Ni sa Kidavaki mai

Kemuni na iTubutubu, Qasenivuli, Daunivakasala, kei na iLiuliu ni iTabagone lomani:

Ko ni sa kacivi mai vua na Turaga mo ni vukei ira na itabagone mera saumaki rawa mai ki na kosipeli. Sa dua dina na veivakalougatataki totoka oqo! Sa nomuni madigi oqo mo ni tauyavutaka e dua na veimaliwai ni bula taucoko vata kei ira na itabagone talei ka sa nuitaki kemuni kina na Turaga mo ni qarava. Ena nomuni sa kila vakavinaka na veika cecere era vinakata ka gadreva, ko ni sa na rawa ni vukei ira mera sotava vakai ira na veivakalougatataki ni kena vulici ka bulataki na kosipeli ena veisiga yadua.

Na tikina bibi ni nomu veiqaravi o ya na nomu vakavakarau vakayalo vakai iko ena veisiga yadua, oka kina na nomu masumasu, vulica na ivolanikalou, ka talairawarawa ki na ivunau. Keimami sa vakauqeti kemuni mo ni dinata na bulataka tiko na kosipeli ena kena inaki cecere cake mai na kena ka se bera mada ni se bau vakayacori. Ni ko vakayacora oqo, ko na kila vakavinaka kina na sala mo vukei ira kina na itabagone mera vulica na kosipeli ena nodra vulica kei na nodra vakabauta vakai ira, mera raica rawa kina vakai ira na dina ni kosipeli, ka mera vaqaqacotaka rawa kina na nodra dui matavuvale kei ira tale eso ena nodra wasea na veika era sa mai sotava, vuku vakayalo, kei na ivakadinadina.

Ni tubu cake na nomu lomani ira tiko na itabagone, ko na vakasinaiti ena gagadre mo vukei ira mera tauyavutaka e dua na ivakarau tudei ni masumasu yadua, vulica na ivolanikalou, ka talairawarawa ka na muataki ira sara mera saumaki mai. Masulaki ira tiko na itabagone ena veisiga, ka veivosaki vata kei ira na itubutubu, iliuliu, kei ira na qasenivuli me vakacokotaki kina na nomu sasaga. Ena yaco mo rawa-ka sara vakalevu ni ko veivakayaloqaqataki, daunivakasala, ka veitokoni vei ira na itabagone ena veimadigi yadua.

Sa rawa kivei ira yadua na Yalododonu Edaidai bula kilikili mera vakavulica na kosipeli ena ivakarau ni iVakabula. Ni ko vakamuria na nona ivakarau ni bula, ena vukei iko na Yalo Tabu mo kila na veika mo vakayacora. Ena yaco me tubu cake na nomu ivakadinadina, ena titobu sara na nomu saumaki mai, ka ko na vaqaqacotaki mo sotava na veibolebole ni bula oqo.

Me na vakalougatataki kemuni na Tamada Vakalomalagi ena nomuni qaravi ira tiko na Nona itabagone lomani.

Na Mataveiliutaki Taumada