Au na vakayagataka vakacava na ivolanikalou me’u vukei ira kina eso tale mera yaco me va-Karisito vakalevu cake?

Sa ivakaraitaki uasivi o Jisu Karisito ena veivakatavulici. E vakayagataka o Koya na ivolanikalou me vakatavulica na Nona kosipeli. Era sa vakaroti keda na parofita eso edaidai ni sa sega na ka e uasivita na ivolanikalou kei na vosa ni parofita bula ni da vakatavulica na kosipeli vei ira tale eso. Ni da vakatavuvuli mai na ivolanikalou sa dodonu meda na vulica taumada vakataki keda. Sa na qai rawa meda wasea na italanoa vakaivolanikalou kei na ivakaraitaki ka vukei ira eda vakatavulica mera vakatauvatana na ivolanikalou kivei ira.

Mo vakarautaki iko vakayalo

Na ivolanikalou cava o se qai vakayagataka walega mo vakatavulica kina e dua na ivakavuvuli ni kosipeli? E sa vukei iko vakacava na vulici ni ivolanikalou me yaco mo dua na qasenivuli vinaka cake? O dau vakayagataka vakacava na ivolanikalou ni o veivakatavulici?

Na italanoa ni ivolanikalou se veitikina cava e rawa ni vakaibalebale ka yaga cake kivei ira na itabagone? Cava na vuna e bibi kina vei ira na itabagone mera vakayagataka na ivolanikalou ni ra veivakatavulici?

Vulica ena masumasu na ivolanikalou kei na ivurevure oqo. Na cava ena vakauqeti ira na itabagone ni vinakata mera vakayagataka na ivolanikalou ni ra veivakatavulici?

Maciu 12:1–8; 13:38–41 (iVakaraitaki ni iVakabula ni vakatauvatana tiko na ivolanikalou)

Luke 4:17–27 (E vakayagataka o Jisu na ivolanikalou me vakatavulici ira na tamata e Nasereci)

3 Nifai 23:1–6 (E vakayagataka o Jisu na ivolanikalou me vakatavulici ira na Nifai)

Vidio: “Elder and Sister Bednar—Pride”

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Kerea na itabagone mera wasea vata kei na kalasi e dua na ivolanikalou taleitaki. Cava na vuna e vakaibalebale kina vei ira na ivolanikalou oqo?
Sureta na itabagone mera wilika ena ivolanikalou na ivakaraitaki eso ni iVakabula ena vakayagataki ni ivolanikalou me vakatavulici kina eso tale, me vaka eso ka vakatututaki tiko ena ituvatuva oqo se so tale o na rairai kila. Veivosakitaka vata kei ira na itabagone na taro eso vakaoqo: Cava na vuna e vakayagataka kina na iVakabula na ivolanikalou me veivakatavulici? E vakayarayarataki ira vakacava a vakatavulica o Koya na vakayagataki ni ivolanikalou? Na madigi cava soti mera na vakatavulica na itabagone? Me ra na vakayagataka vakacava na itabagone na ivolanikalou ena nodra veivakatavulici?

Vulica vata

Na itaviqaravi yadua oqo ena vukea na itabagone mera kila deivaki na iwalewale ni nodra rawa ni vakayagataka na ivolanikalou me vukei ira tale kina eso ni yaco mera va-Karisito vakalevu cake. Ena kena vakamuri na veivakauqeti ni Yalotabu, digitaka e dua se sivia ka na mana vinaka ki na nomu kalasi:

Vakaraitaka na iwalewale ni nomu vakayagataki vuli ni veivuke ena ivolanikalou (vaka na ivakamacala e ra, ulutaga ni wase, iDusidusi ni Ulutaga, se iVolavosa ni iVolatabu) vaka e dua na qasenivuli. Sureta na itabagone mera vakayagataka na itoko ni vuli ena ivolanikalou me vakarautaki kina e dua na lesoni ni lotu vakamatavuvale ena dua na ivakarau va-Karisito era sa vulica tiko ena nodra kalasi kadua. Ke rawa, sureta e vica vei ira me wasea na ka era sa vakarautaka vata kei na kalasi.
Kerei ira na itabagone mera raitayalotaka ni ra sa kerei mera vakavulici ira na gone lalai me baleta e dua na itovo va-Karisito mai na kena vakayagataki e dua na italanoa vakaivolanikalou, me vakataka na kai Samaria dauloloma (Luke 10:25–37) se na vosa vakatautauvata ni sipi sa yali (Luke 15:1–7). Sa rawa talega mera sarava na itabagone na ““Elder and Sister Bednar—Pride” ka vakayagataka na veika a bulasotava o Mosese (Mosese 1:1–11) kei Nifai (2 Nifai 4:12–35) me vakavulici kina na itovo va-Karisito o ya na yalomalumalumu. Sureti ira na itabagone mera vakayagataka na idusidusi ena draunipepa 203–04 ni Vunautaka na Noqu Kosipeli mera tuva kina na sala mera vakavulici ira kina na gone ni ra vakayagataka na italanoa vakaivolanikalou se nodra bulasotava era sa digitaka. Ke rawa, solia na gauna vei ira mera vakatovotovo veivakavulici ka vakarautaka na gauna donu mera na vakavulica vei ira na gone na nodra italanoa.
Vakaraitaka na iwalewale ni kena vakarautaki na lewena ni vakatavulici tiko na ivolanikalou ena wasei ni italanoa kei Kavetani Moronai kei na yavu ni bula galala. Me kena ivakaraitaki, nomu rawa ni vakalekalekataka na ituvaki ni itukutuku ena Alama 46:1–11 ni bera ni wiliki na tikina e 12–13. Taroga na itabagone se a vukei ira vakacava na kilai deivaki ni italanoa vakaivolanikalou mai na nodra kila taumada na ituvaki ni itukutuku. Sureta na itabagone mera digitaka e dua na ivolanikalou ka vakatovotovotaka na kena vakatavulici vei ira tale eso ni vakarautaki na lewena kei na itukutuku me baleta na bula ni tamata.
Vakaraitaka na iwalewale ni nodra sureti tale eso mera vakaraica vakatabakidua e dua na ka ena ivolanikalou. Sureta na itabagone mera vakasaqara e dua na ivolanikalou me baleta e dua na ivakarau va-Karisito ka vakatakila e dua na ka e rawa ni ra kerea mera vakaraica na dauvuli ni wiliki tiko na ivolanikalou. Vakatarai ira mera vakatavulica na nodra ivolanikalou ki na kalasi ni vakayagataki na rai ni “vakasaqara”.

Kerei ira na itabagone me ra wasea na veika era sa vulica nikua. Era sa kila deivaki li na iwalewale ni kena vakayagataki na ivolanikalou ena nodra sasaga ni vukea eso tale mera lako mai kivei Karisito? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Maqosa eso ni vuli ena kosipeli

Vakayagataki ni ivakamacala e ra. Ena imatai ni itaviqaravi ni wasewase oqo, sa ra vakayaloqaqataki na itabagone mera vakayagataka na itoko ni vuli ivolanikalou, oka kina na ivakamacala e ra. Sureti ira mera wilika e dua na wase me baleta e dua na ivakarau va-Karisito ka vulica na ivakamacala e ra yadua ni wase oya, ni saumi na taro oqo: Na ivakamacala e ra oqo e vakuria vakacava na noqu kila deivaki na wase? Vakayaloqaqataka na itabagone mera taleva wasoma na ivakamacala e ra ni ra vulica vakataki ira na ivolanikalou.

Veisureti me caka

Taroga na itabagone ena iwalewale e rawa ni ra vakayagataka kina na veika era sa vulica ena kalasi me vakavinakataka na nodra vulica ka vakatavulica na kosipeli. Sureti ira mera wasea ena veikalasi ka tarava na veika era sotakaya ena vakayagataki ni ivolanikalou me vakatavulici kina eso tale.