E rawa vakacava ni vukei au na iVola i Momani me vakaukauwataka noqu vakabauta ena Veisorovaki i Jisu Karisito?

Na inaki levu ni Vola i Momani sa ikoya me vakaraitaka na dina vei ira kece na tamata ni o Jisu na Karisito. E vakavulica “mera lako Vua na tamata kecega, kevaka e sega [eda] na sega ni vakabulai” (1 Nifai 13:40). E tu kina e vuqa na ivakaraitaki ni iapositolo yalodina ka ra vakabauti Jisu Karisito ka ciqoma na veivakalougatataki ni Nona Veisorovaki. O ira na parofita ni Vola i Momaniera wasea na ivakadinadina kaukauwa ni i Vakabula, “mera kila kina na noda kawa na sala [me] bokoci kina na [noda] ivalavala ca” (2 Nifai 25:26).

Mo vakarautaki iko vakayalo

E kauti iko vakacava na iVola i Momani mo voleka sara vei Jisu Karisito? Na tiki ni ivolanikalou cava so ena iVola i Momani e sa vakaukauwataka nomu ivakadinadina baleta na i Vakabula?

E sa vakaukauwataka vakacava na iVola i Momani na nodra vakabauta o ira na itabagone o vakavulica? E rawa vakacava mera veivakaukauwataki vakaiira ena nodra dui vakabauta yadua me baleti Jisu Karisito ena vakayagataki ni iVola i Momani?

Ena nomu vulica na ivolanikalou ena masumasu, vakabibi na iVola i Momani, na cava o vakila me na vukei ira na itabagone me vakaukauwataka na nodra vakabauti Jisu Karisito?

Draunipepa ni ulutaga kei na ivakamacala ki na iVola i Momani

2 Nifai 25:26 (O ira na Nifai era vunau ka vola me baleti Karisito me vakaukauwataka nodra vakabauta na luvedra)

3 Nifai 27:13–14 (Na i Vakabula e vakadinadinataka kivei ira na Nifai na Nona ilesilesi vakalou)

Neil L. Andersen, “Na iVola i Momani: Vaqaqacotaki ni Vakabauta ena Noda Gauna,”Ensign or Liahona, Oct. 2011, 39–45

Vidio: “Book of Mormon Introduction”

Veivakavulici ena ivakarau ni Turaga

Ena veituvaki vakayadua, sa dua na ivakaraitaki o Jisu ka daunivakasala kivei ira e vakavulici ira. E vakavulica o Koya na ivakarau ni masu, veivakavulici, loloma, kei na veiqaravi ena Nona ivakarau ni bula. E rawa vakacava me vakauqeti ira na itabagone o vakavulica na nomu ivakaraitaki? Na veika cava o sotava vakatamata e rawa mo wasea ka na vukei ira na itabagone mera kila na kena vakaukauwataka vakacava na iVola i Momani na nomu vakabauti Jisu Karisito?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa me vukei iko:

Na cava so era sa sotava ka rawa me vakaukauwataka na veika era sa vulica me baleti Jisu Karisito kei na Veisorovaki?
Mera vakasamataka mada na itabagone se vakacava ke dua na nodra itokani e tarogi ira se ra lotu Vakarisito li na Momani. Bolei ira mera vakayagataka na ivolanikalou mai na iVola i Momani (me vaka na ivolanikalou era vakatututaki ena idusidusi oqo) me isaunitaro oqo.

Vulica vata

Na itaviqaravi yadua e koto oqori e ra e rawa me vukei ira na itabagone mera kila na kena vakaukauwataki vakacava na nodra vakabauti Jisu Karisito na iVola i Momani. Muria na veidusimaki ni Yalotabu, digitaka e dua se sivia ka na ganita na nomu kalasi:

Vola ena papa ni volavola “E rawa vakacava ni vukei au na iVola i Momani me vakaukauwataka na noqu vakabauta na Veisorovaki i Jisu Karisito? Wasea na kalasi ena iwasewase lalai, ka lesia na iwasewase yadua mera wilika e dua na tiki ni itukutuku nei Elder Neil L. Andersen “Na iVola i Momani: Vaqaqacotaki ni Vakabauta ena Noda Gauna.” Sureti ira mera raica na papa ni volavola me baleta na isaunitaro. Vakauqeta na iwasewase yadua mera tukuna nodra isaunitaro ki na kalasi, salavata kei na dua na tiki ni ivolanikalou era kunea ni vakaibalebale vakalevu mai na nodra iwase ni ilesilesi.
Vakaraitaka na vidio “Book of Mormon Introduction.” Sureti ira na itabagone mera cakacaka vata vakaitokani mera tuva e dua na vidio lekaleka me nodra vakataki ira ka ra wasea tiko kina na kena vakayarayarataka vakacava na iVola i Momani na nodra ivakadinadina ni i Vakabula kei na Nona Veisorovaki. E rawa vakacava mera vakamacalataka se cava na iVola i Momani? Na veitikina se italanoa cava soti era na wasea? Vakauqeti ira mera vakasamataka na veigaunisala e rawa mera wasea kina na vidio vata kei ira eso tale.
Ena veivakadonui mai vua na bisopi, sureta e dua e qai curuvou me wasea na veika e sotava ka rawata kina e dua na ivakadinadina ni i Vola i Momani. Kerei koya me lako mai ka vakavakarau me wasea eso na ivolanikalou e taleitaka mai na iVola i Momani me baleta na Veisorovaki i Jisu Karisito. E kauti koya mai vakacava na iVola i Momani me voleka cake sara vua na i Vakabula? A vukei koya vakacava me kila vakavinaka cake na Nona ilesilesi? Sureti ira na lewenikalasi mera wasea nodra dui ivakadinadina kei na ivolanikalou taleitaki me baleti Jisu Karisito mai na iVola i Momani.
Duavata ena dua na kalasi, vakasamataka nodra ivakaraitaki na tamata ena iVola i Momani ka ra a veivutuni ka ciqoma na veivosoti ni nodra ivalavala ca (me vakataki Alama na Gone, Inosi, se o Lamoni na Tui). Wilika eso nodra italanoa ena iVola i Momani. Na cava e vakavulica vei keda me baleta na Veisorovaki na veika era sotavi oqo?

Kerei ira na itabagone mera wasea na veika era sa vulica nikua. Era kila beka li me rawa ni vakaukauwataka vakacava na iVola i Momani na nodra vakabauta ena Veisorovaki? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Solia na nomu ivakadinadina ena veigauna e vakauqeti iko kina na Yalo Tabu, me kua ni qai yaco ga ni sa tini na lesoni. Mo dau vakarautaka tale ga na gauna vei ira na nomu lewenikalasi mera solia kina na nodra ivakadinadina” (Na Veituberi, Me iLutua Ni Noda Bula, 51).

Veisureti mera bulataka

Sureti ira na itabagone mera vakayagataka na iVola i Momani me vakaukauwataka na nodra vakabauti Jisu Karisito. Solia vei ira na madigi ena veikalasi mai liu mera wasea na ivolanikalou era kunea ena iVola i Momani ni vakadinadinataki Jisu Karisito kei na Nona Veisorovaki.
Wasea nomu ivakadinadina ni iVola i Momani e dua talega na ivakadinadina i Jisu Karisito.