E rawa vakacava meu vakaitavi vakavinaka ena veimatabose ni Lotu?

Na Lotu ni Turaga e liutaki mai na veimatabose. Ena veidusimaki ni veiliutaki ni matabete, era veivakasalataki vata na iliuliu me baleta na kena yaga vei ira vakayadua na tamata, matavuvale, kei na Lotu. Na matabose qaqa e sureta na taucoko ni itukutuku mai vei ira kece na lewe ni matabose, ka vakasaqara me ra duavata ka dusimaki mai na Yalo Tabu me tarai cake na matanitu ni Kalou. Na vulici ni kena ciqomi vakacava na ivakatakila ena veimatabose e rawa me vukea noda vakaitavi vakavinaka ena veisoqoni ni matabose, okati kina na soqoni ni mataveliutaki, soqoni ni matabisopi ni komiti ni itabagone, kei na matabose ni matavuvale.

Mo vakarautaki iko vakayalo

Ena gauna cava o sa bau lewena kina e dua na matabose? Na veika cava soti o sotava e sa vukea nomu kila na bibi ni veimatabose ena cakacaka ni Turaga?

Na veimatabose cava era sa bau vakaitavi kina na itabagone (me vaka, na kalasi kei na kuoramu ni mataveiliutaki se na komiti ni matabisopi ni itabagone)? E matata vakacava tu vei ira na itabagone nodra kila na inaki ni veimatabose?

Vakayagataka na veiivurevure e ra mo kila kina vakai iko na ivakavuvuli ni kena yaga na veimatabose ena Lotu. Qai vakasamataka me rawa vakacava na veiitaviqaravi ena vo ni ituvatuva oqo me vukea nomu tuva na ivakarau ni nodra vakaitavi na itabagone ena vuli. Na veika o sotava vakai iko ena nomu vakaitavi ena veimatabose ena vukei iko tale ga me yaga nomu veivakavulici.

Maciu 18:20 (Na Turaga ena tiko maliwai ira era soqoni vata tiko ena vuku ni Yacana)

Moronai 6:4–5 (Era soqoni vata vakawasoma na lewe ni Lotu me ra veivosakitaka kina na welefea ni yalo)

V&V 38:27 (Eda sa vakaroti meda duavata)

V&V 88:122 (E yaco na veivakavukui ena noda ciqoma na madigi meda vosa ka vakarorogo)

Henry B. Eyring, “Vuli ena Matabete,” Ensign se Liaona, Me 2011, 62–65.

Dieter F. Uchtdorf, “Cakacakataki na Dina ni Kosipeli i Jisu Karisito” soqoni ni veituberi ni veiliutaki e vuravura raraba, Fepe. 2012

Vidio: “Participate in Councils”

4:42

Veivakavulici ena ivakarau ni Turaga

Na i Vakabula a solia na madigi vei ira a vakavulica o Koya me ra taroga nodra taro vakai ira ka wasea na nodra rai e loma (raica na Luke 10:25–37). A sauma lesu nodra taro ka rogoca na veika era sotava. E rawa vakacava mo vakayaloqaqataki ira na itabagone me ra taroga na veitaro ka wasea na titobu ni nodra rai e loma?

Semata vata

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava vata kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama e koto e ra ena rawa ni vukei iko:

Kerei ira na itabagone me ra wasea e dua na ka era sotava ka ra vulica kina eso na ka me baleta na kosipeli ena dua na ivakarau vakaibalebale vakalevu sara. E rawa me ra okata kina na veika era sotava mai na lotu, semineri, lotu vakamatavuvale, vulici vakayadua ni ivolanikalou, se na bula ni veisiga.
Sureti ira na itabagone me ra wasea na veika era sotava nodra vakaitavi ena ituvatuva ni veimatabose ena Lotu, me vaka na kalasi kei na mataveiliutaki ena kuoramu se soqoni ni matabisopi ena komiti ni itabagone. Na cava era a cakava nodra vakavakarau me baleta na soqoni? Na cava era a cakava me ra vakaitavi kina? E veivuke vakacava na matabose me vakayacori na cakacaka ni Turaga?

Vulica vata

Na veitaviqaravi yadua e koto e ra ena vukei ira na itabagone ena nodra kila na ivakavuvuli ni vakayaco matabose mana ena Lotu. Muria na veivakauqeti ni Yalotabu, digitaka e dua se sivia ka na ganita na nomu kalasi: Solia na gauna vei ira na itabagone me ra vakaitavi ena tikina lailai era sotava ena matabose ni mai cava na iwasewase oqo.

Vola ena vava ni volavola na tiki ni ivolanikalou e vakatututaki ena ituvatuva oqo. Kerei ira yadua na lewenikalasi me ra digitaka e dua na tiki ni ivolanikalou me ra vulica ka qai vakasamataka na vuna e vakayagataka kina na Turaga na veimatabose me vakayacori kina na Nona cakacaka. Na cava na vuna e sega kina ni yaga kevaka e dua na tamata a vakatulewataka taucoko ka sega na veivakasalataki mai vei ira tale eso? E rawa vakacava vei ira na itabagone me ra vakayagataka na ivakavuvuli oqo ena nodra veimaliwai vata kei na nodra matavuvale?
Wasea na vosa nei Peresitedi Dieter F. Uchtdorf’ “Cakacaka ena Dina ni Kosipeli i Jisu Karisito” vaka iwasewase, ka solia vei ira yadua na itabagone me wilika e dua na iwasewase. Kerei ira na itabagone me ra vola e dua na taro me baleta na vakaitavi ena veimatabose ka rawa me saumi mai na nodra iwasewase. Sureti ira me ra veisoliyaka nodra taro kei na nodra iwasewase ni vosa vata kei na dua tale na lewenikalasi ka vakasaqara na kedra isaunitaro yadua. Na cava era vulica mai vei Peresitedi Uchtdorf ka rawa me ra vakayagataka ena nodra vakaitavi ena veimatabose ni matavuvale kei na Lotu?
Vakaraitaka na vidio “Participate in Councils.” Sureti ira na itabagone me ra vakasaqara na yavu yaga ni dua na matabose rawa ka qai vola vakaivola (eso na ivakaraitaki e rawa me oka kina na muria na Yalotabu, veirogorogoci, kei na cakava ka ciqoma na ilesilesi). Sureti ira me ra wasea na veika era sotava era sa raica kina na veiivakavuvuli oqo ni vakayagataki ena dua na matabose se ena so tale na ituvatuva.

4:42
Sureta eso na itabagone me ra wilika na veika a sotava o Peresitedi Henry B. Eyring ena nona se itabagone kina ena nona kuoramu ni matabete (ena nona vosa “Vuli ena Matabete”), ka sureta eso tale me ra wilika nona 20 na yabaki yani ki liu ena nona a bisopi (ena vosa vata ga). Kerei ira me ra veitalanoataka tale vakai ira na italanoa. Na cava era vulica mai na italanoa oqo me baleta na veimatabose? Na cava e cakava kina na veimatabose e dua na ivakarau yaga me vakayacori kina na cakacaka ni Turaga? Na veimadigi cava so e tu vei ira na itabagone me ra veivakasalataki vata kina?

Na itaviqaravi oqo e solia vei ira na itabagone na madigi me ra sotava na vakaitavi ena dua na matabose. Oqo ena vakatitobutaka nodra kila ka vakavakarautaki ira me ra vakayagataka ena taudaku ni kalasi na veika era vulica ena loma ni kalasi.

Ni mai vakacavari e dua na itaviqaravi e cake, sureti ira na itabagone me ra vakayagataka na ivakavuvuli era a vulica mai na kena ivakaraitaki ena vakaitavi ena dua na matabose. Lesi ira yadua na lewenikalasi ki na dua na itavi me ra vakayacora, ka kerei ira me ra digitaka e dua na ulutaga me rawa ni ra veivakasalataki taucoko kina, me vaka nodra vukei ira vakacava na lewe ni tabanalevu me ra kila na bibi ni vakarokoroko se yalomalumalumu.

Kerei ira na itabagone me ra wasea na veika era sa vulica nikua. Era kila tiko beka se vakacava na yaga ni nodra vakaitavi ena veimatabose ni Lotu? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Me Veivuke ena Veivakavulici

“Na taro e dau volai tu ena papaloaloa ni bera ni dau tekivu na lesoni e dau vukei ira na vuli tiko me ra vakasamataka kina na lesoni ni bera ni tekivu na kalasi” (Veituberi, Me iLutua ni Bula, 114).

Veisureti me caka

Sureti ira na itabagone me ra vakayagataka na veika era vulica ka cakava nikua ena nodra vakaitavi ena veimatabose (semati ki na nodra ilesilesi, na nodra matavuvale, se na nodra itavi ena veiliutaki ni semineri). Ena itekitekivu ni kalasi ka tarava, sureta e vica vei ira me ra wasea na veika era sotava.