Nomu iNaki

E ratou vakavulica na Mataveiliutaki Taumada ni nomu inaki vaka-qasenivuli ni itabagone o ya mo vukei ira mera saumaki mai ki na kosipeli i Jisu Karisito.

E ka ni tamata yadua na nona ilakolako me saumaki mai. Na saumaki mai e sega ni dau yaco walega ena dua na soqoni, kalasi, se itaviqaravi. Na kena isutu, ni ra na saumaki ga mai na itabagone ena gauna era bula vagumatuataka kina na kosipeli ena veisiga yadua— masu, vulica na ivolanikalou, muria tiko na ivunau, vakayacora na itavi ni matabete kei na kena tale eso, curuma na valetabu, veiqaravi ena nodra matavuvale kei na kena tale eso, ka wasea yani na kosipeli. Ni ra vakayacora na veika oqo, ena yaco ki na nodra gagadre, vakasama, kei na ivalavala me salavata tiko kei na Nona lewa na Tamada Vakalomalagi. Era na yaco mera bula marau ka nuidei, ka ra na marautaka mera “kitaka … ka sega ni vakasaurarataki vei ira” (2 Nifai 2:26). Era na sasagataka tiko mera muria na veivakauqeti ni Yalo Tabu, vorata na veitemaki, ka “vakayacora ga vakai ira na ka era kila ni dodonu” ( V&V 58:27). Era sa yaco me “tamata yalosavasava ena vuku ni isoro i Karisito” ( Mosaia 3:19).

Eda na yaco taucoko meda tamata saumaki mai ni da vulica me da lakova tiko vakai keda ena salatu ni kosipeli. Ena nomu ilesilesi, ena iwalewale ni nomu veitokani, veivakayaloqaqataki, ka tokoni ira na itabagone ena nodra bula dina vakayalo, kei na ivakarau ni nomu veivakavulici ka vuli vata kei ira ena gauna ni veivakavulici ka vakakina e tautuba, sa na vukei ira mera tudei tikoga ena salatu ka rawata na sasaga ni bula taucoko ni saumaki mai vakaikoya.