Siganisucu: Meu na wasea vakacava na noqu ivakadinadina ni ko Jisu Karisito na Luve ni Kalou?

Na Siganisucu sa gauna meda vakananuma kina na sucu ni iVakabula ka meda vakavouia na noda vakavinavinakataka na iloloma cecere ni Nona bula uasivi sara kei na solibula veisorovaki.Ena ivolanikalou ka tukuni kina na Nona sucu, eda raica kina na ivakarau tudei ni bula vakatisaipeli-tekivu mai vei Samuela na Leimani, a parofisaitaka ena yaloqaqa na Nona lako mai, kivei ira na Nifai era a raica vakamatua tiko na ivakatakilakila ni Nona sucu, kivei ira na ivakatawa ni sipi era a tukuna yani na itukutuku ni sa sucu na Luve ni Kalou, kivei iratou na tamata vuku e ratou a kila ni sa yaco na ka a parofisaitaki ka ratou gole vakayawa me ratou laki raica na nodra Tui na Jiu.Me vakataki ira ga na Yalododonu ena gauna makawa, eda vakila na gagadre meda tukuna yani kivei ira na tamata na noda ivakadinadina baleti Jisu Karisito kei na “itukutuku vinaka mo dou reki vakalevu kina” eda sa mai kunea ena Nona kosipeli vakalesui mai (Luke 2:10).

Mo vakarautaki iko vakayalo

Na ivolanikalou se nodra ivakavuvuli cava na parofita ni gauna oqo sa vaqaqacotaka na nomu ivakadinadina ni sa vakalou o Jisu Karisito? Sa vakauqeta vakacava na nomu bula na ivakadinadina oqo? Na gauna cava o sa vakayagataka kina na ivolanikalou se ivakavuvuli oqo mo vukei ira eso me ra vaqaqacotaka na nodra ivakadinadina?

Na gauna cava o sa rogoci ira kina na itabagone me ra vakadinadinataka na iVakabula? Na cava e rawa ni o cakava mo vakauqeti ira kina me ra wasea na nodra ivakadinadina vei ira na tani?

Vulica ena masumasu na ivurevure e ra. Na cava o nanuma ni na vakauqeti ira na itabagone me ra wasea na nodra ivakadinadina baleta na iVakabula?

Maciu 2; Luke 2 (Sa sucu o Jisu Karisito)

Ilamani 14 (E parofisaitaka o Samuela na Leimani na sucu i Jisu Karisito)

3 Nifai 1:4-22 (E vakadinadinataka o Nifai na ivakatakilakila ni nona sucu na Karisito)

Henry B. Eyring, “Na iLoloma Uasivi Duadua,” mai na Lotu ni Siganisucu ni Mataveiliutaki Taumada 2012

“Na Karisito Bula: Na Nodra iVakadinadina na iApositolo,” Ensign, Epe. 2000, 2-3

Vidio: “He Is the Gift,” “Glad Tidings of Great Joy: The Birth of Jesus Christ,” “A Savior Is Born—Vidio ni Siganisucu,” Na Yalo ni iMatai ni Siganisucu, “Light the World: 25 Days of Service”

Veivakavulici ena ivakarau ni iVakabula

A vakayagataka na ivolanikalou na iVakabula me veivakavulici ka vakadinadinataka na Nona ilesilesi. A vakavulici ira na tamata mera vakanananutaka vakataki ira na ivolanikalou ka mera vakayagataka mera kunea kina na isau ni nodra vakatataro. E rawa vakacava ni o vukei ira na itabagone me ra kila na ivakadinadina qaqa era tu ena ivolanikalou?

Semata vata

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava vata kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama e koto e ra ena rawa ni vukei iko:

Sureti ira na itabagone mera wasea na sala era a vakayacora kina ena loma ni macawa na veika era a vulica mai na lesoni ni macawa sa oti.
Kerei ira na itabagone mera wasea na sala era marautaka kina na sucu ni iVakabula. Na ivakarau ni bula cava e kauti ira mai vakavoleka vua na Karisito?

Vulica vata

Na itaviqaravi yadua e ra ena vukea me ra vakauqeti na itabagone me ra wasea na nodra ivakadinadina baleti Jisu Karisito. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Vakaraitaka e dua na vidio e vakaturi tiko ena ituvatuva oqo, ka sureti ira na itabagone mera veiwasei vakai ira ena nodra nanuma kei na veika era vakila baleta na iVakabula.Wasea na nomu ivakadinadina baleta ni sa vakalou na iVakabula, ka sureti ira na itabagone mera vakayacora vakakina. Vakayaloqaqataki ira na itabagone mera wasea e dua vei ira na vidio oqo ena dua na lotu vakamatavuvale se ena itukutuku raraba. Ena dua na kalasi ni gauna mai muri, sureti ira me ra tukuna na veika era sa sotava ena nodra wasea na itukutuku oqo.
Me raici vata vakalasi, na itukutuku ni nona sucu na iVakabula, ena Veiyalayalati Vou kei na iVola i Momani, ena kena wiliki vata eso na ivolanikalou era tiko ena ituvatuva oqo.Na cava era raica na itabagone ena ivolanikalou oqo e vakauqeti ira mera wasea na nodra ivakadinadina vei ira eso, me vaka a cakava o Samuela na Leimani kei ira na ivakatawa ni sipi? Na veivakararamataki cava tale era rawata mai kina? Sureti ira na itabagone mera vakasamataka vakatitobu ka veivosakitaka na sala mera wasea kina na nodra ivakadinadina baleti Jisu Karisito ena Siganisucu oqo.
Mera lagata vata na itabagone na sere tabu ni Siganisucu, ka sureti ira mera veivosakitaka na itukutuku e tiko ena sere era raica ni veivakauqeti vei ira.Na ivolanikalou cava era rawa ni wasea e semati tiko ki na sere ni lotu oqo? Ke gadrevi, sa rawa mo raica na madigi eso me lagati na sere ni Siganisucu vakalasi kivei ira na tamata ena itikotiko raraba.

Kerei ira na itabagone me ra wasea na veika era sa vulica nikua. Era sa vakauqeti beka me ra wasea na nodra ivakadinadina baleti Jisu Karisito vei ira na tani? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ulutaga oqo?

Me Veivuke ena Veivakavulici

“Ni da sa veituberi tiko ena kosipeli, me da kila e na yalomalumalumu, ni veivakavulici dina na Yalo Tabu. Na noda itavi me da liga ni veivakavulici ni Yalo Tabu, me rawa kina ni veivakavulici, soli ivakadinadina, veivakacegui ka veivakauqeti” ( Veituberi, Me iLutua ni Noda Bula [1999], 47).

Veisureti me cakacakataki

Tarogi ira na itabagone, se cava era sa vakauqeti kina me ra cakava baleta na veika era sa vulica nikua. Vakauqeti ira mera cakava na ka era sa vakila. Vakasamataka na sala e rawa mo vakamuria.