Nodra Raivotu na Parofita Baleta na iSoqosoqo ni Veivukei: Vakabauta, Matavuvale, Veivukei
Mai vei Julie B. Beck
Peresitedi Raraba ni iSoqosoqo ni Veivukei Vakacegui Walega Oqo
Na vakabauta, matavuvale, kei na veivukei—e tolu na vosa rawarawa sara oqo era sa tukuna tiko na nodra raivotu na parofita baleti ira na marama ena loma ni Lotu.
Ena vica na yabaki sa oti oqo au sa dauvakauqeti meu vosa tiko baleta na iSoqosoqo ni Veivukei—na kena inaki kei na kena veiqaravi,1 na yaga ni kena itukutuku,2 na nona cakacaka, kei na nona sema vata tiko kei ira na bisopi kei ira na kuoramu ni Matabete i Melikiseteki.3 E vaka e bibi toka ena gauna oqo meda raica mada vakatabakidua na nodra raivotu na parofita baleta na iSoqosoqo ni Veivukei.4
Me vaka ga nodra tomana tiko ena veivakavulici na parofita ni Turaga vei ira na italatala qase kei na bete levu me baleta na kedra inaki kei na nodra ilesilesi, era sa wasea vakakina na nodra raivotu me baleti ira na marama ena iSoqosoqo ni Veivukei. Mai na nodra ivakasala, sa matata vinaka kina ni inaki ni iSoqosoqo ni Veivukei o ya me vakatorocaketaka na vakabauta kei na ivalavala dodonu ni marama yadudua, vaqaqacotaka na nodra matavuvale kei na itikotiko, ka vakasaqara ka vukei ira era vakaleqai tu. Na vakabauta, matavuvale, kei na veivukei—e tolu na vosa rawarawa sara oqo era sa tukuna tiko na nodra raivotu na parofita baleti ira na marama ena loma ni Lotu.
Mai na itekitekivu ni Veivakalesuimai, era a wasea tiko kina na parofita na nodra raivotu baleti ira na marama yaloqaqa, yalodina, ka vakainakinaki, ka ra kila vakavinaka tu na kedra yaga tawamudu kei na inaki. Ena gauna a tauyavutaka kina o Parofita Josefa Simici na iSoqosoqo ni Veivukei, a vakasalataka na isevu ni kena peresitedi me “vakatulewa ena isoqosoqo oqo, ena nodra qaravi na dravudravua—vukei na nodra gagadre, ka sotavi na veika tale eso ni isoqosoqo vou oqo.”5 E raica o koya na isoqosoqo oqo me “dua na isoqosoqo digitaki, mera vakatikitikitaki mai na veika ca ni vuravura.”6
A vakasalataka o Brigham Young, na ikarua ni Peresitedi ni Lotu, vei rau na nona daunivakasala kei na Kuoramu ni iApositolo Le Tinikarua mera dusimaki ira na bisopi mera “tauyavutaka [na marama] ena iSoqosoqo ni Veivukei ni Marama ena veitabanalevu.” A kuria, “Eso beka era na nanuma ni oqo e dua na ka walega, ia e sega.”7
E muri, a qai kaya o Peresitedi Joseph F. Smith ni duidui oqo mai na veimataisoqosoqo vakavuravura ni ra sa “cakava na tagane, se cakava na yalewa,” ni iSoqosoqo ni Veivukei e “cakava na Kalou, vakadonui vakalou, cicivaki vakalou, tabaki vakalou mai vua na Kalou.”8 A kaya o Peresitedi Joseph Fielding Smith vei ira na marama ni “sa soli kina vei ira na kaukauwa kei na veivakadonui mera cakava e vuqa sara na ka.”9 A kaya, “Sa ikemuni na lewe ni mataisoqosoqo cecere duadua ni marama e vuravura, na mataisoqosoqo sa tiki bibi sara ena matanitu ni Kalou e vuravura ka sa tuvanaki ka cakacaka vakamatau me vukei ira na lewena yalodina mera rawata na bula tawamudu ena matanitu nei Tamada.”10
Sa Dua na Dodoliga Raraba ni Veivakauqeti
Ena veiyabaki, e drau vakaudolu na marama kei na goneyalewa era sa mai tiki ni “ilawalawa ni marama” rabailevu tikoga.11 Sa yaco kina, na vanua cava ga e vakaitikotiko kina e dua na marama se vanua cava ga e veiqaravi kina, e lewena ka vakaitavi tikoga ena iSoqosoqo ni Veivukei.12 Ena vuku ni kena inaki bibi na iSoqosoqo ni Veivukei, eratou gadreva kina na Mataveiliutaki Taumada mera tekivutaka na goneyalewa na nodra vakavakarau ki na iSoqosoqo ni Veivukei ni se bera mada ga ni ra yabaki 18.13
E sega ni dua na parokaramu na iSoqosoqo ni Veivukei. E tiki vakadonui ni Lotu ni Turaga ni sa “tabaki vakalou mai vua na Kalou” me veivakavulici, veivakaqaqacotaki ka veivakauqeti vei ira na marama ki na nodra inaki me baleta na vakabauta, matavuvale, kei na veivukei. Na iSoqosoqo ni Veivukei sa ikoya e dua na sala ni nodra bula na marama ni Yalododonu Edaidai, kei na kena veivakauqeti e sa ulabaleta yani na kalasi ni Siga Tabu se dua na soqo ni veimaliwai. E vakamuri na ivakarau ni bula vakatisaipeli vakamarama era a veiqaravi vata kei na Turaga o Jisu Karisito kei ira na Nona iApositolo ena Nona Lotu taumada.14 Eda sa vakavulici kina ni “sa nona itavi e dua na marama me kauta mai ki na nona bula na ivalavala dodonu e dau vakamareqeti ena iSoqosoqo ni Veivukei me vaka ni nona itavi na tagane me tara cake ena nona bula na ivakarau ni bula era dau vakamareqeta na matabete.”15
Ena gauna a tauyavutaka kina o Parofita Josefa Simici na iSoqosoqo ni Veivukei, a vakavulica vei ira na marama mera na laki “vukei na dravudravua” ka “vakabulai na yalo.”16 Me baleta na nodra itavi ni “vakabulai na yalo,” era sa vakadonui kina na marama mera tauyavutaka ka vakaitavi ki na dua na dodoliga raraba ni veivakauqeti. A vakatikori na imatai ni peresitedi ni iSoqosoqo ni Veivukei me vakamatatataka na ivolanikalou, kei na iSoqosoqo ni Veivukei e se taura matua tiko ga na nona itavi yaga ni veivakavulici ena Lotu ni Turaga. Ena gauna sa tukuna kina o Josefa Simici vei ira na marama ni iSoqosoqo ni Veivukei e na vakarautaki ira ki na “veimadigi, veivakalougatataki kei na isolisoli ni Matabete,”17 a tadolavi vei ira na cakacaka ni veivakabulai ni Turaga. Na nodra vakabulai na tamata e oka kina na wasei ni kosipeli kei na vakaitavi ena cakacaka ni kaulotu. E oka kina na vakaitavi ena cakacaka ni valetabu kei na tuvakawa. E oka kina na kena vakayacori na veika dodonu me rawa kina na bula rawati koya vakayalo ka vakayago.
A vakaraitaki kina o Elder John A. Widtsoe ni na dauveivakarautaki na iSoqosoqo ni Veivukei me “veivukei ena dravudravua, veivukei ena tauvimate; veivukei ena vakatitiqa, veivukei ena lecaika—veivukei ena veika kece e vakataotaka na marau kei na toso ni marama. Sa dua na isolisoli levu!”18
E vakatauvatataka kina o Peresitedi Boyd K. Packer na iSoqosoqo ni Veivukei ki na “lalaga veitaqomaki.”19 Na ilesilesi ni nodra taqomaki na marama kei na nodra matavuvale e vakatorocaketaka na bibi ni kena wanonovi ka qaravi na veisiko kei na veiqaravi eso sa vakayacori tiko, ka sa ivakaraitaki tale tikoga ni noda igu meda nanuma tiko na noda veiyalayalati vata kei na Turaga. Me vaka ni sa noda “itavi kei na ilesilesi meda dauveiqaravi vei ira era vakaleqai kei ira era kune rarawa,” eda na cakacaka vata kei ira na bisopi me vukei tiko kina na nodra gagadre vakayago ka vakayalo na Yalododonu.20
A kaya kina o Peresitedi Spencer W. Kimball: “E vuqa na marama era bula tiko ena isulutaga—isulutaga vakayalo. E dodonu me nodra na veicurucuru babalavu totoka, na icurucuru balavu vakayalo. … Sa nomuni galala mo ni lako ki na veivale ka veisautaka na isulutaga ki na icurucuru babalavu.”21 E tukuna kina o Peresitedi Harold B. Lee na raivotu oqo. A kaya: “Ko ni sega beka ni raica na vuna sa mai biuta kina na Turaga vei ira na … iSoqosoqo ni Veivukei mera sikova na veitikotiko oqo? Baleta, ena yasana na Turaga vakai koya, e sega e dua [ena] Lotu e levu cake na nona veivakauqeti ena loloma, ka taucoko na nona kila vakavinaka na yalodra kei na nodra bula na tamata yadudua oqo.”22
A veivakaroti kina o Peresitedi Joseph F. Smith vei ira na marama ni iSoqosoqo ni Veivukei kei na nodra iliuliu, ena nona kaya ni sega ni vinakata me “raica na gauna mera na muria kina na iSoqosoqo ni Veivukei, se ra veimaliwai ka vakayalia na kedra ivakatakilakila ena nodra waki ira vata kei … na veisoqosoqo e cakava na marama.” Sa nuitaki ira tiko na marama “mera liutaka na vuravura … ka liutaki ira vakauasivi cake na marama e vuravura, ena veika kecega e rogorogo vinaka, veika kecega e va-Kalou, ena veika kecega e veilaveti ka veivakasavasavataki vei ira na luve ni tamata.”23 E vakamatatataki ena nona ivakasala na kena gadrevi me tagutuvitaki mai na iSoqosoqo ni Veivukei na itovo makawa, ikau, kei na ivakarau eso e sega ni salavata kei na kena inaki kei na ivakavuvuli ni ivolavakarau.
O ira na iliuliu era vaqara na ivakatakila ka mera raica kina na veisoqoni yadua, lesoni, kalasi, itaviqaravi, kei na sasaga ni iSoqosoqo ni Veivukei sa vakayacori tiko kina na kena inaki a tauyavutaki kina. Na veimaliwai, veitokani, kei na duavata eda gadreva sa ikoya ga na isau ni totoka ni veiqaravi vata tiko kei na Turaga ena Nona cakacaka.
Vakayacori na Nodra Raivotu na Parofita
Dua na gauna walega oqo eratou a vakadinadinataka kina o Peresitedi Thomas S. Monson kei rau na nona daunivakasala “ni sa vakalesuya mai na Turaga na taucoko ni kosipeli mai vua na Parofita Josefa Simici ka sa tiki bibi ni vakalesuimai o ya na iSoqosoqo ni Veivukei.” Me ivakadinadina ni nodra gagadre me sa taqomaki na “isolisoli lagilagi” ni iSoqosoqo ni Veivukei, a tabaka walega kina oqo na Mataveiliutaki Taumada ka veivotayaka yani e vuravura raraba na Luvequ Yalewa ena Noqu Matanitu: Na iTukutuku kei na Cakacaka ni iSoqosoqo ni Veivukei. Ena loma ni draunipepa ni ivola oqo, e rawa ni da raica kina na nodra ivakarau kei na ivakaraitaki na yalewa kei na tagane lewenilotu era duavata tiko ena cakacaka ena matavuvale kei na Lotu, ka rawa meda vulica na ivakavuvuli ni o cei oi keda, na veika eda vakabauta, kei na veika cava meda taqomaka. Eda sa vakayaloqaqataki mai vei iratou na Mataveiliutaki Taumada meda vulica na ivola bibi oqo ka “taura na kena dina tawamudu kei na kena ivakaraitaki totoka ni veivakauqeti ki na [noda] bula.”24
Ena gauna era tuvanaki ira kina na marama ki na inaki ni iSoqosoqo ni Veivukei, sa na yaco kina na veika era raivotutaka na parofita. A kaya o Peresitedi Kimball, “E tiko e dua na kaukauwa ena isoqosoqo oqo [ni iSoqosoqo ni Veivukei] ka se bera tiko ni vakayagataki sara vakavinaka me vaqaqacotaka na veivuvale kei Saioni ka tarai cake na Matanitu ni Kalou—ena sega tikoga me yacova ni ra sa toboka rawa na raivotu ni iSoqosoqo ni Veivukei o ira na marama kei na matabete.”25 A parofisaitaka ni “vuqa na tubu lelevu ena yaco mai ki na Lotu ena iotioti ni gauna ena yaco mai baleta ni vuqa na marama vinaka ni vuravura (ka dau tu e lomadra vakavuqa … na vakanananu e loma ni bula vakayalo) era na vakayarayarataki mai ki na Lotu vakalewelevu. Ena yaco oqo ni ra sa vakaraitaka tiko ena nodra bula na marama ena Lotu … e sa rairai tiko ni ra duatani ka duidui—ena veisala mamarau eso—mai vei ira na marama ni vuravura.”26
Au sa vakavinavinakataka na nodra raivotu na parofita me baleta na iSoqosoqo ni Veivukei. O au, me vakataki Peresitedi Gordon B. Hinckley, “ni vakabauta dei ni sega tale ni dua na isoqosoqo ena dua na vanua me tautauvata kei na iSoqosoqo ni Veivukei ni Lotu.”27 Sa qai noda ilesilesi oqo meda tuvanaki keda yani ki na nodra raivotu na parofita me baleti na iSoqosoqo ni Veivukei ena noda vakasaqara na vakalevutaki ni noda vakabauta, vaqaqacotaki ni matavuvale, ka veivukei.
Au mai tinia kina ena vosa nei Peresitedi Lorenzo Snow: “E sinai tu ena veika yalataki ni vunilagi na iSoqosoqo [ ni Veivukei]. Ni tubu tiko na Lotu, sa na vakarabailevutaki cake na kena yaga, ka na kaukauwa cake na kena igu ni vinaka mai na veigauna sa oti.”28 Kivei kemuni na marama ko ni sa gutaka tiko ki liu na matanitu ni Kalou, a kaya kina, “Ni ko ni wasea na veicakacaka oqo, ko ni sa na wasei talega ena kena qaqa na cakacaka oqo kei na kena sa vakalou ka lagilagi ni na solia na Turaga vei ira na luvena yalodina.”29 Mai na raivotu oqo au sa vakadinadinataka talega kina ena yaca i Jisu Karisito, emeni.