Au na vakarautaki au vakacava meu ciqoma na cakacaka vakalotu ni valetabu?

Ni se bera mada ga ni da ciqoma na cakacaka vakalotu ni valetabu, sa rawa meda vakarautaki keda meda bula kilikili tiko meda curuma na valetabu, maroroya tiko na veiyalayalati eda sa cakava oti, ka vakayacora me tiki ni noda bula na valetabu. Sa rawa talega meda vulica na ivolanikalou kei na nodra vosa na parofita meda vulica vakalevu cake kina na cakacaka vakalotu ni valetabu.

Mo vakarautaki iko vakayalo

Kevaka o sa ciqoma oti na cakacaka vakalotu ni valetabu, o a vakarautaki iko kina vakacava?

Na cava beka o sa rogoca se raica mai vei ira na itabagone o sa vukei kina mo kila vakavinaka na veika era sa vakila me baleta na valetabu? Na cava era sa cakava tiko mera vakarautaki ira kina ni ciqoma na cakacaka vakalotu ni valetabu?

Me kilai: Sa rawa mo vakatura vei nomu bisopi me vakarautaka mai na tabanalevu na ilavelave ni ivolalailai na Temples of The Church of Jesus Christ of Latter-day Saints (09339) me veivuke vei ira na itabagone ena vakavakarau ki na nodra curuma na valetabu.

Wilika ena masumasu na ivolanikalou kei na ivurevure oqo. Na cava o nanuma ena vukei ira na itabagone ena nodra kakavaki tiko yani mera ciqoma na cakacaka vakalotu ni valetabu?

Same 24:3–4; V&V 97:15–17 (Sa dodonu meda savasava me rawa ni da curuma na vale ni Turaga)

Quentin L. Cook, “Raici Iko ena Valetabu,”Ensign se Liaona, Me 2016, 97–101

Quentin L. Cook, “Waqa Qaqa ka Vakataki Bristol : Mo Kilikili Vaka-Valetabu—ena Gauna Vinaka kei na Gauna Ca,” Ensign se Liaona, Nove. 2015, 39–42

Russell M. Nelson, “Vakavakarau ena Veivakalougatataki ni Valetabu,” Ensign se Liaona, Okoto. 2010, 40–51

Linda K. Burton, “Vakarautaki ena iValavala ka Sega ni Se bau Kilai,” Ensign se Liaona, Nove. 2014, 111-14

“Me Tiki tiko ni Noda Bula na Valetabu,” Ensign se Liaona, Okoto. 2010, 76–78

“Taro dau Tarogi Vakalevu,” Ensign se Liaona, Okoto. 2010, 79–80

“iTukutuku kivei Ira na iTabagone mai na Mataveiliutaki Taumada,” Me iSakisaki ni iTabagone (2011), ii–iii

Vidio: “Always in Our Sights”

Semata vata

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava vata kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama e koto e ra ena rawa ni vukei iko:

Sureti ira na itabagone mera wasea na veivakararamataki vou sa yaco vei ira ena nodra vulica tiko na veika e baleta na cakacaka vakalotu kei na veiyalayalati ena nodra kalasi se ena nodra vuli yadua.
Sureti ira na itabagone mera wilika na “ iTukutuku mai na Mataveiliutaki Taumada, ” ena Me iSakisaki ni iTabagone (ii-iii). Ni ra sa wilika oti na itukutuku, kerei ira mera wasea na vuna era vakabauta kina me digitaki na iyaloyalo ni valetabu me waqa ni ivolalailai oqo.

Vulica vata

Na itaviqaravi yadua e ra ena vukei ira na itabagone mera vakavakarau ki na nodra vakaitavi ena cakacaka vakalotu ni valetabu. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

E dua vei ira na sala bibi ka rawa ni ra vakarautaki ira kina na itabagone mera curuma yani na valetabu sa ikoya na nodra bula kilikili tiko ena gauna saraga oqo. Vakaraitaka na vidio ni imatai ni tolu na miniti ni vosa nei Elder Quentin L. Cook “Waqa Qaqa ka Vakataki Bristol : Mo Kilikili Vaka-Valetabu—ena Gauna Vinaka kei na Gauna Ca.” Kerei ira na itabagone mera wasea na sala e tauvatana kina kei na bula kilikili kaya na valetabu na veivakatauvatani nei Elder Cook. Wasewasei ira na itabagone kina tolu na ilawalawa ka sureta na ilawalawa yadua me taleva e dua vei ira na tolu na ivakavuvuli ni bula kilikili nei Elder Cook. Kerei ira na ilawalawa yadua me vakavulica ki na vo ni kalasi na veika era sa vulica. Vakarautaka vei ira na itabagone na gauna mera tuva kina na veilalawa mera bulataka kina na veiivakavuvuli sa vakatura o Elder Cook.
Vakaraitaka na vidio “Always in Our Sights,” ka sureti ira yadua na lewe ni kalasi me ra vakasamataka e dua na tiki ni ivolanikalou e nanuma o koya ni sema tiko ki na itukutuku ena vidio (vakaraitaka vei ira na iwalewale ni kena kunei na ivolanikalou ena Topical Guide se iDusidusi Vakamatanivola ki na iVolatolu). Kerei ira na itabagone me ra wasea na nodra ivolanikalou ka vakamacalataka na veika e vakavulica na veitikina me baleta na vakavakarau ni gole ki valetabu.Vukei ira na itabagone me ra vakasamataka na sala eso mera “raici ira ena valetabu,” me vaka a vakatura o Elder Quentin L. Cook ena nona vosa “Raici Iko ena Valetabu.” Sa rawa me ra ukutaka na kadi eso ena ivolanikalou era sa raica rawa ka vakabira na kadi ena nodra iloilo se ena dua na vanua taleitaki e nodra vale me ra nanuma tiko kina na nodra lalawa me ra ciqoma na veivakalougatataki ni valetabu. Na yalayala kei na veisureti cava era rawa ni raica na itabagone ena vosa nei Elder Cook?
Me wilika na kalasi, na Same 24:3–4, ka tarogi ira na itabagone na cava beka na ibalebale me savasava kina na ligadra kei na yalodra. Na cava e lavaki kina vei koya me curuma na valetabu me na
savasava tiko vakayalo? (raica na V&V 97:15–17). Sureta e dua na lewe ni matabisopi ki na kalasi me vakamacalataka na cava me cakava e dua na tamata me bula kilikili ni vaka-ivolatara ni valetabu. Na cava beka ena vakatura o koya mera cakava na itabagone ena vakavakarau ni kena ciqomi na cakacaka vakalotu ni valetabu? Vakayaloqaqataki ira na itabagone mera dau taro.
Lesi ira yadua na itabagone mera wilika e dua na iwasewase ni itukutuku nei Peresitedi Russell M. Nelson “Vakavakarau ki na Veivakalougatataki ni Valetabu.” Sureti ira na itabagone mera wasea na veika era sa vulica mai na nodra iwasewase o ya me baleta na vakavakarau mera curuma na valetabu. Na cava eso tale na ka era kurabuitaka ena itukutuku nei Peresitedi Nelson?
Digitaka na taro eso mai na itukutuku “Taro dau Tarogi Vakalevu” o nanuma ni veiganiti vinaka kei ira na itabagone ena nomu kalasi, ka vola na taro oqo ena vava ni volavola. Vakarautaka na tiki ni pepa eso ka vola kina na isau ni taro mai na itukutuku. Mera qai digitaka na itabagone yadua e dua na taro mai na vava ni volavola ka raica na kena isau ena pepa o sa vakarautaka. Sureti ira na itabagone mera wasea e dua na rai vakatitobu era sa kunea.
E vakayaloqaqataki keda na vosa nei Sisita Linda K. Burton “Vakarautaki ena iValavala ka Sega ni Se Bau Kilai,” meda vakavakarau ki na ”tiri vakayadudua“ ni valetabu. Na cava e mana cake kina meda vakavakarau ki na ”tiri vakayadudua“ ni cakacaka tabu vakalotu mai na kena e vakayacori ga vakadua? Sureti ira na itabagone mera vola eso na ivakarau tudei ena vukei ira mera vakavakarau kina ki na valetabu. Me baleta na vakasama eso, sa rawa mera raicalesu na vosa nei Sisita Burton.

Kerei ira na itabagone me ra wasea na veika era sa vulica nikua. Na cava era sa bau vakila se vakanananu kina? Era sa kila vakavinaka tiko beka na sala mera vakavakarau kina ki na cakacaka vakalotu ni valetabu? E tiko tale beka eso na nodra vakatataro? Ena yaga beka me tauri vakalevu na gauna ena ulutaga oqo?

Maqosa eso ni vulica na kosipeli

Vakayagataka na Topical Guide. Na imatai ni itaviqaravi ena iwasewase oqo ena vakayaloqaqataki ira na itabagone mera kunea na ivolanikalou ena nodra vakayagataka na Topical Guide (raica na Veituberi, Me iLutua ni Noda Bula draunipepa 67). Vukei ira mera marautaka na Topical Guide kei na ivola ni vuli tale eso me rawa ni ra vakayagataka kina vakawasoma ena nodra dui vulica yadua na kosipeli.

Veisureti me caka

Sureti ira na itabagone mera vakasamataka vakatitobu na veika era sa rogoca ka vakila nikua ka digitaka e dua na ka era na cakava mera vakavakarau kina ni ciqoma na cakacaka vakalotu ni valetabu.
Wasea na nomu ivakadinadina me baleta na bibi ni cakacaka vakalotu ni valetabu.