E rawa vakacava meu na duri vaka e dua na ivakadinadina ni Kalou?

Ni da sa papitaiso, eda sa veiyalayalatitaka meda “vakadinadinataka na Kalou e na veigauna kecega, ena veika kecega kei na veivanua kecega dou sa tiko kina” (Mosaia 18:9). Ni sa kui tani tiko mai na ivakaro ni Kalou na ivakatagedegede ni vuravura, sa dau namaki vakavuqa vei keda me da taqomaka na noda vakabauta. Ni da vakayacora vakakina, sa dodonu me da muria na nona ivakaraitaki na iVakabula, ni dau yaloqaqa ka yalololoma ena Nona tutaka na dina. Kevaka eda sa tara cake ena “uluvatu ni noda iVakabula,” na “cagi kaukauwa” ni iotioti ni gauna “ena sega ni rawai [keda] se dreti [keda] sobu … ni sa dei sara na uluvatu [eda] sa tara kina” (Ilamani 5:12).

Mo vakarautaki iko vakayalo

Na gauna cava beka sa bau gadrevi kina vei iko mo taqomaka na nomu vakabauta? Na cava beka a vukei iko ena nomu vakarautaka na mataqali gauna vakaoqo? Na cava soti ko sa sotava ka na rawa ni ko wasea vei ira na itabagone?

Na gauna cava beka o sa raici ira kina na itabagone ni ra duri vaka-ivakadinadina ni Kalou? Na cava beka era dau sotava ka dau bololaki kina na nodra vakabauta? E rawa vakacava me ra dau veivaqaqacotaki ka veitokoni?

Wilika ena yalomasumasu na veivolanikalou kei na ivurevure oqo. Na cava ena vakauqeti ira na itabagone me ra duri kina vakayaloqaqa ka vakadinadinataka na Kalou?

1 Nifai 8:24–34 (Na raivotu nei Liai ni vunikau ni bula kei na vale vakaitamera)

Roma 1:16–17 (Kakua ni madualaka na kosipeli)

1 Timoci 4:12 (Mo dua na ivakaraitaki ni vakabauta)

1 Pita 3:15 (Mo dau tu vakarau ka dau sauma na nodra vakatataro na tamata baleta na noda vakabauta)

V&V 100:5–8 (Yalayala vei ira era kacivaka na vosa ni Kalou)

1 Nifai 17:48–55; Mosaia 13:1–9; 17:1–4; Moronai 1:1–3 (iVakaraitaki ni tamata era dinata tiko ga na kosipeli e dina ni tu na veivakacacani)

Thomas S. Monson, “Mo Kaukauwa ka Qaqa,” Ensign se Liaona, Me 2014

Jeffrey R. Holland, “Na iSau—kei na Veivakalougatataki—ni Bula Vakatisaipeli,” Ensign se Liaona, Me 2014

Neil L. Andersen, “Covulaca Vakayalo,” Ensign se Liaona, Me 2014

Vidio: “No Cussing Club” “Defenders of the Faith”

Semata vata

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava vata kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Kerei ira na itabagone mera wasea e dua na ka era se qai vulica oti ga se veivakavulici kina ena taudaku ni kalasi. A vukei ira vakacava na ivakavuvuli era a vulica ena macawa sa oti?
Kauta mai ki na kalasi e rua na makeneta, ka vakaraitaka na ivakarau erau veidreti kina. Qai vukica e dua vei rau na makeneta, ka vakaraitaka na ivakarau erau veibili kina. Taroga vei ira na itabagone na ivakarau e rawa ni vakayagataki kina na makeneta e rua oqo me vakamacalataki kina na malanivosa oqo nei Peresitedi Thomas S. Monson: “Ena veivanua era dau voleka ni tautauvata kina na ivakatagedegede vakatamata kei na Lotu, sa koto kina ena gauna oqo e dua na maliwa rabailevu, ka sa rabailevu cake tikoga” (“Kaukauwa ni Matabete,” Ensign se Liaona, Me 2011, 66).

Vulica vata

Raica eso tale na vakasama ni vuli kei na veivakavulici.

Na itaviqaravi yadua e ra ena vakauqeti ira na itabagone me ra duri vaka-ivakadinadina ni Kalou dina ga ni tu na veisaqasaqa. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Ni wilika vata vakalasi na, 1 Nifai 8:24–34, ka taroga vei ira na itabagone se isema cava era raica ena iwase ni raivotu oqo nei Liai kei na nodra bula. Wasea e dua na ka o sa sotava o a tutaka kina na nomu vakabauta ena loma ni veivakacacani kei na veisaqasaqa. Sureti ira na itabagone me ra wasea eso na veika era sa sotava oti.
Sureti ira na lewe ni kalasi me ra wasea na nodra ivakaraitaki eso ena ivolanikalou ka ra a dinata tu ga na kosipeli ena loma ni veivakacacani (e tukuni ena ivolanikalou ena ituvatuva oqo eso na ivakaraitaki). Ni wilika vata va-kalasi na kedra itukutuku na tamata oqo. Na cava era sa vulica na lewe ni kalasi mai na ivakaraitaki eso oqo ka yaco tiko vei ira ena gauna oqo? Me tiki ni veivosaki oqo, e rawa me ra vakadikeva na itabagone eso tale na ivolanikalou ka vakadikeva na itabagone eso tale na ivolanikalou ka vakaturi ena ituvatuva oqo se na vidio “Defenders of the Faith.”
Sureti ira na lewe ni kalasi me ra sarava na vidio “No Cussing Club” ka raica na iyatuvosa ena vidio ka vakauqeti ira me ra duri vaka-ivakadinadina ni Kalou. Na cava soti era dau sotava ka dau bolei kina na nodra vakabauta kei na ivakatagadegede? Na cava era sa cakava tiko me ra taqomaka kina na nodra vakabauta? E rawa vakacava ni ra muria na ivakaraitaki ena vidio?
Wasea vakatolu na kalasi, ka solia ki na iwasewase yadua e dua na vosa mai na ituvatuva oqo. Kerea na veiwasewase me ra railesuva na nodra vosa ka tuva na iyatuvosa mana e rawa ni ra wasea me ra vakayaloqaqataka kina e dua me taqomaka na dina ni kosipeli. Me ra tukuna na iwasewase yadua vei ira na vo ni kalasi na sala e rawa ni ra wasea kina na veimalanivosa oqori vei ira na tani. Me vakaoqo, e rawa ni ra cakava e dua na iyaloyalo cavuti ka wasea vata kei ira eso tale na lewe ni kalasi ena loma ni macawa me ivakananumi ni veika sa veivosakitaki ena kalasi.

Kerei ira na itabagone me ra wasea na veika era sa vulica nikua. Era sa vakauqeti beka me ra duri vaka-ivakadinadina ni Kalou? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ulutaga oqo?

Veisureti me caka

Tarogi ira na itabagone, se cava era sa vakauqeti kina me ra cakava me baleta na veika era sa vulica nikua. Vakauqeti ira mera cakava na ka era sa vakila. Vakasamataka na sala eso e rawa ni o talemuria.