iVakarau ni Nodra Vakavulici na iTabagone

O na vakayacora vakacava na ivakavuvuli ni ivakarau ni veivakavulici ni iVakabula? Oqo e vica na vakatutu rawarawa sara. Me baleta na ikuri ni itukutuku, raica na iVoladusidusi 2: Veiliutaki ena Lotu (2010), 1.4, 3.2.

Vaqaqacotaki ni Matavuvale

Na vanua uasivi duadua vei ira na itabagone mera vulica ka bulataka na kosipeli o ya e nodra loma ni nodra vale, ena nodrau veidusimaki yalololoma na itubutubu ivalavala dodonu. Na loma ni nodra vale e bulataki kina na Karisito sa veivakarautaki vinaka duadua vei ira na itabagone mera ciqoma na cakacakatabu vakalotu ni kosipeli. (Raica Veituberi, Me iLutua ni Noda Bula,155– 174.)

Ena vuku ni ka oqo, sa vakarautaki tu kina na veimataisoqosoqo, itaviqaravi, kei na parokaramu ni Lotu (oka kina na ivola iTavi Vua na Kalou kei na Torocake Yadudua, Me iSakisaki ni iTabagone, kei na ivola lewenivuli ni itabagone) me tokoni ira na itubutubu ni ra vukei ira tiko na luvedra tagane kei na yalewa mera saumaki mai ki na kosipeli i Jisu Karisito.

Vakavakarau Vakayalo

E vakarota kina na Turaga, “Mo vulica taumada mo kila” ( V&V 11:21). E tiki tiko ni vakavakarau vakayalo o ya mo vulica mada vakai iko na vunau ko na laki vakavulica. Ena dusimaki iko na Yalotabu ki na veika bibi e veiganiti ka veivukei sara vei ira na itabagone. Kei na gauna o sasagataka kina mo bulataka tiko na veika o vakavulica, sa na rawa kina mo laki tukuna ni sa dina sara na kosipeli ni ko sa sotava vakai iko. (Raica Veituberi, Me iLutua ni Noda Bula,13– 23.)

Veivosakitaka Vata

Na nodra vukei na itabagone mera saumaki mai e gadrevi kina na nodra sasaga vata na itubutubu, iliuliu, daunivakasala, kei ira na qasenivuli, oka kina o ira na qasenivuli ni semineri. Veivosakitaka vata na veika me baleta na nodra gagadre na itabagone. Me kilai na veika era sa vulica tiko mai vale, ena lotu, kei na kena ena semineri me rawa ni ko yavutaki mai kina ni ko sa vakavulici ira. Na cakacaka vata vakaoqo ena rawa mo ni bulia kina e dua na vuli-ka kaukauwa sara vei ira na itabagone mai na kena ko ni via sasagataka tiko vakayadudua.

E vuqa sara tiko na madigi vei ira na itubutubu, qasenivuli, daunivakasala, kei na iliuliu mera na dau veivosaki vata. Oqo e vica na kena ivakaraitaki:

Na soqoni ni veiliutaki, me vakataka na matabose ni tabanalevu se bose ni komiti ni itabagone ni matabisopi.
Na veivosaki leleka ni se bera se sa oti na soqoni ni Lotu.
Veitaratara ena talevoni se imeli.

Veiqaravi vei ira na iTabagone

Na nodra vakavulici na itabagone e cecere sara mai na kena votai tiko vei ira na itukutuku. Na veivakavulici va-Karisito e oka kina na nodra vakasalataki ka vakayaloqaqataki na itabagone ena nodra sasaga yadudua mera bulataka na kosipeli ena veisiga. E rawa ni oka kina na nodra vukei ena taudaku ni gauna ni soqoni, kalasi, kei na itaviqaravi.

Tovolea mo lomani ira na itabagone me vakataka na nona dau lomani ira na Tamada Vakalomalagi. E raica o Koya na vinaka e tiko vei ira; e tu Vua na vosota ni ra sa toro cake tiko. E vakayaloqaqataki ira ena gauna mada ga ni ra saga tiko mera cakava na ka dodonu, ka sega vakadua ni dau biuti ira o Koya. (Raica Veituberi, Me iLutua ni Noda Bula,35– 45.)

Vakavulica na kosipeli

Ena veivakavulici taucoko ni kosipeli, na Yalotabu duadua ga na qasenivuli dina. Kevaka o vakasaqara na nona veidusimaki, ena tara na yalomu o Koya ka vakauqeti ira o vakavulica tiko.

E dua vei ira na sala vinaka me sureti kina na Yalotabu o ya mera vakaitavi na itabagone ena veivosakitaki ni ivolanikalou kei na nodra ivakavuvuli buta katakata na parofita bula. Ena vukei iko na ituvatuva ni vuli ena initaneti mo raica kina na ivurevure e veiganiti.

E tiko na gauna era na dau wasea mai kina na itabagone na veika vakayalo era sa sotava kei na nodra sa vakavukui vakayalo. E rawa ni ra cakava oqo ena lotu vakamatavuvale, ena kalasi se soqoni ni kuoramu, ena itaviqaravi ni Muavata, ni ra vulagi dokai ena lalai, se ena vuqa tale na gauna ni soqoni kei na gauna raraba eso. Ni ra veiwaseitaka vakai ira na nodra ivakadinadina, sa vakadinadina kina na Yalotabu, ka yaco mera vakararamataki taucoko. (Raica Veituberi, Me iLutua ni Noda Bula,57– 67.)