E rawa vakacava niu ulabaleta na vakatitiqa ena vakabauta?

So na gauna e tiko vei ira na lewe ni Lotu na vakatataro me baleta na kosipeli. E sa matau tu na vakatataro, ka ni gauna eda vakasaqara kina vagumatua na dina, eda vaqaqacotaka na noda ivakadinadina. Ia, na gauna eda tekivu vakatataro kina ena yalo tawaveivakabauti, sa na drakidrakita sara ki na Yalo ni Turaga me tuberi keda. Ni da vakasaqara na veisaunitaro, meda sa digitaka me tiko na vakabauta ena ka eda sa kila rawa tu me baleta na kosipeli, tutaka na bulataki ni vunau, ka tomana voli na vuli ivolanikalou kei na masumasu e veisiga. Ni da cakava na veika oqo, ena vukei keda na Tamada Vakalomalagi ena vaqaqacotaki ni noda ivakadinadina.

Mo vakarautaki iko vakayalo

O sa vaqaqacotaka vakacava na nomu vakabauta? Era sa vakatavulici keda vakacava na parofita, iapositolo, kei na iliuliu edaidai ena ivakarau ni sausaumi ni tiko e so na noda taro dredre?

Na taro dredre cava soti me baleta na kosipeli sa vaka mera oga voli kina e so na itabagone? E rawa vakacava ni o vukei ira ni ra vakasaqara vakagumatua na isau ni veitaro oqo?

Vulica ena masumasu na ivurevure e ra. Na ivurevure cava soti o rawa ni vakayagataka mo vukea kina na nodra vakatavulici na itabagone me baleta na vaqaqacotaki ni nodra vakabauta kei na sotavi ni taro dredre e so? Na cava o sa vakauqeti mo wasea?

Marika 5:35–36; 9:14–24; Joni 20:26–29; V&V 6:36 (Kakua ni rere)

Ilamani 5:12 (Tara na nomu yavu vei Jisu Karisito)

1 Nifai 15:24 (Vakanuinui ki na ivolanikalou)

Joni 7:17; Jemesa 2:17–18, 22; 3 Nifai 14:7–8; Ica 12:6, 12 (Cakacaka ena vakabauta)

2 Nifai 2:11 (Na veibasai ena ka kecega)

V&V 46:10–14 (Sa soli vei ira e so me ra kila, vei ira e so tale me ra vakabauta na nodra vunau)

Quentin L. Cook, “Gumatua ena iVakadinadina me baleti Jisu,” Ensign se Liaona, Nove. 2016, 40–44

M. Russell Ballard, “Keitou na Lako Vei Cei,” Ensign se Liaona, Nove. 2016, 90-92

Vern P. Stanfill, “Digitaka na Rarama,” Ensign se Liaona, Nove. 2015, 55–57

L. Whitney Clayton, “Digitaka mo Vakadinata,” Ensign se Liaona, Me 2015, 36–39

Jeffrey R. Holland, “Kemuni na Turaga, Au Sa Vakabauta,” Ensign se Liaona, Me 2013, 93–95

Vidio: “Digitaka na Rarama”

Veivakavulici ena ivakarau ni iVakabula

Na Turaga e lomani ira e vakavulica. Ni ra sotava na dredre, a sega ni biuti ira tu o Koya ia a tomana tikoga me lomani ira ka qaravi ira. Na cava o rawa ni cakava mo muria kina na Nona ivakaraitaki?

Semata vata

Raica eso tale na vakasama ni vuli kei na veivakavulici.

Ena imatai ni vica na miniti ni kalasi yadua, vukei ira na itabagone me ra semata vata na veika era sa vulica tiko ena veikalasi duidui (me vaka na vuli yadua, semineri, kalasi ni Lotu tale eso, se na ka era sotava vatana nodra itokani kei na lewe ni matavuvale). Ena rawa vakacava mo vukei ira mera raica na yaga ni kosipeli ena bula ni veisiga? Na vakasama eso ka koto e ra ena rawa ni vukei iko:

• Vakamacalataka ni lewe ni Lotu yadua, oka kina na cauravou se goneyalewa yadua, sa gadrevi me tiko na nodra dui ivakadinadina me baleta na kosipeli. Sureti ira na itabagone mera wasea na veika era sotava ka sa vakatavulica vei ira na bibi ni kena taraicake na nodra dui ivakadinadina.Vakamacalataka ni gauna eda taracake yadua kina na noda dui ivakadinadina, sa yaco meda bula rawati keda vakayalo.

• Navuca ni vakaraitaka vei ira na itabagone e dua na iyaloyalo matailevu ni dua na iyaya kilai tani (e matailevu sara me sega ni kilai rawa na iyaya) ka tarogi voli mera vakilakila se cava oya. Qai vakaraitaka vei ira na iyaya. E veisau vakacava na noda vakasama ni sa tiko vei keda na rai dodonu? Kerei ira na itabagone mera navuca na ka e vakatavulica vei ira na ivakaraitaki oqo me baleta na bibi ni kena tiko e dua na rai tawamudu.(Me baleta na vakasama tale eso, raica na Rafael E. Pino, “Na Rai Tawamudu ni Kosipeli,” Ensign se Liaona, Me 2015, 117–19.) Ni sotava na itabagone na veitaro dredre, ena veivuke vakacava na kena maroroi voli e dua na rai tawamudu?

Vulica vata

Raica eso tale na vakasama ni vuli kei na veivakavulici.

Na itaviqaravi yadua e ra e rawa ni vukei ira na itabagone ni vulica na vakasaqarai vagumatua ni isau ni taro dredre e so. Muria na veivakauqeti ni Yalotabu, digitaka e dua se sivia ka na ganita na nomu kalasi:

• Kauta mai e tolu na vatu ka vakayacani ena veiitatarabe e vakatakilai ena vosa nei Elder Quentin L. Cook “Gumatua ena iVakadinadina me baleti Jisu.” Wasei ira vakatolu na gone, ka solia ki na iwasewase yadua e dua vei ira na vatu. Kerea na iwasewase yadua mera raica mai na vosa nei Elder Cook na ivakarau e rawa ni vakamalumalumutaka kina na vakabauta na nodra itatarabe ka me dua talega na ivakaraitaki ni ivakarau ena malumalumu kina na vakabauta ni vakatara ki na nona bula na tamata na itatarabe oqo. Oti qai solia ki na ilala yadua e dua na buloko se simede ka kerei ira me ra raica e dua na ka ena tara cake nodra vakabauta. E rawa ni o wilika na Ilamani 5:12 me tiki ni veivosaki oqo.

• Sureti ira na itabagone me ra vola na nodra veika taleitaki baleta na kosipeli i Jisu Karisito kei na Nona Lotu. Na cava era vakavinavinaka kina me baleta na kosipeli? Me ra vakasaqaqara na itabagone ena vosa nei Elder M. Russell Ballard “Keitou na Lako Vei Cei?” ka vakasaqara eso na veivakalougatataki ni kosipeli e cavuta o Elder Ballard. Wasea na ivakarau sa veisautaka kina na nomu bula na dina vakosipeli e tukuna o Elder Ballard. E rawa ni vaqaqacotaka vakacava noda vakabauta na noda nanuma tiko na veivakalougatataki ni kosipeli?

• Kerea e dua na lewe ni kalasi me vakavakarau mai me wasea na italanoa ena Marika 9:14–27, se wilika vakalasi na italanoa. Wasea vakatolu na ilawalawa ni kalasi, ka solia ki na ilawalawa yadua e dua vei ira na tolu na vakadidike nei Elder Jeffrey R. Holland me baleta na italanoa ena nona vosa “Turaga, Au sa Vakabauta.” E rawa vakacava ni ra vakayagataka na itabagone na vakadidike nei Elder Holland ni tiko vei ira se dua tale era kila na taro dredre e so kei na vakatitiqa me baleta na kosipeli?

• Wasea vakalalai na kalasi ka solia ki na iwasewase yadua e dua na ilavelave ni vosa nei Elder L. Whitney Clayton “Digitaka mo Vakadinatase dua na ilavelave ni vosa nei Elder Vern P. Stanfill “Digitaka na Rarama Mera wilika na ilawalawa yadua e dua na wase ni vosa ka makataka na veitikina e vakainaki ka vakaibalebale vei ira. Sureti ira na itabagone mera wasea na ka era sa vulica mai vua na Yalotabu ni ra vuli voli. E rawa vakacava ni ra wasea na italanoa ni Dausoko o Gutzler, se nona vodo baisikeli o Elder Standfill se na veika e lako curuma ena vidio “Digitaka na Rarama” ki na ivakarau ni kena ulabaleti na vakatitiqa ka toso iliu na nona vakabauta?

• A vakatavulica o Peresitedi Boyd K. Packer, “Na ivakadinadina me sa na kune ena kena cavuti oti!” (“The Candle of the Lord,” Ensign, Jan. 1983, 54). Cava na vuna e vukea kina na kena vaqaqacotaki na wasei ni noda ivakadinadina? Wilika na Joni 7:17; Ica 12:6, 12; kei na Jemesa 2:17–18, 22 ka veivosakitaka na ka era vakatavulica na ivolanikalou oqo me baleta na cakacaka voli ena vakabauta. E rawa vakacava ni vakaraitaki kivua na Tamada Vakalomalagi na cakacakataki ni ka e vakadinati e tiko vei keda ni da sa vakarau tu meda ciqoma e levu tale na rarama kei na dina?

Kerei ira na itabagone me ra wasea na veika era sa vulica nikua. Era sa kila vakamatata cake li na iwalewale e rawa ni ra sotava kina vagumatua na taro dredre e so me baleta na kosipeli? Era sa kila vakamatata cake li na iwalewale ni nodra vukei tale e so ka sotava voli na veitaro vakaoya? Kevaka o kauwai voli me baleta e dua vei ira na lewe ni kalasi, sa rawa ni o vakatututaka vakatabakidua mera vosa kivei ira na nodra itubutubu, dua na iliuliu ni itabagone, se na bisopi me baleta na nodra vakatataro.

Sureta me caka

Raica eso tale na vakasama ni vuli kei na veivakavulici.

O na rairai vakayaloqaqataki ira na itabagone mera vola e dua na itukutuku taleitaki kivua e dua na lewenilotu luluqa se ki na dua ka lomaleqataka voli na taro eso.

Sa rawa talega ni o vakayaloqaqataki ira mera tutaka oqo na vaqaqacotaki ni nodra ivakadinadina ena masumasu kei na vuli ivolanikalou e veisiga.