Siganimate: E rawa vakacava meu wasea na noqu ivakadinadina me baleta nona Tucake tale ko Jisu Karisito?

Ena Sigatabu ni Siganimate o keda, kei ira na vakabauta Vakarisito tale eso, eda marautaka na ka bibi duadua ena itukutuku kei vuravura —na Tucaketale nei Jisu Karisito. A “sereka na ivau ni mate, ka sa sega kina na kaukauwa ni ibulubulu, ia ena vakaotia ko Koya na bati gaga nei mate ena nona kaukauwa” (Alama 22:14). Na Nona Tucaketale sa ilutua ni Nona isoro ni veivakaduavatataki, ka vakadruka kina na ivalavala ca kei na mate ki na kawatamata. Ni da wasea na noda ivakadinadina me baleta nona Tucaketale na iVakabula, sa rawa kina ni da vukei ira eso tale me ra kunea na vakacegu kei na inuinui.

Mo vakarautaki iko vakayalo

Na ivolanikalou se nodra ivakavuvuli cava na parofita ni gauna oqo sa vaqaqacotaka na nomu ivakadinadina ni nona Tucaketale o Jisu Karisito? Sa vakauqeta vakacava na nomu bula na ivakadinadina oqo? Na gauna cava o sa vakayagataka kina na ivolanikalou se ivakavuvuli oqo mo vukei ira eso me ra vaqaqacotaka na nodra ivakadinadina?

Na gauna cava o sa rogoci ira kina na itabagone me ra vakadinadinataka na iVakabula? Na cava e rawa ni o cakava mo vakauqeti ira kina me ra wasea na nodra ivakadinadina vei ira na tani?

Vulica ena masumasu na ivurevure oqo. Na cava o nanuma ni na vakauqeti ira na itabagone me ra wasea na ivakadinadina me baleta nona Tucaketale na iVakabula?

Luke 24; Joni 20 (Tucaketale o Jisu Karisito)

3 Nifai 11:1–17 (Rairai vei ira na Nifai na iVakabula sa tucaketale)

V&V 76:22–24; Josefa Simici—Ai Tukutuku 1:16–17 (iVakadinadina nei Josefa Simici me baleta na iVakabula sa vakaturi cake tale)

Thomas S. Monson, “Sa Tucake Tale ko Koya!” Ensign se Liaona, Me 2010, 87–90

D. Todd Christofferson, “Na Tucaketale nei Jisu Karisito,” Ensign se Liaona, Me 2012, 86–90

“Na Karisito Bula: Nodra iVakadinadina na iApositolo,” Ensign, Epe. 2000, 2–3

mormon.org/easter

Vidio: “Because of Him,” “His Sacred Name—an Easter Declaration”, “E Bula o Koya—Marautaka na Siganimate Baleta ni Bula o Jisu Karisito”. “Na Tui ni Sautu: Kunea na Vakacegu Tawayalani mai vei Jisu Karisito”

Veivakavulici ena ivakarau ni iVakabula

A vakayagataka na iVakabula na ivolanikalou me veivakavulici ka vakadinadinataka na Nona ilesilesi. A vakavulici ira na tamata mera vakanananutaka vakataki ira na ivolanikalou ka mera vakayagataka mera kunea kina na isau ni nodra vakatataro. E rawa vakacava ni o vukei ira na itabagone me ra kila na ivakadinadina qaqa era tu ena ivolanikalou?

Semata vata

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava vata kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama e koto e ra ena rawa ni vukei iko:

Sureti ira na itabagone mera wasea na sala era a vakayacora kina ena loma ni macawa na veika era a vulica mai na lesoni ni macawa sa oti.
Kerei ira na itabagone me ra wasea na nodra a vaqaqacotaki mai na nona ivakadinadina e dua kei Jisu Karisito.

Vulica vata

Na itaviqaravi yadua e ra ena vukea me ra vakauqeti na itabagone me ra wasea na nodra ivakadinadina ni Tucaketale vei ira na tani. Muria na veivakauqeti ni Yalotabu, digitaka e dua se sivia ka na mana vinaka kina nomu kalasi:

Vakaraitaka na vidio e vakaturi ena ituvatuva oqo, ka sureti ira na itabagone me ra veiwaseitaka na nodra vakasama kei na nodra nanuma me baleta na iVakabula. Vakayaloqaqataki ira na itabagone me ra wasea e dua vei ira na vidio oqo vei ira na lewe ni nodra matavuvale, itokani kei na so tale. Ena dua na kalasi ni gauna mai muri, sureti ira me ra tukuna na veika era sa sotava ena nodra wasea na itukutuku oqo, okati kina na kena isau era ciqoma. Sureti ira na itabagone mera taleva na itaviqaravi ena mormon.org/easter ka digitaka e dua era gadreva mera na cakava vaka-kalasi me vakavakarau ki na Siga ni Mate.
Sureti ira na itabagone me ra raica ka wasea na ivolanikalou (me vaka na kena era tuvai ena ituvatuva oqo) ka ra na vakayagataka me ra vukei ira kina eso tale me vaqaqacotaki na nodra ivakadinadina me baleta na nona Tucaketale o Jisu Karisito. Vakayaloqaqataki ira na itabagone me ra cakava e dua na lisi ni ivolanikalou ka wasei ena kalasi me rawa ni ra dau railesuva.
Sureti ira na itabagone me ra wilika “Se Bula Na Karisito” se dua na vosa ni koniferedi raraba e vakaturi ena ituvatuva oqo, ka vaqara na iyatuvosa era nanuma ni wasei kina na ivakadinadina qaqa ni nona Tucaketale na iVakabula. Kerei ira me ra veiwaseitaka na iyatuvosa era sa kunea ka vakamacalataka na vuna era vakaibalebale kina. Sureti ira na itabagone me ra veivosakitaka na vuna era nanuma kina ni sa rui bibi me tiko na noda parofita kei na iapositolo bula ka ra vakadinadinataka na Tucaketale. Wasea na nomu ivakadinadina ni Tucaketale, ka sureti ira na itabagone me ra vakayacora vakakina.
Solia vei ira na itabagone na gauna me ra vola e tolu se sivia na sala e duatani kina nodra bula ena Tucaketale nei Jisu Karisito. Sureti ira me ra wasea na veika era sa vola. Solia vei ira na ilavelave ni vosa nei Elder D. Todd Christofferson “Na Tucaketale nei Jisu Karisito,” ka kerei ira me ra vakasaqara na veika tale eso e rawa ni ra vakuria ki na nodra lisi. Sureti ira me ra vakasamataka e dua e gadrevi me kila na nona Tucaketale na iVakabula, ka vakayaloqaqataki ira me ra vakatulewataka na ivakarau me ra wasea kina na ivakadinadina vua na tamata oqori.

Kerei ira na itabagone me ra wasea na veika era sa vulica nikua. Era sa vakauqeti beka me ra wasea na nodra ivakadinadina ni Tucaketale vei ira na tani? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ulutaga oqo?

Veisureti me caka

Tarogi ira na itabagone, se cava era sa vakauqeti kina me ra cakava baleta na veika era sa vulica nikua. Vakauqeti ira mera cakava na ka era sa vakila. Vakasamataka na sala e rawa mo vakamuria.