E rawa vakacava meu vakayagataka na vakatauvatani ni ka me vakavulici kina eso me baleta na Veisorovaki i Jisu Karisito?

Valenivola

Me vukei ira eso mera kila e dua na nanuma e qaqaco vinaka, vakayalo me vaka na Veisorovaki, ena veivuke sara vakalevu ke vakatauvatani kei na so na ka e dina ka kilai vinaka. E dau vakayagataka na Turaga kei ira na Nona parofita na vei ivakaraitaki kei na veika kilai vinaka era dau yaco, me vukei ira era vakavulica mera kila na ivakavuvuli vakayalo. Ena noda vulica na vakatauvatani vata ni ka, ena rawa kina meda kila vakavinaka cake vakai keda na Veisorovaki, ka na rawa ni yaco me vakaibalebale vakalevu cake sara kina noda vakavulici ira yani eso tale.

Mo vakarautaki iko vakayalo

Na veivakatauvatani cava se lesoni vakaraitaki e sa vukei iko nomu kila vakavinaka cake na Veisorovaki?

Na madigi cava e tu vei ira na itabagone mera vakavulici ira eso tale me baleta na Veisorovaki? Ena veivuke vakacava na kena vakayagataki na veivakatauvatani me vukei ira na itabagone mera veivakavulici vakavinaka cake?

Aisea1:18 ( E vakaibalebaletaka o Aisea me baleta na ucacevata kei na vutika ni sipi me vakavulici na veivutuni)

Maciu 11:28–30 (Na i Vakabula e vakatautauvatana na veivuke e solia o Koya vei keda ki na dua na ivua)

Luke 15:11–32 (Vakaibalebale ni gone cidroi)

2 Nifai 1:15 (E vakatautauvatana o Liai na vakabulai ki na vakavolivoliti ena liga loloma ni Kalou)

Jeffrey R. Holland, “Lewa Dodonu, Loloma,” Ensign se Liaona, Me 2015, 104–6

Vidio: “The Mediator”; “Where Justice, Love, and Mercy Meet”

Veivakavulici ena ivakarau ni Turaga

E wasea na i Vakabula na italanoa rawarawa, vakaibalebale, kei na ivakaraitaki ni bula dina ka vukei ira a vakavulica o Koya mera kunea na lesoni ni kosipeli ena vuravura vakavolivoliti ira. E rawa vakacava mo vukei ira na itabagone mera veivakavulici ena ivakarau ni i Vakabula? (Raica na: Vakavulica na Kosipeli ena iVakarau ni i Vakabula }, 4–5.)

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni vukei iko:

Tarogi ira na itabagone na cava era sa cakava na nodra qasenivuli, iliuliu, kei na itubutubu me vukei ira nodra kila na Veisorovaki.

Vulica vata

Na itaviqaravi yadua e koto qori e ra e rawa me vukei ira na itabagone mera vulica na kena vakayagataki vakacava na veivakatautauvatani me vakavulici ira eso tale me baleta na Veisorovaki. Muria na veidusimaki ni Yalotabu, digitaka e dua se sivia ka na ganita na nomu kalasi:

Vakaraitaka na vidio “The Mediator.” Sureti ira na itabagone vakayadudua mera vola na mataqali iwase ni veivakatauvatani e vakayagataka o Peresitedi Boyd K. Packer (me vaka na dausoli dinau, na dau dinau, na dinau, kei na so tale) ka vola na ka e matataki yadua. Wasea na lewe ni kalasi mera veisa, ka kerei ira mera veivakavulici vakaiira me baleta na Veisorovaki ka vakayagataka na veivakatautauvatani nei Peresitedi Packer. E rawa vakacava me vukei ira na itabagone mera kila vakavinaka cake na Veisorovaki veivakatauvatani oqo?
Kerei ira na itabagone mera vakasamataka ka wasea na ivakaraitaki ni veivakatauvatani ena ivolanikalou ka rawa me vakayagataki me vakavulica na veika me baleta na Veisorovaki (raica, kena ivakaraitaki, na ivolanikalou e vakatututaki ena idusidusi oqo). Na cava era vulica me baleta na Veisorovaki mai na veivakatautauvatani oqo? Vola ena papa ni volavola, “__________ e tautauvata __________.” Sureti ira na itabagone mera vakalewena na imatai ni vanua lala vata kei na dua na ivakavuvuli ka semati ki na Veisorovaki (me vaka naveivutuni, veivosoti, se tucaketale) kei na ikarua ni vanua lala eso na ka e kilai vinaka ka rawa ni vakayagataki ena nodra vakavulici eso tale me baleta na ivakavuvuli oqori. Solia vei ira na itabagone e vica na madigi mera vakatovotovotaka kina na ivakarau ni veivakavulici oqo.
Wasea na kalasi ki na rua na iwasewase. Lesia e dua na iwase me wilika ka veivosakitaka na italanoa nei Elder Jeffery R Holland me baleti rau na veitacini erau kabata na bariniqele ena nona vosa “Lewa Dodonu, Loloma”). Kerea na iwase kadua me ra wilika ka veivosakitaka na ivakaraitaki nei Elder Dallin H. Oaks me baleta na vunikau ka kalove ena cagi(ena nona itukutuku na “The Atonement and Faith”). Kerea na iwasewase yadua me vakavulica na iwasewase tale kadua ena veika era sa vulica me baleta na Veisorovaki mai na veivakatautauvatani era sa vulica mai.

Kerei ira na itabagone mera wasea na veika era sa vulica nikua. Era sa kila li na kena vakayagataki vakacava na veivakatauvatani me vakavulici me baleta na Veisorovaki kivei ira tale eso? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“O koya e matai ena veivakavulici e sega tale ni dau vakasama, ‘Na cava au na cakava ena kalasi edaidai?’ ia, ‘Na cava era na cakava na noqu lewenikalasi edaidai?’; me kua ni, ‘Na cava au na vakavulica vei ira edaidai?’ e vinaka cake me, ‘Au na vukei ira vakacava na noqu lewenikalasi mera kunea na veika dodonu mera kila?’” (Virginia H. Pearce, ena Veituberi, Me iLutua Ni Noda Bula [1999], 69).

Veisureti mera bulataka

Kerei ira na itabagone mera vakasamataka na veika era vulica nikuame baleta na veivakavulici. Na cava era vakila ni ra vakauqeti mera cakava ena nodra vakavulici eso tale me baleta na Veisorovaki? Kevaka e rawa, laivi ira mera veivakavulici vakaiira ena gauna ni kalasi, se tuvalaka mera veivakavulici ena so tale na ituvatuva.
Wasea nomu ivakadinadina ni veivakalougatataki e rawa vei ira na itabagone mera kauta vei ira eso tale ena nodra vakavulica na veika me baleta na Veisorovaki.