Meu iliuliu vinaka cake vakacava?

Sa ivakaraitaki uasivi sara ni veiliutaki dodonu o Jisu Karisito. Era muria na Nona ivakaraitaki o ira na iliuliu ni Nona Lotu ena nodra lomani ira ka qaravi ira era liutaka. Ena noda segata taumada me da tisaipeli yalodina, sa qai rawa kina ni da vukei ira eso tale me ra tara cake na ivakadinadina kaukauwa ka toro voleka yani vua na Tamada Vakalomalagi kei Jisu Karisito.

Mo vakarautaki iko vakayalo

Vakasamataka mada e dua o kila ni iliuliu Vakarisito. Na ivakarau vinaka cava beka ni veiliutaki e tu vua na tamata oqori? Sa vakauqeti iko kei ira tale eso beka vakacava na nona veiliutaki?

Na cava na vuna era na gadreva kina na itabagone me ra vulica na ivakarau ni veiliutaki? Na madigi cava soti e tu vei ira me ra veiliutaki—ena Lotu, ena nodra vuvale, kei na nodra itikotiko?

Ni ko vakavakarau tiko, vulica ena yalomasumasu na ivolanikalou kei na ivurevure oqo. Na veivakauqeti cava o gadreva mo wasea vei ira na itabagone?

Lako Yani 18:13–26 (A vakasalataki mai vei Jecoro o Mosese me baleta na ivakarau me iliuliu mana kina)

Maciu 20:20–28; 23:11; V&V 50:26 (O ira na iliuliu Vakarisito era dau qaravi ira era liutaka)

Joni 13:4–15; 3 Nifai 18:16; 27:21, 27 (O Jisu Karisito na noda ivakaraitaki ni iliuliu)

Mosaia 2:11–19 (A qaravi ira na nona tamata na Tui o Penijamini)

V&V 121:34–46 (iVakavuvuli ni veiliutaki dodonu)

Stephen W. Owen, “O Ira na iLiuliu Levu Duadua Sai Ira na Dauvakamumuri Levu Duadua,” Ensign se Liaona, Me 2016, 70–76

Thomas S. Monson, “iVakaraitaki ni iValavala Dodonu,”Ensign se Liaona, Me 2008, 65–68

Tad R. Callister, “Na Kaukauwa ni Matabete vei Cauravou Lailai,” Ensign se Liaona, Me 2013

“Veiliutaki ena Lotu i Jisu Karisito,” iVoladusidusi 2: Veiliutaki ena Lotu (2010), 11–15

Veivakavulici ena ivakarau ni iVakabula

Vakasamataka mada na veika o kila tu baleta na iVakabula. Na cava o raica rawa me baleta na iwalewale ni Nona veivakavulici kei na veiliutaki? A vukei ira vakacava o Koya me ra vuli ka tubu? Ena rawa vakacava ni o muria na Nona ivakaraitaki ni veivakavulici kei na veiliutaki me vukea na nodra vuli ka tubu na itabagone? E rawa vakacava ni o vakauqeti ira me ra iliuliu Vakarisito?

Semata vata

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava vata kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama e koto e ra ena rawa ni vukei iko:

Sureti ira na itabagone mera wasea e dua na ka era se qai sotava oti ga a vakavotuya vei ira e dua na ka era sa vulica tiko ena nodra kalasi ni Lotu.
Vakaraitaka e dua na kena iyaloyalo na iVakabula (raica, me kena ivakaraitaki, na Gospel Art Book), ka vola na vosa iliuliu ena vava ni volavola. Kerei ira na itabagone me ra vola ena vava ni volavola na veivosa tale eso e votu mai nodra vakasama ni ra vakasamataki Jisu Karisito ni dua na iliuliu vinaka sara.

Vulica vata

Na itaviqaravi yadua e ra e rawa ni vukei ira na itabagone me ra vulica na sala me ra yaco kina me ra iliuliu mana cake. Mai na veivakauqeti ni Yalotabu, digitaka e dua se sivia ka na ganita vinaka na nomu kalasi:

Ni wilika vata vakalasi na Maciu 20:20–28. Na cava e vakavulica na iVakabula vei ira Nona iApositolo me baleta na veiliutaki ena matanitu ni Kalou? Sureti ira na itabagone me ra vola e dua na ituvatuva ena vava ni volavola me veidutaitaki kina na veiliutaki e vuravura kei na veiliutaki ena Lotu. Ena yaco me iliuliu vakacava e dua na tamata ena dua na bisinisi se matanitu? ena Lotu? Na mataqali veiliutaki vakacava e vinakati e vuravura? ena Lotu? Me tiki ni veivosaki oqo, sureti ira na itabagone me ra wilika na ivolanikalou e vakavuvulitaka na ivakavuvuli ni veiliutaki Vakarisito (me vaka era vakaturi ena ituvatuva oqo). Na cava na vuna e bibi kina vei ira na itabagone me ra kila na ivakavuvuli oqo? Era na vakayagataka beka vakacava ena nodra dui matavuvale? ena nodra veiqaravi vaka-Lotu? ena nodra veitikotiko?
Wasea na iwasewase eso mai na Wase 3 niiVoladusidusi 2, “Veiliutaki ena Lotu i Jisu Karisito,” oqori e vakavuvulitaka na ivakavuvuli e kena ivakaraitaki na iVakabula (me vaka na iwasewase 3.2.1, 3.3.3, 3.3.4, 3.3.5, kei na 3.3.6). Kerei ira yadua na lewenikalasi me ra wilika e dua na iwasewase oqori ka vakasamataka e dua na italanoa mai na nona bula na iVakabula ka vakaraitaki kina na ivakavuvuli e vakavuvulitaki ena nona iwasewase (e rawa ni ra raica na Gospel Art Book, 34–51, me baleta eso na vakasama). E rawa talega ni ra kerei me ra railesuva na vosa nei Stephen W. Owen “O Ira na iLiuliu Levu Duadua Sai Ira na Dauvakamumuri Levu Duadua,” ka vaqara na ivakavuvuli se italanoa me baleta na veiliutaki e Vakarisito. Kerea vei ira na itabagone me ra wasea na veika era sa vulica mai na ivoladusidusi kei na italanoa. Na ivakaraitaki cava ni ivakavuvuli oqo era sa raica ena nodra dui bula?
Ni wilika vakalasi na 1 Nifai 6:3–6. kerei ira na itabagone me ra vakasamataka na itukutuku ni ivolanikalou oqo ni o wasea vei ira na italanoa nei Peresitedi Thomas S. Monson me baleta na nona yavalata na daligana, mai na nona vosa “iVakaraitaki ni iValavala Dodonu” (se vakaraitaka na iwase ni nona vosa oqo ena vidio). Na cava e vakavulica vei ira na itabagone me baleta na veiliutaki na italanoa oqo? Sureti ira me ra vakasamataka vakatitobu na itukutuku era tukuna tiko vei ira tale eso ena ivakarau ni nodra bula. Vakayaloqaqataki ira me ra wasea ki na kalasi na veika eso era sa sotava ka ra vakalougatataki kina mai na nona ivakaraitaki e dua tale na lewenilotu. Na cava eso tale na ivakarau vinaka ni veiliutaki era sa raica mai vei ira eso ena kalasi?
Kerea e dua na lewe ni kalasi me dreketa e dua na kato dreketi. Vakatawana na katodreketi ena ivola se na iyaya tale eso me yacova ni sa bibi sara. Tarogi ira na itabagone ena ivakarau e rawa ni matataki kina e dua na veikacivi vakaveiliutaki ena katodreketi oqo. Sureti ira na itabagone me ra vulica na Lako Yani 18:13–26 ka raica na ivakasala a ciqoma o Mosese mai vei Jecoro ena ivakarau me iliuliu vinaka cake kina. Na cava beka a rawa ni yaco kevaka a sega ni muria o Mosese na ivakasala oqo? Sureti ira na itabagone me ra raitayaloyalotaka mada ni ra lesi me ra tuvalaka e dua na koniferedi ni itabagone ena iteki. Me ra na vakayagataka beka vakacava na ivakasala nei Jecoro ena gauna vaqori? Solia vei ira na gauna me ra tuvalaka kina na nodra koniferedi ni itabagone vakatayaloyalotaki. O cei beka era na kerea me veivuke? Na cava era na kerea vei ira oqori me ra cakava?
Vola e vica na ivakavuvuli ni veiliutaki e vakavuvulitaka o Elder Tad R. Callister ena “Na Kaukauwa ni Matabete vei Cauravou Lailai” ena so tale na tikinipepa. Solia e dua na pepa vei ira yadua na lewe ni kalasi, ka kerei koya me vakasaqara kina eso na itukutuku me baleta na ivakavuvuli e lesi vua. Sureti ira na lewenikalasi me ra wasea na veika era sa vulica me baleta na veiliutaki mai vei Elder Callister. Vakayaloqaqataki ira me ra wasea e dua na ivakaraitaki e kila me baleta na ivakavuvuli eso oqo.

Kerei ira na itabagone me ra wasea na veika era sa vulica nikua. Era sa kila beka na sala me ra yaco kina me ra iliuliu vinaka cake? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Veisureti me caka

Tarogi ira na itabagone, se cava era sa vakauqeti kina me ra cakava baleta na veika era sa vulica nikua. Vakauqeti ira mera cakava na ka era sa vakila. Vakasamataka na sala e rawa mo taumuria kina.