Veivakavulici ena iVakarau ni iVakabula

Vakasamataka mada na veika o kila tu baleta na iVakabula. O raici Koya tiko beka ena nomu vakasama — ni ra wavokiti Koya voli na Nona tisaipeli? O raici Koya tiko beka ni vakavulici ira tiko na lewevuqa ena baravi ni Wasawasa o Kalili se vosa sara tikoga vei koya na marama ena tobu ni wai? Na cava o raica rawa me baleta na iwalewale ni Nona veivakavulici kei na veiliutaki? A vukei ira vakacava eso mera vuli, ka tubucake vakayalo, ka saumaki mai ki na Nona kosipeli?

E lomani ira o Koya, ka masulaki ira, ka tomana tiko na Nona qaravi ira. E vakaraica na madigi me tiko kina vata kei ira ka vakaraitaka na Nona lomani ira. E kila na veika era taleitaka, inuinui, kei na gagadre kei na veika e yaco tiko ena nodra bula.

E kila o Koya se o cei o ira kei cei e rawa ni ra vakataka. E raica na veisala talei eso me vukei ira mera vuli ka tubu cake —na salatu me baleti ira sara ga. Ni ra sotava na dredre, a sega ni biuti ira tu o Koya ia a tomana tikoga me lomani ira ka qaravi ira.

A vakarautaki Koya me veivakavulici ena nona gauna duadua ni masu kei na lolo. Ena veisiga, ni Nona gauna vakataki koya, a vakasaqara na veidusimaki nei Tamana Vakalomalagi.

A vakayagataka na ivolanikalou me veivakavulici ka vakadinadinataka na Nona ilesilesi. A vakavulici ira na tamata mera vakanananutaka vakataki ira na ivolanikalou ka mera vakayagataka mera kunea kina na isau ni nodra vakatataro. E vakatakatari na lomadra e loma ni sa vakavulica o Koya na vosa ni Kalou ena kaukauwa kei na lewa, ka ra sa kila vakai ira ni sa dina sara na ivolanikalou.

A wasea na italanoa rawarawa eso, vosa vakatautauvata, kei na ivakaraitaki bula e vakaibalebale cake vei ira. A vukei ira mera raica rawa na ivakavuvuli ni kosipeli ena veika era sotava kei na veika ni vuravura e wavoliti ira tiko. A tukuna o Koya na veika me baleta na qoli, na sucu ni gone, kei na cakacaka ena were. Me baleta na Nona vakavulica na veikauwaitaki, a tukuna na italanoa ni kena laki vueti mai na sipi a yali. Ni vakavulici iratou na Nona tisaipeli me ratou nuitaka ga na veimaroroi talei nei Tamada Vakalomalagi, a vakauqeta me ratou “vakananuma na viavia ni veikau.”

A tarogi ira ka vakavuna mera vakasama ka vakanananu titobu e lomadra. A taleitaka sara na isau ni nodra taro ka marautaka na ivakaraitaki ni nodra vakabauta. E solia vei ira na madigi mera taroga na taro eso ka wasea na nodra dui veivakavukui vakayalo, ka sauma na veika era taroga ka vakarorogo ki na veika era sa sotava tiko. Ena vuku ni Nona loloma, era lomavakacegu kina mera wasea na nodra vakasama kei na nodra dui vakanananu ni lomadra.

A sureti ira mera soli ivakadinadina,ni ra sa vakayacora, e tara na yalodra na Yalotabu. “Dou sa kaya se ko cei koi au?” A taroga o Koya. Ena gauna sa sauma mai kina o Pita, a vaqaqacotaki na nona ivakadinadina: “Oi kemuni na Karisito, na Luve ni Kalou bula.’

E vakabauti ira tikoga, vakarautaki ira, ka solia vei ira na ilesilesi bibi ni veivakavulici, veivakalougatataki ka veiqaravi vei ira na tamata. “Dou lako yani ki vuravura taucoko, ka vunautaka na itukutuku vinaka kivei ira na tamata kecega,” oqo na Nona ilesilesi vei iratou. Sa Nona inaki me vukea na nodratou saumaki mai ena nodratou veiqaravi vei ira na tamata.

A sureti ira mera cakacaka ga ena vakabauta ka bulataka na dina a vakavulica o Koya. Ena Nona veivakavulici taucoko, a vakatabakiduataka na nodra vukei o ira era muri Koya tiko mera bulataka na kosipeli ena yalodra taucoko. Me rawati oqo, a raica na veimadigi eso mera vuli mai na veivakaukauwataki e sotavi. Ena gauna a rairai kina vei ira na Nifai, a sureti ira mera lako mai vua vakayadudua, me rawa ni ra raica, vakila, ka kilai Koya vakai ira. Ena gauna sa vakila kina o Koya ni ra sega ni kila vakavinaka sara na ka e tukuna tiko, a kerei ira mera lesu ki na nodra dui vale ka laki vakavakarautaki ira mera lesu tale mai ka vulica e levu tale na ka.

E na veituvaki yadua oqo, a yaco o Koya me nodra daunivakaraitaki ka daunivakasala. A vakavulica vei ira na masu ena Nona masu vata kei ira. A vakavulica vei ira mera dauloloma ka veiqaravi ena iwalewale a loloma ka veiqaravi kina. A vakavulica vei ira na sala me vakavulici kina na Nona kosipeli ena ivakarau a veivakavulici kina o Koya.

E kilai levu, ni ivakarau ni Nona veivakavulici na iVakabula e duidui sara mai na ivakarau e vakayacora tu o vuravura.

Sa qai koya oqo, na nomu veikacivi tabu — mo veivakavulici ga me vakataka na veivakavulici ni iVakabula. Ni ko vakayacora oqo, era na dolava na lomadra o ira na itabagone me teivaki kina na soreni kosipeli, me buroro, ka tubu. Oqo ena muataki ki na saumaki mai— na iusutu ni inaki ni nomu veivakavulici. Ni ko vukei ira na itabagone mera saumaki mai, ko sa vukei ira sara tikoga mera vakamuria na iVakabula ena nodra bula taucoko— curuma na valetabu ena bula kilikili, ciqoma na Matabete i Melikiseteki, kaulotu, vakayacora na veiyalayalati tabu, susuga cake na matavuvale valavala dodonu, ka tara cake na matanitu ni Kalou e vuravura taucoko. Sa na uasivi sara na nomuni marau!