Au na vukei ira vakacava na tani me ra vulica na veika me baleta na Tamada Vakalomalagi?

E vuqa na tamata ena vuravura nikua era sega sara ga ni kila na Kalou se era vakasamataka tiko e dua na ka Vakalou levu ka duatani sara mai na veika dina me baleti Koya. Me vaka ni sa tu vei keda na taucoko ni kosipeli, sa rawa ni da vukei ira na tani me ra kila na veika dina me baleta na Tamada Vakalomalagi kei na kedra isema Vua.

Mo vakarautaki iko vakayalo

Na veika cava soti o sa bau sotava ena nomu veivakavulici vei ira na tani se o sa vakavulici kina me baleta na Kalou na Tamada? Na cava na vuna o nanuma kina ni na veivuke mo kila na nodra vakabauta o ira o vakavulica?

Na madigi cava soti a basika vei ira na itabagone me ra vakamacalataka kina vei ira tale eso na nodra vakabauta me baleta na Kalou na Tamada? E rawa vakacava ni o vukei ira ena nodra vakarautaki ira ki na veimadigi oqo?

Vulica ena masumasu na ivolanikalou kei na ivurevure eso oqo. Na cava o nanuma ni na veivuke vakalevu duadua vei ira na itabagone o vakavulica?

Alama 18:24–40; 22:4–23 (Rau vakavuvulitaka vei ira na Tui ni Leimani o Amoni kei Eroni me baleta na Kalou)

Alama 30:12–15, 37–53 (Veisaqasaqa vata kei Alama o Korio me baleta na tiko ni dua na Kalou)

“Na Kalou sai Koya na Tamada Vakalomalagi Dauloloma,” Vunautaka na Noqu Kosipeli (2004), 33–34

“Kalou na Tamada,” True to the Faith (2004), 50–52

Veivakavulici ena iVakarau ni iVakabula

Na iVakabula e kilai ira ka ciqomi ira e dau vakavulica. A kunea o Koya na veisala bibi eso me vukea na nodra vuli kei na tubu. Na cava o kila me baleti ira na itabagone o vakavuvulitaka? Na sala cava e rawa ni o ciqomi ira vakavinaka cake kina? Na sala ena veivakauqeti kina oqo ki na ivakarau ni nomu veivakavulici?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Kerei ira na itabagone me ra wasea e dua na ka era se qai vulica walega me baleti iratou na Lewetolu Vakalou. Na cava beka era lomatarotarotaka tiko? E rawa vakacava ni ra veivukevukei me kunei na isau ni nodra taro?
Sureti ira na itabagone me ra taura e rauta ni dua na miniti. me ra vola na veika eda vakabauta, me baleta na Tamada Vakalomalagi (kevaka e ganita, dusimaki ira ki na “ Na Kalou sai Koya na Tamada Vakalomalagi Dauloloma,” Vunautaka na Noqu Kosipeli, 33–35; se na “Kalou na Tamada,” Tudei ena Vakabauta, 50–52). Sureta e vica vei ira me ra wasea na veika era vola. Kerei ira na itabagaone me ra wasea e dua ga na ka era sa sotava, ka ra a veitalanoataka kina na nodra vakabauta me baleta na Kalou, vata kei na dua e duatani na nona vakabauta (se rawa ni o wasea e dua ga na ka o sa sotava). Na cava era vulica rawa mai na gauna oqori?

Vulica vata

Na veitaviqaravi e ra ena vukei ira na itabagone me ra vulica me ra vakamacalataka na nodra vakabauta me baleta na Kalou vei ira na tani. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Ni dikeva vakalasi se vakaiwasewase lalai na Alama 30:12–15, 37–53. Kerei ira eso na itabagone me ra tukuna eso na vuna e sega ni vakabauta kina na Kalou o Korio, ka kerei ira na kena vo me ra vaqara na vuna e vakabauta kina o Alama. Era kila beka na itabagone eso na tamata e tautauvata kei Korio na ivakarau ni nodra rai? Sureti ira na itabagone me ra vakananuma mada na sala e rawa ni ra vukea kina e dua na itokani ka sega ni vakadeitaka rawa tiko se tiko dina na Kalou. Solia eso na gauna mo vukei ira na itabagone me ra tuvalaka na veika e rawa ni ra cakava ena veigauna vakaoqori. Na cava soti e rawa ni ra wasea? Na ivakarau cava beka e ra na rawa ni wasea vakadodonu kina na ivakadinadina?
Sureta na veimama ni kalasi me ra wilika na Alama 18:24–40, ka sureta na ikarua ni veimama me ra wilika na Alama 22:4–23. Na cava e rawa ni ra vulica me baleta na veivakavulici mai na nodrau ivakaraitaki o Amoni kei Eroni? Na cava erau a cakava o Amoni kei Eroni me rau vukei Lamonai kei na tamana me rau kila na kena ituvaki na Kalou? Na cava na vuna erau tekivu ruarua kina o Amoni kei Eroni ena nodrau tarogi Lamonai kei tamana ena nodrau vakabauta me baleta na Kalou? Kerei ira na itabagone me ra wasea na veika era vulica ka veitalanoataka na sala e rawa ni ra vakayagataka kina ni basika na madigi me ra vakamacalataka na nodra vakabauta me baleta na Kalou vei ira na tani.
Ena nona veivakadonui na bisopi, sureta e dua se sivia na saumaki mai me ra lako mai ki na kalasi ka wasea na veika era vakabauta me baleta na Kalou ni bera ni ra mai lewena na Lotu kei na sala e tara kina ka vakayarayarataka kina na nodra vakabauta na nodra vulica na kosipeli vakalesui mai. Sureti ira na itabagone me ra vaqara na ivolanikalou e tokona na kila vou era sa mai rawata na saumaki mai me baleta na Tamada Vakalomalagi.

Kerei ira na itabagone me ra wasea na veika era sa vulica nikua. Na cava era sa bau vakila se vakanananu kina? Era sa kila beka na sala me ra vukei ira kina na tani me ra vulica na veika e baleta na Tamada Vakalomalagi? E tiko tale beka eso na nodra vakatataro? Ena yaga beka me tauri vakalevu na gauna ena ulutaga oqo?

Me Veivuke ena Veivakavulici

“Vakaraitaka na vakarokoroko kei na veinanumi me baleta na isaunitaro cala. Raica me taleitaka tikoga na tamata yadua na vakaitavi. E rawa ni o taura me nomu na kena icolacola ena nomu rawa ni kaya, ‘Vosoti au. Au vakabauta ni sega ni matata na noqu taroga na taro oya. Meu tovolea tale mada’” (Na Veituberi, Me iLutua ni Noda Bula [1999], 69).

Veisureti me caka

Tarogi ira na itabagone, se cava era sa vakauqeti mera cakava, baleta na ka era sa vulica nikua. Vakauqeti ira me ra cakava na ka era sa vakila. Vakasaqara na Yalotabu ena nomu vakasamataka ena masumasu na veika mo na cakava.