Meu na vakauqeti ira vakacava na tamata mera talairawarawa ki na ivakaro?

Me vaka ni da sa Yalododonu Edaidai—ka qasenivuli ni kosipeli—e dodonu meda ivakaraitaki ni da sa bulataka tiko na kosipeli. Ena rawa ni veivakauqeti na noda ivakaraitaki vei ira na tamata mera talairawarawa ki na ivakaro. A kaya na iVakabula vei ira na Nona tisaipeli, “Oi kemudou na rarama kei vuravura” ( Maciu 5:14). Na vakacegu kei na marau eda vakila mai na noda bulataka na kosipeli ena laurai ena noda ivalavala, ena noda vosa, kei na kaukauwa ni noda ivakadinadina.

Mo vakarautaki iko vakayalo

O sa vakauqeti beka vakacava mai na nodra ivakaraitaki eso era sa dau talairawarawa ki na ivakaro? E sa vukei iko vakacava mo yaco mo dua na qasenivuli gugumatua cake, na nomu sasagataka mo bulataka na ivakaro?

Na madigi cava sa tu vei ira na itabagone me ra ivakaraitaki kina vei ira na tamata? Na cava o rawa ni cakava mo vukei ira mera taura na veimadigi oqo mera vakauqeti ira kina na tamata mera talairawarawa ki na ivakaro?

Vulica ena masumasu na ivolanikalou kei na ivurevure eso oqo. Na cava ena vukei ira na itabagone mera kila ni sa rawa me vakauqeti ira na tamata me ra talairawarawa ki na ivakaro, na nodra ivakaraitaki kei na ivakadinadina?

Maciu 5:14–16; 1 Timoci 4:12; Alama 17:11; 39:11 (Na bibi ni ivakaraitaki vinaka)

Alama 4:19 (Na kaukauwa ni ivakadinadina savasava)

Thomas S. Monson, “Mo iVakaraitaki ka Dua na Rarama,” Ensign se Liaona, Nove. 2015, 86–88

L. Tom Perry, “Sa Biuta Tani na Rere na Loloma Levu Sara,” Ensign se Liaona, Nove. 2011, 41–44

Ann M. Dibb, “Dou Tucake ka Rarama Mai,” Ensign se Liaona, Me 2012, 117–19

Vidio: “Let Your Light So Shine,” “Leave the Party”

4:28

6:26

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Tarogi ira na itabagone na vunau cava era sa rogoca vakawasoma tiko ena kalasi ni Lotu se soqoni. Na cava era nanuma ena kena sa mai vakamatatataki na ivakaro oqo? Na cava era sa vulica tiko? Na cava beka era lomatarotarotaka tiko?
Sureti ira na itabagone mera vakasamataka mada (kakua ni tukuna na yaca ni tamata o ya) e dua era kila era diva tu me ra na vakauqeti koya me talairawarawa ki na ivakaro. Me veivosakitaka na kalasi, na cava e vakauqeti ira na tamata mera bulataka na kosipeli. Ena rawa vakacava ki na nodra ivakaraitaki, veika era sotava, kei na nodra ivakadinadina na itabagone me vukei ira mera tara na yalodra na tamata era lomana?

Vulica vata

Na itaviqaravi yadua e ra ena vukei ira na itabagone mera kila vakavinaka na sala mera vakauqeti ira kina eso mera talairawarawa ki na ivunau. Mai na veivakauqeti ni Yalotabu, digitaka e dua se sivia ka na ganita vinaka na nomu kalasi:

Sureti ira na itabagone mera wilika na Maciu 5:16 kei na 1 Timoci 4:12, na ivolanikalou a vakauqeta na vosa nei Peresitedi Thomas S. Monson “Mo iVakaraitaki ka Dua na Rarama.” Na cava era vakavulica vei ira na tikina oqo me baleta na kaukauwa ni nodra ivakaraitaki? Sureti ira na itabagone mera vaqara ena vosa nei Peresitedi Monson e dua na itovo e kerea o koya meda sa kena ivakaraitaki. Kerei ira mera wasea e dua na gauna a vakaraitaka kina e dua na tamata na itovo o ya ka mera veivosakitaka na kena mana vei ira. Na cava era rawa ni cakava na itabagone mera ivakaraitaki vinaka cake e vale, onolaini, e koronivuli, kei na nodra itikotiko raraba?
Lesi ira yadua na itabagone mera wilika e dua vei ira na ivolanikalou baleta na ivakaraitaki ena ituvatuva oqo ka raica e dua ena loma ni kalasi e wilika e dua tale na tikina ka wasea vakai ira na veika era sa vulica. Vakayacora tikoga na itaviqaravi oqo me yacova ni ra sa rogoca yadua na itabagone na ivolanikalou yadua. Na cava e bibi kina na ivakaraitaki ni o vakavulica na kosipeli? Kerei ira na itabagone mera vola ena vava ni volavola eso na madigi ni veivakavulici e tiko vei ira— na kena e lesi kei na kena e vagauna.
Wasea na itukutuku oqo mai na vosa nei Elder L. Tom Perry “Sa Biuta Tani na Rere na Loloma Levu Sara }”: “Na noda bula e dodonu me ivakaraitaki ni veika vinaka kei na dodonu ni da sasagataka tiko meda vakatotomuria na Nona ivakaraitaki. Na cakacaka vinaka eda cakava yadua sa rawa me vakacaucautaki kina na iVakabula kei na Nona Lotu. Ni ko sa cakava tiko na veika vinaka, ni ko dua na tagane kei na yalewa dokai ka caka dodonu, ena ramase mai na nomu bula na Rarama i Karisito.” Kerei ira na itabagone me ra wasea na veika era sa sotava ka vakauqeti ira kina na nona ivakaraitaki vinaka e dua me ra bulataka na kosipeli, se vakaraitaka na vidio “Let Your Light So Shine.” Sureti ira mera vakasamataka vakatitobu na kena sa veivakauqeti tiko vei ira na tamata na nodra ivakaraitaki, ka vakayaloqaqataki ira mera tuvanaka na nodra dui lalawa mera veivakauqeti kina vei ira eso mera maroroya na ivakaro ena ivakaraitaki vinaka.

4:28
Wasea e dua na gauna o a digitaka kina mo talairawarawa ki na ivakaro ni Kalou. Ni ko sa veiwasei, muria na idusidusi oqo: kua ni wasea na veika tabu o sotava vakavo ga ke vakauqeti mai na Yalotabu, kua ni veisautaka na veika o sa sotava, kua ni tukuna na veika o lako curuma me rawa kina ni dreta nodra rai na tamata tani mai vei iko, ka kua ni wasea na veika me baleta na ivalavala ca sa oti se na caka cala. Veivosakitaka kei ira na itabagone na idusidusi oqo, ka sureti ira mera vakamuria na idusidusi oqo ena nodra wasea tiko na veika era dui sotava ni ra maroroya na ivakaro. Tarogi ira na itabagone na vuna era nanuma kina ni sala mana duadua ni nodra vuli ena nodra wasea na veika era lako curuma me ra vakavulici ira na tani me baleta na ivakaro.
Sureta na kalasi me vakamacalataka vakalekaleka na tikina ena Alama 4:19 (kevaka era gadreva na veivuke, vakatura mera wilika na ulutaga ni wase 4). Me wiliki vata na tikina e 19, ka tarogi ira na itabagone na cava na nodra nanuma ni ibalebale ni “vunauci ira ena nodra ivalavala ca” kei na kena rawa ni vakauqeti ira na lewe ni Lotu me ra talairawarawa ki na ivakaro. Era sa vakauqeti vakacava na itabagone mai na nodra ivakadinadina eso tale (me vakataki ira na itubutubu, qasenivuli, iliuliu, se so tale na itabagone)? Kerei ira na itabagone mera vakasamataka mada na ivakaraitaki ni ivakadinadina ena ivolanikalou (me kenai vakaraitaki, Maciu 16:13–19; Mosaia 3:17; Alama 5:45–48; 7:13; V&V 76:22–24). Mo ni wilika vata, ka sureti ira na itabagone me ra wasea na vuna era sa raica kina na kena veivakauqeti na ivakadinadina oqo. (Me Kilai: Na itaviqaravi oqo sa madigi ni nodra vakavulici na itabagone ena sala mera cavuta kina na nodra ivakadinadina ni ra vakavulica na kosipeli vei ira na tamata. Na ikuri ni ulutaga qo, raica na Veivakavulici ena Sala ni iVakabula [2016], 11.)
Vakaraitaka na vidio “Leave the Party,” se sureti ira na itabagone me ra wilika e dua na italanoa ena vosa nei Sisita Ann M. Dibb “ Dou Tucake ka Rarama Mai ” (na italanoa kei Samisoni, Taniela, Joana, se o Karen). Kerei ira mera veivosakitaka na veika era sa vulica baleta na kaukauwa ni ivakaraitaki me ra vakauqeti kina na tamata mera talairawarawa se talaidredre ki na ivakaro. Na cava soti era sa vakila na itabagone ka ra a vakauqeta kina e dua se ra vakauqeti mai vua e dua na tamata me ra talairawarawa?

Kerei ira na itabagone mera wasea na veika era sa vulica nikua. Era sa kila tiko beka na sala mera vakauqeti ira kina na tamata mera talairawarawa ki na ivakaro? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Me Veivuke ena Veivakavulici

“Mo dau vakarorogo vinaka ki na nodra soli vakasama na nomu lewenikalasi. Na nomu ivakaraitaki ena vakauqeti ira me ra dau vakarorogo vakavinaka vei ira eso. Ke sega ni matata vei iko na nona vakasama e dua na lewenikalasi, mo dau taro. O na rairai kaya vakaoqo, ‘Au sega ni kila. E rawa beka ni o vakamacalataka tale mai?’ se ‘O rawa beka ni o solia e dua na ivakaraitaki ni ka o nanuma tiko?’” ( Veituberi, Me iLutua ni Noda Bula [1999], 73).

Sureta na itabagone mera cakava

Sureti ira na itabagone mera vakasamataka mada e dua na ka era rawa ni cakava mera vakauqeta kina e dua era kila me talairawarawa ki na ivakaro. Ke sa gadrevi, sureti ira mera wasea ki na kalasi e tarava na veika era sa sotava.