Au na maroroya vakacava na noqu veiyalayalati meu daunanuma tikoga kina na iVakabula?

Ni gauna eda sa kania kina na sakaramede, eda sa yalataka kina ni da daunanuma tikoga na iVakabula.Sa kena ibalebale oqo eda na dau raicatikoga na Nona ivakaraitaki kei na ivakavuvuli me dusimaka na digidigi eda vakayacora. Eda na vakaliuci Koya tiko ena noda bula ka vakasaqara meda kilai Koya ka muria na Nona lewa. Ena gauna eda sotava kina na veivakatovolei, eda na rai yani Vua meda vakacegui ka vaqaqacotaki. Sa yalataka kina na Tamada Vakalomalagi ni kevaka eda na maroroya tiko na veiyalayalati oqo, ena dau tikoga kei keda na Nona Yalotabu.

Mo vakarautaki iko vakayalo

Na cava mo na cakava mo daunanuma tikoga kina na iVakabula? E sa vakalougatataka vakacava na nomu bula ni ko daunanumi Koya?

Na cava e gadrevi kina vei ira na itabagone mera vulica na sala mera daunanuma tikoga na iVakabula ena veika kecega era cakava? Ena vukei ira vakacava mera drotani rawa mai na veitemaki ka vorata na veivakatovolei?

Ni ko vakavakarau tiko, vulica ena yalomasumasu na ivolanikalou kei na ivurevure oqo. Na veivakauqeti cava o gadreva mo wasea vei ira na itabagone?

Joni 8:29 (Sa mai vakaraitaka o Jisu Karisito ni sa daunanuma ka vakasaqara tikoga me vakataka na Tamana)

Joni 14:26; 3 Nifai 11:32 (Sa rawa ni vukei keda na Yalo Tabu meda daunanuma tikoga na iVakabula)

Alama 37:36–37 (E dodonu meda vagolea na noda vakanananu kei na ivalavala kecega vua na Turaga)

Ilamani 12:1–5 (Era dau berabera na tamata mera nanuma na Turaga)

V&V 6:36 (Raica tikoga na Turaga ena vakanananu taucoko)

V&V 20:77, 79 (Na masu ni sakaramede)

Gerrit W. Gong, “Dau Nanumi Koya Tikoga,” Ensign se Liaona, Me 2016, 108–10

Claudio R. M. Costa, “Ni ra na Dau Nanumi Koya Tikoga,” Ensign se Liaona, Nove. 2015, 101–3

D. Todd Christofferson, “Meda Dau Nanumi Koya Tikoga,” Ensign, Apr. 2011, 21–27

Veivakavulici ena ivakarau ni iVakabula

Vakasamataka mada na veika o kila tu baleta na iVakabula. A vakaraitaka vakacava o Koya ni daunanuma tikoga na Tamana? O na vakamuria vakacava na Nona ivakaraitaki mera vukei kina na itabagone mera vulica na ivakarau me ra vaqaqacotaki ni ra daunanuma tikoga na iVakabula?

Vidio: “Invite Us to Testify”

Sarava eso tale

Semata vata

Raica eso tale na vakasama ni vuli kei na veivakavulici.

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava vata kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama e koto e ra ena rawa ni vukei iko:

• Sureti ira na itabagone mera wasea e dua na ka era se qai sotava oti ga a vakavotuya vei ira e dua na ka era sa vulica tiko ena nodra kalasi ni Lotu.

• Vakaraitaka e dua na iyaloyalo ni iVakabula ni qarava tiko na sakaramede ( raica na Gospel Art Book 54). Kerei ira na itabagone mera wilika na masu ni sakaramede enaVunau kei na Veiyalayalati20:77, 79, ka vola ena vava na yalayala eda sa vakayacora ena gauna eda kania kina na sakaramede. Na cava era cakava na itabagone mera daunanuma tikoga kina na iVakabula?

Vulica vata

Raica eso tale na vakasama ni vuli kei na veivakavulici.

Na itaviqaravi yadua e ra ena rawa ni vukei ira na itabagone mera vulica na sala mera gugumatua cake ena nodra sasaga mera daunanuma tikoga na iVakabula ena veika kecega era cakava. Mai na veivakauqeti ni Yalotabu, digitaka e dua se sivia ka na ganita vinaka na nomu kalasi:

• Kerei ira yadua na lewe ni kalasi mera wilika e dua vei ira na ivolanikalou sa vakaturi tiko ena ituvatuva oqo ka wasea na veika sa vakavulici kina o koya me daunanuma tikoga kina na iVakabula. Na cava e bibi kina meda daunanumi Koya tikoga kina? Ena vakayaco-ka vakacava ki na noda bula ena veisiga ni da daunanumi Koya tikoga (kena ivakaraitaki, ena gauna ni noda digidigi se na veivakatovolei eda sotava? Sureti ira na itabagone mera wasea na gauna era a vakalougatataki kina baleta ni ra a sasagataka tiko mera nanumi Jisu Karisito.

• Kerei ira na itabagone mera wilika na Ilamani 12:1–5 ka wasea na vuna sa rawarawa tu ga kina vei ira na tamata mera guilecava na Turaga. Eda na drotani vakacava mai na veitemaki meda guilecava na Turaga? Kerei ira na itabagone mera wasea na veika era sa cakava tiko me vakadeitaka ni sa tiki tiko ni nodra bula ena veisiga na iVakabula.

• Vola ena vava ni volavola “Meu nanuma tiko vakacava na iVakabula ena veigauna?” Lesia ki na lewe ni kalasi yadua me wilika e dua na wase ni vosa nei D. Todd Christofferson “Dau Nanumi Koya Tikoga” se na vosa nei Elder Gerrit W. Gong “Dau Nanumi Koya Tikoga,” ni vakasaqarai na isau ni taro e tiko ena vava ni volavola. Kerei ira me ra wasea eso na veivakararamataki kei na italanoa mai na rua na vosa oqo e vakavulica vei keda na sala me da daunanumi Jisu Karisito tiko kina. Na cava era sa vulica ena vukei ira me ra vakayacora rawa kina na nodra veiyalayalati mera “dau nanumi Koya tikoga”?

• Kerei ira na itabagone mera vakasamataka tale mada me vica na miniti na italanoa era sa kila tu baleta na iVakabula mai na ivolanikalou. (Sa rawa ni o sureti ira mera raica na iyaloyalo 30–61 ena Kato ni iYaloyalo Vakosipeli se mera taleva lesu na itekivu ni vosa nei Elder Claudio R. M. Costa “Ni ra na Dau Nanumi Koya Tikoga” me baleta eso na vakasama .) Sureti ira mera vakasamataka ni gauna era nanuma kina na italanoa oqo ena rawa ni vukei ira ena nodra bula ena veisiga, ka kerei ira mera wasea na nodra nanuma. Solia vei ira na itabagone na ilavelave ni vosa nei Elder Costa ka sureti ira mera wilika na nona lisi ni veisala e rawa kina vei keda meda dau nanuma na iVakabula (raici ira na lisi vakadigo ena mua emuri ni vosa). Kerei ira mera wasea e dua na ka era sa vakauqeti kina ka vakamacalataka na vuna e vakaibalebale cake kina vei ira. Vakatura mera maroroya tiko na itabagone na nodra ilavelave ni vosa me vukei ira mera daunanuma tikoga kina na iVakabula ena gauna era na kania tale kina na sakaramede.

Kerei ira na itabagone mera wasea na veika era sa vulica nikua. Era sa kila vakavinaka tiko beka na sala mera maroroya tiko kina na nodra veiyalayalati o ya mera daunanuma tikoga na iVakabula? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Maqosa eso ni vuli ena kosipeli

Vakasaqara na ivakavuvuli baleti Karisito. Vakayaloqaqataki ira na itabagone mera vakasaqara na ivakavuvuli baleti Jisu Karisito ena veigauna era vulica kina na ivolanikalou. Se cava ga na veika era wilika tiko, sa rawa mera tarogi ira vakaiira ena taro “Na cava beka au sa vulica mai na itukutuku oqo baleti Jisu Karisito, na Nona ivakarau kei na itovo, Nona bula, se Nona Veisorovaki?”

Veisureti me caka

Raica eso tale na vakasama ni vuli kei na veivakavulici.

Tarogi ira na itabagone, se cava era sa vakauqeti kina me ra cakava baleta na veika era sa vulica nikua. Vakayaloqaqataki ira mera cakava na ka era sa vakila. Vakasaqara na Yalotabu ena nomu vakasamataka ena masumasu na veika e rawa mo na cakava.