Au na kunei ira vakacava na noqu isau ni taro va-kosipeli?

E tiki ni rawati keda vakayalo na noda vulica rawa vakataki keda na sauma na noda taro va-kosipeli. E dau yaco vakawasoma na ivakatakila ena gauna eda dau vakasaqara kina vagumatua ena yalodina na isau ni veitaro bibi ka vakabauta na yalayala a vakayacora na iVakabula: “Dou kerekere, ka na soli vei kemudou: dou vakasaqara, ka dou na kunea; dou tukituki ka na dolavi vei kemudou” (Maciu 7:7). Eda na rawa ni kunea na noda isau ni taro va-kosipeli ni da masu, vulica na ivolanikalou vakakina na nodra vosa na parofita bula, ka vakasaqara na veidusimaki ni Yalo Tabu.

Mo vakarautaki iko vakayalo

Na itavi cava sa vakayacora na vakasaqarai ni isau ni taro ena nomu vuli ivolanikalou? Na veisala cava soti o sa kunea kina nomu isau ni taro?

Na taro cava soti era sa taroga na itabagone me baleta na kosipeli? Na cava e rawa ni o cakava mo vakauqeti ira na itabagone mera vakasaqara na isau ni nodra taro va-kosipeli?

Vulica ena masumasu na veiivolanikalou kei na veiivurevure oqo. Na cava ena vakauqeti ira na itabagone mera vaqara na isau ni nodra taro va-kosipeli?

1 Nifai 15:2–11 (A tu na nodrau taro o Lemani kei Lemueli ia rau a sega ni taroga vua na Turaga)

Alama 40:1–12; Ica 2:18–23; Josefa Simici—Ai Tukutuku 1:10–18 (iVakaraitaki ni tamata era a vaqara na nodra isau ni taro)

V&V 6:14–15 (Ena rawa ni vakararamataka na noda vakasama na Yalotabu ke da taro vua na Turaga)

V&V 9:8–9 (Ni da lomatarotaro, sa dodonu meda dau vakadikeva ena noda vakasama ka qai taroga vua na Turaga ke sa donu)

W. Mark Bassett, “Me Baleta Noda Vakatorocaketaki kei na Vuli Vakayalo,” Ensign se Liaona, Nove. 2016, 52–54

Jeffrey R. Holland, “Kemuni na Turaga, Au Sa Vakabauta,” Ensign se Liaona, Me 2013

“E Sauma na Veitaro ni Yalo na iVola i Momani,” Vunautaka na Noqu Kosipeli (2004), 119–20

James B. Martino, “Vuki ki Vua ka na Basika Mai na iSaunitaro,” Ensign se Liahona, Nove. 2015, 58–60

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama e koto e ra ena rawa ni vukei iko:

Sureti ira na itabagone mera wasea na sala sa vukei ira kina na ka era vulica rawa ena dua na gauna (vuli yadua, lotu vakamatavuvale, semina, kei na so tale) mera kila e dua tale na ka era a vulica ena dua tale na gauna.
Sureti ira na itabagone mera tuva na taro era dau taroga wasoma na tamata me baleta na bula se lotu (me baleta e so na ivakaraitaki, raica na Vunautaka na Noqu Kosipeli,tabana e 119). Na cava e namaka vei keda na Turaga meda vakayacora ni da vakatataro tu? Vakauqeti ira na lewe ni kalasi mera vakasamataka na veitaro oqo ena gauna ni lesoni. Kakua ni taura e levu na gauna ena kalasi ena nomu tovolea tiko mo sauma na veitaro oqo, ia mo vakanamata ga ena vakavulici ira na itabagone ena ivakavuvuli ena vukei ira ena nodra kunea na isau ni nodra taro.

Vulica vata

Na veiitaviqaravi yadua e ra ena rawa ni vukei ira na itabagone mera kunea na isau ni nodra taro va-kosipeli vakaiira. Mai na veivakauqeti ni Yalotabu, digitaka e dua se sivia me na ganita vinaka na nomu kalasi:

Sureti ira na itabagone me ra vola eso na taro e rawa ni ra taroga ena initaneti ka kunea na kena isau totolo, me vaka na, “Ena vakacava beka na draki ni mataka?” Vukei ira me ra vakasamataka na ivakaraitaki eso ni taro vakayalo ka gadrevi kina na sasaga kei na vosota, me vaka na, “E dina beka na iVola i Momani?” Ena vosa nei Elder W. Mark Bassett “Me Baleta Noda Vakatorocaketaki kei na Vuli Vakayalo,” wilika vata na tolu na parakaravu ka tekivu ena “Me rawa ni da kila vakamatata na veika vuni ni Kalou” Sureti ira na itabagone me ra wilika na 1 Nifai 2:16 kei na 1 Nifai 10:17 ka raica na ivakarau e vakaraitaka kina o Nifai na ikalawa yadua ni kena vakasaqarai na kilaka ka tukuni ena vosa nei Elder Bassett. Bolei ira na itabagone me ra muria na ivakaraitaki nei Nifai ni tiko na nodra taro me baleta na kosipeli.
Sureti ira na lewenikalasi me ra railesuva na vosa nei Elder James B. Martino “Vuki ki Vua ka na Basika mai na iSaunitaro.” Na cava eda sa vulica me baleta na kena kunei na isau ni noda taro mai na nona itukutuku me baleti iratou na luvei Mosaia kei Leimani kei Lemueli? E rawa ni o sureti ira na lewe ni kalasi me ra veidutaitaka na italanoa e rua oqo ena nomu cakava e dua na lisi me baleta na duidui ni nodra ivakarau na tamata kei na isau ni nodra ivalavala. E rawa talega ni o sureti ira na lewe ni kalasi me ra wasea na veika era sa sotava ena nodra ciqoma na isau ni nodra taro.
Sureti ira na itabagone mera wilika na veiivolanikalou oqo: Maciu 7:7; V&V 6:14–15; 9:7–9. Vakalasi, vola e dua na lisi ni ivakavuvuli era vakavulica na veitikina oqo, me baleta na tarogi ni taro kei na ciqomi ni kena isau. Na cava e sega ni dau sauma vakadodonu ka vakatotolo sara kina na Turaga na noda taro? Vakasamataka mo tukuna vei ira na itabagone na gauna a tu kina e dua na nomu taro va-kosipeli ka qai ciqoma e dua na kena isau. Sureti ira na itabagone mera cakava vakakina.
Kerei ira na itabagone mera vakasamataki ira na tamata ena ivolanikalou era a taroga na taro ka veimuataki kina ivakatakila (ke gadrevi, sa rawa mo raica vata kei na ivolanikalou era vakaturi tu ena itukutuku oqo). Sureti ira na itabagone mera wilika na veika baleti ira oqo ena ivolanikalou ka qai vaqara na taro era taroga, era vaqara vacava na isau ni nodra taro, kei na isaunitaro era ciqoma rawa. Kerei ira me ra wasea na veika era vulica ena kalasi. Na ivakavuvuli cava soti tale me baleta na taro era rawa ni vulica mai na veika sa yaco oqo? Era rawa vakacava ni vakayagataka na veiivakavuvuli oqo na itabagone kina nodra taro vakaiira?
Kerea e dua na lewenikalasi me lako vakavakarau mai me vakasotari rau vata na italanoa ena Marika 9:14–27, se wilika vakalasi na taro. Wasea vakatolu na kalasi, ka qai solia ki na ilawalawa yadua e yadua na vakadidike nei Elder Jeffrey R. Holland me baleta na italanoa ena nona vosa, “Turaga, au sa Vakabauta.” E rawa vakacava ni ra vakayagataka na vakadidike nei Elder Holland ni ra vakatataro se vakatitiqataka na kosipeli o ira se dua tale era kila?
Vakalasi, wilika na imatai ni va na parakaravu ni “ E Sauma na Veitaro ni Yalo na iVola i Momani, ” ena Vunautaka na Noqu Kosipeli (tabana e 119). Sureta yadua na lewe ni kalasi me digia e dua vei ira na taro lisitaki ka ra dau vakataroga voli o ira se dua era kila. Solia vei ira na itabagone na gauna ena kalasi mera wilika kina na parakaravu mai na iVola i Momani ka kunei kina na taro digitaki. Kerei ira mera wasea na isau ni taro era sa kunea ka vakamacalataka se ra rawa ni vakayagataka vakacava na iVola iMomani me vukei tale eso mera sauma na veiitaro vata vaqori.

Ni oti nodra vakacavara e dua vei ira na itaviqaravi e cake, sureti ira na itabagone mera taleva na taro era sa vola ena itekivu ni kalasi. Solia vei ira na madigi mera vakarautaka na sala era na vaqara kina na isau ni nodra taro. Ke rawa, vakatarai ira mera tekivu vaqara na isau ni taro ena ivolanikalou, nodra vosa na parofita bula, iSakisaki ni iTabagone, kei na ivurevure tale eso ni Lotu.

Kerei ira na itabagone me ra wasea na veika era sa vulica nikua. Era sa kila vinaka beka na sala mera qara kina na isau ni nodra taro va-kosipeli vakaiira? E tiko tale beka eso na nodra vakatataro? Ena yaga beka me na tauri vakalevu na gauna ena iulutaga oqo?

Me Veivuke ena Veivakavulici

Vakasamataka mo lesia e dua na lewe ni kalasi ni se vo e vica na siga ka sureti koya me vakavulica kece se dua na tiki ni lesoni. Vakauqeti ira na itabagone mera vakayagataka na ituvatuva ni vuli oqo mera vakarau veivakavulici kina.

Veisureti me caka

Sureti ira na itabagone mera wasea eso na veivakurabuitaki era sotava ena gauna ni kalasi. Na cava era vakayacora mera kunea kina na isau ni taro ki na nodra vakatataro me baleta na kosipeli? Vakauqeti ira mera wasea na veika era kunea ena veikalasi mai muri.