Eda Sega ni Lako Duadua Voli

Mai vei Peresitedi Thomas S. Monson

Ni na dua na siga o na tu vakatikitiki ka raica na nomu veigauna dredre, ka kila ni a dau tu ga e yasamu o Koya.

Kemuni na ganequ lomani na yalo eda vakila ena yakavi nikua sa ivakatakilakila ni nomuni igu, nomuni yalodina kei na nomuni vinaka. Meu cavuvosa mai vua na iVakavuvuli: “Oi kemudou na masima kei vuravura. …Oi kemudou na rarama kei vuravura.”¹

Niu vakasamataka na madigi e noqu meu vosa vei kemuni, e vakananumi tale vei au na loloma e dau tu vua na watiqu lomani, o Frances, me baleta na iSoqosoqo ni Veivukei. Ena nona gauna ni bula a veiqaravi o koya ena vuqa sara na itutu ena iSoqosoqo ni Veivukei. Ni keirau se qai yabaki 31, au a kacivi meu peresitedi ni Tabana ni Kaulotu na Canadian. Ena tolu na yabaki ni ilesilesi oya, a vakatulewa kina o Frances ena iSoqosoqo ni Veivukei taucoko ena vanua levu oya, ka kovuta na vanua o Ontario kei Quebec. Eso na nona itokani voleka sara era a basika ena vuku ni ilesilesi oya, vakakina mai na vuqa na veikacivi a qai vakatawana e muri ena iSoqosoqo ni Veivukei ni neitou tabanalevu. O koya e dua na luvena yalewa yalodina na Tamada Vakalomalagi, na noqu itokani lomani, ka noqu itau taleitaki duadua. E sega ni vakamacalataki rawa na levu ni noqu nanumi koya.

O au talega au taleitaka na iSoqosoqo ni Veivukei. Au vakadinadinataka vei kemuni ni a tauyavutaki ena veivakauqeti ka sa tiki bibi sara ni nona Lotu na Turaga ena vuravura oqo. Ena dredre sara me da soqona na veika vinaka sa yaco mai ki na isoqosoqo oqo kei na bula taucoko sa vakalougatataki mai kina.

Na iSoqosoqo ni Veivukei era lewena na marama duidui eso. Era tu o ira vei kemuni era sega ni vakawati—o ni se vuli tiko beka, se sa cakacaka—tauyavutaka tiko e dua na bula vinaka ka taucoko. Eso vei kemuni o ni tinadra bula osooso na gonelalai era se qai tubu tiko. Ia eso tale vei kemuni era sa yali na watimuni ena vuku ni veisere se na mate ka sasaga dredre tiko mo ni susugi ira na luvemuni ni sega nodra veivuke na watimuni tagane se tama. Eso vei kemuni o ni sa susugi ira cake na luvemuni ia o ni sa raica rawa ni na sega ni oti rawa na nodra gadreva na nomuni veivuke. E vuqa sara vei kemuni era sa qase sara na nomuni itubutubu ka ra gadreva tu na veivuke ni loloma o ni rawa ni solia duadua ga o kemuni.

Se evei ga na yasa ni bula eda tu kina, e tu na gauna eda dau sotava kece kina na dredre kei na bolebole. E dina ni na duidui beka vei keda yadua, ia eda dau sotava kece.

Era tu e vuqa na bolebole eda dau sotava baleta ni da bula tiko ena vuravura ni bula vakayago oqo, ka ra lewena tu na veimataqali tamata kecega. Ena so na gauna eda dau taroga ena lomaleqa, “Meu vakadeitaka tiko vakacava na noqu rai ena selesitieli niu sokota voli na vuravura telesitieli oqo?”

Ena yaco ena so na gauna ni o na lakova voli e dua na sala ka tu kina na wa vakavotona ka vakatakilakilataki ena veika dredre. Ena so beka na gauna o vakila ni cavuka na kemu isema—se o tu duadua voli—mai vua e Dausolia na isolisoli vinaka kecega. E vakaisosomitaki na rere ena vakabauta.

Ni o ni tu ena dua na ituvaki vakaoqo, au kerei kemuni mo ni nanuma na masu. Au taleitaka na vosa nei Peresitedi Ezra Taft Benson me baleta na masu. E kaya kina o koya:

“Ena noqu bula taucoko au sa dau vakabibitaka duadua tu mai vei ira kece na ivakasala au sa ciqoma na ivakasala me baleta na vakararavi ena masu. Sa yaco me tiki bibi sara ni noqu bula—e dua na iyaqa, e dua na ivurevure tudei ni igu, ka yavu ni noqu kila na veika vakalou. …

“…E dina ni dau yaco na kalouca, ena masu e rawa ni da kunea kina na veivakadeitaki, ni na tukuna na vakacegu ki yaloda na Kalou. Na vakacegu oqori, na yalo oqori ni vakacegu, na veivakalougatataki cecere duadua ni bula.”²

E veivakasalataki kina na iApositolo o Paula:

“Me vakatakilai vua na Kalou na nomudou kerekere ena masu.

“Ia na vakacegu ni Kalou, sa uasivia na ka kecega e kilai rawa, ena vakataudeitaka na yalomudou kei na lomamudou ena vukui Jisu Karisito.”³

Sa dua na yalayala lagilagi! Na vakacegu sai koya na ka eda vakasaqara, na ka eda gadreva.

Eda a sega ni biu mai na vuravura oqo me da mai lako duadua voli. Sa dua na ivurevure talei ni kaukauwa, ni igu, kei na vakacegu sa tu me baleti keda yadua. O Koya e kilai keda vakavinaka cake mai vei keda, o Koya e raica tiko na iyaloyalo levu ka kila na kena itinitini mai na itekitekivu, sa vakadeitaka vei keda ni na tu me baleti keda me vakarau ni veivuke kevaka walega eda kerea. Sa tu vei keda na yalayala: “Masu tikoga ena vakabauta… ena rawa vakavinaka na veika kece e baleti kemudou.”⁴

Ni sa cabe cake ki lomalagi na noda masu, me da kakua ni guilecava na vosa e vakavuvulitaka vei keda na iVakabula. Ni sotava na rarawa na yaluma levu mai Kecisemani kei na kauveilatai, a masu vei Tamada o Koya, “Me kakua ni yaco na noqu lewa, me yaco ga na nomuni lewa.”⁵ E dina ni na dau dredre ena so na gauna, ia sa baleti keda talega, me da dau vakabauta na Tamada Vakalomalagi ni kila vakavinaka cake na ivakarau kei na gauna kei na iwalewale cava me vakarautaka kina na veivuke eda vakasaqara.

Au taleitaka na nona vosa na dauserekali:

Au sega ni kila na iwalewale cava e tu,
Ia oqo au kila, ni Kalou e dau sauma na masu.
Au kila ni sa Yalataka tu
Ka tukuna vei au ni dau rogoci tu ga na masu,
Ka na saumi, totolo se bera.
Au masu kina ka wawa tu.
Kalougata au qara, au sega ni kila
Yaco beka mai ena sala saraga au diva,
Ia noqu masu me Nona ga,
O koya sa lewa vuku cake ka qaqa,
Dei ni na solia na noqu gagadre,
Se sauma vinaka cake sara tale.6

Sa dina sara, na masu e sega ni baleta walega na gauna ni leqa. Sa tukuni wasoma vei keda mai na ivolanikalou me da “dau masu tikoga”⁷ ka dau tikoga e yaloda e dua na masu.⁸ Na qaqa ni dua na sere kilai levu e biuta mai e dua na taro ena vinaka vei keda kevaka eda dau tarogi keda kina e veisiga: “Ko a masu li?”⁹

E duavata kei na masu ena noda vukei me da toso tikoga ena vuravura dau dredre wasoma kina oqo na vulica na ivolanikalou. Na vosa ni dina kei na veivakauqeti ka kunei ena noda ivolayavu e va era noqu iyau vakamareqeti. Au sega ni dau oca ena wiliki ira. Au dau laveti cake vakayalo ena veigauna au vakasaqaqara kina ena ivolanikalou. Na veivosa tabu oqo ni dina kei na loloma e dau tubera noqu bula ka dusia na sala ki na vinaka sara e tawamudu.

Ni da wilika ka vakananuma vakatitobu na ivolanikalou, eda na vakila na vakasolokakana kamica ni Yalotabu ki na lomada. E rawa ni da kunea na isau ni noda taro. Eda vulica na veivakalougatataki e dau yaco mai na noda rokova tiko na ivakaro ni Kalou. Eda na rawata e dua na ivakadinadina tudei me baleta na Tamada Vakalomalagi kei na noda iVakabula, o Jisu Karisito kei na Nodrau loloma ena vukuda. Ni vakaduavatataki na vuli ivolanikalou kei na noda masu, eda rawa ni kila vakaidina ni dina na kosipeli i Jisu Karisito.

E kaya o Peresitedi Gordon B. Hinckley, “Me vakalougatataki keda yadua na Turaga me da kanamagiti mai na nona [vosa] tabu ka rawata mai [kina] na igu, na vakacegu [kei na] kilaka ‘sa uasivia na ka kecega e kilai rawa (Filipa. 4:7).”¹⁰

Ni da nanuma na masu ka taura na gauna me da wilika na ivolanikalou, ena tawayalani na veivakalougatataki e yaco ki na noda bula ka vakamamadataki na noda icolacola.

Meu wasea mada vei kemuni na italanoa ni ivakarau e sauma kina na Tamada Vakalomalagi na nona masu kei na vakatakekere e dua na marama ka solia vua na vakacegu kei na veivakadeitaki a vakasaqara tiko vagumatua?

A tekivu na bula dredre nei Tiffany ena yabaki sa oti ni vakavulagi tiko mai nona vale me baleta na Thanksgiving oti oya qai vakadua tale ena Siganisucu. E tiko voli kina na watina ena koronivuli ni vuli vuniwai ka sa ikarua tiko ni nona yabaki oqo ena nona vakatovotovo. Ena vuku ni gauna babalavu ni cakacaka e gadrevi vua, sa sega kina ni rawa ni veivuke vei watina me vaka na kena ivakarau erau a vinakata ruarua, o koya gona sa mani koto kina e ligai Tiffany e vuqa sara na ka e gadrevi ena gauna ni vakacagicagi, me ikuri ni nodra qarauni tiko na luvedrau lalai e va. Sa dau yaloluvuci sara tiko mai kina, a qai kila ni sa laurai na kenisa vua e dua e dau lomana sara. Sa mani tekivu me tarai koya sara vakalevu na oca kei na lomaleqa, sa yaco mai na yalolailai kei na lomaocaoca. A vakasaqara na veivuke vakavuniwai, ia e sega ni dua na veisau e yaco. Sa sega ni taleitaka na lomana na kana, ka tekivu me lutu na yagona, ka sa sega saraga ni vinaka ki na yagona sa lailai rawa tu. A vakasaqara na vakacegu ena ivolanikalou ka masuta me sereki mai na ivau ni yaluma sa vesuki tu kina. Ni vaka me sega ni basika rawa mai na vakacegu kei na veivuke, sa tekivu me nanuma ni sa laivi koya na Kalou. Era masulaki koya na nona matavuvale kei ira na itokani ka tovolea me ra vukei koya. Era kauta yani na kakana e dau taleitaka ena nodra tovolea me bulabula toka mada ga na yagona, ia e dau kana ga vakalailai ka sega ni rawa ni vakaotia.

Ena dua na siga dredre, a tovolea ka sega ni mani rawata e dua nona itokani me vakayarayarataki koya ena kakana e dau taleitaka. Ni vaka me sa drava kece na ka, a mani kaya na itokani, “E dodonu me tiko e dua na ka e rogo vinaka vei iko.”

A vakasama vakalailai o Tiffany qai kaya, “Na ka ga au rawa ni vakasamataka ka rogorogo vinaka na madrai vavi e vale.”

Ia e sega tu.

Ena yakavi ni siga ka tarava a taqiri na lali ni katuba nei Tiffany. A dolava na watina na katuba me vaka ni a tiko e vale. Ni lesu mai, a kauta voli mai e dua na ibuli madrai vavi e vale. E kurabui o Tiffany ni tukuna vua na watina ni kauta mai e dua na marama na yacana o Sherrie ka rau sega ni kila vinaka sara. O koya na itokani nei Nicole na taci Tiffany, e vakaitikotiko mai Denver e Colorado. A vakaveikilaitaki vei Tiffany kei na watina o Sherrie ena vica na vula yani ki liu ni ratou a mai tiko o Nicole kei na nona matavuvale ena Thanksgiving. A lako mai o Sherrie, ka vakaitikotiko mai Omaha, ka lako mai ki na vale nei Tiffany me mai raici Nicole.

Oqo ni sa oti e vica vata na vula, ni toka e ligana na madrai totoka, a qiriti Nicole na tacina o Tiffany me vakavinavinakataka nona talai Sherrie mai ena ilakolako ni loloma. Ia e qai kila ni a sega ni vakavuna o Nicole na veisiko mai oya ka sega sara ga ni bau kila kina e dua na ka.

Sa qai kilai na vo ni italanoa ena nona tarogi Sherrie o Nicole se cava a vakavuna me kauta na ibuli madrai oya. A vakauqeti koya, Tiffany, kei Sherrie na veika e rogoca mai kina—ka vakauqeti au talega.

Ena mataka oya ni kau madrai, a vakauqeti o Sherrie me bulia e rua na ibuli ka sega ni dua ga me vaka nona inaki taumada. E kaya ni a vakauqeti me kauta tiko ena nona motoka na ikarua ni ibuli, e dina ga ni sega ni kila na vuna. Ni oti na vakasigalevu ena nona vale e dua nona itokani sa tekivu me tagitagi na luvena yalewa yabaki dua ka vinakata me kau ki vale me laki moce. A tu vakadua o Sherrie ni yaco mai na yalo sega ni rawa ni vakacalai oya ni gadreva me kauta na ikarua ni ibuli madrai vei taci Nicole o Tiffany, ka vakaitikotiko rauta ni 30 na miniti ki na yasa ni tauni kadua ka sega mada ga ni rau veikilai vinaka sara. A tovolea me kauta tani yani na vakasama oya, ena nona vinakata me kauta na luvena yalewa sa wawale tu vakalevu me laki moce kei na nona madualaka me kauta tu e dua na ibuli madrai vua e dua ka rau sega madaga ni veikilai vinaka sara. Ia, a kaukauwa cake na veivakauqeti me lako vei Tiffany, a mani muria na veivakauqeti.

Ni yaco yani, a dolava na katuba na wati Tiffany. A vakananuma vua o Sherrie ni o koya na itokani nei Nicole ka rau sa sota oti vakalailai ena gauna ni Thanksgiving, solia vua na ibuli madrai ka gole tale.

O koya a yaco kina ni a tala na Turaga e dua e voleka saraga ni sega ni kilai ki na yasa ni tauni kadua, sega walega ni lai solia e dua na ibuli madrai ia e dua na itukutuku matata ni loloma vei Tiffany. Na veika a yaco vua ena sega ni vakamacalataki rawa ena dua tale na sala. A gadreva vakalevu sara me kila ni sega ni tiko duadua voli—ni kilai koya tiko na Kalou ka sega ni laivi koya. Na madrai oya—na ka saraga e vinakata tiko—a kauta yani vua e dua e voleka sara me rau sega ni veikilai, e dua ka sega tu mada ga ni kila na nona gagadre ia a rogoca na veivakauqeti ni Yalotabu ka vakamuria. Sa yaco me ivakatakilakila matata vei Tiffany ni kila vinaka tiko na Tamana Vakalomalagi na nona gagadre ka lomani koya me tala mai kina na veivuke. A rogoca ka sauma na nona masu ni kere veivuke.

Kemuni na ganequ lomani, e lomani kemuni na Tamamuni Vakalomalagi—o kemuni yadudua sara. Na loloma oqori e sega ni veiveisau. E sega ni vakavuna na kemu irairai, na veika o taukena, se na levu ni ilavo e tiko ena nomu akaude ni baqe. E sega ni na veisautaki ena nomu taledi kei na nomu rawa ka. Ena dau tu ga. E tu vei kemuni ena gauna ni rarawa se marau, yalolailai se nuidei. Na loloma ni Kalou e tu me nomu kevaka madaga o nanuma se sega, ni dodonu me nomu. Ena duadua tu ga.

Ni da vakasaqara na Tamada Vakalomalagi ena masu vagumatua, vuli ivolanikalou ena yalodina, ena yaco na noda ivakadinadina me qaqaco vinaka ka titobu na wakana. Eda na kila na nona lomani keda na Kalou. Eda na kila ni da na sega sara ni lako taudua. Au yalataka vei iko ni na dua na siga o na tu vakatikitiki ka raica na nomu veigauna dredre, ka kila ni a dau tu ga e yasamu o Koya. Au kila ni dina oqo ena nona sa mai takali yani na noqu itokani tawamudu—o Frances Beverly Johnson Monson.

Au laiva vei kemuni na noqu veivakalougatataki. Au laiva vei kemuni na noqu veivakalougatataki. Au laiva vei kemuni na noqu vakavinavinaka ena veika vinaka o ni dau cakava kei na bula o ni bulataka. Mo ni vakalougatataki ena veisolisoli vinaka kecega sa noqu masu ena yaca ni noda iVakabula ka Dauveisereki, io ko Jisu Karisito na Turaga, emeni.