Vakadeitaki ni Veika me Vakavulici

Sa tauyavutaki oti tu na Ia Mo Lako Mai, Mo Muri Au: iVurevure ni Nodra Vuli na iTabagone ki na veitabana ka vakayavutaki tiko ena ivakavuvuli ni kosipeli vakalesuimai i Jisu Karisito. Era sa oka tu ena veitabana oqo e vica toka na ituvatuva ni vuli e rawa ni vakayagataka na daunivakasala kei ira na qasenivuli me veivakarautaki ki na soqoni ni kuoramu ni Matabete i Eroni kei na kalasi ni Goneyalewa kei na Matawilivola ni Sigatabu. Era sa sureti ka vakauqeti tale tu ga na itubutubu mera vakayagataka oqo ena loma ni nodra matavuvale.

Era sa mai tuvanaki toka na veitabana lalai mera soqoni ena veivula me vukea na kena vakacokotaki na nodra veigauna ni vulica na kosipeli o ira na itabagone ena loma taucoko ni Lotu. Sa vakarautaki tu e vuqa sara na ituvatuva ni vuli ena dua na tabana lailai mai na kena e rawa ni vakavulici ena loma ni dua na vula. Sa dodonu mera vakadeitaka vata na iliuliu ni tabanalevu kei ira na qasenivuli ni itabagone na ituvatuva cava ni vuli me vakavulici mai na dua na tabana vakaoqo. Kevaka o iko e dua na daunivakasala ni Matabete i Eroni se Goneyalewa, mo veivosaki kei na nomu kuoramu kei iratou na mataveiliutaki ni kalasi ena kena digitaki na ituvatuva ni vuli. Sa rawa talega mo sureti ira na lewe ni nomu kuoramu kei na kalasi mo ni veivosakitaka vata na veika era na vinakata se gadreva mera vulica.

Ni ko tuvanaka na veika mo na vakavulica, vakasamataka ena masumasu na veika e baleti ira na nomu itabagone. Na veika cava beka era sa sotava tiko? Na bolebole se veitemaki cava beka era sotava tiko? Na cava beka era lomatarotarotaka tiko? Na vunau cava beka era gadreva tu mera kila vakavinaka me ra vakarautaki ira yani ki na nodra veisiga ni mataka. O na raica kina ni sa rawa mo vakamatautaka na nomu ituvatuva me veiganiti kei na gagadre se lomatarotaro vovou e dau basika mai. Me vakataka, ni ra na gadreva na itabagone e sivia e dua na macawa mera veivosakitaka kina e dua na ulutaga. Mo dusimaki tiko ena nomu veivakavulici, na nodra gagadre na itabagone, ka kakua ni veika sa tuvanaki tu mai.