Era cakacaka vata vakacava na lewe ni matabete kei ira na marama ena kena tarai cake na matanitu ni Kalou?

Ena veitokani vata kei ira na lewe ni matabete ni Kalou, e yaga vei ira na marama nodra vukea na Tamada Vakalomalagi me ra tucake tale mai na mate na tamata kece ga ka rawata na bula tawamudu.Ena ruku ni nodra veidusimaki o ira era vakaitutu ena idola ni matabete, me ra veivakasalataki vata na lewe ni matabete kei ira na marama me vakalougatataki na nodra bula na luve ni Kalou. E rawa me yaco oqo ena soqoni ni tabanalevu kei na iteki, ena veimatavuvale, kei na vuqa na ituvaki tale eso.

Mo vakarautaki iko vakayalo

Ena gauna cava o sa bau raica me ra cakacaka vata kina na lewe ni matabete kei ira na marama ena kena tarai cake na matanitu ni Kalou? Na cava soti o sa sotava e rawa mo wasea vei ira na itabagone?

Na cava na vuna e bibi kina vei ira na itabagone me ra kila nodra cakacaka vata vakacava na marama kei ira na lewe ni matabete ena Lotu ni Turaga? Na madigi cava e tu vei ira na cauravou kei na gone yalewa me ra veiqaravi vata kina ena gauna oqo? Na cava era gadreva me ra kila ena nodra qaravi ira eso tale ena gauna oqo kei na vakavakarau ni veiqaravi ena gauna sa bera mai?

Ena nomu vakavakarau, vulica ena masumasu na veiivolanikalou kei na veiivurevure oqo. Na cava o vakila me na veivuke sara vakalevu kivei ira na itabagone o vakavulica?

“Na Matavuvale: Ai Vakaro Ki Vuravura Raraba, ” Ensign se Liaona, Nove. 2010, 129 (Na tagane kei na yalewa vakawati, me rau dau veilomani ka veikauwaitaki vakaveiwatini ka vakakina vei ira yadudua sara na luvedrau; raica na parakaravu 6 kei na 7)

Russell M. Nelson, “Dua na Kerekere vei Ira na Ganequ Yalewa,” Ensign se Liaona, Nove. 2015, 95–98

Quentin L. Cook, “Era Vakasakiti Dina na Marama Yalododonu Edaidai!” Ensign se Liaona, Me 2011, 18–21

“Veivakalougatataki ni Matabete Vei Keda Kece: Na iSema Sega ni Cavuka Rawa ki na Matabete,” Luvequ Yalewa ena Noqu Matanitu: Na iTukutuku Kei Na Cakacaka Ni iSoqosoqo Ni Veivukei (2011), 125–43

Vidio: “The Errand of Angels,” “Sustaining Each Other in the Home”

Veivakavulici ena ivakarau ni Turaga

Na i Vakabula e sureti ira na daumuri Koya me ra vakadinadinataka, ena nodra vakayacora, a tara na lomadra na Yalotabu. E rawa vakacava mo vakayaloqaqataki ira na itabagone o vakavulica me ra vakadinadinataka kivei ira vakataki ira na taucoko ni dina ni kosipeli?

Semata vata

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira me ra raica na kena yaga na kosipeli ena nodra bula ni veisiga? Na veivakasama ka koto oqo e ra ena rawa ni vukei iko:

Sureti ira na itabagone me ra wasea e dua na ka era qai sotava wale ga qo ni vakadeitaka vei ira na dina ni veika era a vulica tiko ena lotu se mai vei ira vakataki ira.
Vola ena vava ni volavola na ulutaga ni lesoni. Sureti ira yadua na lewenikalasi me ra vola na isaunitaro. Qai kerei ira me ra cakacaka vata vakaitokani ka semata nodra isaunitaro ki na dua na iyatuvosa. Sureti ira me ra wasea vata kei na kalasi na nodra iyatuvosa.

Vulica vata

Na veitaviqaravi yadua e koto e ra ena vukei ira na itabagone me ra kila na sala ni nodra cakacaka vata na marama kei ira na lewe ni matabete ena kena tarai cake na matanitu ni Kalou. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureti ira na itabagone mera raicalesu na vosa nei Peresitedi Russell M. Nelson, me tekivu ena ika tini ni parakaravu. Na ivakadinadina cava era sa raica ena kena mai yaco na parofisai nei Peresitedi Kimball? Na cava era rawa ni ra vakayacora na itabagone, yalewa kei na tagane, me vukea na yaco ni parofisai oqo? Vakauqeti ira na itabagone mera raicalesu na vo ni vosa nei Peresitedi Nelson, ka vaqara na veisala mera cakacaka vata kina na marama kei ira na lewe ni matabete. Navuca nodra sureti na lewe ni kalasi mera wasea na veika era vakila baleta na nodra veivakayarayarataki na marama yalododonu, ena nodra vola eso na ivola ni vakavinavinaka vei ira na marama ena nodra bula se ena nodra tabaka eso na ka ena sala ni vakauitukutuku raraba.
Wasea na wase 8 ni Luvequ Yalewa ena Noqu Matanitu me wase vakalalai me rawa ni ra wilika na itabagone ena gauna ni kalasi, ka lesi ira vakayadua ena dua na iwase. Sureti ira me ra vakasaqara na itukutuku se italanoa e vakaraitaka nodra cakacaka vata vakacava na lewe ni matabete kei ira na marama ena kena tarai cake na matanitu ni Kalou. Sureti ira na itabagone me ra wasea nodra vosacavuti se italanoa vata kei na kalasi. Na italanoa tautauvata cava e rawa me ra wasea na itabagone mai na veika era dui sotava vakai ira?
Mai na veivakadonui nei bisopi, sureta e vica na marama kei na lewe ni matabete ka ra vakailesilesi ena tabanalevu me ra wasea vata kei na kalasi na veika era sotava nodra cakacaka vata ena Lotu. E yaga vakacava vei ira mai na veika era dui sotava vakayadua kei na kena ituvatuva? Sureti ira na itabagone me ra wasea eso na veika era sa sotava oti.
Sureti ira na itabagone me ra wilika na iwase vakatokai na “Nodra iTavi na Marama ena Lotu” mai na vosa nei Elder Quentin L. Cook “Era Vakasakiti dina na Marama YDE!” Kerei ira me ra veiwaseitaka vakai ira na ka era vulica. E rawa vakacava me ra vakayagataka na itabagone na itukutuku nei Elder Cook me vukei ira eso tale me ra kila na bibi ni marama ena Lotu”?
Vakaraitaka na vidio “The Errand of Angels” se na imatai ni vica na miniti ni “Ward Council Model,” qai kerei ira na itabagone me ra wasea eso na raiyawa era rawata rawa me baleta na nodra cakacaka vata na marama kei ira na lewe ni matabete. Vakauqeti ira na itabagone me ra wasea na ivakarau era raica vei ira na marama kei na turaga ena nodra matavuvale kei na tabanalevu na kena tarai cake na matanitu ni Kalou. E rawa vakacava vei ira na cauravou kei na gone yalewa me ra vakayacora na veika era vulica mai na vidio oqo ena nodra veiqaravi vata ena Lotu?
Sureti ira na itabagone me ra wilika ena vakadirorogo na parakaravu 6 kei na 7 ena “Na Matavuvale: Ai Vakaro Ki Vuravura Raraba ” ka vakaraitaka na ivakarau ni nodra cakacaka vata na tagane kei na yalewa ena kena vakayacori na inaki tawamudu ni Kalou. Kerei ira na itabagone me ra wasea na veika era kunea. Ena gauna cava era sa raica kina na ivakaraitaki ni tagane kei na yalewa vakawati nodra vakamuria na ivakavuvuli ena ivakaro ni matavuvale? Na cava e rawa me ra cakava ena gauna oqo nodra vakavakarau ki na dua na veimaliwai vakamatavuvale e vakamacalataki tu ena ivakaro ni matavuvale?

Kerei ira na itabagone mera wasea na veika era sa vulica nikua. Era kila tiko beka nodra cakacaka vata vakacava na turaga kei na marama ena Lotu? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Me Veivuke ena Veivakavulici

“Na nomu vakavakarau vakayalo ena yaga sara vakalevu ena kena vukei na veivakavulici. Ena gauna o sa vakavakarau tiko kina vakayalo, o sa kauta tale tiko mai na yalo ni sautu, na loloma kei na veidokai. Era na kila o ira o vakavulica na dei ni nodra vakasamataka vakatitobu se na veivosakitaki ni veika e yaga tawamudu” (Veituberi, Me iLutua Ni Noda Bula [1999], 93).

Veisureti me caka

Tarogi ira na itabagone, se cava era sa vakauqeti kina me ra cakava baleta na veika era sa vulica nikua. Vakauqeti ira mera cakava na ka era sa vakila. Vakasaqara na Yalotabu ena nomu vakasamataka ena masumasu na veika e rawa mo na cakava.