Kevaka sa Lailai na Vuku Vua e Dua vei Kemudou
Ena vakatakila na Kalou na dina vei ira era vakasaqara ena kena iwalewale sa vakamacalataki ena ivolanikalou.
Ena siga koya a vulica tiko na luvequ tagane yabaki 10 na veika baleta na mona ni tamata ena Initaneti. E vinakata o koya me vuniwai ni veisele ena dua na siga. E sega ni dredre me kilai ni vuku cake sara o koya mai vei au.
Eda taleitaka na Initaneti. Mai vale keitou dau veitaratara kei ira na lewe ni matavuvale kei na itokani ena tabana vakaitukutuku raraba, ena imeli, kei na sala tale eso. O iratou na luvequ e levu ga na nodratou cakacaka ni vuli e caka ena Initaneti.
Se cava ga na noda taro, kevaka eda gadreva eso tale na itukutuku, eda na vakasaqara ena initaneti. Ena vica ga na sekodi sa levu na ka ena tu vei keda. Sa dua na ka vakasakiti oqo.
E vakarautaki ena Initaneti e vuqa sara na madigi ni vuli. Ia, o Setani e vinakata me da rarawa, ka vakatanitaka kina na inaki ni veika dina. E vakayagataka o koya na iyaya cecere ni cakacaka oqo me vakavuna na vakatitiqa kei na rere, ka me vakarusa na vakabauta kei na inuinui.
Ni sa rui levu na ka e tu ena Initaneti, sa dodonu me da vakatulewa sara vakamatau ena vanua me vagolei kina noda sasaga. O Setani e rawa ni vakaogai keda, vagolei keda tani, ka vakadukadukalitaki keda ena noda vakasaqaqara ena itukutuku, e vuqa vei ira oqori na benu.
Me da kakua ni laki veilakoyaki voli ena benu.
Rogoca na veidusimaki oqo, e vakarautaka na ivolanikalou: “Sa soli vei ira na tamata kecega na Yalo i Karisito me ra kila na vinaka mai na ca; ia au na tukuna vei kemudou na sala mo dou lewa rawa kina; raica na veika kecega sa vakauqeti keda me da ivalavala vinaka, ka sureti keda me da vakabauta na Karisito, sa vakatakilai ena kaukauwa kei na isolisoli i Karisito, ia dou na kila vakaidina ni sa vu mai vua na Kalou.”1
Ia na ka dina, ni da sotava tale tiko ga na veika vata a sotava o Josefa Simici ena nona gauna ni gone. E dau vakavuqa talega na noda raica ni sega vei keda na vuku.
Ena matanitu ni Kalou, na vakasaqarai ni dina e dau marautaki, vakayaloqaqataki, ka sega vakadua ni dau vunitaki se rerevaki. Eda dau vakasalataki vakaukauwa mai Vua na Turaga sara ga vakataki Koya na lewe ni Lotu me da vakasaqara na vuku.2 E kaya kina o Koya, “Dou gumatua sara … ; mo dou veivakavulici vakai kemudou, ena veika mo dou yalomatua kina, dou gumatua sara mo dou kila-ka, io ena vuli kei na vakabauta.”3 Me da na kila vakacava na dina ena dua na vuravura ka sa kaukauwa tiko ga mai na kena saqata na veika ni Kalou?
E vakavulica vei keda na ivolanikalou na kena ivakarau:
Taumada, e rawa ni da kila na dina ena noda wanonova toka na vuana.
Ena Nona Vunau cecere mai na Ulunivanua, e kaya kina na Turaga:
“Sa vakakina sa vuataka na vua vinaka na kau vinaka kecega, a sa vuataka na vua ca na kau ca. …
“E dina ga dou na kilai ira ena vuadra.”4
E vakavuvulitaka na vakavuvuli vata oqo na parofita o Momani ena nona kaya, “Dou na kilai ira mai na vuadra; ia kevaka era sa vinaka, ena vinaka talega na vuadra.”5
Eda sa sureti ira kina na tamata kecega me ra dikeva na vuana kei na cakacaka ni Lotu oqo.
O ira era dau taleitaka na dina era na rawa ni kila na duidui e vakayacora na Lotu kei ira na lewena ena veitikotiko era sa tauyavu tu kina. Era na kila talega na torocake ni nodra bula o ira era muria na kena ivakavuvuli. O ira era dau vakadikeva na vuana era na kila ni kana vinaka ka taleitaki na vua ni Lotu.
iKarua, e rawa ni da kunea na dina ena noda vakatovotovotaka sara ga o keda na vosa.
E vakavuvulitaka na parofita o Alama:
“Me da vakatauvatana mada na vunau kei na dua na sorenikau. … Kevaka ko sa tea e lomamu e dua na sorenikau vinaka, sa na tubu vakaidina ni ko sa vakabauta, … ia ni ko sa vakila ni sa tubu cake mai; ko na kaya—Sa sorenikau vinaka dina oqo, … raica sa vakamarautaka na yaloqu; kau sa taleitaka sara. …
“… Ia, … ena sega li ni tubu kina nomudou vakabauta? Io, dou sa sega ga ni kila vakavinaka sara. …
“… Ena tubu ga na kau vinaka mai na soreni kau vinaka.”6
Sa dua na veisureti uasivi mai vua e dua na parofita ni Turaga! E rawa ni vakatauvatani oqo ki na dua na vakatovotovo ni vakadidike. Eda sureti me da vakatovotovotaka na vosa, sa soli vei keda na kena ivakarau, ka tukuni vei keda na macala ni vakatovotovo kevaka eda muria na kena ivakaro.
O koya oqo sa vakavuvulitaka kina vei keda na ivolanikalou ni rawa ni da kila na dina ena noda wanonova toka na vuana; se, na noda vakatovotovo kina vakataki keda, solia kina e dua na tikina e yalomu, ka vakabulabulataka, me vaka e dua na sorenikau.
E tiko tale e dua na ikatolu ni sala me da kila kina na dina, sai koya oqori noda ivakatakila yadua.
E vakavulica na Vunau kei na Veiyalayalati wase 8 ni ivakatakila sai koya na vuku—“ko na kila vakaidina na veika ko sa kerea ena vakabauta, kei na yalodina, raica ena soli mo kila.”7
Ka tukuna vei keda na Turaga na ivakarau eda na ciqoma kina na ivakatakila. E kaya o Koya, “Raica ena vakatakila vei iko na Yalo Tabu, ia ena lako yani vei iko ko Koya ka tukutuku sara ki lomamu.”8
Sa vakavulici vakaoqori vei keda ni da na rawata na ivakatakila ena noda kerekere ena vakabauta, ena yalo dina, ka vakabauta ni da na rawata.
Ia meda raica ni sa vakamatatataka na Turaga ena Nona ivakasala ni qaqarauni, “Mo nanuma tiko ni sa rawa na ka kecega ena vakabauta; ia na veika kecega ko sa vinakata mo kerea ena vakabauta.”9 Na vakabauta e gadreva na cakacaka, me vaka na vakasamataka vakavinaka taumada, qai taroga ena masu kevaka sa dodonu.
E kaya na Turaga:
“Ia kevaka au kila ni ganita, au na uqeta na yalomu ka na katakata mai na lomamu; raica ko na qai kila sara ni sa dodonu.
“Ia kevaka e sega tiko ni dodonu, ko na sega ni vakila e dua na ka; ia ko na guilecava ga na nomu gagadre.”10
Na vakabauta e sega ni cakacakataki, sa mate wale.11 O koya mo, “kerekere ena vakabauta, me kakua na vakatitiqa.”12
E dua tiko na noqu itokani, eda sega ni vakabauta vata, ka a tukuna vei au ni sega ni tu vinaka tu vakayalo. Ena sega ni vulica na ivolanikalou se masu baleta e kaya ni sega ni rawa me kila na vosa ni Kalou, ka sega talega ni vakadeitaka ni tiko na Kalou. Na ivakarau ni vakasama oya e vakamacalataka na tu vakaca ni nona bula vakayalo ka na vakavuna na veibasai ni ivakatakila, me vaka e vakamacalataka o Alama. A kaya, “Ia ko ira sa yalo kaukauwa era na kila vakalailai ga na vunau.”
Ia, qai vakuria tale o Alama, “ko ira sa yalomalumalumu, era na kila vakalevu na vunau, ka na vakatakilai vei ira na veika vuni ni Kalou me ra kila sara.”13
O Alama kei iratou na luvei Mosaia eratou ivakaraitaki ni ivakavuvuli ni vakabauta e gadreva na cakacaka. Eda wilika ena iVola i Momani:
“Eratou sa tamata yalomatua ka dau wilika vagumatua na ivolatabu, me ratou kila kina na vosa ni Kalou.
“Ia e sega ni o koya walega oqori; eratou sa gumatua sara ena masumasu kei na lolo; ka sa tu vei iratou na yalo ni parofisai, ka ratou tukuna na veika ena yaco.”14
Sa tautauvata vinaka ena iwalewale oqo kei na kerekere ena yalodina. Kevaka eda sa vakasaqara tiko ena yalodina na dina, eda na cakava na veika kece eda rawata me da kunea, ka na rawa ni okati kina na wiliki ni ivolanikalou, lako ki lotu, ka solia noda vinaka duadua ena kena muri na ivunau ni Kalou. E kena ibalebale talega ni sa lomada me da cakava na loma ni Kalou ena gauna eda kunea kina.
Na veika e vakayacora o Josefa Simici ena nona vakasaqara na vuku sa ivakaraitaki uasivi ni cava na kena ibalebale me dina na yaloda. E tukuna o koya ni vinakata me kila se o cei vei ira na veimatalotu oya e dina me “kila ka curu kina.”15 Ni se bera mada ga ni masu, sa vakarau tu me cakava na veika ena tukuni mai vua.
Sa dodonu me da kerekere ena vakabauta kei na yalo e dina. Ia e sega ni o koya ga oqori. Sa dodonu me da vakabauta tiko ni da na ciqoma na ivakatakila. Sa dodonu me da vakabauta na Turaga ka vakanuinui ena Nona yalayala. Nanuma tiko na veika sa volai: “Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu vei ira kecega na tamata, a sa sega ni dauveivakadirideini; ka na soli ga vua.”16 Sa dua na yalayala vakasakiti!
Au sureti kemuni kece mo ni vakasaqara na dina ena dua vei ira na iwalewale oqo ia me vakausivi cake mai vua na Kalou ena ivakatakila yadua. Ena vakatakila na Kalou na dina vei ira era vakasaqara ena kena iwalewale sa vakamacalataki ena ivolanikalou. E levu cake na igu e gadrevi kina mai na noda vakasaqaqara walega ena Initaneti, ia e yaga dina.
Au cavuta na noqu ivakadinadina ni oqo na Lotu dina nei Jisu Karisito. Au sa raica na vuana ena veivanua eso kei na nodra bula e udolu vakaudolu, oka kina o ira na lewe ni matavuvale; o koya oqori au sa kila kina ni dina. Au sa vakatovolea na vosa ki na noqu bula ena loma ni vuqa na yabaki ka vakila na kena revurevu e yaloqu; o koya oqori au sa kila kina ni dina. Ia e bibi duadua, au sa vulica vakataki au na kena dina mai na ivakatakila ena kaukauwa ni Yalo Tabu; o koya oqori au sa kila kina ni dina. Au sureti kemuni kece mo ni vakayacora talega vakakina. Ena yaca i Jisu Karisito, emeni.