Au na vakalougatataki vakacava kei na noqu matavuvale niu vola tiko na noqu ivolaniveisiga?

Sa vakamatatataka na Turaga kei ira na Nona parofita na bibi ni kena volai na ivolaniveisiga. Na volai ni noda ivolaniveisiga sa madigi tiko meda raica tiko na noda bula ka kila rawa na veivakalougatataki e vuqa sa solia vei keda na Kalou. Sa rawa ki na noda ivolaniveisiga me dua na ivurevure ni veivakauqeti ka veivakaukauwataki kivei ira na itabatamata ni mataka ni noda matavuvale.

Mo vakarautaki iko vakayalo

Na veika cava o sa sotava sa vakavulica vei iko na kena bibi me volai tiko na ivolaniveisiga? E dua beka na itukutuku ena nomu ivolaniveisiga se nona e dua na qase e liu ena rawa ni veivakauqeti vei ira na itabagone?

Era na vakalougatataki vakacava na itabagone ena nodra vola tiko e dua na ivolaniveisiga? Na cava beka na vuna era sega kina ni vola na nodra ivolaniveisiga? Mo na vukei ira vakacava mera raica na inaki vakayalo ni kena volai na ivolatukutuku?

Vulica ena masumasu na ivolanikalou kei na ivurevure oqo. Na cava ena vakauqeti ira na itabagone mera veivakavulici?

1 Nifai 1:1–3; Alama 37:8–9; Mosese 6:5, 45–46 (Na ivakaraitaki ni volai ni itukutuku ena ivolanikalou)

1 Nifai 6:3–6 (Na cava mena okati tiko ena itukutuku ni tamata yadudua)

3 Nifai 23:6–13 (A cudruvi ira na Nifai na iVakabula ena kena sega tu ni vakaoti na nodra ivolatukutuku)

Henry B. Eyring, “Mo Ni Nanuma Deivaki Tiko,” Ensign se Liaona, Nove. 2007, 66–69; raica talega na vidio “O Remember, Remember”

Veivakavulici ena ivakarau ni iVakabula

Na iVakabula a tarogi ira a vakavulica ka vakavuna mera vakasama ka vakanananu kina vakatitobu. Ena vuku ni Nona loloma, era lomavakacegu kina mera wasea na nodra vakasama kei na nodra dui vakanananu ni lomadra. O na tauyavutaka vakacava e dua na veimaliwai ena nomu kalasi mera yalo vakacegu kina na itabagone ni ra sauma na taro?

Semata vata

Raica eso tale na vakasama ni vuli kei na veivakavulici.

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava vata kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama e koto e ra ena rawa ni vukei iko:

• Sureti ira na itabagone mera wasea na gauna era a vakadinadinataka kina na dina ni kosipeli ena dua na gauna lekaleka sa oti.

• Ke rawa, wasea e dua na itukutuku mai na nomu ivolaniveisiga se nona e dua na qase e liu (se sureta e dua na lewenikalasi se lewe ni tabanalevu me cakava oqo). Na cava e bibi kina me volai na veika e sotavi oqo? Era sa vakalougatataki vakacava baleta ni dua a vola tiko na nona ivolaniveisiga?

Vulica vata

Raica eso tale na vakasama ni vuli kei na veivakavulici.

Na itaviqaravi yadua e ra ena vukei ira na itabagone mera kila vakavinaka na bibi ni volai tiko na ivolaniveisiga. Mai na veivakauqeti ni Yalotabu, digitaka e dua se sivia ka na ganita vinaka na nomu kalasi:

• Sureti ira na itabagone mera wilika na imatai ni walu na parakaravu ni vosa nei Peresitedi Henry B. Eyring “ Mo ni Nanuma Deivaki Tiko” (se vakaraitaka navidio yavutaki tiko ena vosa) ka kerei mera raica na veivakalougatataki e yaco mai baleta ni a vola vakaoqo o Peresitedi Eyring na veika a sotava ena veisiga. Na cava tale era vulica baleta na volai ni ivolaniveisiga mai na itukutuku nei Peresitedi Eyring? Mo ni wilika vata na iotioti ni parakaravu ni nona vosa, ka wasea na ka o se qai sotava oti ga ko a raica kina na liga ni Kalou se vaka me tukuna tiko vei iko o Koya e dua na ka. Sureti ira na itabagone mera vakasamataka vakatitobu na nodra dui isau ni taro e tukuna tiko o Peresitedi Eyring ka vola na nodra nanuma.

• Kerei ira yadua na itabagone me wilika e dua vei ira na ivolanikalou oqo: 1 Nifai 1:1–3; Alama 37:8–9; Mosese 6:5, 45–46. Kerei ira na itabagone mera vakasamataka mada ka wasea eso na veivakalougatataki e yaco mai baleta ni ra vola na nodra itukutuku o ira na tamata ena ivolanikalou. Na cava na vuna e sega ni tiko kina na nodra ivolaniveisiga na tamata eso? Na cava era sa vulica na itabagone mai na veitikina oqo e vukei ira mera raica na kena bibi me volai na ivolaniveisiga? Vakauqeti ira mera wilika na ivolaniveisiga ni dua na qase e liu (ke rawa) se vakataroga e dua na itubutubu se tubudra-budra na gone ka vola na nodra ivakadinadina, nodra a saumaki mai vakacava, veika bibi era sotava, kei na veika guiguilecavi dredre.

• Kerei ira na itabagone mera vola na veika eso era na vola ena nodra ivolaniveisiga. Na kalasi, me wilika na 1 Nifai 6:3–6. Kerei ira na itabagone mera raica na veika a gadreva o Nifai me okata ena nona ivolatukutuku, ka vola talega oqo. Sureti ira na itabagone mera vakasamataka vakatitobu na veika era nanuma mera vola ena nodra ivolaniveisiga, ka solia na gauna mera vola e vica na parakaravu ni itukutuku ena ivolaniveisiga.

• Sureti ira na itabagone mera wilika na 3 Nifai 23:6–13. Ena rawa ni bulataki vakacava na ivolanikalou oqo ki na noda sasagataka meda vola na noda ivolaniveisiga? Kerei ira na itabagone mera vakasamataka e dua na ka vakayalo se vakayago era sotava e vakaibalebale cake era nanuma mera na vola. Era na vakalougatataki vakacava o ira se so tale ni ra wilika na veika e sotavi? Solia e dua na gauna ena kalasi mera vola na veika era sotava oqo.

Kerei ira na itabagone me ra wasea na veika era sa vulica nikua. Era sa kila vakavinaka beka na veivakalougatataki ni volai na ivolaniveisiga? Na cava era sa bau vakila se vakanananu kina? E tiko beka eso tale na nodra vakatataro? Ena yaga dina beka me tauri vakalevu na gauna ena ulutaga oqo?

Maqosa eso ni vuli ena kosipeli

Vakasamataka vakatitobu. Ena lesoni oqo, era sa vakayaloqaqataki na itabagone mera vakasamataka vakatitobu na veika era sa sotava tiko ka vola ena nodra ivolaniveisiga. Na vakasamataka vakatitobu sai koya na kena raici ka nanumi vakatitobu e dua na ka. Sureti ira na itabagone mera taroga oqo vei ira “Na cava e vinakata na Kalou meu vulica mai na veika au sa sotava tiko?” Na vakasama vakatitobu ena sureta na ivakatakila. Vakauqeti ira na itabagone mera vakamatautaka na vakasama vakatitobu ena nodra vulica na kosipeli.

Vidio: “Searching for Words in the Scriptures”

Sarava eso tale

Veisureti me caka

Raica eso tale na veivakasama ni vuli kei na veivakavulici.

Tarogi ira na itabagone, se cava era sa vakauqeti kina me ra cakava baleta na veika era sa vulica nikua. Vakauqeti ira mera cakava na ka era sa vakila. Vakasamataka na sala e rawa mo vakamuria.