Meu na vukei ira vakacava eso mera vakaitavi ena vuli?

Sa noda ilesilesi taucoko meda vulica na vunau ni kosipeli mai na noda dui sasaga vagumatua yadua. Sa rawa meda veivuke na qasenivuli ni kosipeli, vei ira eda vakavulica mera ciqoma me nodra ilesilesi na nodra vuli vakai ira yadua. Sa rawa meda vakayadrata eso mera gadreva na vuli, kila vakavinaka, ka bulataka na kosipeli. Eda na qasenivuli gugumatua cake ni da vukei ira eda vakavulica mera kunea vakai ira na ivakavuvuli ni kosipeli ka rawata na veivakaukauwataki mai vua na Kalou.

Mo vakarautaki iko vakayalo

Na veika cava o sa sotava vaka-lewenikalasi e vakaibalebale cake kina na nomu vakaitavi? E duidui vakacava na ka o sotava mai na nomu sega ni vakaitavi?

Na cava eso na sala ena vakaibalebale cake kina vua e dua me vakaitavi ena vuli-ka, me ikuri ni ivakamacala? Na cava mo cakava me vakayaloqaqataki kina na vakaitavi?

Na kila cava ni veivakavulici sa tu vei ira na itabagone oqo? Era sa veisureti vakacava tiko vei ira era vakavulica mera vakaitavi? Mo tara cake vakacava na nodra kila oqo?

Vulica ena masumasu na ivolanikalou kei na ivurevure e ra. Na cava o nanuma ena veivuke vakalevu vei ira na itabagone o vakavulica?

Maciu 16:13–16 (A sureti Pita na iVakabula me vakadinadina)

Maciu 28:18–19; Luke 10:1–9 (E solia na iVakabula vei iratou na Nona tisaipeli na ilesilesi mera veivakavulici ka qaravi ira na tamata)

Marika 10:17–21 (E veisureti na iVakabula vei ira e vakavulica mera cakacaka ena vakabauta)

Luke 7:36–43 (E dau taro na iVakabula mera sureti kina o ira e vakavulica mera vakasamataka vakatitobu na Nona itukutuku)

Joni 3:1–13 (E dau sauna na iVakabula na nodra taro o ira e vakavulica)

3 Nifai 11:13–15 (E veisureti na iVakabula vei ira e vakavulica mera kilai Koya vakai ira ga)

3 Nifai 17:1–3 (E veisureti na iVakabula vei ira e vakavulica mera vakarautaki ira mera vulica e vuqa tale na ka)

V&V 88:122 (Era na vakavukui na vuli ni ra wasea na nodra nanuma kei na kila ka ra veirogorogoci vakai ira)

David A. Bednar, “Yadrava Tiko ena Gumatua Kecega,” Ensign se Liaona, Me 2010, 40–43

Veivakavulici ena ivakarau ni Turaga

E vakayagataka na iVakabula na italanoa rawarawa, vosa vakatautauvata, kei na ivakaraitaki ni veika a yaco dina me vukei ira na tamata mera kila vakavinaka na ka e vakavulica tiko. E vukei ira mera raica na lesoni ni kosipeli ena veika era dui sotava. Mera na veivuke vakacava na itabagone vei ira eso mera vakaitavi vagumatua ena vulica na kosipeli?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu, se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Kerei ira na itabagone mera wasea e dua na ka era se qai vulica oti ga se veivakavulici kina ena taudaku ni kalasi. A vukei ira vakacava na ivakavuvuli era a vulica ena macawa sa oti?
Sureti ira na itabagone mera veivosakitaka na kena ca ni tiko ena kalasi sa vosa tikoga kina o qasenivuli ka ra sega ni bau vakaitavi kina na lewenikalasi. Vukei ira mera vola na sala duidui eso e rawa ni ra vakaitavi kina o ira na vuli (oka kina ena kalasi kei na taudaku ni kalasi).Me na vakayaloqaqataka vakacava o qasenivuli na vakaitavi oqo?

Vulica vata

Na itaviqaravi e ra ena vukei ira na itabagone mera kila vakavinaka me na vukei ira vakacava ko ira vakavulica tiko mera vakaitavi ena vuli. Mai na veivakauqeti ni Yalotabu, digitaka e dua se sivia ka na ganita na nomu kalasi:

Sureti ira na itabagone mera vakasaqaqara ena tabana 4–5 ena Vakavulica na Kosipeli ena iVakarau ni iVakabula, ka vola ena papa ni volavola na sala a veisureti kina na iVakabula e vakavulica mera vakayacora na nodra vuli vakai ira. Kerei ira na itabagone mera digitaka e dua na ulutaga mai na lisi o ya ka mera veisasa mera raica e dua na ivakaraitaki ena ivolanikalou ena gauna a veivakavulici kina na iVakabula ena sala vakaoqo (me vaka na kena era vakaturi tiko ena ituvatuva oqo). Sa rawa mo sureti ira talega mera vakasamataka na gauna a vakavulici ira kina e dua na qasenivuli ena sala vata vakaoqo. Kerei ira na vakaisa mera wasea ki na kalasi na veika era sa kunea. Veivosakitaka na sala e rawa ni ra vakatotomuria na itabagone na ivakarau ni iVakabula ni ra veivakavulici kina. Na cava e bibi kina mera kovuti ena sala vakaoqo o ira o vakavulica tiko?

Kerei ira na itabagone mera wasea na veika era sa vulica nikua. Era sa kila vakavinaka beka na sala mera vukei ira eso mera vakaitavi ena vuli? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Na vakarorogo e ivakaraitaki ni loloma. E na so na gauna e dau gadrevi kina na soli bula. Ena gauna eda vinakata kina meda vakarorogo vei ira eso, eda dau sega ni tukuna na veika eda via tukuna ka solia na gauna vei koya e vosa tiko me vakamacalataki koya kina” ( Veituberi, Me iLutua ni Noda Bula [1999], 76).

Veisureti mera bulataka

Sureti ira na itabagone mera vakasamataka na madigi eso era na vakavulica kina eso baleta na yavu ni veivakabulai. Vakayaloqaqataki ira mera tuvanaka na sala mera na vukei ira kina era vakavulica me vakaibalebale cake na nodra vakaitavi. Ena lesoni e tarava, sureti ira mera wasea na ka era sa cakava.