Ena rawa vakacava niu vakila na kedrau duidui na dina kei na cala?

E vuqa na dina ni kosipeli a veisautaki se yali donuya na Vukitani Levu. Na dina oqo a vakalesuimai ena noda gauna mai vei Josefa Simici. Na vulici ni vosa ni Kalou kei na rogoci ni Yalo Tabu ena rawa ni vukei keda meda vakila na duidui ni dina ni kosipeli vakalesuimai kei na veika lasutaki e vakatavulica o vuravura.

Mo vakarautaki iko vakayalo

O na kila vakacava na dina kei na cala? Na veivakalougatataki cava o sa sotava ena nomu bula me baleta na nomu a veidutaitaka rawa na dina kei na cala?

Na cava beka eso na veika lasu era sa sotava tiko na itabagone nikua? O na vakayaloqaqataki ira vakacava mera vakadeitaka na dina ni itukutuku era dau ciqoma? Na cava e bibi kina mera kila na sala mera cakava kina oqo?

Vakayagataka na ivurevure e ra mo kila kina vakaiiko na duidui ni dina kei na cala. Na veika o sotava vakaiiko ena nomu vakamuria na ivakavuvuli oqo ena vukea me yaga na nomu veivakavulici. Qai vakasamataka se na rawa vakacava na veitaviqaravi ena vo ni ituvatuva oqo me vukea na nomu tuva na ivakarau ni nodra vakaitavi na itabagone ena vuli.

Joni 8:31–32; Josefa Simici—Maciu 1:37 (Na vulici ni vosa ni Kalou e vukei keda ena vakilai ni dina)

Aisea 5:20; Mosese 4:3–4 (E saga me veivakacalai o Setani)

Moronai 7:12–19 (Na veika kece ka vakauqeti keda meda caka vinaka ka vakabauti Karisito sa mai vua na Kalou)

Moronai 10:5; V&V 46:7–8 (Na Yalo Tabu e vakadinadinataka na ka dina)

Josefa Simici—Ai Tukutuku 1:8–20 (A masulaka o Josefa Simici me kila na dina)

Boyd K. Packer, “Na Veika Oqo Au sa Kila,”” Ensign se Liaona, Me 2013, 6–8

Neil L. Andersen, “Josefa Simici,” Ensign se Liaona, Nove. 2014, 28–31

Marcos A. Aidukaitis, “Kevaka Sa Lailai na Vuku Vua Edua Veikemudou,” Ensign se Liaona, Me 2014, 108-10

Vidio: “You Will Be Freed”

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Veivosakitaka na veitaro e tiko vei ira na itabagone me baleta na Vukitani kei na Veivakalesuimai ena nodra kalasi tale kadua. E rawa vakacava mo vukei ira mera kunea na isau ni taro?
Vakaraitaka na imatai ni dua na miniti ka 30 na sekodi ni vidio “You Will Be Freed.” Ena tiki ni vidio oqo, e veivakaroti kina o Elder M. Russell Ballard me baleta na ivadi qaseqase i Setani me lawakitaki keda. Sureta na itabagone mera veivosakitaka na veika era sa vulica me baleta na nodra sega ni soli ira ki na veicavilaki nei Setani.

Vulica vata

Na itaviqaravi yadua e ra e rawa ni vukei ira na itabagone mera kila na kedrau duidui na dina kei na cala. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Solia ki na lewe ni kalasi yadua e dua na ilavelave ni iotioti ni ciwa na parakaravu ni vosa nei Peresitedi Boyd K. Packer “Na Veika Oqo Au sa Kila.” Sureti ira na itabagone mera vakaraica na veivosa bibi ka na vukei ira mera kila rawa na duidui ni dina mai na cala. Kerei ira mera vola na vosa era sa kunea ena papa ni volavola ka vakamacalataka na vuna era digitaka kina na veivosa oqo.
Wasea vakarua na kalasi, ka solia ki na iwasewase yadua e dua na ilavelave ni vosa nei Elder Neil L. Andersen “Josefa Simici.” Sureta e dua na ilawalawa me wilika na italanoa me baleta na ivola lasutaki ka a lawakitaki kina eso na lewe ni Lotu. Sureta na ikarua ni ilawalawa me wilika na italanoa me baleta na itaba nei Elder Russell M. Nelson. Kerea na ilawalawa yadua me wasea na veika e sa kila mai na nodratou italanoa me baleta na kena kilai na dina kei na ka cala.
Kerei ira na itabagone mera vulica na Josefa Simici-Ai Tukutuku 1:8-20 ka vola na ituvatuva a taura o Josefa Simici me kila kina na dina mai na cala. Mera na muria vakacava na itabagone na ivakaraitaki nei Josefa Simici ni ra vinakata mera kila e dua na ka dina?
Kerei ira na itabagone mera vakasaqara ena Moronai 7:12-19 na yavu era na vakayagataka mera kila kina na dina kei na ka butobuto. Sureti ira yadua na itabagone mera vola na digidigi eso e sa yaco tiko vua ka me vakayagataka na yavu oqo me dusimaki kina na digidigi yadua. Sureti ira mera wasea na veika mai na nodra lisi kevaka era lomavinaka kina.
Sureti ira na itabagone mera vakasamataka na gauna era a rogoca kina e dua na itukutuku ka rawa ni ra lomatarotarotaka kina na nodra ivakadinadina ni kosipeli. Na cava e rawa ni ra cakava mera kila kina na dina kei na cala ena gauna vaka o ya? Me vukei ira mera kunea na isaunitaro eso ki na taro oqo, sureti ira mera vulica na ivolanikalou ena idusidusi oqo se na tolu na ikabakaba a navuca o Elder Marcos A. Aidukaitis ena nona vosa “Kevaka Sa Lailai na Vuku Vua Edua Veikemudou.” Kerei ira mera wasea na veika era sa raica. Sureti ira talega mera wasea eso na ka era a sotava ka ra a rawa ni kila vakamatata kina na dina mai na cala.

Kerei ira na itabagone mera wasea na veika era sa vulica nikua. Era sa kila deivaki tiko beka na sala mera kila kina na duidui ni dina mai na cala? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ulutaga oqo?

Maqosa eso ni vuli ena kosipeli

Kilai vakamatata ni vunau dina kei na kena e lasu. Eso na gauna ni da sotava se vulica na itukutuku vou eso, sa rawa ni da vakila na kena dina taucoko ena saumi ni veitaro vakaoqo: E vakatavulici vakalevu beka na nanuma oqo ena ivolanikalou? Era vakatavulica li na parofita bula kei na iapositolo? E sa veiraurau vinaka li ki na ivakavuvuli ni gauna oqo kei na lawatu vakadonui ni Lotu? E sa vakadinadinataka li kivei au na Yalotabu na taucoko ni kena dina?

Veisureti me caka

Sureti ira na itabagone mera wasea e dua na veivakauqeti a yacovi ira ena gauna ni kalasi. Na cava era sa vakauqeti mera cakava? Na cava o rawa ni cakava mo vakayaloqaqataki ira kina mera bulataka na ka era sa vulica?