Ena vukei au vakacava na vakarokoroko meu ciqoma kina na ivakatakila?

Ni da vakarokoroko, eda sa vakaraitaka tiko ni da lomana na Kalou ka na rawarawa sara meda na ciqoma na ivakatakila kivei keda yadua. Na itovo e vakarokoroko ena vukei keda meda vakila tikoga na domo lailai, e vinaka ni Yalotabu. Kevaka meda na dau rokova na veika tabu, ena nuitaki keda tiko na Tamada Vakalomalagi ka vakatakilai vei keda na ikuri ni veika dina.

Mo vakarautaki iko vakayalo

Na cava na ibalebale ni ka oqo vei iko? E vukei iko vakacava na nomu vakarokoroko mo vakila na Yalotabu? Na cava soti o sa sotava e rawa ni o wasea vei ira na itabagone?

Na cava na ibalebale ni vakarokoroko vei ira na itabagone ena nomu kalasi? O na vukei ira vakacava mera raica na isema e tiko ena kedrau maliwa na vakarokoroko kei na ivakatakila?

Vulica ena yalomasumasu na veiivolanikalou kei na ivurevure oqo. Na cava o sa raica ena vukei ira na itabagone mera tauyavutaka e dua na yalo ni vakarokoroko?

1 Tui 19:12; 3 Nifai 11:1–7 (Sa dau vosa vei keda na Kalou ena domo lailai, sa rogo vinaka)

Same 46:10 (“Dou tiko lo, mo dou kila niu sa Kalou”)

V&V 63:64; 84:54–57 (Meda dau rokova na veika tabu)

Paul B. Pieper, “Maroroya Me Ka Tabu,” Ensign se Liaona, Me 2012, 109–11

“Vakarokoroko,”Tudei ena Vakabauta (2003), 149

“iVakatakila,” Tudei ena Vakabauta (2003), 33–37

Veivakavulici ena ivakarau ni Turaga

Ena veituvaki kecega, e a dauniivakaraitaki ka qasenivuli vei iratou na Nona tisaipeli na iVakabula. A vakarautaki Koya me veivakavulici ena nona gauna duadua ni masu kei na lolo. Wasea vei ira na itabagone na kena a vukei iko na nomu vakarokoroko mo ciqoma kina na nomu ivakatakila. O na vakayaloqaqataki ira vakacava na itabagone mera dau rokova na veika tabu?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veigauna (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Sureti ira na itabagone mera wasea mai na nodra vakatataro eso baleta na veika era sa vulica tiko ena kalasi tale eso.
Vola ena papa ni volavola, “Na vakarokoroko sai koya __________.” Kerei ira na lewe ni kalasi mera gole mai ka vola ena papa ni volavola na ibalebale ni vakarokoroko. Sureti ira na itabagone mera semata ki na ivakamacala oqo na veika era sa vulica baleta na vakarokoroko ena lesoni nikua.

Vulica vata

Na itaviqaravi yadua e ra ena vukei ira na itabagone mera kila vakavinaka na isema e tiko ena kedrau maliwa na vakarokoroko kei na ivakatakila. Mai na veivakauqeti ni Yalotabu, mo digitaka e dua se sivia ka na ganita na nomu kalasi:

Kerei ira na itabagone mera wilika na “Vakarokoroko” ena Tudei ena Vakabauta se tikina eso mai na vosa nei Elder Paul B. Pieper “To Hold Sacred,” mera raica kina na isau ni taro “Ena vukei au vakacava na vakarokoroko meu ciqoma kina na ivakatakila?” Sureti ira na itabagone mera wasea na veika era sa raica. Na cava era nanuma na itabagone ni ra rawa ni cakava mera vakarokoroko cake kina vakalevu?
Wasea vakailawalawa na kalasi, ka kerea na ilawalawa yadua mera vulica vata e dua se rua na ivolanikalou e vakaturi tiko ena ituvatuva oqo. Sureti ira na ilawalawa mera veivosakitaka na veika era sa vulica mai na ivolanikalou oqo me baleta na isema e tiko ena kedrau maliwa na vakarokoroko kei na ivakatakila. Kerei ira na ilawalawa yadua mera wasea ki na vo ni kalasi na veika era sa vulica rawa.
Sureti ira na itabagone mera vakasaqara na vosa nei Peresitedi Boyd K. Packer “Reverence Invites Revelation” ka mera raica na veika e dodonu meda cakava meda sureta kina na ivakatakila ena noda soqoni ni Lotu. Kerei ira mera wasea na veika era sa raica rawa ka vakatura na sala me vakayagataki kina na ivakasala nei Peresitedi Packer me baleta na kena rokovi na veika eso se veika tabu (me vakataka na valetabu, na ivolanikalou, kei na veika vakaoqo).

Kerei ira na itabagone mera wasea na veika era sa vulica nikua. Era sa kila vakavinaka tiko beka na kena semati tiko na vakarokoroko ki na ivakatakila? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Ena gauna eda dau soqoni kina meda vulica na ivakavuvuli ni kosipeli, e dodonu me caka e na yalo e vakarokoroko.… Na tawa-vakarokoroko e ganita na nona inaki na meca, ni na vakataotaka na sala maravu ni ivakatakila e na vakasama kei na yalo.…Na vakarokoroko e sureta mai na ivakatakila” (Boyd K. Packer, ena Veituberi, Me iLutua Ni Noda Bula [1999], 97).

Veisureti mera bulataka

Tarogi ira na itabagone na cava era sa vulica rawa nikua me baleta na bibi ni vakarokoroko ena kena ciqomi na ivakatakila. Era na veisautaka vakacava na nodra itovo se kedra ituvaki raraba me rawa ni ra ciqoma kina na ivakatakila?