Ena vukei au vakacava na Yalo Tabu meu vakatavuvulitaka na kosipeli?

Ni da vakatavuvulitaka na kosipeli, sa dodonu me da vakadinadinataka ena yalomalumalumu ni Yalo Tabu sai koya na qasenivuli dina. Na noda galala sa ikoya me da veiqaravi me vaka ni da iyaya ni cakacaka me na veivakavulici, vakadinadina, veivakacegui, ka veivakauqeti mai kina ki vei ira na tani na Yalo Tabu. Sa dodonu me da bula kilikili me da ciqoma na Yalotabu, masuta na Nona veituberi ni da vakavakarau ka veivakavulici, ka tara cake e dua na draki me ra vakila kina na Nona veivakauqeti o ira eda vakavulica.

Mo vakarautaki iko vakayalo

O na kila vakacava ni o sa veivakavulici tiko ena Yalo Tabu? O sa bau sotava beka eso na veika vakayalo ena veivakavulici ka rawa mo wasea vakavinaka vei ira na itabagone?

Na madigi cava soti e tu vei ira na itabagone me ra vakavulici ira kina eso tale ena kosipeli? Era sa kila deivaki li se cava na ibalebale ni vuli ena Yalotabu? Na sala cava e rawa ni o vukei ira kina me ra vakila na bibi ni kena vakamuri na Yalotabu ena nodra veivakavulici?

Wilika ena yalomasumasu na veiivolanikalou kei na ivurevure oqo. Na cava o vakauqeti mo wasea vei ira na itabagone?

Joni 15:26; V&V 50:13–22; 52:9 (Sa talai mai na Dauveivakacegui me vakavuvulitaka na dina)

2 Nifai 33:1–2 (Na Yalo Tabu ena kauta yani na noda vosa ki yalodra na luve ni tamata)

Alama 17:3 (Era a vakarautaki ira na luvei Mosaia me ra veivakavulici ena kaukauwa kei na dodonu)

V&V 11:21; 84:85 (Ena vukei keda na Yalotabu me da kila na ka me da tukuna kevaka eda segata me da rawata na vosa ni Kalou)

V&V 42:11–17 (Kevaka e sega vei keda na Yalotabu, me da kakua ni veivakavulici)

Dallin H. Oaks, “Teaching and Learning by the Spirit,” Ensign, Maji 1997, 6–14

Matthew O. Richardson, “Veivakavulici ena iVakarau ni Yalotabu,” Ensign se Liaona, Nove. 2011, 94–96

“Na Kaukauwa ni Yalotabu ena Saumaki,” Vunautaka na Noqu Kosipeli (2004), 92–93

Veivakavulici ena ivakarau ni iVakabula

A taroga na iVakabula na taro ka vakavurea vei ira e vakavuvulica me ra vakasama ka vakanananu vakatitobu. A solia vei ira na madigi me ra taroga na nodra taro ka wasea na nodra nanuma. Baleta ni lomani ira, era vakila ni ra taqomaki vinaka ena nodra wasea na nodra vakasama kei na veika era nanuma. Na sala cava e rawa ni o vukei ira kina na itabagone me ra vakila ni ra na taqomaki ena nodra wasea na nodra vakasama kei na veika era nanuma?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira me ra raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Kerei ira na itabagone me ra vakasamataka e dua na gauna era a vakila kina na Yalotabu ena dua na kalasi vaka-Lotu, ena semineri, se ena dua na lotu vakamatavuvale. Na cava a cakava na qasenivuli me sureti kina na Yalotabu?
Sureti ira na itabagone me ra tuva na madigi eso a yaco vei ira me ra vakavulica kina na kosipeli vei ira tale eso. Vakauqeti ira me ra okata na veigauna eso ni veivakavulici sega ni namaki ka sega ni vakarautaki, ka vakakina na ilesilesi vakarautaki eso ni veivakavulici. Vola ena papa, “na cava na kena ibalebale me da veivakavulici ena Yalotabu?” Sureti ira na itabagone me ra vakananuma vakatitobu, ena gauna taucoko ni lesoni, na ivakarau me ra sauma kina na taro oqo me vaka ni semati ki na madigi ni veivakavulici era sa tuvalaka. Ena itinitini ni lesoni, sureti ira me ra wasea na nodra nanuma.

Vulica vata

Na itaviqaravi ka ra koto oqo e ra ena vukei ira na itabagone me ra kila se cava na ibalebale ni veivakavulici ena Yalotabu. Ni vakamuri na veivakauqeti ni Yalo Tabu, digitaka ga na kena o kila ni na ganita na nomu kalasi:

Me ra digitaka na itabagone e dua vei ira na taro oqo: Na cava sa rui bibi kina me da veivakavulici ena Yalotabu? E vakalougatataki keda vakacava na Yalotabu ni da qasenivuli? Ena vakalougatataki ira vakacava eda vakavulica na Yalotabu? Na cava e dodonu me da cakava me da sureta kina na Yalotabu ena noda veivakavulici? Kerei ira yadua na lewe ni kalasi me ra wilika e dua na ivolanikalou me baleta na veivakavulici ena Yalotabu (me vaka na kena era vakaturi ena ituvatuva oqo) ka raica mai na ivolanikalou e dua na isau ni taro e digitaka. Solia e dua na madigi vei ira na lewe ni kalasi me ra wasea na nodra ivolanikalou kei na kena isaunitaro era sa kunea.
Digitaka ena masumasu na iwasewase eso mai na vosa nei Elder Dallin H. Oaks “Veivakavulici kei na Vuli mai na Yalotabu” se mai Na Veituberi, Me iLutua ni Noda Bula, tabana e 47–48, o nanuma ni na vukei ira na itabagone me ra kila na kena ibalebale me ia na veivakavulici ena Yalotabu. Wasea vakalalai na kalasi, ka kerea na iwasewase yadua me ra wilika vata e dua vei ira na iwasewase oqori ka vola e dua na ituvatuva ni veika e rawa ni ra cakava me ra veivakavulici kina ena Yalotabu. Sureta na veiwasewase me ra veiwaseitaka na veika era sa vulica, ka vakauqeti ira me ra vakuria na nodra ituvatuva ni ra vakarorogo tiko ki na iwasewase tale eso. Kerei ira me ra vakasamataka vakatitobu na ivakarau e rawa ni ra vakayagataka kina na veika era sa vulica ena dua na madigi ni veivakavulici mai muri.
Sureti ira na itabagone me ra wilika na vosa nei Matthew O. Richardson “Veivakavulici ena iVakarau ni Yalotabu,” vaqara na isau ni veitaro eso “E dau veivakavulici vakacava na Yalotabu?” ka da “Na vakatotomuri Koya vakacava ena noda veivakavulici?” Kerei ira me ra veiwaseitaki na veika era sa kunea. Na cava soti era sa bau sotava oti ena nona veivakavulici e dua na qasenivuli “ena ivakarau ni Yalotabu”? Ena rawa vakacava ni ra muria na nona ivakaraitaki na qasenivuli oya ena nodra veivakavulici ka tarava?
Solia vei ira yadua na lewe ni kalasi e dua na ilavelave “Na Kaukauwa ni Yalotabu ena Saumaki” ena Vunautaka na Noqu Kosipeli (tabana e 102–103). Kerei ira me ra wilika yadudua, ka vaqara na isau ni taro oqo “Na cava na kena ibalebale me da veivakavulici ena Yalotabu?” Sureti ira me ra wasea na veika era raica. Taroga vei ira na itabagone na cava na vuna era nanuma kina ni bibi me ra kila na veika oqo ena gauna oqo, ni bera ni ra laki veiqaravi vakadaukaulotu tudei. Vakauqeti ira me ra vakacavara na itaviqaravi ni “Vuli Yadua” kei na “Vuli iVolanikalou” vakataki ira (kevaka e rawa, e rawa ni o solia vei ira na gauna ena kalasi me tekivu kina). Sureti ira me ra vola toka na veika kece e vakauqeti ira ena nodra wilika na ivolanikalou oqo ka wasea ena kalasi ena dua na lesoni mai muri.

Kerei ira na itabagone me ra wasea na veika era sa vulica nikua. Na cava era sa bau vakila se vakanananu kina? Era kila beka na ivakarau ni veivakavulici ena Yalotabu? E tiko tale beka eso na nodra vakatataro? Ena yaga dina beka me tauri vakalevu na gauna ena iulutaga oqo?

Me Veivuke ena Veivakavulici

“Kua ni dau rerevaka na vakadigagalu. Era gadreva na tamata na gauna me ra vakasamataka ka sauma kina na taro se me ra tukuna na veika era vakila tiko. Mo cegu mada ni o taroga e dua na taro, ni oti na kena wasei e dua na ka vakayalo e sotavi, se ni dua na tamata e dredre tiko na nona vakamacalataki koya” (Na Veituberi, Me iLutua ni Noda Bula, [1999], 67).

Veisureti me caka

Tarogi ira na itabagone, se cava era sa vakauqeti mera cakava, mai na ka era sa vulica nikua, Vakauqeti ira me ra cakava na ka era sa vakila. Vakasaqara na Yalotabu ena nomu vakasamataka ena masumasu na veika mo na cakava.