Luvena Yalewa ni Veiyalayalati
Na salatu … meda na lako kina ka lesu vei Tamada Vakalomalagi … e vakatakilakilataki tu ena veiyalayalati tabu vua na Kalou.
Eda sa mai tuberi ena kaukauwa vakayalo ena bogi nikua. Sa noqu masu ni na vakauqeti na uto ni yalomuni me vakataki au mai na nodra vosa na iliuliu marama oqo.
Oqo e dua na soqoni vakairogorogo. O ira kece na yalewa ena Lotu yabaki walu ka lako cake era a sureti mera soqoni vata kei keda ena bogi nikua. E vuqa vei keda era sa masulaka na Yalo Tabu me tiko kei keda. Sa mai yaco na veivakalougatataki oqo ni da rogoca nodra vosa na marama oqo kei na sere ivakatagi veilaveti. Sa noqu masu ni na tiko ga kei keda na Yalotabu niu mai vosa ni veivakauqeti ka vakadinadina me ikuri ni veika sa mai tukuni oti—ka vakabibi me vakadinadinataki ni veika sa tukuni vei keda sai koya na veika sa gadreva na Turaga meda rogoca.
Au na vosa tiko me baleta na salatu—ka sa mai cauraki tiko nikua ena kedra sala totoka—o ya meda na lako kina ka lesu vei Tamada Vakalomalagi. Na salatu oqo e vakatakilakilataki tu ena veiyalayalati tabu vua na Kalou. Au na vosa tiko baleta na reki ni da vakayacora ka maroroya tiko na veiyalayalati oqo ka vukei ira na tamata mera maroroya.
E so vei kemuni ko ni se qai papitaiso oti toka ga ka ciqoma talega na isolisoli ni Yalo Tabu ena veitabaki ni liga. O ni se nanuma vinaka sara tu ga oqo. Eso era se papitaiso makawa sara, ia e sega ni dau makare sara na vakanananu lesu oqo ni veiyalayalati a yaco, ia eso na kila oqori e dau lesu mai ni rogoci na masu ni sakaramede.
E sega vakadua ni tautauvata na nodaru nanuma lesu na siga ni nodaru a vakayacora na veiyalayalati tabu ni papitaiso ka ciqoma na isolisoli ni Yalo Tabu. Ia eda vakila vakayadua na veivakadonui ni Kalou. Eda a qai gadreva kina meda veivosoti ka vosoti talega ka yaloqaqa vakalevu cake meda caka dodonu.
Na titobu ni kena curuma na uto ni yalomuni na kila oqori a vakatau vakabibi ena nomu a vakarautaki maivei ira era lomani kemuni. Au nuitaka ni o kemuni se qai curu vou mai ki na matanitu ko ni kalougata ni o ni dabe vata tiko kei tinamuni. Ke dina, mo dredre mada vua ena vakavinavinaka. Au nanuma lesu na reki ni yaloqu kei na vakavinavinaka niu dabe e dakui tinaqu ena ilakolako lesu ki vale mai na noqu papitaiso mai Philadelphia, e Pennsylvania.
O tinaqu sara ga a vakarautaki au vakavinaka meu vakayacora na veiyalayalati o ya kei ira kece era muri mai. A yalodina sara o koya ena ilesilesi o ya mai vua na Turaga:
“Raica ko ira na itubutubu mai Saioni, se ena dua na iteki sa tauyavutaki tu, me ra vakavulici ira na luvedra e na ivakavuvuli dina ni ra sa yabaki walu; io na ivakavuvuli ni veivutuni, na vakabauti Jisu Karisito na Luve ni Kalou Bula, na papitaiso kei na isolisoli ni Yalo Tabu e na veitabaki ni liga; ia kevaka e sega, era na cudruvi kina.
“Raica oqo na ivakaro vei ira na lewe i Saioni, se e na dua ga na iteki sa tauyavutaki tu.
“Ia me ra papitaiso na luvedra ni ra sa yabaki walu, me bokoci kina na nodra ivalavala ca; io era na vakalougatataki e na veitabaki ni liga, (ka ciqoma na [Yalo Tabu].”1
Sa vakayacora o tinaqu na nona itavi. A vakarautaki iratou na luvena me vakataka ena vosa nei Alama, e volai tiko ena iVola i Momani:
“Sa qai kaya vei ira: Raica sa tu oqo na wai, ia sa yaca tale ga ni wai ko ya ko Momani; (ia me vaka dou sa gadreva) mo dou curu ki na loma ni bai ni Kalou, ka vakatokai me nona tamata, ka sa lomamudou mo dou veivuketaka na nomudou icolacola me mamada kina;
“Io ni sa lomamudou mo dou tagi vata kei ira sa tagi, ka vakacegui ira sa rarawa, ka vakadinadinataka na Kalou ena veigauna kecega, ena veika kecega kei na veivanua kecega dou sa tiko kina me yacova na mate, io me vakabulai kemudou na Kalou ka okati kemudou vata kei ira e na imatai ni tucake tale mai na mate, me nomudou kina na bula tawamudu—
“Raica au sa kaya vei kemudou, kevaka sa vakaoqori na ka sa lomamudou, na cava me tarova na nomudou papitaiso e na yaca ni Turaga? Io me ivakadinadina ni nomudou sa veiyalayalati vata kaya mo dou qaravi Koya ka muria na nona vunau, me sovaraka mai kina vei kemudou na nona Yalotabu?
“Ia ni ra sa rogoca na vosa oqo, era sa vakasausau ena marau ka ra kailavaka: Io oqori sara ga na ka sa lomai keimami tiko.”2
O a sega beka ni vakasausau ni ko rogoca na veisureti ena imatai ni gauna mo veiyalayalati ena papitaiso, ia o vakila dina na loloma ni iVakabula ka cecere nomu dinata mo susugi ira eso ki Vua. Au rawa ni kaya “dina sara” baleta ni yalo o ya sa vakatikori titobu tu e yalodra na luvena yalewa na Tamada Vakalomalagi. Oqo sa tiki ni noda iyau vakalou mai Vua.
Ko ni a vakavulici mai Vua ni bera nomuni tadu mai ki na bula oqo. A vukei kemuni mo ni kila vinaka ka ciqoma mo ni mai vakatovolei, vakadikevi, kei na madigi digitaki vinaka me baleti kemuni sara ga. Ko ni a vulica ni a vakarautaka na Tamada e dua na ituvatuva ni bula marau mo ni taqomaki ena veivakatovolei oqo ka ko na veivukei talega vei ira mera taqomaki ni ra sotava. Na ituvatuva oqo e vakatakilakilataki ena veiyalayalati kei na Kalou.
Sa noda galala meda digitaka meda vakayacora se sega na veiyalayalati oqo. E vica ga vei ira na Luvena yalewa e nodra madigi ena bula oqo mera bau vulica na veiyalayalati oqo. Ko ni sa dua vei ira sa digitaki. Kemuni na tacida lomani, oi kemuni yadua sa luvena yalewa ena veiyalayalati.
A vakavulici kemuni na Tamada Vakalomalagi ni bera nomuni sucu mai baleta na veika mo ni na sotava ni ko biuti Koya mai ka tadu mai ki vuravura. Ko ni a vakavulici ni na sega ni rawarawa na sala lesu ki na Nona itikotiko. Sa kila tu o Koya ni na dredre sara mo rawata na ilakolako ke o sega ni vukei.
Ko ni sa vakalougatataki sega walega mo kunea na sala ni vakayacori na veiyalayalati oqori ena bula oqo ia mo ovici talega mai vei ira na tamata era na vukei iko—ka ra sa vakataki iko, era sa luvena yalewa veiyalayalati ni Tamada Vakalomalagi.
Ko ni sa mai vakila na veivakalougatataki ni soqoni vata kei ira na luvena yalewa na Kalou ena bogi nikua era sa veiyalayalati kaya mera vukei kemuni ka dusimaki kemuni ni ra a yalataka mera cakava. Au sa raica na ka ko ni sa raica baleti ira na tacida ni veiyalayalati era dinata nodra veivakacegui ka veivukei—ka ra matadredredre ni ra cakava.
Au nanuma kina na matadredredre nei Sisita Ruby Haight. O koya e wati Elder David B. Haight, a lewe tu ni Kuoramu ni iApositolo Le Tinikarua. Ni se cauravou a peresitedi tu ni iteki o Palo Alto mai California. A dau masulaka, ka kauwaitaki ira na goneyalewa ena kalasi ni Leba ena nona tabanalevu.
A vakauqeti o Peresitedi Haight me kerei bisopi me kacivi Ruby Haight me vakavulici ira na goneyalewa oqo. E kila ni o koya e ivakadinadina ni Kalou me na laveta, vakaceguya, ka lomani ira na goneyalewa ena kalasi oqo.
E qase cake sara o Sisita Haight mai na 30 na yabaki mai vei ira na goneyalewa me vakavulica. Ia ni oti e 40 na yabaki nona vakavulici ira, e dau sotavi watiqu tiko, ka a dua vei ira na goneyalewa ena nona kalasi, ka dau dodoliga mai, dredre, ka kaya vei Kathy, “Isa! o Noqu Leba.” Au sega ni raica walega nona dredre. Au vakila nona lomana vakalevu e dua na yalewa ka se qarava tiko me vaka ga e luvena dina. Nona matadredredre kei na veikidavaki sa baleta nona raica, e dua na luvena yalewa na Kalou se lako tikoga ena salatu ni veiyalayalati ki vale.
E matadredre talega mai vei iko na Tamada Vakalomalagi ni ko vukea e dua na Luvena yalewa ni lako voli ena salatu ni veiyalayalati ki na bula tawamudu. Sa dau marau o Koya ena veigauna ni ko digitaka na dodonu. E sega walega ni raici iko oqo ia na ka o rawa ni yacova talega.
Ena nanuma beka e dua na nomu itubutubu eke ni ko rawa ni vinaka cake mai na kena o nanuma. E vakaoqori o tinaqu.
Na ka au sega ni kila niu se gone, oya o Tamaqu Vakalomalagi, na Tamamuni Vakalomalagi, e raica na rawa-ka cecere sa tu vei ira na Luvena ni vakatauvatani nodra raici keda na tinada se noda raici keda madaga vakataki keda. Ena gauna ko toso kina i cake ena salatu o ya ki na nomu rawa-ka, ena vakamarautaki Koya. Ko na vakila na Nona veivakadonui.
E raica o Koya na rawa-ka lagilagi sa tu vei ira taucoko na Luvena yalewa, ena nodra vanua cava ga. Ia, sa mai nomuni kina vakayadudua e dua na ilesilesi cecere. Sa namaka o Koya mo ni qaravi ira na tamata yadua o ni raica ni ra Luve ni Kalou. Oqori na vuna sa vakaroti keda o Koya meda lomani ira na wekada me vaka eda sa lomani keda ka vosoti ira. Na yalomuni dauloloma kei na veivosoti vei ira na tamata sa iyau vakalou mai Vua ni ko sa Luvena yalewa. Na tamata yadua o sotava sa Luvena vakayalo sa daulomana.
Ni ko vakila na mataveitacini cecere oqo, na veika eda tawase kina sa mai takali yani. Kena ivakaraitaki, era dau wasea na lomadra na tacida gone kei na tacida qase cake ka ra namaka mera kilai vakavinaka ka ciqomi. Ko ni sa luvena yalewa vakatautauvata cake vakalevu ni Kalou ni vakatauvatani mai na kemuni duidui.
Ena vakasama oqo, mera maqusa yani na goneyalewa ki na iSoqosoqo ni Veivukei ni sa madigi me vakalevutaki nodra iwiliwili na tacida era na qai kilai ira, qoroya, ka lomana.
Ena ituvatuva oqori meda raica na noda rawa-ka sa tubu cake tiko mai ena matavuvale kei na Lalai. Sa yaco tiko ena lotu vakamatavuvale kei na parokaramu ni Lalai. Era sa vakauqeti na gonelalai mera kaya na veika cecere ka totoka, ena nodra cakava ni sa sereka na wa ni yamedra na iVakabula ni a vakavulici ira ni oti Nona tucake tale.3
E dina ga ni sa valuti ira tiko na tacida ena yabaki lalai o Setani, sa laveti ira tiko na tacida na Turaga ki na vanua cecere ka cecere sara vakayalo. Me vakataki, ira na goneyalewa ka sa vakavulica tiko vei ira na tinadra na iwalewale ni vakayagataki ni FamilySearch mera kunei ka vakabulai na tubuda e liu. Eso na goneyalewa au kila era sa gole tiko ena mataka caca mera laki papitaiso veisosomitaki e valetabu ke ra sega mada ga ni vakauqeti e vuabaleti ena yalo i Ilaija.
Ena ilesilesi e vuravura raraba, era sa kacivi na tacida mera laki iliuliu. E tauyavutaka na Turaga na gadrevi ni nodra veiqaravi ka tarai na yalodra e lewe levu na tacida mera iliuliu. Era sa raica eso na peresitedi ni kaulotu eso na tacida daukaulotu era sa gugumatua cake sara vakadaukaulotu ka vakabibi mera iliuliu dauveituberi.
O veiqaravi tiko vaka-daukaulotu tudei se sega, sa rawa talega vakakina mo vakabulabulataka nomu vakamau ka rawata mo susugi ira cake na gone vakaturaga ni vakamuri na nodra ivakaraitaki na marama cecere eso oqo.
Vakasamataki Ivi mada, na tinadra na ka bula kecega. E kaya vaoqo o Elder Russell M. Nelson me baleti Ivi: “O keda kei ira na kawatamata kecega eda sa vakalougatataki tawamudu baleta na yaloqaqa kei na vuku nei Ivi. Ena nona a kania taumada na vuanikau, sa kila na cava mena vakayacori. A vuku sara o Atama me vakayacora vakakina.”4
Ira kece na luvei Ivi yalewa sa rawa mera kauta mai na kalougata vakaoqo ki na nona matavuvale a kauta o Ivi ki na nona matavuvale. E bibi sara o koya ki na tauyavutaki na matavuvale ka vakaoqo na itukutuku ni nona buli: “E ratou sa veivosaki tale na Kalou ka kaya: Me datou ia ka bulia e dua na dauveivuke e yaga vua na tamata, ni sa sega ni vinaka me tiko duadua ga na tamata, io me datou bulia e dua na dauveivuke e yaga vua.”5
Eda sega ni kila na taucoko ni veivuke nei Ivi vei Atama kei na nodrau matavuvale. Ia eda kila ga e dua na isolisoli cecere e solia o koya, ka rawa talega vei kemuni yadua mo ni solia: a vukea nona matavuvale mera raica na salatu ki vale ni sa vaka me dredre na ilakolako yani. “A sa marau vakalevu ko Ivi na watina ni sa rogoca na nona vosa: Raica kevaka keirau a sega ni talaidredre, ke a sega na luvei keirau, ka keirau a sega talega ni kila na ka vinaka mai na ka ca; io ke keirau a sega ni rekitaka na neirau vakabulai kei na bula tawamudu sa solia na Kalou vei ira kecega sa vakabauta.”6
Mo sa na muria ga na nona ivakaraitaki.
Ena ivakatakila, a raica rawa o Ivi na salatu ki na itikotiko ni Kalou. Sa kila o koya ni Veisorovaki i Jisu Karisito sa rawa kina me bula tawamudu na matavuvale. Sa vakadeitaka o koya, ka rawa talega vei kemuni, ni muria nona veiyalayalati vua na Tamana Vakalomalagi, ni Dauveivueti kei na Yalo Tabu ena raici koya kei na nona matavuvale mai na rarawa cava ga kei na lomaleqa ena yaco mai. E kila o koya ni rawa me nuitaki Iratou.
“Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua.
“Mo vakarogotaka vua na nomu sala kecega, Ia ena vakadodonutaka na nomu ilakolako ko koya.”7
Au kila ni a sotava o Ivi na rarawa kei na lomaleqa, ia au kila talega ni rekitaka nona kila ni o koya kei nona matavuvale sa rawa me ratou lesu ka laki bula vata kei na Kalou. Au kila ni vuqa vei kemuni oqo ko ni dau rarawa ka lomaleqa. Au sa vakalougatataki kemuni, me vakataki Ivi, mo ni vakila na marau vata ga a vakila o Ivi, ni kemuni sa lesu ki vale.
Sa noqu ivakadinadina tudei ni Kalou na Tamada sa dau wanonovi kemuni ena loloma. E lomani kemuni yadudua. Sai kemuni na Luvena yalewa ena veiyalayalati. Ena vuku ga ni lomani kemuni o Koya, ena vakarautaka na veivuke ko ni na gadreva mo ni tosoi yani ki liu kei ira eso ki cake ena salatu lesu ki na Nona itikotiko.
Au kila ni sa mai sauma na iVakabula na isau ni noda ivalavala ca kece ka sa dau tukuna na ka dina na Yalo Tabu. Ko ni sa mai vakila na vakacegu o ya ena soqoni oqo. Au vakadinadinataka ni idola taucoko ka vauca na veiyalayalati tabu sa vakalesuimai. E taura tu ka cakacaka kina nikua na noda parofita bula, o Peresitedi Thomas S. Monson. Sa noqu vosa ni veivakacegui kei na inuinui oqo vei kemuni, na Luvena yalewa lomani ni veiyalayalati, ena yaca tabu i Jisu Karisito, emeni.