E vakatauvatana vakacava na Turaga na dina ni kosipeli ki na veiyaya matata kei na veika sa sotavi oti?

O Jisu Karisito e sa Dauniveivakatavulici. E wasea o Koya na italanoa rawarawa eso, na vosa vakatautauvata, kei na ivakaraitaki dina ni bula ka vukei ira e vakatavulica o Koya mera kila deivaki na ivakavuvuli ni kosipeli. Sa rawa ni da vakayagataka na italanoa eso meda veivakatavulici me vakataka na iVakabula ni da vakatakila na veika eda sota kaya kei na ivakavuvuli ni kosipeli ki na vuravura wavoliti keda.

Mo vakarautaki iko vakayalo

Na vosa vakatautauvata cava i Jisu Karisito o dau nanuma vakawasoma, ka cava e vuna? Na veivakatauvatani cava tale e sa vukei iko ni kila deivaki na ivakavuvuli ni kosipeli?

Na vosa vakatautauvata cava i Jisu e rawa ni vakaibalebale cake vei ira na itabagone? Na veivakatauvatani cava tale e rawa ni vukei ira mera kila deivaki na ivakavuvuli ni kosipeli? Na cava e rawa ni ra vulica na itabagone me baleta na veivakatavulici mai na veivakatauvatani kei na italanoa eso a vakayagataka na iVakabula?

Vulica ena masumasu na ivolanikalou kei na ivurevure e ra. Na veivakauqeti cava o gadreva mo wasea vei ira na itabagone?

Maciu 20:1–15; 25:1–13, 14–30; Luke 8:4–15; 15:1–7, 8–10, 11–32; raica talega na vidio “The Prodigal Son” (iVakaraitaki ni italanoa vakaibalebale)

5:34

Maciu 18:1–6 (E vakayagataka na iVakabula e dua na gonelailai me vakatavulica kina na matanitu vakalomalagi)

Maciu 5:13–16; raica talega na vidio “Sermon on the Mount: The Beatitudes” (E vakatauvatani iratou na Nona tisaipeli na iVakabula ki na rarama ni kadrala)

2:9

L. Tom Perry, “Na iVunau kei na iVakavuvuli Era Tu ena Yavu ni Vakabauta,” Ensign se Liaona, Nove. 2013

Jeffrey R. Holland, “Na Tamata Cakacaka ena Were ni Vaini,” Ensign se Liaona, Me 2012, 31–33

David A. Bednar, “E Dodonu Mo Sucu Tale,” Ensign, se Liaona Me 2007, 19–22

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Sureta na itabagone mera vakamacalataka e dua na lotu vakamatavuvale se lesoni tale eso, e dua na vosa ni soqoni ni sakaramede, se dua na vosa ni koniferedi era nanuma ka veivosakitaka na vuna e veivakananumi kina.
Sureta na itabagone mera wasea e dua na italanoa era nanuma mai na dua na vosa ni koniferedi raraba wale tikoga oqo. Na cava era vulica mai na italanoa? Cava na vuna era nanuma kina ni a digitaka na daunivosa me vakayagataka e dua na italanoa me veivakatavulici?

Vulica vata

Na itaviqaravi yadua oqo ena vukei ira na itabagone mera kila deivaki na iwalewale ni vakayagataki ni vosa vakatautauvata kei na kena vakatauvatani eso ni ra veivakatavulici. Ena kena vakamuri na veivakauqeti ni Yalotabu, digitaka e dua se sivia ka na mana vinaka ki na nomu kalasi:

Sureti ira na itabagone mera cakava e dua na ivoladusi ena ulutaga oqo: ‘Caka Pikeli” kei na “Yaco mo Saumaki”. Kerea na itabagone mera wilika na vosa nei Elder David A. Bednar “E Dodonu mo Sucu Tale” ka vakatakila na veivakatauvatani e cakava o Elder Bednar me vakatavulica kina na ivalavala ni saumaki mai. Mo qai navuca ni sureta na itabagone mera droinitaka na iyaloyalo eso me vukei ira ni raitayaloyalotaka na veivakatauvatani. Solia na gauna vei ira na itabagone mera wasea kina e dua na veivakatauvatani mai na veika era sa sotakaya ka rawa ni ra vakayagataka me vakatavulica e dua na dina ni kosipeli.
Kerea na itabagone yadua me vakasamataka e dua na nona vosa vakatautauvata ka vakasaqara ena ivolanikalou. Kevaka era gadreva na vakatutu, navuca mo wasea e dua na vosa vakatautauvata ka vakaturi ena ituvatuva oqo. Sureta na itabagone mera tukuna tale ki na kalasi na vosa vakatautauvata era sa digitaka ka wasea na vuna e vakaibalebale kina vei ira. Na cava e sa rui dau dua kina na iwalewale mana ni veivakatavulici na vosa vakatautauvata? Navuca mo solia na gauna vei ira na itabagone mera bulia na nodra vosa vakatautauvata ka vakatavulica e dua na dina ni kosipeli. O na rairai tuberi ira ena nomu vakatututaka mera tekivuna ena navuci ni ivakavuvuli ni kosipeli cava era vinakata mera vakatavulica. Ka rawa mera na qai vakasamataka e dua na ituvaki ni nodra vosa vakatautauvata ka na kilai levu kivei ira na tamata era vakatavulica tiko ka vola e dua na italanoa ka na vakatavulica na ivakavuvuli ni kosipeli.
Vakaraitaka vei ira na itabagone e dua na talevoni veikauyaki se dua na kena iyaloyalo, ka kerei ira me ra vakatautauvatataka na talevoni kei na dua na ivakavuvuli ni kosipeli. Sureti ira me ra wilika na iotioti ni lima na parakaravu ni bera na ulutaga “Tauyavu kei na iVakarau ni Matabete” ena vosa nei Elder L. Tom Perry “Na iVunau kei na iVakavuvuli Era Tu ena Yavu ni Vakabauta” ka veivosakitaka na ivakatautauvata a cakava o koya. Ena mua ni nona vosa, e sureti ira na itabagone o Elder Perry me ra vulica na ivunau ena Yavu ni Vakabauta. Wilika vata vakalasi na nona veisureti, ka kerei ira yadua na itabagone me ra vulica na ivunau e vakavuvulitaki ena dua na Yavu ni Vakabauta ka lako mai ki kalasi ena macawa mai qo ka vakarau mai me ra veivakavulici vakalailai ena ivunau oqori ni vakayagataki e dua na ivakatautauvata.
Vakaraitaka e dua na vidio e vakaturi ena ituvatuva oqo se sureti ira na itabagone me ra wilika ena ivolanikalou na ivakaraitaki eso ni nona vakatautauvatataka na iVakabula na kosipeli ki na dua na iyaya kilai levu. Cava na vuna e veivakatavulici kina ena sala vakaoqo o Jisu? Kauta mai ki na kalasi eso na iyaya ni veisiga, vaka na sovu, koini, ki, vatu, se kakana. Sureta na itabagone mera digitaka e dua na iyaya ka vakatavulica e dua na ivakavuvuli ni kosipeli ni vakayagataki tiko na iyaya oya.
Sureta na itabagone mera wilika na vosa vakatautauvata ni tamata cakacaka eso ena were ni vaini ena Maciu 20:1–15. Kerei ira mera veivosakitaka eso na sala e rawa ni vakayagataki kina na vosa vakatautauvata oqo ki na nodra bula. Sureti ira mera wilika na vosa nei Elder Jeffrey R. Holland “The Laborers in the Vineyard” ka veivosakitaka na dina ni kosipeli e vakatavulica okoya ena vakayagataki ni vosa vakatautauvata oqo (mo nanuma mo qai raica matua na veitiki ni vosa ka na veiganiti vakalevu sara vei ira na itabagone). Kerea na itabagone mera digitaka e dua tale na vosa vakatautauvata mai na ivolanikalou ka tukuna ki na kalasi se cava era vakila ni vakaibalebaletaki vei ira. Cava na vuna e dua kina na sala momona ni nodra vukei eso tale mera vulica na ivakavuvuli ni kosipeli na vosa vakatautauvata?

Kerei ira na itabagone me ra wasea na veika era sa vulica nikua. Era sa kila deivaki li na iwalewale ni veivakatavulici ena vakayagataki ni vosa vakatautauvata kei na veivakatauvatani eso? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Maqosa eso ni vuli ena kosipeli

Kilai vakavinaka ni ivakatakarakara. Ni gadrevi me kilai vakavinaka na vosa vakatautauvata kei na ivakatakarakara ena ivolanikalou, e gadrevi kina vei ira na itabagone mera rawa ni kila na ivakatakarakara, kila na veitiki ni ivakatakarakara oqo, ka vakadewataki ira. E dua na sala me kilai kina na ivakatakarakara oqo o ya me ra laurai na vosa vakaoqo vaka, vakataki, vakataka na, me vaka se vaka tu o ya. Sa rawa ni ra qai cakava na itabagone e dua na lisi ni veitiki ni ivakatakarakara. Ni gadrevi me vakadewataki na ivakatakarakara, sa rawa mera raica na ivurevure tale eso ni Lotu (me vakataka na mekasini ni Lotu, vosa ni koniferedi, kei na ivolanikalou tale eso) ka raica na kena rawa ni vukei ira na ivakatakarakara mera kila vakavinaka kina e dua na ivakavuvuli ni kosipeli. Vakayaloqaqataki ira mera cakava oqo ena gauna era sotava kina e dua na vosa vakatautauvata se ivakatakarakara ni ra dui vulica tiko na nodra ivolanikalou.

Veisureti me caka

Sureta na itabagone mera vakayagataka na veivakatauvatani eso se vosa vakatautauvata me vakatavulici kina e dua tale ena dina ni kosipeli. Kerei ira mera vakasamataka eso na ituvaki e rawa ni ra vakatavulica kina na dina oqo, me vaka na lotu vakamatavuvale, ena dua na vosa ni soqoni ni sakaramede, se vata e dua na itokani.