Rai Cake

Mai vei Elder Adrián Ochoa

Ena Vitusagavulu

Nikua na gauna me da rai cake kina vua na iVurevure ni dina ka vakadeitaka ni sa kaukauwa tiko noda ivakadinadina

Niu yabaki walu, keitou a talai kei na rua na tavalequ ki na dua na tauni voleka me keitou laki volia mai na kakana ni 15 na siga mai qo. Niu railesu, au kurabuitaka na nodratou veivakabauti na buqu noqu nei kei noqu momo vei keitou. E serau ka karakarawa vinaka tu na lomalagi ena mataka oya ni keitou biubiu yani ena neitou kareti lailai tolu na kena ose.

Ena lomadonu ni bucabuca, a yaco mai e dua na vakasama vakasakiti me keitou sobu ka veimapolo. Keitou mani vakayacora vakakina–me dua na gauna balavu. Keitou a wele sara ena neitou qito keitou sega kina ni raica na “ivakatakilakila ni gauna” e ului keitou sa tekivu me robota mai na lomalagi na o loaloa. Ni keitou qai vakila mai na veika sa yaco tiko, sa sega mada ga na gauna me keitou vodoka kina neitou ose. A robai keitou vakaukauwa na uca bi, ka roba na matai keitou na cagi kaukauwa, keitou sa sega ni vakasamataka rawa e dua na ka me keitou cakava me keitou luvata ga na idabedabe ni ose ka vakaruru ena icoco ni idabedabe.

Keitou mai tomana neitou ilakolako ni sa sega na ose, suasua, kei na batabata, keitou tovolea me keitou toso ena kena totolo duadua keitou rawata. Ni keitou voleka yani ki na vanua keitou gole tiko kina, keitou raica ni sa waluvu tu na sala rabailevu me curu yani ki tauni ka vaka e dua na uciwai sa vakadodonu tu mai vei keitou. Na ka walega me keitou sa na cakava me keitou biuta laivi na neitou ivakaruru ka kabata na bai ni bulumakau e viri wavokita tu na tauni. Sa bogilevu toka keitou qai laki vaqara vakaruru tiko ena imatai ga ni vale keitou donumaka ena oca kei na momosi ka suasua ni keitou curuma yani na tauni. Eratou vakamamacataki keitou, vakani keitou ena bini, ka vakadavori keitou ena dua ga na neitou rumu vakataki keitou. Sega ni dede keitou sa raica ni buturara qele tu na rumu oqo ka tautauvata vinaka, mani votu tale mai e dua na vakasama vakasakiti. Keitou droinitaka e dua na iwirini ena buturara ka tomana neitou veimapolo me yacova ni keitou qai moce ga ena buturara.

Ni keitou gone keitou a nanumi keitou ga. Keitou sega ni bau nanumi ira na neitou daulomani era vakasaqarai keitou tiko mai vale—ke me a vakakina, keitou na sega ni vakaberaberataka na neitou ilakolako ena dua na ka sega na betena. Ia, kevaka me keitou a yalomatua, keitou na raica cake na lomalagi, raica ni sa tekivu me uku na o loaloa, vakatotolotaka na neitou ilakolako me kua ni toboki keitou na cava. Ena gauna oqo ni sa levu cake vakalailai na veika au kila, au dau vakananuma tiko vei au: “Meu kakua ni dau guilecava meu rai cake.”

Na veika au a sotava vata kei rau na tavalequ sa vakavulici au meu dau qarauna na ivakatakilakila ni gauna. Eda bula donumaka na veisiga ca a vakamacalataka o Paula: “Ni ra na daulomani ira walega na tamata, … talaidredre kivei ira nodra qase, era na sega ni vakavinavinaka, era na sega ni yalosavasava, … era na dau veibeitaki vakailasu, era na sega ni daurawa na yalodra, … a ra na lomana vakalevu na marau a ra na lomani koya na Kalou vakalailai” (2 Timoci 3:2–4).

Ni vosa tiko me baleta na gauna oqo, e kaya kina o Elder Dallin H. Oaks: “Eda gadreva me da vakayacora ruarua na vakavakarau vakayago kei na vakavakarau vakayalo. … Ia na vakavakarau beka ena rawarawa na kena vakaweleweletaki sai koya e sega ni laurai levu ka dredre vakalevu cake—na kena e vakayalo” (“Vakavakarau ki na iKarua ni Lesu Mai,” Liaona, Me 2004, 9). Ena dua tale na kena itukutukuni, kakua ni guilecava mo dau rai cake.

Ni gadrevi vakatotolo na vakavakarau vakayalo ena veigauna ca vakaoqo, Au gadreva meu cavuta e dua na ivakasala ni qaqarauni me baleta e dua na ivakatakilakila kaukauwa ni gauna. Na noqu bula vakacakacaka e biuti au ena mata ni tekinolaji, kau kila kina na kena yaga, vakauasivi ena veitaratara. Sa dua na ka na levu ni itukutuku vakatamata sa koto sara ga ena noda iqaqalo. Ia e sinai tu ena Initaneti na veika dukadukali ka veicavilaki. Sa vakavinakataka cake noda galala ni digidigi na tekinolaji, ia sa rawa ni vakacaucautaki kina vakailasu na tamata sega vua na kilaka, baleta walega ni levu era raica tiko na nona buloqu (blog). Oqo na vuna, sa dodonu kina, vakalevu cake mai na veiguna sa oti yani, me da daunanuma na ivakavuvuli tawamudu oqo: “Dou na kilai ira ena vuadra” (Maciu 7:20).

Vakauasivi, au vakasalataki kemuni mo ni kakua ni sarava na iyaloyalo vakasisila se gole nomu vakasama vei ira na daubeitaka vakailasu na Karisito kei na Parofita o Josefa Simici. Na ivalavala ruarua oqori e tautauvata na kena revurevu: na yali ni Yalo Tabu kei na Kena kaukauwa veitaqomaki ka veitokoni. Ena dau muria ga mai na ca kei na rarawa.

Kemuni na taciqu kei na ganequ kevaka o ni donumaka ena dua na gauna e dua na ka ena vakavuna nomu lomatarotaro ena vuku ni nomu ivakadinadina ni koispeli, au vakatakekere mo ni rai cake. Raica na ivurevure ni yalomatua kei na dina kecega. Vakabulabulataka na nomu vakabauta kei na ivakadinadina ena vosa ni Kalou. Era tu eso e vuravura era segata me ra vakasewasewana na nomu vakabauta ena nodra wakia vata na lasu kei na dina vakatikina. Oqo na vuna sa rui bibi kina mo kilikili kaya tikoga na Yalo. Na veitokani ni Yalo Tabu e sega ni dua walega na ka taleitaki—sa yaga vakabibi sara ki na nomu vakabulai tiko vakayalo. Kevaka dou na sega ni kumuna cake na vosa i Karisito ka vakarorogo vakamalua ki na veivakauqeti ni Yalo. O na veretaki (raica na Josefa Simici—Maciu 1:37). Me da cakava na veika oqo.

O Jisu Karisito, o koya sa uasivi sara, kei Josefa Simici, ka tukuna ni sega o koya, erau a vakamatei ruarua mai vei ira na dauveibeitaki vakailasu ka ra a sega ni ciqoma na nodrau ivakadinadina. Eda na kila beka vakacava ni dina na nodrau ivakadinadina—ni o Jisu Karisito na Luve ni Kalou ka parofita dina o Josefa Simici?

“Dou na kilai ira ena vuadra.” E rawa beka ni vuataka mai na vua vinaka e dua na vunikau ca? Au sa kila vakataki au ni sa vosota na noqu ivalavala ca na noqu Dauveisereki ka sereki au mai na noqu ivua, ka biuti au kina ena dua na ituvaki ni marau au sega ni kila ni tu. Kau sa kila vakataki au ni parofita o Josefa Simici baleta niu sa bulataka na veiyalayala rawarawa ena iVola i Momani: “Dou kerea vua na Kalou na Tamada Tawamudu ena yaca i Karisito” (Moronai 10:4). Ena kena itukutukuni rawarawa, rai cake.

Eso beka era na kaya me dua na ivakadinadina e rairai me rawa kina ni qai vakabauti na Tucaketale nei Karisito se na dina ni Nona kosipeli vakalesui mai. Au na cavuta vei ira na vosa nei Alama vei Korio, o koya a tovolea tiko me cavilaki ira eso me ra kakua ni vakabauta: “Sa rauti iko na ivakatakilakila kece sa tu; a cava ko sa via vakatovolea kina na Kalou? A cava ko sa kaya kina meu vakatakila vei iko e dua na ivakatakilakila, ni ko sa kila na nodra ivakavuvuli na nomu qase, kei ira na parofita yalosavasava? Ko sa kila na ivolatabu” (Alama 30:44).

O iko kei au na ivakadinadina bula ni nona kaukauwa ni veisereki na iVakabula. O kedaru na ivakadinadina bula ni nona veiqaravi na Parofita o Josefa Simici kei na nodra yalodina na Yalododonu taumada ka ra dei tu ena nodra ivakadinadina. Na Lotu i Jisu Karisito sa roboti vuravura kece yani ka tubu tiko me vaka e se bera vakadua ni bau yaco—ka ciqomi, me vaka ena gauna i Karisito, mai vei ira na tamata yalomalumalumu ka ra sega ni gadreva me ra raica ka tara me ra qai vakabauta.

E sega ni dua e kila na gauna ena lako tale mai kina na Turaga. Ia sa donumaki keda tu oqo na veigauna ca. Nikua na gauna me da rai cake kina vua na iVurevure ni dina ka vakadeitaka ni sa kaukauwa tiko noda ivakadinadina.

Meu lesuva tale noqu italanoa, keitou yadra cake kei rau na tavalequ ena dua na mataka serau ka ramase ka totoka tu na lomalagi. A tukituki e katuba e dua na turaga ka vakasaqarai iratou tiko mai e tolu na gonetagane lakosese. A vakavodoki keitou ena ose, ka lesu yani ki vale ena bucabuca vata ga. Au na sega ni guilecava rawa na veika keitou a raica ena ilesulesu ki vale—e dua na ilala tamata era a vakasaqarai keitou tiko ena bogi taucoko, e tao tu ena soso na nodra katavila kei na lori. Era kunea eke e dua na idabedabe ni ose ka dua na ose mai kea, ni ra raici keitou ni keitou sa lesu tiko yani ki vale, au rawa ni vakila na nodra vakacegu kei na loloma. Ena icurucuru yani ki tauni, era cici mai na tavale me ra mai kidavaki keitou, eratou liu duadua tu mai na buqu na momo kei na nei dauloloma. Eratou mokoti keitou ka tagi, ena reki ni ratou sa kune na luvedratou lakosese. Sa dua na ivakananumi levu vei au oqo ni kauwaitaki keda tiko na Tamada Vakalomalagi dauloloma. Sa waraki keda tiko ena yalonanamaki o Koya me da lesu yani ki vale.

Era wavoliti keda na ivakatakilakila ni cava. Me da rai cake ka vakarautaki keda. Eda na taqomaki ena dua na ivakadinadina qaqaco vinaka. Me da vakamareqeta ka vaqaqacotaka e veisiga na noda ivakadinadina.

Au kila ni rawa ni da bula vata vakamatavuvale me tawamudu, ni waraki keda tiko, na Luvena, na Tamada Vakalomalagi dauloloma, ka dodoka tu mai na Ligana. Au kila ni bula tiko o Jisu Karisito, na noda Dauveivueti. Me vakataki Pita, e sega ni vakatakila vei au na lewe kei na sui, ia na Tamaqu ga sa tiko mai lomalagi (raica na Maciu 16:15–19). Ena yaca i Jisu Karisito, emeni.