Na sala mana cava soti me da wasea kina na kosipeli vei ira tale eso?

Na wasei ni kosipeli e noda itavi kece sara na Yalododonu Edaidai. E dodonu me da dau masu ka vakasaqara na madigi eso me da tukuna kina vei ira tale eso na kosipeli vakalesui mai. Sa rawa ni da “vakarau tiko [me da] tukuna vua na tamata yadua sa tarogi [keda] na vu ni rarama sa tu ena [lomada]” (1 Pita 3:15).

Mo vakarautaki iko vakayalo

Na madigi cava beka sa yaco mai vei iko mo wasea na kosipeli vei ira na tani? Na cava beka o sa cakava mo wasea na kosipeli vei ira na tani?

Na veika cava beka era sa sotava na itabagone ena kena wasei na kosipeli? Na madigi cava beka sa vakarautaki tu vei ira na itabagone mera wasea kina na kosipeli?

Vulica ena masumasu na veiivolanikalou kei na veiivurevure oqo. Na cava ena vukei ira na itabagone me ra kila na ivakarau me ra wasea kina na kosipeli vei ira tale eso?

Maciu 28:19–20 (sa vakaroti ira na Nona tisaipeli na iVakabula me ra vakavulica na kosipeli ki na veimatanitu kecega)

Roma 1:16 (Sa sega ni madualaka na kosipeli nei Karisito o Paula)

1 Timoci 4:12 (Mo dua na ivakaraitaki ni vakabauta)

1 Pita 3:15 (Vakarau tu mo sauma na taro ni kosipeli)

V&V 1:23 (Na kosipeli e vunautaki mai vei ira na malumalumu ka rawarawa)

V&V 11:21 (Sa dodonu me da vakavakarau me da vunautaka na kosipeli ena noda segata me da kila na vosa ni Kalou)

V&V 33:8–10 (Sa dodonu me da dolava na gusuda)

V&V 88:81 (Eda sa vakaroti me da vakasalataki ira na noda neiba)

V&V 100:5–8 (Na Yalo Tabu ena tukuna vei keda na veika me da tukuna ka vakadinadinataka na dina ni kosipeli)

Joaquin E. Costa, “Ki na iTokani kei na Dauvakatataro ni Lotu,” Ensign se Liaona, Me 2017, 112–14

Dieter F. Uchtdorf, “A Ka Levu Vakaidina na Nona iNaki na Noda Kalou!” Ensign se Liaona, Nove. 2016, 19–22

Vidio: “Sharing Your Beliefs” “I’ll Go Where You Want Me to Go”, ”The Journey”, “Reach Out and Share”

Veivakavulici ena ivakarau ni iVakabula

Na iVakabula e ivakaraitaki ka dauveivakauqeti vei ira a vakavuvulica o Koya. Na sala cava e rawa ni vakauqeti ira kina na itabagone na nomu ivakaraitaki me ra wasea na kosipeli vei ira na nodra itokani kei na lewe ni matavuvale?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Sureti ira na itabagone me ra wasea e dua na gauna era a vulica kina e dua na ivakavuvuli ni kosipeli mai na nona vosa se nona ivalavala e dua na itokani.
Sureti ira na itabagone mera wasea na gauna era a vakadinadinataka kina na dina ni kosipeli ena dua na gauna lekaleka sa oti. E rawa talega ni o vakasamataka mo vakaraitaka na vidio “I’ll Go Where You Want Me to Go” se wasea na italanoa ena iwasewase “Dua na iTukutuku Kilai”mai na vosa nei Peresitedi Dieter F. Uchtdorf “ A Ka Levu Vakaidina na Nona iNaki na Noda Kalou!” Na cava era vulica na itabagone mai na veika oqori ka na rawa ni vukea me mana na nodra wasea na kosipeli?

Vulica vata

Na itaviqaravi yadua e ra e rawa ni vukei ira na itabagone me ra vulica na ivakarau me mana kina na nodra wasea na kosipeli. Mai na veivakauqeti ni Yalotabu, digitaka e dua se sivia ka na ganita vinaka na nomu kalasi:

Ena nona vosa “Ki na iTokani kei na Dauvakatataro ni Lotu,” e talanoataka e dua na italanoa o Elder Joaquin E. Costa. Na cava eda rawa ni vulica me baleta na wasei ni kosipeli mai vua na goneyalewa e vakatakila na kosipeli vei Elder Costa kei rau na daukaulotu ka vakavulici koya? Kerei ira na itabagone me ra cakacaka vata vaka veisa me ra tuva e dua na vakatasuasua lailai me matataka na tikini talanoa nei Elder Costa me baleta na nona saumaki ka vakavulica e dua na sala vinaka me wasei kina na kosipeli. E vuqa tu na sala me da wasea kina na kosipeli.
Vola na taro ena vava ni volavola: “Na cava beka me da wasea kina na kosipeli?” kei na “Me da wasea beka vakacava na kosipeli?” Wasei ira vakarua na itabagone ka kerei ira me ra vakaraica na ivolanikalou ka na sauma na taro qo (raica na ivolanikalou e vakaturi ena ituvatuva oqo; kevaka e gadrevi vakakina, vakayaloqaqataki ira na itabagone me ra wilika vakavica na ivolanikalou me vakadeitaka ni ra sa kila na ka era wilika tiko). Sureti ira me ra wasea na veika era sa kunea ka vola na nodra isaunitaro ena vava ni volavola ena ruku ni kena taro dodonu. Kerei ira na itabagone me ra digitaka e dua na ka mai na isaunitaro era sa vola ena vava ni volavola me ra na tovolea me ra vakayagataka ena nodra dui sasaga vakataki ira me ra wasea na kosipeli.
Vakaraitaka na vidio “Sharing Your Beliefs,” ka kerei ira na itabagone me ra wasea na sala era sa raica ni ra vakayagataka kina na tamata na sala vakatekinolaji me wasei kina na kosipeli. Na sala cava soti tale e rawa ni ra vakasamataka? Solia vei ira na gauna ena kalasi me ra tuva kina na sala eso e rawa ni ra vakayagataka kina na tekinolaji me ra wasea na kosipeli vei ira nodra itokani kei ira na lewe ni nona matavuvale.

Kerei ira na itabagone me ra wasea na veika era sa vulica nikua. Era sa kila beka na itabagone na ivakarau me ra wasea kina na kosipeli? E tiko tale beka eso na nodra vakatataro? Ena yaga dina beka me na tauri vakalevu cake na gauna ena iulutaga oqo?

Veisureti me caka

Sureti ira na itabagone me ra masuta na madigi eso me ra wasea na kosipeli vei ira tale eso me vakayagataki kina na veika era sa vulica. Ena dua na kalasi mai muri sureti ira na itabagone me ra wasea na veika eso a yaco kina.