Nomu Va na Miniti
Na cakamana ni Veisorovaki e rawa ni vakavinakataka na malumalumu ena noda vakaitavi.
Na Olimipiki ni Vulaibatabata se qai oti toka ga a kuruseti vuravura ni ra a veisisivi kina na dauqito ni 89 na matanitu ka ra veisisivi ena 98 na qito duidui. E vakasakiti, ni 10 vei ira na dauqito oqori era lewena na Lotu i Jisu Karisito ni Yalododonu Edaidai, ka 3 vei ira eratou vakametali me vaka e volai ena Church News: o Christopher Fogt, Noelle Pikus-Pace, kei Torah Bright.1 Eda vakacaucautaki ira kei ira kece na dauqito era a veisisivi. Vinaka vakalevu!
Au tukuna tiko na qito oqo ka vagoleya na noqu vakasama vei ira na cauravou, goneyalewa, kei na itabagone qase cake—o kemuni o ni donumaka na nomuni veitabayabaki bibi ka na vakatau kina na itosotoso ni nomuni bula. Au vakila e dua na yalo ni vakusakusa ena noqu vosa tiko oqo vei kemuni.
Mo ni vakila na vakusakusa oqori, au na wasea na italanoa kei Noelle Pikus-Pace, e dua vei ira na dauqito Yalododonu Edaidai. Ena qito nei Noelle, na skeleton, era tara cake yani na dauqito na nodra totolo ena nodra gutuwa ka qai mota yani ki na dua na ivakasisisi lailai. Ni vica toka ga na idi mai dela ni qele na matadra, era veitau sobu yani ena dua na sala ucacevata tatakelokelo ena totolo ka yacova sara yani na 90 na maile (145 km) dua na auwa.
E vakasakiti kina, ena vica na yabaki ni vakavakarau ena qai vakatau na qaqa se na yalorarawa ena veika e mai yaco ena loma ga ni va na cici ya 60 na sekodi.
Na nona tatadra ni Olimipiki ena 2006 o Noelle a mai takosovi ena vakacalaka ka ramusu kina e dua na yavana, ka sega ni rawa ni vakaitavi. Ena Olimipiki ni 2010 a mai sega tale ni vakavotukana nona tatadra ni mai vakavuna ga nona sega ni lai tu ena itutu ni metali e sivia ga vakalailai na dua na ikatini ni sekodi.2
E rawa beka ni o vakatayaloyalotaka na nanamaki a vakila ni wawa toka me tekivuna na nona imatai ni cici ena Olimipiki ni 2014? Ena mai vakayagataki ena dua ga na gauna lekaleka na veiyabaki ni vakavakarau. Va ga na miniti na kena levu taucoko. E vica na yabaki na nona vakavakarau tiko ki na va na miniti oya ka na taura nona bula taucoko na nona dau vakananuma lesu tu.
Na iotioti ni nona cici o Noelle e sega ni dua kina na cala! Eda na sega ni guilecava na nona rika yani ki na vanua ni sarasara me mokoti iratou na nona matavuvale ni takosova oti na laini, ka kailavaka, “Sa rawa!” Sa mate vinaka na veiyabaki ni vakavakarau. Keimami raica nona metali ni Goneyalewa ni toka e domona qai biu tikiva yani na metali siliva.3
Ena rairai sega beka ni dodonu ni qai mai vakatautaki ga na nona gauna taucoko ni vakavakarau ki na Olimipiki o Noelle ena veika e mai cakava ena va ga na miniti bibi ka leleka. Ia sa kila tiko o koya, oqori na vuna a vakavakarau kina vagumatua. A vakila na kena bibi, na totolo ni nona va na miniti, kei na kena ibalebale ena vo ni nona bula taucoko.
Eda nanumi Christopher Fogt talega, e dua na lewe ni timi ka a rawata na metali varasa ena veitau ibilibili ni ucacevata ya-va. A rawa me tu vakasuka ni oti e dua na coqa ena Olimipiki ni 2010, a digitaka o koya me sasaga tikoga. Ni oti e dua na cici vakasakiti, a rawata na icovi a sasagataka tiko mai vagumatua.4
Ia, vakasamataka mada na kena tautauvata kei ira na dauqito oqo’ na nomu sala ki na bula tawamudu “vakaitavi ena va na miniti.” O iko e dua na ka bula tawamudu. Ni se bera ni o sucu mai, o a bula tu vakayalo. Ena kena iserau e dua na Tamada Vakalomalagi dauloloma, o a tereni ka vakavakarau mo lako mai ki vuravura ena dua na gauna lekaleka ka, io, mai vakaitavi. Na bula oqo na nomu va na miniti. Ni o tiko voli eke, na nomu ivalavala ena vakatau kina se o na winitaka na nomu icovi ni bula tawamudu. E vakamacalataka na parofita o Amuleki, “Me vakarautaki … me na lesu tale vua na Kalou; io, oqo na bula … me kitaka na [nona] cakacaka kecega.”5
Ena dua na kena vakasama, sa tekivu oti na nomu va na miniti. Sa tekivu toso na kaloko. E veiganiti vinaka na nona vosa na iApositolo o Paula: “dou cici vakakina mo dou tauca na [kena icocovi].6
E tautauvata na kena gadrevi na ikalawa oqori ki na nona gauna lekaleka ni vakaitavi e dua na dauqito ni Olimipiki–na rika kei na ivukivuki vei ira na dauvakasisisi kei na dauvakasisisi ena papa ni ucacevata, kena lewai vakamatau na igole ni sala ni ibilibili ni ucacevata, se sisi sivita na matamata ni sala sobu mai delana–sa vakakina na kena bibi sara ena noda bula, eso na ka—na vanua ni cegu dau tosoi keda ena noda veiitavi vakayalo e vuravura. Na ivakatakilakila vakayalo oqo sai koya na veicakacaka vakalotu solia mai na Kalou ka yaga sara ni kosipeli: papitaiso, ciqoma na isolisoli ni Yalo Tabu, veitabaki ki na matabete, cakacaka vakalotu ni valetabu, kei na vakaivotavota ena sakaramede e veimacawa.
“Ena [vei]cakacaka vakalotu oqo … , ena vakatakilai kina na kaukauwa vakalotu.”7
Kei na sala vata ga e vakarautaki kina e dua na dauqito ena ivakarau ni vakaukauwa yago me vakaitavi kina ena nona qito ena kena ivakatagedegede duadua e cake, na muri ni ivakaro ena rawa kina vei iko mo ciqoma na cakacaka vakalotu veivakabulai oqo.
E rawa beka ni o vakila na vakusakusa oqori?
Kemuni na noqu itokani gone, evei ga na vanua o sa tu kina ena nomu “vakaitavi va na miniti,” Au vakauqeti kemuni mo ni vakasamataka vakatitobu, “na cava au gadreva meu cakava tale me vakadeitaki kina na noqu metali?” Ena gauna beka ni koniferedi oqo, sa vakasolokakanataka kina vei iko na Yalotabu na cava oya: me vakainaki vakalevu cake beka na nomu vakavakarau ki na dua na cakacaka vakalotu ni mataka se mo ciqoma e dua na cakacaka vakalotu sa dodonu mo a sa ciqoma makawa. Se cava ga, cakava sara ga oqo. Kua ni wawa. Ena totolo na toso ni nomu va na miniti, o na qai vakasamataka tu ena gauna tawamudu taucoko na veika o vakayacora ena bula oqo.8
E gadrevi na bula vakaivakarau yadua. Na masu e veisiga, vulica na ivolanikalou, ka dau lako i lotu e dodonu me yavu ni nomu tuberi. E gadrevi kina e dua na ivakarau tudei ni talairawarawa ki na ivakaro, rokova na veiyalayalati o sa cakava, ka muria na nona ivakatagedegede na Turaga ka kunei ena Me iSakisaki ni iTabagone.
Rairai o sa kila tiko na veika eso ena nomu bula ka rawa ni vakaberaberataka se tarova na nomu tubu vakayalo. Ke vakakina, muria na ivakasala vakaivolanikalou oqo nei Paula: “Me da biuta laivi tu na ka bibi kece kei na ivalavala ca eda sa tao rawarawa kina ka me da ciciva tikoga na cere sa tu e matada.”9
E sega ni sa bera me da veivutuni. Ia e rawa ni vakakina ena dua na gauna walega oqo, baleta e sega ni dua e kila na gauna ena oti kina na nomu va na miniti.
Eda na vakasamataka tiko beka vakataki keda, “Au sa vakacacana. Sa suruta na pusi na noqu va na miniti. Meu sa soro ga.” Ke vakakina, muduka na vakasama oqori, ka kakua tale vakadua ni vakasama vakaoqori. Na cakamana ni Veisorovaki e rawa ni vakavinakataka na malumalumu ena noda vakaitavi. Me vaka sa vakavuvulitaka o Elder Jeffrey R. Holland:
“Ki vei kemuni … o ni se lokuyara tiko, … Au vakadinadinataka na kaukauwa veivakavoui ni nona loloma na Kalou kei na cakamana ni nona loloma soliwale. …
“… E se bera vakadua ni bera kevaka se tukuna tiko na iVakavuvuli … ni se vo na gauna. … Kakua ni lokuyara.”10
Nanuma o sega ni tiko duadua. Sa yalataka na iVakabula ni na sega ni laivi iko mo luveniyali tu.11 Era tu talega na nomu matavuvale, itokani, kei ira na veiliutaki era tokoni iko tiko.
E dina ni sa vagolei tiko na noqu vosa vei ira na itabagone ena Lotu, vei kemuni na itubutubu kei na tubunigone, au tukuna na veika oqo:
Ena dua na gauna lekaleka sa oti a vakamacalataka kina o Elder David A. Bednar e dua na ivakarau rawarawa me vakayacori kina na vakadidike vakamatavuvale me vakatakilakilataki na toso ena sala ni veiyalayalati ena veicakacaka vakalotu veiganiti. Na ka ga e gadrevi e dua na tiki ni pepa ka rua na kena kolomu: “yaca” kei na “ituvatuva” me baleta na cakacaka vakalotu e tarava se na kena e gadrevi.” Au a cakava oqo ena dua na gauna walega oqo, au vola na yacadra yadua na lewe ni matavuvale. Ena kedra maliwa, au raica kina e dua na makubuqu tagane dramidrami, me na masulaki ena dua na gauna ga oqo; dua na makubuqu tagane yabaki ono, ka sa yaga me vakarautaki ki na papitaiso; kei na dua na luvequ tagane sa na yabaki 18, sa bibi na nona vakarautaki ki na matabete kei na edaumeni ni valetabu. Na tamata kece ena lisi era gadreva na cakacaka vakalotu ni sakaramede. Na vakatovotovo rawarawa oqo sa vukei au ena noqu vakataucokotaka na noqu itavi vakapeteriaki meu vukei ira na lewe ni noqu matavuvale yadua ena sala ni veiyalayalati, ka dua na ituvatuva ni cakacaka me baleti ira yadua. Oqo beka e dua na vakasama me baleti iko, ka na yaco kina na veivosaki vakamatavuvale, lesoni ni lotu vakamatavuvale, vakavakarau, kei na veisureti sara mada ga ki na veicakacaka vakalotu gadrevi ena nomu matavuvale.12
Me vaka niu dua na dau vakasisi ena ucacevata kei na papa, a vakauqeti au vakalevu na rawati ni metali siliva ena itavi va na miniti nei koya na dauqito ni Ositerelia YDE ka dauvakasisi ena papa ni ucacevata o Torah Bright ka rawa metali kina ena veisisivi ni qakilo rauni. E vakidacalataki vuravura nona vakaotia e dua na cici sega ni dua na kena cala qai mai tinia ena dua na saumaki vakanadaku 720. Ia, e veivakauqeti cake sara mada ga ka veivakurabuitaki ki vuravura na ivakarau e dolele yani kina ka vakaraitaka na loloma Vakarisito vei ira era veisisivi vata tiko. E raica rawa ni vaka me taqaya voli me baleta na ikarua ni nona veisisivi o Kelly Clark na dauvakasisi ena papa ni ucacevata ni Amerika, ka a sega ni vinaka na imatai ni nona qito ena iotioti ni rauni. “A mokoti au,” e nanuma lesu o Clark. “A tauri au tu ga me yacova niu sa malumu sobu ka taura malua na noqu icegu. Sa dua na ka totoka me dua na imoko mai vua e dua na itokani.” E qai laki tomani Torah ena nodra tavata na qaqa o Kelly Clark me taura na metali varasa.
Ni tarogi me baleta na ivalavala ni yalovinaka vei ira era veisisvi vata, ka rawa ni sega ni taura kina nona metali siliva, e kaya ga vakaoqo o Torah, “O au e dua e veisisivi tiko—au vinakata meu solia na noqu vinaka duadua—ia au vinakata me ra solia talega na nodra vinaka duadua na veisisivi kei au.”13
Ni da vakasamataka tiko oqori, e tiko beka e dua e gadreva na nomu veivakayaloqaqataki? Dua na lewe ni matavuvale? Dua na itokani? Dua na lewe ni kalasi se lewe ni kuoramu? O na vukei ira rawa vakacava ena nodra va na miniti?
Kemuni na itokani lomani, o ni tu ena loma ni dua na ilakolako. Ena so na sala, o ni veitau sobu tiko ena qakilo rauni se sala ni ibilibili ni ucacevata, ka rawa ni dredre toka me da cakava na ivukivuki yadua se vakamuria na itakelo yadua. Ia nanuma, o sa vakavakarau tu mai ena ka oqo me baleta na milenia. Oqo na gauna mo vakaitavi kina. Oqo na nomu va na miniti! Oqo na kena gauna!
Au vakaraitaka na noqu yalodei ena nomuni kaukauwa. E tu e yasamuni na iVakabula kei vuravura. Kevaka o kerea na Nona veivuke ka muria Nona veidusimaki, mo na druka rawa vakacava?
Au tinia ena noqu ivakadinadina me baleta na veivakalougatataki e noda ni tiko na parofita bula, o Peresitedi Thomas S. Monson, vakakina kei Jisu Karisito kei na Nona itavi me noda iVakabula ka Dauveivueti, ena Yacana tabu, o Jisu Karisito, emeni.