Maroroya Me Ka Tabu

Mai vei Elder Paul B. Pieper

Ena Vitusagavulu

Na veika tabu e dodonu mera taqomaki vakavinaka, vakacerecerei vakalevu, ka me rokovi vakaidina.

Ena 1,500 na yabaki ni bera na Karisito, a vagolei e dua na ivakatawa ni sipi ki na dua na vunikau sa kama tiko ena baba ni Ulunivanua o Orepi. Na veisotari vakalou a itekitekivu ni nona vakamataliataki o Mosese mai na dua na ivakatawa ni sipi me dua na parofita kei na nona cakacaka ni vakatawa sipi me laki vakasokomuni ira mai na Isireli. Ni oti e tinikatolu na drau na yabaki, a vakauqeti sara e dua na bete cauravou digitaki ena nona ivakadinadina e dua na parofita sa cudruvi. Na ka oqo sa tubu cake kina na nona veisau o Alama mai na dua na vakailesilesi vakamatanitu ki na dua na italai ni Kalou. Ni oti toka e voleka ni 2,000 na yabaki, a curuma yani na veikau e dua na cauravou yabaki 14 ka vakasaqara na isau ni dua na taro dina. A sotava o Josefa Simici ena veikau oqo na ituvatuva me laki vakaitutu kina vakaparofita vakakina na kena yaco e dua na vakalesuimai.

A veisau taucoko na nodratou bula o Mosese, Alama, kei Josefa Simici ena nodratou sotava na veika vakalou. Na veika oqo a vakaqaqacotaki iratou me ratou yalodina tikoga vua na Turaga kei na Nona cakacaka ena nodratou bula taucoko se cava ga na veiulubaleti ni veisaqasaqa kei na veika dredre era tarava mai.

Na noda sotava na veika vakalou ena sega beka ni yaco e matada votu se veivakurabuitaki, se veivakacacani sara na noda bolebole. Ia, me vakataki ira na parofita, na noda yaloqaqa meda vosota tiko ena yalodina ena vakatau ki na noda kila, nanuma, ka maroroya na veika tabu eda ciqoma mai lagi.

Na kaukauwa, idola, kei na cakacakatabu vakalotu nikua sa vakalesuimai ki vuravura. Era sa tiko talega na ivolanikalou kei ira na ivakadinadina bula. O ira era sa vakasaqara na Kalou sa rawa mera papitaiso me bokoci kina na ivalavala ca kei na veivakadeitaki “me tabaka na uludra ka papitaisotaki ira ena bukawaqa kei na Yalo Tabu” (V&V 20:41). Ni da sa ciqoma oti na isolisoli talei vakalesuimai oqo, kei na noda sotava na veika vakayalo ena okati kina vakalevu na ikatolu ni Lewetolu Vakalou, na Yalo Tabu.

Ena domo lailai, sa vosa vei au na Yalotabu

Me dusimaki au, vakabulai au mai na butobuto au raica.

(“The Still Small Voice,” Children’s Songbook, 106)

Meda sa liutaki tu;

Yalotabu vakalou.

Me tukuni Jisu mai,

Qai rarama noda rai.”

(“Yalo Tabu Liutaka,” Sere ni Lotu, naba 81)

Ni da vakasaqara na isaunitaro mai vua na Kalou, eda vakila na, domo lailai sa vosamalua ki yaloda. Na veika era vakilai oqo—na veivakatakilakila—era sa vakaivakarau ka dredre ka rawa meda vakawaleni ira se tuvanaki ira vakainaki se kila vakatotolo. Na itukutuku vakatamata yadua oqo e vakadinadinataka na loloma kei na veikauwaitaki vakatamata yadua ni Kalou me baleti ira na Luvena kei na nodra dui ilesilesi vakayago yadudua. Na kena vakanananutaki ena veisiga kei na volai tiko ni ivakatakilakila e lako mai na Yalotabu sa qarava tiko e rua na kena inaki ni noda vukei keda (1) meda kila rawa na noda sotava na veika vakalou ka (2) maroroi ira me noda ka vakakina vei ira na noda kawa. Na kena volai sa ivakaraitaki tale tikoga ni kena ivakarau noda kauwaitaka ka vakavinavinaka kei na noda sa vakaio tiko vua na Kalou, ni “sa kilikili sara me vakatusa na tamata ni sa bulia na ka kecega na Kalou; ia me muria talega na nona vunau. Ia kevaka e sega, ena tau vua na nona cudru waqawaqa” (V&V 59:21).

Ena noda doka na veika eda sa dau ciqoma mai vua na Yalotabu, e kaya kina na Turaga: “Ia mo dou kila ni sa ka tabu na veika vakalomalagi” (V&V 63:64). Na Nona vosa e sega ni veivakavotui walega; e veivakamatatataki ka ivakamacala talega. Na rarama kei na kila-ka mai lomalagi sa ka tabu sara. Sa ka tabu baleta ni sa kena ivurevure o lomalagi.

Na vosa tabu e kena ibalebale ni sa kilikili me vakacerecerei ka dokai. Ni da vakatoka e dua na ka me ka tabu, sa vakatakila kina na Turaga ni sa ka yaga sara vakalevu ka me vakaliuci mai na veika cava tale eso. Na veika tabu e dodonu mera taqomaki vakavinaka, vakacerecerei vakalevu, ka me rokovi vakaidina. Na ka tabu sa cecere sara ena ituvatuva vakaveiliutaki ni yavu ni bula vakalomalagi.

Na veika sa tabu vua na Kalou sa ka tabu vei keda ena gauna walega ni noda vakayagataka na galala ni digidigi; na tamata yadudua me na digitaka me ciqoma ka taura me ka tabu na veika e sa lewa na Kalou me ka tabu. E solia mai na rarama kei na kila-ka mai lomalagi. E sureti keda meda ciqoma ka vakadeitaka me sa ka tabu.

Ia “sa kilikili me tu na veibasai ni ka kecega” (2 Nifai 2:11). Na veibasai ni veika tabu na butobuto se tawa kilikili—o ya na veika e vakayago se vakavuravura. Na veika vakavuravura sa dau veisaqasaqa kei na veika tabu meda guta yani ka vakaliuca. Na noda kila na veika ni vuravura sa yaga ki na noda bula vakayago ena veisiga. E kuria vakakina na Turaga, na Nona vakasalataki keda meda vakasaqara na vuli-ka kei na vuku, meda vulica rawa ka kila-ka mai na veiivola vinaka, ka yaco meda kila na vosa eso, duivosavosa, kei ira na tamata (raica na V&V 88:118; 90:15). O koya gona, na noda digitaka na veika tabu kei na veika vakavuravura sa noda digitaka na ka e veiganiti me vakaliuci, sega ni vakatabakidua; ni “sa vinaka na vuku kevaka [eda sa] muria na ivakaro ni Kalou” (2 Nifai 9:29; vakamatatataki).

Na ivalu ni kena digitaki na veika me vakaliuci vei rau na veika tabu kei na veika vakavuravura ena yalo yadudua ni tamata ena rawa me vakamatatataki ena veika a sotava o Mosese ena vunikau a kama tiko. E kea a ciqoma kina o Mosese na nona veikacivi tabu mai vei Jiova me laki sereki ira mai na Isireli mai na tiko vakabobula. Ia, taumada mai na nona kila vakavuravura me baleta na kaukauwa kei Ijipita kei ira na fero a vakavuna me lomatarotaro kina. Sa qai cakacakataka o Mosese na nona vakabauta na vosa ni Turaga, ka biliga laivi na nona kila vakavuravura ka vakararavi ga ki na veika tabu. Na vakararavi o ya a vakatikora vua na kaukauwa me ulabaleta kina na veivakatovolei vakayago ka liutaki Isireli tani mai Ijipita.

Ni oti na nodra dro bula mai na mataivalu nei Noa, era a vesu ka laki tiko vakabobulataki vei Emuloni. A rawa sara ga me a vakatitiqataka o Alama na ivakadinadina vakayalo a ciqoma o koya ni a vakarorogo tiko vei Apinatai. Ia, a vakararavi ga ki na veika tabu ka soli kina vua na kaukauwa me vosota rawa ka yaco me drobula mai na nona vakatovolei vakayago.

A sotava o Josefa Simici e dua na digidigi tautauvata ena itekivu ni gauna me vakadewataka kina na iVola i Momani. Sa kila tu o koya ni sa ka tabu na peleti kei na cakacaka ni vakadewa. Ia a vakauqeti mai vei Martin Harris me vakaliuca mada na veinanumi vakaveitokani vakavuravura kei na veika vakailavo, ka sa veisaqasaqa tiko kei na veivakaro tabu. Sa yaco kina, me yali na veiivola sa vakadewataki oti tu. A cudruvi Josefa na Turaga ni sa solia na “ka [sa] tabu vei ira na tamata ca” (V&V 10:9) ka vakatikitikitaki koya vakalailai mai na peleti kei na isolisoli ni vakavakadewa. Ena gauna sa muadonu tale kina na veika me vakaliuca o Josefa, era sa vakalesuimai na veika tabu ka tomani tale na cakacaka.

Sa vakarautaki tu ena iVola i Momani na ivakaraitaki tale eso ni sasaga me vakaliuci kina na veika tabu. Era tukuni kina o ira era vakadinata ni a muataki ira na nodra vakabauta ki na vunikau ni bula mera kania na vuanikau tabu, o ya na loloma ni Kalou. Kei na nodra veivakalialiai na tamata mai na valelevu o ya a vakavuna vei ira sa vakadinata mera vagolea na nodra raica vakatabakidua tiko na veika tabu ki na veika sa vakavuravura. (Raica na 1 Nifai 8:11, 24–28.) E muri era a digitaka na Nifai na viavialevu ka cakitaka na yalo ni parofisai kei na ivakatakila, ka “vakalialia na veika tabu” (Ilamani 4:12). Eso mada ga vei ira era a raica e matadra na ivakatakilakila kei na cakamana me baleta na sucu mai ni Turaga, era digitaka mera cakitaka ga na veika tabu sa vakaraitaki mai lomalagi ka tokona ga na ivakamacala vakavuravura (raica na 3 Nifai 2:1–3).

Nikua sa tomani tikoga na kena sasaga. Sa tubu cake tikoga na vakaitamera kei na kaukauwa ni voqa kei vuravura. Sa toso cake tikoga na nona vakacacana ka vakauqeta tikoga ko vuravura na tamata vakabauta mera biuta laivi na veika tabu. Baleta ga “eda sa raica me vaka na titiro ena iloilo buwawa” (1 Korinica 13:12) ka “sega ni kila na ibalebale ni veika kece eda sa raica” (1 Nifai 11:17), ni so na gauna eda na vakila noda rawai vakarawarawa ka da gadreva na veivakadeitaki cecere vakayalo. A kaya na Turaga vei Oliver Cowdery:

“Kevaka ko sa gadreva e dua tale na ivakadinadina, mo nanuma lesu ga na bogi ko a masu ka tagica kina vei au mo kila na dina ni veika oqo.

“Au a sega li ni vakaceguya kina na lomamu? Ai ivakadinadina cava tale ko gadreva, me uasivia na i vakadinadina sa solia na Kalou?” (V&V 6:22–23).

A tataunaka na Turaga vei Oliver kei keda meda vakararavi ga ena ivakadinadina tabu vakatamata eda a ciqoma ena kena bolei na noda vakabauta. Me vakataki Mosese, Alama kei Josefa ni bera, na kena sotavi na veika vakalou oqo e veiqaravi me veivakaiyaqataki vakayalo ka taqomaki keda ena gauna ni veivakatovolei.

Na veika tabu era na sega ni digitaki mera sorovaki. O ira era digitaka mera vakanadakuya na veika tabu ena vakabutobutotaki na nodra vakasama (raica na V&V 84:54), ka vakavo ga ke ra veivutuni, na rarama sa tu vei ira ena kau tani mai vei ira (raica na V&V 1:33). Ni ra sega ni vakaiyaqataki ena veika tabu, era na raica ni ra sa kuitaki yani vakatawa savasava ena wasawasa ni veika vakavuravura. Ena kena veibasai, o ira era vakatabuya na veika tabu era na ciqoma na yalayala oqo: “Raica sa vu ni rarama na Kalou; ia ko koya sa kunea na rarama, ka tudei tikoga vua na Kalou, ena vakararamataki vakalevu; io ena tubucake tikoga na nona rarama me yacova na siga lagilagi ko ya” (V&V 50:24).

Me na vakalougatataki keda na Turaga meda dau kila, nanuma tiko, ka maroroya tikoga me ka tabu na veika eda sa ciqoma mai lagi. Au vakadinadinataka ni da cakava oqo, ena tu vei keda na kaukauwa meda na vosota rawa kina na veivakatovolei ka vorata rawa na bolebole ni noda gauna oqo. Ena yaca i Jisu Karisito, emeni.