Ena vukei au vakacava na noqu vulica na ivolanikalou meu vulica na veika me baleta na Tamada Vakalomalagi?

Ena loma ni veitabayabaki kece sara, era sa dau vakatakila mai na parofita na veika dina me baleta na Kalou. Ni da vulica vagumatua na nodra ivakadinadina ena ivolanikalou, e rawa ni da vulica na veika me baleta na ituvaki ni nona bula na Tamada Vakalomalagi ka vakalevutaka cake na noda vakabauta kei na noda ivakadinadina. Na vinaka cake ni noda kila na veika e baleta na Tamada Vakalomalagi, na vinaka cake ni noda kila na keda icavacava vakalou me vaka ni da Luvena.

Mo vakarautaki iko vakayalo

Sa vaqaqacotaka vakacava na nomu vakabauta na Tamada Vakalomalagi kei na nomu ivakadinadina me baleti Koya na nomu dau vulica vakataki iko na ivolanikalou? Na iwalewale cava soti o sa vakayagataka mo vulica kina na ivolanikalou ka na rawa ni yaga vei ira na itabagone?

Na cava e bibi kina me ra kila ka ciqoma na itabagone na veika me baleta na Tamada Vakalomalagi? Na ivolanikalou cava o nanuma ni na rawa ni veivuke vakalevu vei ira?

Ni o vulica ena masumasu na ivolanikalou kei na ivurevure tale eso oqo, vakasaqara na veimalanivosa se iyatuvosa e rawa ni ra vakayagataka na itabagone me ra vulica kina eso tale na ka me baleta na kena ituvaki na Tamada Vakalomalagi.

Omanai 1:17; Mosaia 1:3–7; Alama 37:8–9 (E na vukei keda na ivolanikalou me da kila na kena ituvaki na Kalou)

V&V 1:37–39; 18:34–36 (Eda rawa ni rogoca na domo ni Kalou ena ivolanikalou)

D. Todd Christofferson, “Na Veivakalougatataki ni iVolanikalou,” Ensign se Liaona, Me 2010, 32–35; raica talega na vidio “The Blessings of Scripture”

Veivakavulici ena ivakarau ni iVakabula

A vakayagataka na iVakabula na ivolanikalou me vakavulica ka vakadinadinataka kina na Nona ilesilesi ena ituvatuva nei Tamana. E rawa vakacava ni o vukei ira na itabagone me ra vulica me ra vakayagataka na ivolanikalou me ra kila kina eso tale na ka me baleta na Tamada mai Lomalagi?

Semata vata

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Sureta e dua na cauravou ena kalasi me wasea vei ira na goneyalewa e dua na ka sa vulica me baleti iratou na Lewetolu Vakalou ena dua na soqoni ni kuoramu ni Matabete i Eroni se qai oti toka. Oti qai sureta e dua na goneyalewa me wasea vei ira na cauravou e dua na ka sa vulica ena kalasi ni Goneyalewa.
Kerei ira na itabagone me ra vakananuma vakatitobu na taro oqo “Na cava ena yaco vei ira e sega vei ira se ra sega ni dau vakayagataka na ivolanikalou?” Sureti ira me ra vaqara na isau ni veitaro oqo ni ra wilika e dua na ivolanikalou e vakaturi tiko ena ituvatuva oqo se ena iwasewase ka kena ulutaga “Na iVolanikalou e Vakarabailevutaka na Noda Kato ni Vakanananu” ena vosa nei Elder D. Todd Christofferson “Na Veivakalougatataki ni iVolanikalou.” Kerei ira me ra wasea na veika era raica.

Vulica vata

Na itaviqaravi yadua e ra ena vukei ira na itabagone me ra kila na sala me ra vakayagataka kina na ivolanikalou me vakatitobutaka na nodra kilai ratou na Lewetolu Vakalou. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureti ira na tabagone me ra tuva ena papa eso na ka dina era kila me baleta na Kalou. Tarogi ira se ra kila vakacava na dina oqo. Vakaraitaka vei ira na ivakavakayagataki ni iDusidusi Vakaiulutaga me ra kunea kina na ivolanikalou e vakavuvulitaka na veika dina me baleta na Kalou era sa tuva (me vaka beka oqo, e rawa ni ra vaqara “God, Love of” se “God, Wisdom of”). Sureti ira me ra vola ena papa na idusidusi eso era kunea. Vakayaloqaqataki ira na itabagone me ra wasea e dua tale na dina era vulica me baleta na Tamada Vakalomalagi ni ra wilika na ivolanikalou oqo ka vola ena papa. Na cava era bibi kina na ivolanikalou ena nodra vukei keda me da kila na Kalou?
Digitaka e dua na iwase se malanivosa mai na ivolanikalou, ka vakaraitaka vei ira na itabagone na veika e rawa ni ra vulica me baleta na Tamada Vakalomalagi mai na iwase oya. Me vakaoqo, e rawa ni o vakaraitaka vei ira na kena vakavuvulitaki ena 1 Nifai 1 me baleta na Nona lagilagi (raica na tikina 8–9) kei na Nona loloma uasivi (raica na tikina 14, 20). Solia vei ira na itabagone na gauna ena kalasi me ra wilika e dua na wase se dua na malanivosa ka vola na veika era vulica me baleta na Tamada Vakalomalagi ni ra wiliwili tiko. O na gadreva beka mo vakatura na veimalanivosa oqo: Aisea 55; 2 Nifai 26:23–33; Mosaia 2:19–25; Vunau kei na Veiyalayalati 1:17–39. E rawa ni ra cakava yadua ga, vakaiwasewase, se vakalasi taucoko sara ga. Kerei ira na itabagone me ra veiwaseitaka na veika era sa raica.
Sureti ira na itabagone me ra wilika yadua na vosa “God” ena Bible Dictionary ka vola e dua na ka era sa vulica me baleta na Kalou na Tamada ena veika era sa wilika. Vakayaloqaqataki ira me ra raica e dua na ivolanikalou veiwekani e dusimaki ena vosa. Ni ra sa oti kece, sureti ira yadua na lewe ni kalasi me ra raica e dua ena kalasi ka vola e duatani na ka, ka kerei ira me ra veiwaseitaka na veika era sa vulica (oka kina na ivolanikalou kecega era sa kunea). Wasea na sala sa yaco mo kila kina na Tamada Vakalomalagi ena kena wiliki na ivolanikalou, ka kerei iratou e vica na itabagone me ratou wasea na veika eratou sa sotava.

Kerei ira na itabagone me ra wasea na veika era sa vulica nikua. Na cava era sa bau vakila se vakanananu kina? Era sa kila beka na sala e rawa ni vukei ira kina na vulici ni ivolanikalou me ra kila me baleta na Tamada Vakalomalagi? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“E vakavuqa ni dau levu cake na lewe ni lesoni mai na veika e rawa ni o vakavulica ena gauna e soli vei iko. Ena veigauna vaqori, sa dodonu mo digitaka na iyaragi ena veivuke vakalevu duadua vei ira o vakavulica” (Na Veituberi, Me iLutua ni Noda Bula [1999], 98–99).

Veisureti me caka

Vakayaloqaqataki ira na itabagone me ra vakayagataka na veika era vulica nikua me vakavinakataka cake nodra vuli ivolanikalou yadua. Ena veilesoni mai muri, sureti ira me ra wasea na vakasama eso era sa rawata me baleta na Tamada Vakalomalagi mai na nodra vuli.