Na cava e rawa me vakavulici au na ivolanikalou me baleta na Veisorovaki i Jisu Karisito?

Na inaki levu ni ivolanikalou sa ikoya na vakadinadinataki Jisu Karisito, vukea noda lako mai Vua ka vakaivotavota ena Nona Veisorovaki. Ena noda vakasaqaqara vagumatua ena ivolanikalou, eda na vulica rawa kina na veika me baleta na iVakabula mai na ivakavuvuli, italanoa, kei na ivakatakarakara eso.

Mo vakarautaki iko vakayalo

Na ivolanikalou cava me baleti Jisu Karisito era vakaibalebale vakalevu vei iko? Na ivakatakilakila cava i Jisu Karisito o sa kunea ena ivolanikalou? Na ivolanikalou cava e vukea na nomu kila vakavinaka cake na Veisorovaki?

Era kunei Jisu Karisito vakacava ena ivolanikalou o ira na itabagone o vakavulica? Na ivakatakilakila cava soti i Jisu Karisito e rawa mo vukei ira mera kunea kina?

Vulica na ivolanikalou kei na ivurevure ni Lotu tale eso ena masumasu. Na cava o vakila mo wasea vei ira na itabagone?

iVakatekivu 22:1–14 (Ena nona solia o Eparaama na luvena o Aisake ena solibula sa vakatautauvatani ena solibula ni Luve ni Kalou; raica na Jekope 4:5)

2 Nifai 11:4; Mosese 6:63 (Na veika kece ga sa solia vei keda na Kalou e vakavulica na veika me baleta na Luvena)

Mosaia 13:33–35 (O ira kece na parofita era vakadinadinataki Jisu Karisito)

Boyd K. Packer, “Na Vu ni Noda iNuinui,” Ensign se Liaona, Nove. 2014, 6-8

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni vukei iko:

Vakamuria na veika era a vulica na itabagone ena gauna ni Wilivola ni Sigatabu ena macawa sa oti. Era vakayagataka vakacava na veika era vulica ena loma ni macawa?
Sureti ira na itabagone mera wasea e dua na volanikalou era qai wilika wale ga oqo me baleta Nona Veisorovaki o Jisu Karisito.

Vulica vata

Na itaviqaravi yadua ka koto oqori e ra e rawa me vukei ira na itabagone mera vulica ena kunei vakacava o Jisu Karisito ena ivolanikalou. Muria na veivakauqeti ni Yalotabu, digitaka e dua se sivia ka na ganita vinaka na nomu kalasi:

Wilika vakalasi na imatai ni lima na parakaravu ni vosa nei Peresitedi Boyd K. Packer “Na Vu ni Noda Vakanuinui.” Sureti ira na lewe ni kalasi mera raica na Topical Guide ka wilika na iwiliwili ni ulutaga ena matanivolakata ka tekivu ena “Jisu Karisito.” Sureti ira mera wilika e vica na ivolanikalou me baleti ira na ulutaga oqori ka wasea vata kei na kalasi na cava e rawa mera vulica me baleta na itavi ni iVakabula kei na Nona Veisorovaki. Me tiki ni itaviqaravi oqo, e rawa ni ra vulica na ivolanikalou baleti Jisu Karisito ka a vosa tiko kina o Peresitedi Packer.
Sureti ira yadua na itabagone mera kauta mai ki na kalasi e dua na ivolanikalou taleitaki me baleti Jisu Karisito kei na Nona Veisorovaki. Na lewe ni kalasi mera vola na tiki ni ivolanikalou ena papa ni volavola, ka wilika vata vakalasi. Tarogi ira na itabagone mera wasea na vuna e vakaibalebale kina vakalevu vei ira na veimalanivosa oqo. Vukei ira mera bulia e dua na isema ni ivolanikalou kei na veitikina oqo.
Vulica vata e dua na italanoa se dua na ka e yaco ena ivolanikalou ka tautauvata kei na Nona Veisorovaki na iVakabula. Kevaka e rawa, vakaraitaka na iyaloyalo ni italanoa (raica na iVola ni iYaloyalo Vakosipeli). Sureti ira na itabagone mera kila rawa se vakatakilakilataka vakacava na italanoa oqori se na ka e yaco ena ilesilesi ni iVakabula. Solia na madigi vei ira na itabagone mera vakasaqara eso na italanoa ni ivolanikalou ka vakavulica vaka- ivakatakilakila na veika me baleta na Veisorovaki i Jisu Karisito.
Sureti ira na tabagone mera vakadikeva ena iVola ni iYaloyalo Vakosipeli ka raica na iyaloyalo ni italanoa ena ivolanikalou ka rawa me vakayagataki ena kena vakavulici na Veisorovaki. Me ivakaraitaki, na italanoa ni waqa i Noa e rawa me vakatakilakilataka na kena vakarautaki vakacava na Veisorovaki ena tataqomaki mai na waluvu ni ivalavala ca. Vakauqeti ira mera wilika na ivolanikalou ka sema ki na iyaloyalo era raica (tiki ni ivolanikalou era kunei ena itekitekivu ni ivola) ka wasea na veika era vulica me baleta na Veisorovaki.
Sureti ira na itabagone mera wilika Mosese 6:63 ka vola na veika “sa tiko mai lomalagi,” “sa tiko e vuravura,” ka “sa tiko e ruku ivuravura” era tukuni Jisu Karisito. Vukei ira mera vakayagataka na Topical Guide mera kunea na ivolanikalou ka vakatautauvatani kina o Jisu Karisito kei na so na veika oqo (me ivakaraitaki, e vakatautauvatani o Koya ki na uluvatu ena Ilamani 5:12).

Kerei ira na itabagone me ra wasea na veika era sa vulica nikua. Era kila vinaka mera vulica vakacava mai na ivolanikalou na veika me baleti Jisu Karisito kei na Nona Veisorovaki ? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ulutaga oqo?

Me Veivuke ena Veivakavulici

“Kua ni rerevaka na vakanomodi. Era dau gadreva na noda itokani na gauna mera vakasamataka kina na isau ni nodra taro se mera dau vakamacalataka kina na veika era vakila. E rawa ni o cegu vakalailai ni oti na nomu taroga e dua na taro, ni oti na kena wasei mai e dua na ka eda sotava vakayalo, se ena gauna e dredre tiko kina na nona vakamacalataki koya e dua” (Na Veituberi, Me iLutua ni Noda Bula, [1999], 77).

Veisureti mera bulataka

Wasea eso na ka o vulica wale ga oqo ena ivolanikalou me baleti Jisu Karisito.
Sureti ira na itabagone mera wasea eso na veivakurabuitaki era sotava ena gauna ni kalasi. Na cava era na cakava ena nodra vulica vakayadua na ivolanikalou me vakanamata vakalevu cake ena vuli me baleti Jisu Karisito? Vakauqeti ira mera wasea na veika era kunea ena veikalasi mai muri.