E rawa vakacava na vakararavi ena loloma ni i Vakabula me vukea noqu yaco meu qasenivuli vinaka cake?

Ena noda igu meda vakavulica na kosipeli, ena so na gauna e rawa meda na vakila ni vaka me takiveiyaga. Ia e rawa meda vakayaloqaqataki mai na yalayala ni Turaga ni Nona “loloma sa rauti ira kece … [na] vakaukauwataki ira ena veika era sa malumalumu kina”(Ica 12:27). Ena noda vakayalomalumalumutaki keda, vakaraitaka noda malumalumu, ka cakacakataka na vakabauti Jisu Karisito, ena vakaukauwataki keda o Koya meda vakavulica na Nona kosipeli ena ivakarau e vinakata o Koya.

Mo vakarautaki iko vakayalo

O sa qai kunea vakacava na isaunitaro ki na nomu veitaro ni kosipeli? Na ivakarau ni vuli cava e sa vukei iko?

Na ivakarau ni vuli cava e sa matau vei ira na itabagone? E tiko beka li e dua na ivakarau ni vuli ka rawa ni dua vei ira na itabagone me vakavulica ki na kalasi?

Jeremaia 1:5–9; Mosese 6:31–34 (O ira na Parofita era vakila ni sega ni veirauti ia era ciqoma na kaukauwa mai vua na Turaga)

1 Koronica 1:27–31; V&V 1:19–23 (Na kosipeli e vunautaki mai vei ira na malumalumu ka rawarawa)

Jekope 4:7; Ica 12:23–29 (Na loloma ni i Vakabula sa rauta vinaka me vakaukauwataki ira na yalomalua)

Alama 17:9–11; 29:9 (E rawa meda yaco meda iyaya ni cakacaka ena liga ni Turaga meda kauti ira mai kina eso tale kivei Karisito)

David A. Bednar, “Ena Kaukauwa ni Turaga,” Ensign se Liaona, Nove. 2004, 76–78

David M. McConkie, “Na Vulici kei na Vakavulici ni Kosipeli,” Ensign se Liahona, Nove. 2010, 13–15

Veivakavulici ena ivakarau ni Turaga

E vakarautaki Koya na i Vakabula me veivakavulici ena nona vakayagataka vakai koya na gauna me masu ka lolo qai vakasaqara na veidusimaki mai vei Tamana. O rawa ni muria vakacava na Nona ivakaraitaki ena nomu vakavakarau mo vakavulici ira na itabagone?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni vukei iko:

Kerei ira na itabagone mera wasea na veika era sa vulica tiko me baleta na Veisorovaki kei na taro cava e tu vei ira me baleta na veika era sa vulica.

Vulica vata

Na itaviqaravi yadua e koto qori e ra e rawa me vakauqeti ira na itabagone mera vakararavi ki na loloma ni iVakabula me vukea nodra yaco mera qasenivuli vinaka cake. Muria na veidusimaki ni Yalotabu, digitaka e dua se sivia ka na ganita na nomu kalasi:

Kerei ira na itabagone mera wasea e dua na ka era sotava ka ra ciqoma kina e dua na ilesilesi ka rairai dredre se ulabaleti ira. Na ilesilesi cava ka ra tu mai liu, ka rawa mera na ciqoma ena rawa me na ulabaleti ira? Vakalasi, wilika na imatai ni 11 na parakaravu ena vosa nei Elder David A. Bednar “Ena Kaukauwa ni Turaga,” ka kerei ira na itabagone mera laveta cake na ligadra ni ra rogoca se wilika eso na ka e rawa me veivakaukauwataki se vakauqeti ira ena gauna era ciqoma kina e dua na ilesilesi ka wasea na veika era sa vulica vata ena kalasi. E rawa vakacava mera vakayacora na veika era vulica ena madigi era taukena nodra vakavulica na kosipeli kivei ira eso tale? Vakasamataka mo wasea e dua na ka o sotava vakai iko ka mani ciqoma kina na kaukauwa mai vua na Turaga mo vakayacora e dua na ilesilesi ka rairai dredre.
Ni bera na kalasi, sureta e dua na itabagone e dau vakayagataka na iyaya ni vakatagi me kauta mai nona iyaya ki na kalasi (se vakaraitaka e dua na iyaloyalo ni iyaya ni vakatagi). Kerea na itabagone me veivosakitaka na cava e dau cakava me vakadeitaka kina ni taucoko tu na iyaya ni ivakatagi. Sureta na kalasi mera wilika na Alama 17:9–11 ka vakamacalataka se vakacava e dua e vakayagataka tiko na iyaya ni vakatagi e vaka na Turaga ena nona vakayagataki keda meda iyaya ni vakavulica na Nona kosipeli. Na cava era cakava na luvei Mosaia tagane nodra vakarautaki ira mera iyaya yaga ena liga ni Turaga? E rawa vakacava vei ira na itabagone mera muria nodra ivakaraitaki ena nodra veivakavulici?
Sureti ira na itabagone mera wilika na vosa nei David M. McConkie, “Na Vulici kei na Vakavulici ni Kosipeli.” Vakauqeti ira mera vola ena papa ni volavola e dua na ituvatuva ni veika e kaya o Baraca McConkie ni ra bibi ena vakavulici ni kosipeli kei na veika e kaya ni ra sega ni bibi. Vakauqeti ira mera wasea nona vakayagataka o Baraca McConkie na italanoa me vakaraitaka na idusidusi era sa volai tu ena papa ni volavola. Sureti ira na itabagone mera tuvalaka na sala e rawa mera vakayagataka kina na veika era sa vulica mai na vosa ka ciqoma na kaukauwa mai vua na Turaga ena nodra vakavulici ira eso tale.
Kerei ira na itabagone mera raitayalolotaka ni dua na itokani e sa ciqoma e dua na ilesilesi mai vua na bisopi me vakavulica e dua na kalasi se me vosa, kei na itokani e vakila ni sega ni rauta ka sega ni vinakata me ciqoma na ilesilesi. Mera vakauqeti ira vakacava na nodra itokani o ira na itabagone? Na ivolanikalou cava e rawa mera vakayagataka me vukei koya. (Raica, me kena ivakaraitaki, na ivolanikalou e vakatututaki ena idusidusi oqo.) Sureti ira mera vakaraitaka ena kena vakayagataki na ivolanikalou oqo me vukea e dua e tu ena ituvaki oqo.

Kerei ira na itabagone mera wasea na veika era sa vulica nikua. Era sa kila li ni loloma ni i Vakabula e rawa ni vukei ira vakacava mera yaco mera qasenivuli vinaka cake? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Kua ni dau vakalialia se mo vakalewa na taro se vakasama, mo dau vakaraitaka ga na veikauwaitaki kei na loloma ena nomu tovolela mo sauma yani na nodra taro na lewenikalasi. Ena gauna era kila kina na tamata ni dau kauwaitaki na nodra vosa, era qai dau wasea mai na veika era sotava, na veika e tarai ira, ka solia talega na nodra ivakadinadina” (Veituberi, Me iLutua Ni Noda Bula [1999], 74).

Veisureti mera bulataka

Tarogi ira na itabagone, se cava era sa vakauqeti mera cakava, baleta na ka era sa vulica nikua. Vakauqeti ira mera cakava na ka era sa vakila. Vakasamataka na sala e rawa mo vakamuria.
Vakadinadinataka na kaukauwa kei na veivuke sa solia vei iko na Turaga ena nomu ilesilesi mo veivakavulici.