Na veivakalougatataki cava sa yalataka tu na Tamada Vakalomalagi kevaka au talairawarawa ki na ivakaro?

Voleka ni ivakaro yadua eda ciqoma mai vua na Tamada Vakalomalagi e yalataki vata tiko mai kei na kena veivakalougatataki. Na talairawarawa ki na ivakaro e kauta mai na galala, tubu ni tamata yadua, taqomaki mai na veika rerevaki, kei na vuqa tale na veivakalougatataki vakayago ka vakayalo. Ena laki yaco me muataki keda na noda talairawarawa ki na bula tawamudu vata kei na Tamada Vakalomalagi. Na noda kila rawa na veivakalougatataki oqo sa na rawa me vakauqeti keda kei ira na tamata meda talairawarawa ki na ivakaro.

Mo vakarautaki iko vakayalo

Na cava e bibi kina me kilai na veivakalougatataki yalataki — ni ko dua e vulica tiko na kosipeli vakakina ni ko qasenivuli ni kosipeli? E veivakauqeti vakacava na nomu gagadre mo bulataka na kosipeli mai na veivakalougatataki nei Tamada Vakalomalagi sa yalataka tu vei iko?

Era na vakalougatataki vakacava na itabagone ena nodra vulica na sala me kilai kina na yalayala ni Kalou ena ivolanikalou kei na nodra vosa na parofita?

Na ivolanikalou kei na vosa cava ena vukei ira na itabagone mera vulica kina na sala mera kila na veivakalougatataki sa yalataka tu na Kalou vei ira sa talairawarawa?

Aisea 58:6–11 (Na veivakalougatataki sa yalataki tu ena talairawarawa ki na lawa ni lolo)

Jeremaia 7:23–24; V&V 1:14–15; 58:29–33 (Na isau ni talaidredre)

Malakai 3:10–12 (Na veivakalougatataki sa yalataki tu ni saumi na ikatini)

V&V 14:7; 82:10; 130:20–21 (Na veivakalougatataki ni talairawarawa)

V&V 20:77, 79 (Na masu ni sakaramede)

V&V 59:9–20 (Na veivakalougatataki sa yalataki tu ni vakatabui na Siga ni Vakacecegu)

V&V 89:18–21 (Na veivakalougatataki sa yalataki tu ena talairawarawa ki na Vosa ni Vuku)

L. Whitney Clayton, “A Ka Kecega sa Kaya vei Kemudou ko Koya Dou Kitaka,” Ensign se Liaona, Me 2017, 97–99

Jeffrey R. Holland, “Ena Cakacaka Mana na Turaga vei Kemuni ena Mataka,” Ensign se Liaona, Me 2016, 124–27

Von G. Keetch, “Era sa Kalougata ka Marau ko Ira sa Maroroya na iVakaro ni Kalou,” Ensign se Liaona, Nove. 2015, 115–17

“ Talairawarawa,” Tudei ena Vakabauta (2004), 121–23

“ Yalataka na Veivakalougatataki Vei Ira na Tamata,” Vunautaka na Noqu Kosipeli (2004), 224

Vidio: “A Secure Anchor”, “Blessed and Happy Are Those Who Keep the Commandments of God”

3:37

NaN:NaN

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Kerei ira na itabagone mera wasea na veika era sa sotava ena macawa sa oti a vukei ira mera kila vakavinaka kina na bibi ni talairawarawa ki na ivakaro.
Vukei ira na itabagone mera kila vakavinaka ni ivakaro era tiko ena ivolanikalou kei na nodra vosa na parofita bula era sa salavata tiko kei na kena veivakalougatataki yalataki se veivunauci; ka rawa ni da raica ena vukuda vakakina vei ira eda vakavulica ni da na vakauqeti kina kei ira tale eso me ra maroroya na ivakaro. Vakaraitaka kivei ira na itabagone na sala me ra kunea kina na veivakalougatataki yalataki ena nomu wilika vata kei na kalasi na “ iTukutuku mai na Mataveiliutaki Taumada Kivei Ira na iTabagone” ena Me iSakisaki ni iTabagone (draunipepa ii–iii). Sureti ira na itabagone mera laveliga ena gauna yadua era rogoca kina e dua na veivakalougatataki yalataki. Na cava era bibi kina na yalayala oqo kivei ira na itabagone?

Vulica vata

Na itaviqaravi yadua e ra ena vukei ira na itabagone mera kila rawa na veivakalougatataki ni talairawarawa. Mai na veivakauqeti ni Yalotabu, digitaka e dua se sivia ka na ganita vinaka duadua na nomu kalasi:

A vakaraitaka o Elder L. Whitney Clayton e vica na vakaraitaki mai na ivolanikalou me baleta eso na tamata era ciqoma na veivakalougatataki ni oti na nodra vakayagataka na nodra vakabauta me talairawarawa. Raica kina eso na itukutuku ena ivolanikalou o nanuma ni na yaga sara vei ira na itabagone ena nomu kalasi (raica na idusidusi ena ivolanikalou ena kena vakaleleka ena mua ni nona vosa). Era kalougata vakacava na tamata ena nodra talairawarawa? Na cava na itavi ni vakabauta ena talairawarawa? Vakauqeti ira na itabagone me ra raicalesu na vosa nei Elder Clayton, ka vaqara na veivakalougatataki e kaya o koya ena muria mai na veisala ni talairawarawa. Na cava era vakila ni ra vakauqeti me ra cakava vakalevucake “me ra vakayacora na vei kalalai me baleta na vakabauta”?
Sureti ira na itabagone me ra vakasamataka e dua e nanuma tikoga ni o koya se “lolovira tiko.” Ena rawa ni nanuma tiko o itokani ni sa rui cecere sara na ivakatagedegede ni kosipeli ka na sega ni rawa me na daumaka sara. Na cava a vakasalataka o Elder Holland ena nona vosa “Ena Cakacaka Mana na Turaga vei Kemuni ena Mataka” era rawa ni wasea vei nodra itokani? Na veivakalougatataki cava a yalataka o Elder Holland kivei ira era sa saga tiko na nodra vinaka taucoko mera talairawarawa ki na ivunau? Sureti ira na lewe ni kalasi me ra wasea na veika era sa kunea mai vua e dua tale. Sa rawa talega me ra wasea na ivakasala mai na vosa vua e dua na itokani se vakabira ena itukutuku raraba.
Vakaraitaka e dua na vidio e vakaturi tiko ena ituvatuva oqo. Kerei ira na itabagone me ra vakalekataka ena dua ga na yatuvosa na veika era sa vulica mai na vidio me baleta na veivakalougatataki ni talairawarawa. Sureti ira na itabagone me ra wasea na nodra yatuvosa ki na kalasi ka me ra veivosakitaka na veika mai na vidio a vakauqeti ira me ra talairawarawa kina. Sureti ira me ra vakasamataka e dua e rawa ni ra sarava vata na vidio ka cakava e dua na lalawa me vakamuri.
Sureta e vica na lewe ni kalasi me ra droinitaka ena vava ni volavola e dua na ilati se itatarovi e taqomaki keda mai na veivakamavoataki, ka sureti ira na vo ni kalasi me ra vakilakila na droini ni cava o ya. Era sa vakataka vakacava na ivakaro na ilati oqo? Kerea e dua na lewe ni kalasi me vakarautaki koya me mai wasea na italanoa baleta na itatarovi ena baravi a tukuna o Elder Von G. Keetch ena nona vosa “Era sa Kalougata ka Marau ko Ira sa Maroroya na iVakaro ni Kalou” (se vakaraitaka na vidio ni nona vosa.). Sureti ira na itabagone me ra cakacaka vakaisa ka raica mai eso tale na veivakatautauvatataki e rawa ni vukei ira me ra kila vinaka na sala sa dau taqomaki keda kina na ivakaro. Era sa vakalougatataki ka taqomaki vakacava mai na nodra maroroya na ivakaro?
Ena dua na yasa ni papa ni volavola, vola na “iVakaro,” kei na dua tale na yasana vola na “Veivakalougatataki Yalataki.” Sureti ira na itabagone mera raica na veitikina ena ivolanikalou sa yalataka tu kina na Turaga na veivakalougatataki kivei ira era sa talairawarawa ki na Nona ivakaro. Me kena ivakaraitaki, sa rawa mera vakasaqaqara ena ivolanikalou sa vakaturi tiko ena ituvatuva oqo. Se, ke gadrevi, vakaraitaka vei ira na iwalewale ni kena vakayagataki na Topical Guide me kunei kina na ivolanikalou me baleta e dua na ivakaro. Sureti ira mera vola ena papa ni volavola na ivakaro era sa wilika kei na veivakalougatataki yalataki era sa kunea. Na cava era sa vakila baleta na ivakaro oqo ena nodra wilika na veivakalougatataki oqo?
Sureti ira na itabagone mera digitaka mai e dua na vosa ni koniferedi se dua na iwasewase ena Me iSakisaki ni iTabagone ka wilika kina na veivakalougatataki era sa yalataka tu na italai ni Turaga kivei keda kevaka eda sa talairawarawa ki na ivakaro. Solia e dua na gauna ki na itabagone yadua me wasea na veika sa kunea rawa o koya. Vakayaloqaqataki ira mera wasea na gauna eso era a ciqoma kina na veivakalougatataki yalataki oqo.
Me qai wilika na kalasi, na “ Yalataka na Veivakalougatataki Vei Ira na Tamata” mai na Vunautaka na Noqu Kosipeli (draunipepa 224). Kerei ira na itabagone mera vakasamataka mada e dua na ivakaro era rawa ni vakavulica vua e dua tale, ka sureti ira me ra vakatovotovotaka ni ra sa vakavulica tiko e dua ena kalasi me baleta na ivakaro o ya, ni vakamuri tiko na idusidusi ena “Yalataka na Veivakalougatataki Vei Ira na Tamata.” Sureta e vica na itabagone mera talanoataka na veika era sa sotava.

Kerei ira na itabagone mera wasea na veika era sa vulica nikua. Era sa kila tiko beka na sala mera raica rawa na veivakalougatataki sa yalataka tu na Tamada Vakalomalagi kivei ira sa talairawarawa? Na cava era sa bau vakila se vakanananu kina? E tiko beka eso tale na nodra vakatataro? Ena yaga beka me na tauri vakalevu cake na gauna ena iulutaga oqo?

Maqosa eso ni vuli ena kosipeli

Vakayagataka na Topical Guide. Ena imatai ni itaviqaravi ena iwasewase oqo, era sa sureti kina na itabagone mera vakayagataka na Topical Guide mera vakasaqara na ivolanikalou baleta e dua na ivakaro. Vukei ira na itabagone mera vakamatautaki ira ki na Topical Guide me rawarawa kina ni ra vakayagataka ena nodra vuli yadudua. Vakaraitaka vei ira na kena laurai e dua na ulutaga ena idusidusi tuvai matanivola ka vakasaqara kina ena iulutaga yadua na ivolanikalou e gadrevi tiko. Vakayaloqaqataki ira mera vakasaqara ka vulica na veitikina oqo me taucoko na nodra kila vakavinaka na veika oqo.

Veisureti me caka

Sureti ira na itabagone mera vakasaqara na veivakalougatataki sa yalataki tu ni ra dui vulica na kosipeli. Vakayaloqaqataki ira me ra wasea ki na kalasi e tarava na veika era sa kunea.