“Au Sa Solia Vei Kemudou e Dua na iVakarau”
Na ivakaraitaki totoka duadua ka bula e vuravura sa ikoya na iVakabula o Jisu Karisito. … E sureti keda meda muria na Nona ivakaraitaki vinaka sara.
Ena noqu vakananuma tiko na noqu itavi meu wasea na kosipeli, au sa lai nanumi ira na daulomani ka ra a vakavuna meu vukei ni kunea na sala vakalou meu muria meu tosocake kina vakayalo. Ena veigauna bibi ni noqu bula, e dau vakalougatataki au na Tamada Vakalomalagi me dua e dau vakademeni au me mai vukei au me tuberi au ena sala e dodonu meu muria. Era dau muria na nona vosa na iVakabula: “Niu sa solia e dua na ivakarau vei kemudou, mo dou kitaka me vaka au sa kitaka oti vei kemudou.”1
Niu a se gonelailai a sega tu ni lewenilotu o tamaqu ka sa sega tu ni dau laki lotu o tinaqu. Keitou a dau bula tu mai Washington, D.C., ka rau tiko na itubutubu nei tinaqu rauta ni 2,500 na maile (4,000 km) mai na yasana o Washington. Ni oti e vica na vula mai na ikawalu ni noqu siga ni sucu, a gade mai o Buqu Whittle me mai sikovi keitou. A lomatarotarotaka o Buqu baleta ni sega ni dua vei keirau kei tuakaqu e sa papitaiso. Au sega ni kila se cava a kaya vei rau na noqu itubutubu baleta oqo, ia na ka ga au kila ni dua na mataka a kauti keirau kei tuakaqu ki na vanua ni gade ka wasea vei keirau na bibi ni noda papitaiso kei na dau lakova wasoma na soqoni ni Lotu. Au sega ni kila na matailalai ni veika a cauraka, ia na nona vosa a vakayadrati au ka sega ni dede keirau sa papitaiso kei tuakaqu.
Tomana tikoga o buqu na nona tokoni keirau. Au nanuma ni veigauna keirau dau lesi me keirau vosa e valenilotu keirau dau qiriti koya me solia mai e so na ivakasala. Ni dau oti ga e vica na siga sa dau yaco mai ena meli e dua na ivola ka tu kina na vosa sa volai rawa tu mai. Ni oti ga vakalailai sa veisau na kena icakacaka a cakava, ka ni sa dau vakau ga mai e dua na idusidusi ni vosa ka sa na gadrevi kina na neirau na sasaga.
E a vakayagataka o buqu na ivakarau donu vinaka ni veivakayarayarataki kei na veidokai me vukei tamaqu me raica na bibi ni nona dau draivataki keirau yani ki valenilotu me keirau laki lotu. Dau cakava o koya na veika kece e rawa me vakayadrati keirau me keirau kidava na bibi ni kosipeli ena neirau bula.
Ka bibi duadua ni keirau kila ni o Buqu e lomani keirau ka lomana talega na kosipeli. Sa dau ivakaraitaki wananavu sara okoya! Sa dua na ka na noqu dau qoroya na nona ivakadinadina ka dau wasea vei au niu a se gonelailai sara. Na nona ivakaraitaki e veisautaka sara ga na vanua sa mua tu kina na noqu bula ki na vinaka e tawamudu.
E muri, niu sa vakarau tauri ivola mai na univesiti, au a sa tekivu veidomoni kei na dua na goneyalewa rairai totoka o Jeanene Watkins. Au nanuma na nona sa tekivu me vakila ni sa vinakati au talega. Ena dua na bogi ni keirau sa veitalanoataka toka na veisiga se bera mai, sa qai vakacuruma sara mai vakamatau o koya na nona vakasama ka veisautaka sara ga vakadua na noqu bula. A kaya vakaoqo, “Niu sa vakamau ena valetabu, me na dua na cauravou yalodina, lesu mai na kaulotu, o koya.”
Au a sega ni dau vakasamataka tu na kaulotu ni se bera o ya. A veisau sara ga na noqu raica na kaulotu niu sa lesu i vale ena bogi o ya. Niu yaco i vale, au sega tale ni qai vakasamataka e dua tale na ka. Au a yadra tu ena bogi taucoka. Au a vagolei tani saraga mai na noqu vuli lesoni ena siga tarava. Niu sa masumasu tiko au sa qai vakadeitaka meu sa na laki raici bisopi mada ka vakalewena na noqu ivolakerekere ni laki kaulotu.
E a sega ni kerei au o Jeanene meu laki kaulotu ena vukuna. A lomani au dina ena nona wasea vei au na ka a luvuci tu kina ka qai solia vei au na digidigi meu digitaka na vanua meu na mua kina ena noqu bula. Keirau a qai lako ruarua i kaulotu ka qai mai vauci ena valetabu. Na yaloqaqa kei na yalodei a tu vei Jeanene e sa ivakadei ni neirau bula vata. Au vakadeitaka ni kevaka me a sega na nona vakabauta qaqaco vinaka ni ivakavuvuli, ni qaravi taumada ni Turaga o Jeanene, ke keirau a sega ni rawata vata na reki. A dua dina na ivakaraitaki vinaka sara ni buladodonu, okoya!
Rau a lomani au vinaka sara o Buqu Whittle kei Jeanene me rau wasea rawa kina vei au nodrau vakadinadinataka ni ivakavuvuli ni kosipeli kei na qarava na Tamada Vakalomalagi ena vakalougatataka na noqu bula. E sega ni dua vei rau a vakasaurarataki au se vakayalolailaitaki au ena vuku ni noqu mataqali tamata vakacava. Erau lomani au ka lomana na Tamada Vakalomalagi. Rau kila ruarua ni na rawa ni vakayacora e levu sara na veika lelevu ena noqu bula o Koya mai na noqu sasaga taudua vakaiau. Rau a vukei au sara vakaukauwa ena yalololoma meu kunea na sala ka na basika kina bula marautaki vakalevu sara.
Ena rawa vakacava vei keda yadua meda idewadewa ni veika vinaka me vakaoqo? Meda lomani ira sara vakaidina eda via vakayarayarataka tiko ena bula dodonu; sa na qai rawa ni ra na tara cake nodra nuidei ena loloma ni Kalou. Ni levu vei ira oqo e vuravura, e sa imatai ni bolebole ni nodra ciqoma na kosipeli, na nodra vakatorocaketaka na nodra vakabauta e dua na Tama Vakalomalagi, ka taucoko tu na nona lomani ira. Ena rawarawa me ra tara cake na nodra vakabauta ni ra sa tiko na nodra itokani se lewe ni matavuvale ka ra na lomani ira ena loloma vata ga vaka o ya.
Na nomu solia vei ira na veivakadeitaki kei na loloma sa na rawa ni vukei ira ena vakatorocaketaki ni nodra vakabauta ena loloma ni Kalou. Sa qai vakalougatataki na nodra bula ni sa na muria yani na nomu lomani ira ena nomu wasea na lesoni o sa vulica, na veika kece o sa sotava, kei nai vakavuvuli o sa muria mo kunea na iwali ni nomu vakatovolei. Vakaraitaka na nomu kauwaitaka dina na veika me baleti ira ka qai wasea na nomu ivakadinadina ni kosipeli i Jisu Karisito.
Sa na rawa ni ko veivuke ena veisala era yavutaki tu ena ivakavuvuli kei na ivunau. Vakauqeti ira o lomana mera vaqara na ka ena gadreva na Turaga mera na cakava. Dua na sala me caka kina na ka oqo sa ikoya me tarogi na taro ena vakayarayarataki ira me ra vakasama sara vakavinaka ka solia vei ira e dua na gauna—se auwa, siga, vula se me balavu cake tale—me ra vaqara ka vakananuma, ka vakaraica vakaiira na kena isau. Ko na gadreva beka mo na vukei ira me ra na kila na masu, ka kila na kena na saumi mai. Vukei ira mera kila ni ivolanikalou e sa dua na ivurevure momona ni kena ciqomi ka kidavi na isau ni masu. Na veika oqo ena vukei ira sara tale tikoga ena nodra vakavakarau ki na veimadigi kei na bolebole ena qai yaco mai vei ira.
Na inaki ni Kalou me “ra tucake tale mai na mate na tamata kece ga.”2 O ya ena yaga vakalevu ki na veika kece eda cakava. Ena so na gauna eda na vesuki ena veika eda raica ni vakasakiti se mai vakaogai sara ena veika e cacawale ka vakayalia na veika sa lavaka tu mai vei keda na Kalou. Ni ko sa vakadeitaki iko ena ivakavuvuli e bibi ko na qai rawa ni kila na veika mo na cakava ka ko na vuavuai vinaka ena qarava na Turaga ka ko na qai kune marau kina vakalevu.
Ni ko sa vakaliuca na ivakavuvuli ni yavu ni veivakabulai, ko sa na qai vakanamata kina kena wasei na veika ko sa kila baleta ni ko sa kila deivaki na kedra bibi tawamudu na veicakacaka vakalotu ni kosipeli. Ko na wasea na veika ko sa kila ka na vakauqeti ira na nomu itokani me ra na gadreva me ra vakaukauwataki vakayalo. Ko na vukei ira ko dau lomani ira ka ra sa gadreva mera talairawarawa ki na Nona ivunau taucoko ka taura kivei ira na yaca i Jisu Karisito
Nanuma ni nodra saumaki na tamata e tiki walega ni cakacaka. Sasagataka mo vaqaqacotaka na matavuvale. Vakavulica tiko ena rai ni kena bibi na matavuvale me na laki vauci ena valetabu. Ena taura toka e vica vata na yabaki ki na so na matavuvale. Sa vakakina oqo vei rau na noqu itubutubu. Ni oti e vica na yabaki ena noqu a papitaiso, sa qai muri yani o tamaqu, e muri sa qai vauci na noqu matavuvale ena valetabu. A dauveivauci o tamaqu ena valetabu, ka rau a veiqaravi vata kei na tinaqu. Ni o sa raica rawa na rai me baleta na veivauci ena valetabu, ko na vukea na tarai cake ni matanitu ni Kalou ena vuravura.
Nanuma tiko ni nomu na lomani ira sa ikoya na iyaragi kaukauwa duadua vei ira o nanuma tiko mona vukei ira. Na ivakaraitaki nei Bu Whittle kei na watiqu o Jeanene, sa vakaraitaka sara ga vei au na nodrau lomani au ka rau vinakata meu na rawa ka vakavinaka sara ena noqu bula.
E dua na itokani vinaka ni loloma oqori, na nomu dau vakadinati ira. Ena so na gauna ena via dredre mo na vakadinati ira, ia era saga e so na sala mo vakadinati ira kina. O ira na luvena na Tamada mai Lomalagi era na rawa ni cakava e so na ka matalia sara ni ra sa kila ni ra sa vakadinati. O ira kece na luve ni Kalou ena bula oqo era sa digitaka na muria na Nona yavu na iVakabula. Vakadinata ni ra na cakava tale vakakina ni sa soli vei ira na madigi.
Ni wasei na ivakavuvuli ena vukei ira ko lomani ira me ra toso yani kina sala ni bula tawamudu. Nanuma, ni da dau tubu cake vakalalai. Ko sa muria oti mai na sala vata oqori ena nomu kila na sala ni kosipeli. Vakarawarawataka na nomu dau wasea na kosipeli.
Na nomu ivakadinadina vakai iko baleta na Veisorovaki i Jisu Karisito sa iyaragi kaukauwa sara. Era itokani ka ivurevure na masu, nai Vola iMomani kei na so tale na ivolanikalou, kei na nomu yalodina kina cakacaka vakalotu ni matabete. Na veika kece oqo ena vakadeitaka na veituberi ni Yalotabu, ni sa ka bibi sara vei iko mo na dau vakararavi kina.
Me da na rawa ka da vakayacora me vaka e a cakava na Karisito,3 vakaliuca na yavu ni ivakavuvuli ni kosipeli oqo: na Veisorovaki i Jisu Karisito e sa vakadeitaka ni da na rawa ni vakataka na Tamada mai Lomalagi ka me rawa ni da laki bula tawamudu vata vakamatavuvale.
E sega tale ni dua na vunau me na bibi cake ena noda qaravi itavi tiko me vaka na Veisorovaki i Jisu Karisito. Ni dua ga na kena madigi e donumaki, vakadinadinataka na iVakabula kei na kaukauwa ni Nona Veisorovaki. Vakayagataka na tiki ni ivolanikalou ena vakavulica na veika baleti Koya kei na vuna e bibi kina na Nona ivakaraitaki kina tamata kecega ena bula oqo.4 Sa dodonu mo gumatua ena vuli. Kakua ni vakaosoosotaki iko ena veika tawayaga ka calata kina na vulici ni ivunau kei na ivakavuvuli ni Turaga. Ni ko sa yavudeitaki tu ena ivunau, o sa na rawa ni dua na ivurevure qaqaco vinaka ni kena wasei ni dina vei ira era gadreva dina tu.
Eda na qarava vakavinaka cake na Tamada Vakalomalagi ena noda veivakayarayarataki donu vei ira tale eso ka qaravi ira.5 Na ivakaraitaki totoka duadua ka bula e vuravura sa ikoya na iVakabula o Jisu Karisito. Na nona veivakalotu taki a vakasinaiti tu ena veituberi, veiqaravi, kei na nodra lomani na tani. A dabe vata kei ira yadua e tukuni ni sega ni ganita me ra dabe volekati Koya. E lomani ira yadudua. E a kila o Koya na ka era gadreva ka vakavulici ira ena Nona kosipeli. E a sureti keda meda muria na Nona ivakaraitaki vinaka sara.
Au kila ni Nona kosipeli sa sala kina vakacegu kei na marau ena bula oqo. Meda nanuma meda na cakava me vaka e a cakava, ena noda wasea na noda loloma, veivakadinati, kei na kila na dina, vei ira na tani ka ra se bera ni ciqoma taucoko na rarama ramase ni kosipeli. Ena yaca i Jisu Karisito, emeni.