Na Kedra iNaki na Matatauyavu kei na Mataisoqosoqo Yadua

Sa dui vakarautaki tu ena matavuvale, kuoramu ni Matabete i Eroni, kei na Goneyalewa, Matawilivola ni Siga Tabu, kei na kalasi ni semineri na veiinaki cecere mera vukei kina na itabagone mera saumaki mai ki na kosipeli. Ni ko kila na inaki kece oqo ena vukei iko mo kila vakavinaka na veika era sa sotava tiko na itabagone ni ra vulica tiko na kosipeli i Jisu Karisito.

Matavuvale

A tauyavutaka na Tamada Vakalomalagi na matavuvale me tiki bibi ni Nona ituvatuva me vukei ira kina na itabagone mera vulica na kosipeli ena ituvaki ni veilomani ka vakavakarau ki na bula tawamudu. Sa nodra itavi taumada na itubutubu mera vakavulici ira na luvedra (raica na V&V 68:25–28), ka oka kina na nodra vakarautaki ira mera ciqoma na cakacakatabu vakalotu ni bula vakalagilagi. E sega ni dua e rawa ni sosomitaki ira na itubutubu ena ilesilesi oqo sa solia vei ira na Kalou. Era tauyavutaki na kuoramu ni matabete, mataisoqosoqo, kei na parokaramu ni Lotu me tokona ka vaqaqacotaki ira na matavuvale.

Matabete i Eroni

Mera saumaki mai o ira na lewe ni Matabete i Eroni, vakayacora na nodra ilesilesi tabu ni matabete, ka mera “vakayacora na kena cakacaka” ( V&V 84:111), vakavakarau ki na kena ciqomi na Matabete i Melikiseteki kei na cakacakatabu vakalotu ni valetabu, ka yaco mera daukaulotu, vakawati ka tama bula kilikili. Era na laki soqoni vata yani ki na soqoni ni kuoramu ena Siga Tabu, ka sega ni kalasi walega. Na veisoqoni yadua a masulaki na kena ituvatuva maivei iratou na mataveiliutaki ni kuoramu ena nodratou veivuke na daunivakasala, ia ena veiliutaki ga nei peresitedi ni kuoramu, e tiko vua na idola ni matabete. Me vaka e vakaroti tiko ena Vunau kei na Veiyalayalati, ena vakatulewa tiko ena soqoni ni kuoramu o peresitedi ni kuoramu, ka bose vata kei ira na lewe ni kuoramu, ka vakavulica vei ira na nodra itavi (raica na V&V 107:85–87, 99–100). E vakarautaki talega ena soqoni ni kuoramu na gauna ni kena vakayacori na cakacaka ni kuoramu, ka na rawa me oka kina na ilesilesi eso, soli ripote kei na talemuri na ilesilesi taumada, kei na kena vakaraitaki ka vakacokotaki na itaviqaravi. Na soqoni oqo e soli talega kina na veimadigi eso vei ira na cauravou mera veivakayaloqaqataki ka veitokoni vakai ira me baleta na nodra sasaga ni iTavi Vua na Kalou, vakabibi na nodra veiwaseitaka na veika era sa vulica tiko.

Goneyalewa

Na kalasi ni Goneyalewa ena Siga Tabu e vakarautaka na gauna ni vuli-ka cecere me vukei ira na goneyalewa mera bula kilikili ni curuma na valetabu ka vakavakarau ki na nodra ilesilesi tawamudu vakamarama ni veiyalayalati, vakawati, ka marama tina. Ena tekivu na lesoni yadua ena kena wasei na itoko ni Goneyalewa ka raica matua na iVola i Momani kei na nodra ivakavuvuli na parofita bula. Na lesoni e vakarautaka talega na madigi ni kena vulici ka bulataki na iyaunibula ni Goneyalewa kei na ivakatagedegede mai na Me iSakisaki ni iTabagone Ni ra vakayagataka na goneyalewa na nodra dodonu ni digidigi mera vakaitavi ena vuli-ka e sureta na Yalo Tabu, era na vakararamataki, vakayaloqaqataki, ka vaqaqacotaki mera bulataka na kosipeli vakai ira ka vakakina ena nodra matavuvale. Na itaviqaravi ena Tubu Cake Yadudua kei na Muavata sa ka bibi ena qaravi ni saumaki mai ni ra sa bulataka tiko na goneyalewa na veika era sa vulica tiko. Ena kena vakadeitaki ni sa dau soli tiko na veimadigi vakarautaki eso vei ira na goneyalewa yadua mera ciqoma ka cakacaka ena ivunau, sa rawa me taurivaki tiko e dua ga na ulutaga ni lesoni me vica vata na macawa.

Matawilivola ni Sigatabu

Na Matawilivola ni Siga Tabu e vaqaqacotaka na vakabauta na Tamada Vakalomalagi kei Jisu Karisito ena kena soli na madigi vei ira na cauravou kei na goneyalewa kei na nodra qasenivuli mera vuli ka vakavulica vata na ivakavuvuli ni kosipeli ka veivaqaqacotaki vakai ira ena nodra bulataka. Na Matawilivola ni Siga Tabu e vakarautaka na madigi totoka ka bibi eso vei ira na itabagone mera semata yani na veika era sa vulica tiko ena nodra vuli yadua kei na veika era sotava tiko mai vale, ena semineri, kei na soqoni kei na kalasi tale eso ni Lotu, kei na bula ena veisiga. Ena Matawilivola ni Siga Tabu, e dau vakabibitaki kina na nodra vukei na itabagone mera tauyavutaka na kila-ka eso ka nuidei tiko mera tamata vuli ka qasenivuli vakataka na Karisito. O iratou na lewe ni mataveiliutaki ni Matawilivola ni Siga Tabu era na veiqaravi tiko vaka-kenadau ni kena sasagataki me vakatorocaketaki na vuli kei na veivakavulici ena tabanalevu (raica na iVoladusidusi 2: Veiliutaki ena Lotu [2010], 12.5).

Semineri

Na semineri e vakarautaka na vuli vakalotu ena loma ni macawa me baleti ira na itabagone. Na kena inaki me vukei ira na itabagone me ra kila ka dau vakararavi ki na ivakavuvuli ni Veisorovaki nei Jisu Karisito, me ra kilikili kaya ki na veivakalougatataki ni valetabu, ka vakarautaki ira, nodra matavuvale, kei ira tale eso ki na bula tawamudu kei Tamada mai Lomalagi. Era na vuli na qasenivuli ni semineri kei ira na gonevuli, ka ra sa vakayaloqaqataki mera bulataka, na ivakavuvuli ni kosipeli me vaka sa virikotori tu ena ivolanikalou kei na nodra vosa na parofita. Era na vakasaqara mera veivakavulici ka vuli ena Yalotabu ena ituvaki ni veilomani, veidokai, ka me vakainaki na kena tadolavi na sala ki na kila ka kei na veivakararamataki. Sa namaki vei ira na gonevuli mera vakaitavi kusarawa ena itovo ni vuli-ka ka soli na madigi mera vakamacala, veiwasei, ka vakadinadinataka na vunau ni kosipeli kei na kena ivakavuvuli. Era sa vakayaloqaqataki mera vulica ena veisiga na ivolanikalou, wilika na veitikina vakaivolatabu me baleta na vuli, ka cavuqaqataka rawa na veitikina ni ivolanikalou kei na ivakavuvuli vakaivunau taumada.