Au na vakayagataka me vakavotukana vakacava na taro ni’u veivakatavulici tiko?

O Jisu Karisito, na Dauniveivakatavulici, e dau taroga wasoma na taro eso me vakayaloqaqataki ira kina na tamata mera vakasamataka vagumatua ka vakayacora na ivakavuvuli e vakatavulica o Koya. Na Nona vakatataro e vakauqeta na vakasama, dikevi ni bula, kei na yalayala. Me vukei ira eda vakatavulica, sa rawa ni da vulica meda taroga na veitaro ka na vukei ira tale eso mera vakasamataka, veivosakitaka, ka vakayagataka na ivakavuvuli ni kosipeli.

Mo vakarautaki iko vakayalo

O sa bau raici ira vakacava na qasenivuli vakavotukana ni ra vakayagataka na taro me vukea eso tale mera vakasamataka vagumatua ka vakayacora na kosipeli? O dau vakayagataka vakacava na taro ni o veivakatavulici?

Na cava e dodonu mera kila deivaki na itabagone me baleta na tarogi ni taro ena vukei ira ni yaco mera qasenivuli vinaka cake?

Vulica ena masumasu na ivolanikalou kei na ivurevure oqo. Na cava ena vakauqeti ira na itabagone o vakatavulica?

Maciu 7:7–11 (E vakataroga na taro na iVakabula me vukei keda ni vakayacora na ivakavuvuli ni masu)

Maciu 16:13–17 (E vakataroga na taro na iVakabula ka sureti Pita me vakadinadinataka)

Maciu 16:24–26 (E vakataroga na taro na iVakabula ka vakavurea na vakasama titobu)

Alama 5:14–30 (Vakayagataka o Alama na taro eso me vakatavulici ira na Nifai)

Dieter F. Uchtdorf, “O Ira Era Dauloloma Era na Lomani,” Ensign se Liaona, Me 2012, 70–76

Vidio: “Things as They Really Are”

3:27

Veivakavulici ena ivakarau ni iVakabula

Na iVakabula a tarogi ira a vakavulica ka vakavuna mera vakasama ka vakanananu kina vakatitobu. Ena vuku ni Nona loloma, era yalovakacegu ni wasea voli na nodra vakasama kei na vakanananu ni lomadra. O na tauyavutaka vakacava e dua na veimaliwai ena nomu kalasi mera yalo vakacegu kina na itabagone ni ra sauma na taro?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Sureta na itabagone mera wasea e dua na ka era a sotava ena loma ni macawa ka vaqaqacotaka na kilai deivaki ni dua na ka era vulica tiko me baleta na ivakarau va-Karisito.
Kerea na itabagone, ke rawa ni dua na macawa ni se bera na kalasi, mera vola na taro eso ka tarogi ira kina na nodra qasenivuli (ena semineri, e koronivuli, se ena veikalasi ni Lotu). Kerei ira mera veivosakitaka ena kalasi na veisala duidui e vakayagataka kina na taro na nodra qasenivuli. Na cava era raica ka a vakavotukana? Cava na vuna e bibi kina na tarogi ni taro me tiki ni veivakatavulici?

Vulica vata

Na itaviqaravi yadua oqo ena vukei ira na itabagone mera kila deivaki na iwalewale ni kena vakayagataki vakamatata na taro ni ra vakatavulici ira tale eso. Ena kena vakamuri na veivakauqeti ni Yalotabu, digitaka e dua se sivia ka na mana vinaka ki na nomu kalasi:

Sureta yadua na itabagone me wilika e dua na ivolanikalou ka lisitaki ena ituvatuva oqo ka vakatakila na taro eso a taroga na iVakabula ena ivolanikalou oya. Cava na vuna e taroga kina o Koya na veitaro oqo? Ena rawa ni a duidui vakacava na kila ni veivakatavulici eso kevaka a sega ni vakataroga na veitaro na iVakabula ena ituvaki vakaoqo? Cava na vuna e dua kina na sala momona ni nodra vakatavulici eso tale na tarogi ni taro? Sureta na itabagone mera vakasamataka eso na madigi era na rairai veivakatavulici kina (vaka dauveituberi vakavuvale, ena vosa ni soqoni ni sakaramede, ena lotu vakamatavuvale, ena so tale na ituvaki wale, ka toso yani). Ena vakavinakataka cake vakacava na nodra veivakatavulici na tarogi ni taro ena ituvaki vakaoqo?
Sureta na itabagone mera wilika na Alama 5:14–30, sarava na vidio “Things as They Really Are,” se taleva lesu na vosa nei Peresitedi Dieter F. Uchtdorf “The Merciful Obtain Mercy.” Kerei ira mera cakava e dua na lisi ni taro eso e vakayagataka o Alama, Elder Bednar, se Peresitedi Uchtdorf ni ra veivakatavulici. E vukei keda vakacava na veitaro oqo meda vuli kina? Sureta na itabagone mera navuca na sala eso e rawa ni ra vakayagataka kina na taro ena gauna tale era na kerei mera vosa kina.

3:27

Kerei ira na itabagone me ra wasea na veika era sa vulica nikua. Era sa kila deivaki li na iwalewale ni vakayagataki taro ni ra veivakatavulici? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ulutaga oqo?

Veisureti me caka

Tarogi ira na itabagone, se cava era sa vakauqeti kina me ra cakava baleta na veika era sa vulica nikua. Vakauqeti ira mera cakava na ka era sa vakila. Vakasamataka na sala e rawa mo vakamuria.