Meu na vakamacalataka vakacava na bibi ni vakamau kei na matavuvale vei ira na tamata?

Ena yaco ki na vuqa na tamata na madigi mera na wasea yani na kosipeli vei ira na tamata.Ena vuku ga ni levu sara na nanuma veisaqasaqa baleta na vakamau kei na matavuvale sa tu e vuravura nikua, sa ka bibi kina na noda rawa ni vakamacalataka na bibi ni vakamau kei na matavuvale ena ituvatuva nei Tamada Vakalomalagi.Ni da cakava oqo, e dodonu meda na vakamacalataka vakamatata ka vakarawarawa na noda vakabauta, ena veidusimaki ni Yalotabu, mera na kila vakavinaka kina na tamata na dina ni kosipeli.

Mo vakarautaki iko vakayalo

O sa vukei ira vakacava na tamata mera kila vakavinaka na nomu vakabauta me baleta na vakamau kei na matavuvale? Ena sala cava beka o sa vakamacalataka kina na ivakavuvuli ni vakamau tawamudu vei ira na itokani era sega ni lewe ni Lotu?

Na veika e sotavi kei na vakasama cava sa vakauqeta tiko na nodra nanuma na itabagone baleta na vakamau kei na matavuvale? O na vakarautaki ira vakacava mera vakamacalataka rawa na dina e baleta na vakamau kei na matavuvale vei ira na tani?

Vakayagataka na ivurevure e ra me kilai vakavinaka cake kina na sala ni kena vakamacalataki na bibi ni vakamau kei na matavuvale. Na nomu sa dau vakamacalataka tiko na ivakavuvuli oqo vei ira na tani ena vukei iko me mana kina na nomu vakavulica. Na itaviqaravi e ra ena ituvatuva oqo ena vukei ira na itabagone mera vulica na veivakavulici.

“Na Matavuvale: “Ai Vakaro ki Vuravura Raraba,” Ensign se Liaona, Nove. 2010, 129

Neil L. Andersen, “Covulaca Vakayalo,” Ensign se Liaona, Me 2014, 18–21

D. Todd Christofferson, “A Cava na Vu ni Vakawati, A Cava na Vu ni Matavuvale,” Ensign se Liaona, Me 2015, 50–53

“Vakamau,” Tudei ena Vakabauta (2004), 145–148

“Vakamau Tawamudu” kei na “Veivaletabu kei na iVola ni Kawa,” Vunautaka na Noqu Kosipeli (2004), 93–95

Semata vata

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava vata kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama e koto e ra ena rawa ni vukei iko:

Sureti ira na itabagone mera wasea na nona sa bulataka tiko e dua na lewe ni nona matavuvale e dua na ivakavuvuili ni kosipeli vei ira.
Sureta e dua e vosataka e dua tale na mataqali vosa (ke rawa, me dua na lewenikalasi) me gole mai ki na kalasi ka vosataka ena vosa o ya. Sureti ira na itabagone mera vakamacalataka ni nodra vakarogoca e dua tale na mataqali vosa era sega ni kila e vaka na vakarorogo ki na nodra vakamacalataka na lewe ni Lotu na dina ni kosipeli kivei ira na tamata ni vakayagataki na vosa e sega ni kilai vakalevu, me vakataka na vakamau tawamudu, veivauci, se matanitu vakasilesitieli.

Vulica vata

Na itaviqaravi yadua e ra ena vukei ira na itabagone mera vulica na sala mera vakamacalataka rawa kina vei ira eso na bibi ni vakamau kei na matavuvale. Muria na veivakauqeti ni Yalotabu, ena nomu digitaka edua se sivia ka na ganita na nomu kalasi:

Taroga vei ira na itabagone kevaka era sa bau tarogi mada ena dua na gauna me ra vakamacalataka na ile ni Lotu ena veiwatini vakamataqali vata. Na cava era a kaya? Sureti ira me ra wilika na veiparakaravu digitaki eso mai na vosa nei Elder D. Todd Christofferson “A Cava na Vu ni Vakawati, A Cava na Vu ni Matavuvale” se na iwase eso ni vosa nei Elder Neil L. Andersen “Covulaca Vakayalo.” Na cava era sa vulica na itabagone me baleta na bibi ni nodrau vakamau e dua na tagane kei na yalewa? Vakauqeti ira na itabagone me ra tuvalaka se dramataka na ka e rawa ni ra tukuna ena dua na gauna e muri ni donumaki ira na madigi me ra vakamacalataka na nodra nanuma me baleta na vakamau.
Sureti ira na itabagone mera vakasamataka ka vola ena papa na veika era na taroga o ira na matalotu tale eso me baleta na vakamau kei na matavuvale, me vakataka, “Na cava na vuna meu vakamau kina ka vakaluveni?” Kerei ira na itabagone mera digitaka eso na taro sa volai tu ka vakasaqara na kena isau mai na ivolanikalou (me ivakaraitaki, raica na kena era tukuni tiko ena iwasewase “Vakamau” kei na “Matavuvale” ni Tudei ena Vakabauta vakakina ena “Na Matavuvale: Ai Vakaro ki Vuravura Raraba”). Vakauqeti ira na itabagone mera vakarautaka e dua na isau ni taro dua na miniti era sa digitaka, ka kakua ena vosa se malanivosa ena rairai sega ni matata vei ira eso, me vakataka na vakamau vakaselesitieli se veivauci. Solia na gauna mera wasea kina na nodra isau ni taro.
Mera qai vola na itabagone e dua na itukutuku kaburaki me baleta na bibi ni vakamau kei na matavuvale. Sa rawa me dua ga na itukutuku lekaleka e rawa ni tabaki ena niusipepa ni koronivuli se toqai ena dua na blog. Sureti ira na itabagone mera wasea ki na kalasi na veika era sa vakarautaka.
Na kalasi, me wilika na “Matavuvale” ena Me iSakisaki ni iTabagone. Sureti ira na itabagone mera vakavakarau mera vakavulica eso na ivunau era sa vulica baleta na matavuvale kivei ira na gone ena Lalai. Me kena ivakaraitaki, sa rawa mera vakavulici ira na gone ena nodra taroga “Na cava e bibi kina na matavuvale?” Sureti ira mera bulia e dua na ituvatuva mena vukei ira mera vakamacalataka vakarawarawa ka vakalekaleka na ivakavuvuli o ya. Ena veivakadonui nei bisopi kei na mataveiliutaki ni Lalai, vakarautaki ira na itabagone mera vakavulica na nodra lesoni. Ni oti na nodra veivakavulici, kerei ira mera veivosakitaka na sala era a vakavulica kina na ivakavuvuli ni kosipeli oqo.
Ena veivakadonui nei bisopi, sureti rau na daukaulotu tudei me rau wasea ki na kalasi na nodrau dau vakamacalataka na vunau ni vakamau kei na matavuvale vei ira eso. Wasea vakarua na kalasi, kerea e dua na ilawalawa me vakarau vakavulica na vakamau tawamudu kei na ikarua ni ilawalawa me vakavulica na valetabu kei na tuva kawa, ena nodrau vakayagataka na ivurevure e tiko ena ituvatuva oqo (se na kena era rawa ni raica). Ni oti na nodra vakarautaka na ivakamacala e rawarawa ka lekaleka ni nodra ulutaga, sureti ira na itabagone mera vakavulica vua e dua mai na ilawalawa ka dua na vunau era sa vulica.

Kerei ira na itabagone me ra wasea na veika era sa vulica nikua. Era sa kila vakavinaka beka na sala mera vakamacalataka kina na bibi ni vakamau kei na matavuvale vei ira na tamata? Na cava era sa bau vakila se vakanananu kina? E tiko beka eso tale na nodra vakatataro? Ena yaga beka me na tauri vakalevu cake na gauna ena iulutaga oqo?

Me Veivuke ena Veivakavulici

“Na veivosaki vakailawalawa lalai ena rawa ni ra dau vakaitavi kina o ira na lewenikalasi era sega ni dau vakaitavi kei ira na sega ni dau taleitaka na lesoni” (Veituberi, Me iLutua ni Noda Bula [1999], 83).

Veisureti me caka

Tarogi ira na itabagone, se cava era sa vakauqeti kina me ra cakava baleta na veika era sa vulica nikua. Vakauqeti ira mera cakava na ka era sa vakila. Vakasamataka na sala e rawa mo vakamuria.