Saumaki ki na Nona Kosipeli mai na Nona Lotu

Mai vei Elder Donald L. Hallstrom

Ena Mataveiliutaki ni Vitusagavulu

Na inaki dina ni Lotu me vukei keda meda bulataka na kosipeli.

Au lomana na kosipeli i Jisu Karisito kei Na Lotu i Jisu Karisito ni Yalododonu Edaidai. Ena so na gauna eda dau waki rau vata na vosa kosipeli kei na Lotu me veisau, ia erau sega ni tautauvata. Ia, erau veiwekani vinaka sara, ka da gadrevi rau ruarua.

Na kosipeli sa ikoya na nona ituvatuva lagilagi na Kalou, ka a soli tu vei keda na Luvena, na madigi meda ciqoma na veika e tu vei Tamana (raica na V&V 84:38). E vakatokai oqo me bula tawamudu ka vakamacalataki me “oqo na isolisoli uasivi duadua ni Kalou” (V&V 14:7). E dua na tiki bibi sara ni ituvatuva oqo sa ikoya na noda mai bula e vuravura—na gauna me tarai cake kina na vakabauta (raica na Moronai 7:26), meda veivutuni (raica na Mosaia 3:12), ka meda mai veivinakati tale kei na Kalou (raica na Jekope 4:11).

Baleta na noda malumalumu vakayago kei na “veibasai ni ka kecega” (2 Nifai 2:11) ena vakadredretaka vakalevu na bula oqo, kei na vu ni noda na sega ni rawa ni vakasavasavataka na noda ivalavala ca, ka sa gadrevi kina e dua na iVakabula. Ena gauna e vakaraitaka kina o Iloimi, na Kalou Tawamudu na Tama ni yalo kecega, na Nona ituvatuva ni veivakabulai, e dua vei keda e qai kaya, “Koi au oqo, mo ni talai au” (Eparama 3:27). Na yacana ko Jiova.

Sucu mai vua na Tamada Vakalomalagi, ena yalo kei na yago, sa tu Vua na kaukauwa vakalou me vakamalumalumutaka na vuravura. Sucu mai vua e dua na tina vakayago, sa na sotava talega ko Koya na mosi kei na vakararawataki ni bula vakayago. A vakatokai talega o Jiova cecere ena yaca Jisu qai kena ikuri na itutu va-Karisito, kena ibalebale na Mesaia se o Koya sa Lumuti. Na ituvuka ni veika e mai rawata na Veisorovaki, ka sa “lako sobu mai kina ki ra sara” (V&V 88:6), ko Jisu Karisito, sa rawa kina Vua me sauma ena vukuda kece sara na noda vueti.

A tauyavutaka na Lotu o Jisu Karisito ena Nona gauna ni veiqaravi e vuravura, “sa tara cake ena nodra yavu na iApositolo kei ira na parofita” (Efeso 2:20). Ena itabagauna oqo ni “otioti ni gauna” (V&V 128:18), sa vakalesuya mai kina na Turaga na veika a dau tu e liu, ka tukuna tiko kina vua na Parofita o Josefa Simici, “Ko na tauyavutaka vei ira na noqu isoqosoqo lewe ni lotu” (V&V 31:7). O Jisu Karisito a ulu ni Nona Lotu ka se vaka tiko kina oqo, ka matataki tiko e vuravura mai vei ira na parofita ka tu vei ira na dodonu vakaiapositolo.

Oqo e dua na Lotu vakasakiti. Na kena tauyavu, kena mana, kei na vinaka era rokova o ira kece era segata ena yalodina mera kila. E tu ena Lotu na veiparokaramu me baleti ira na gonelalai, itabagone, turaga kei na marama. Era tu na kena veivalenisoqoni totoka ka sivia na 18,000 na kena levu. Na veivaletabu vakaturaga—kena levu taucoko ena gauna oqo e 136—era tu wavoliti vuravura, ka 30 tale era sa tara tiko se sa kacivaki oti. E dua na ilawalawa daukaulotu tudei sivia na 56,000, era lewena na gone kei ira e sega soti sara, era veiqaravi tu ena 150 na matanitu. Na cakacaka ni Lotu ni veiqaravi raraba sa ivakaraitaki vakasakiti ni nodra lomasoli na lewenilotu. Na noda ivakarau ni welefea era vukei kina na noda lewenilotu ka veivakauqeti ki na bula rawati koya ena dua na kena iwalewale ka sega ni kune ena dua tale na vanua. Ena Lotu oqo era tu kina na veiliutaki ka ra sega ni dau nanumi ira ga vakai ira kei na dua na yavusa Yalododonu era sa tu vakarau mera veiqaravi vakataki ira ena kena ivakarau uasivi. E sega tale ni dua na ka e vuravura taucoko me vakataka na Lotu oqo.

Niu sucu mai, a vakaitikotiko na noqu matavuvale ena dua na vale somidi ena lomanibai ni dua na valenisoqoni vakairogorogo ni Lotu, na Valecavu mai Honolulu. Au kere veivosoti ena gauna oqo vei iratou na noqu itokani vinaka ena Matabisopi Vakatulewa, ka ratou dau qarava na iyauqaqa ni Lotu, ia niu se gonetagane au dau kaba e delana kei na rukuna ka lakocuruma na veiidi yadua ni vanua ko ya, mai na boto ni tobu wai iloilo ki na dela e loma ni dudukilagi vakacina. Keitou dau lili (vakataki Taseni) ena wa sala ni vu ni baniyani era tu ena vanua o ya.

Sa ka taucoko ga na Lotu vei keitou. Keitou dau lako ki na vuqa na veisoqoni, e levu cake mai na kena e tu ena gauna oqo. Keitou dau lako ki na Lalai ena yakavi ni Lotulevu. Na soqoni ni iSoqosoqo ni Veivukei ena mataka ni Tusiti. Na nodra muavata na itabagone ena bogi ni Vukelulu. Na Vakarauwai na siga ni itaviqaravi ni tabanalevu. Ena Sigatabu, era dau lako na gonetagane kei ira na turaga ki na soqoni ni matabete ena mataka. Ena sigalevu keimami na lako ki na Wilivola ni Sigatabu. Ena bogi keimami dau lesu tale mai ki na soqoni ni sakaramede. Ena lako mai kei na lako yani kei na veisoqoni, e kena irairai ni sa kania kece na neimami gauna taucoko ena Sigatabu kei na veisiga tale eso ena loma ni macawa.

Ena levu ni noqu taleitaka na Lotu, ia ena gauna ni noqu bula vakagonetagane oqori, au qai vakasamataka kina vakadua ni tiko e dua na ka e levu cake. Ena gauna au yabaki lima kina, a vakayacori ena valecavu e dua na koniferedi levu. Keitou taubale sobu yani e gaunisala keitou tiko kina ka kosova e dua na ikawakawa lailai ka yaco yani ki na valenisoqoni totoka ka keitou laki dabe ena ika 10 beka ni iyatu ena valenilotu levu oqo. A vakatulewa ka vosa ena soqoni o ya o David O. McKay, na Peresitedi ni Lotu. Au sega ni nanuma rawa e dua na ka a kaya, ia au nanuma vinaka tiko na veika au a raica kei na veika au vakila. A daramaka toka o Peresitedi McKay e dua na sutu kirimu ka, rairai vakaturaga ena drauniuluna vulavula ka uauana. Ena ivalavala vakavanua ni veiyanuyanu, a daramaka e dua na salusalu damudamu vavaku. Ena nona a vosa, au vakila vakaukauwa e dua na ka, ka vu sara ga mai yaloqu. Au qai kila e muri niu a vakila tiko na veivakauqeti ni Yalo Tabu. Keimami lagata na iotioti ni sere.

Ko totaki Jisu?
Tukuni iko mai.
Ko sa tarogi tu:
Ko totaki Jisu?

(“Ko totaki Jisu?” Sere ni Lotu, naba 158)

Ni ra lagata na qaqa ni sere oqori e rauta ni 2,000 na tamata ia e kena irairai vei au ni tarogi tikoga mai vei au na taro o ya, au via tucake meu kaya, “O au!”

Eso sa yaco mera nanuma ni ulumatua ni noda sasaga ena Lotu na kena itaviqaravi. E koto kina e dua na ka rerevaki. E rawa ni da bulabula tu vakalotu ka luluqa tiko ena kosipeli. Meu vakabibitaka mada: ni bulabula vaka-Lotu e dua na ka e dau sasagataki vakalevu ena Lotu; ia e sega ni rauta. Na bulabula ena Lotu sa ivakaraitaki e tautuba ni veika eda dau gadreva vakayalo. Kevaka eda dau lakova na noda soqoni, taura ka qarava vinaka na noda itavi ena Lotu, ka qaravi ira na tani, oqo e dau laurai ena matanavotu.

E kena veibasai, ni veika ni kosipeli era sega soti ni dau laurai ka dredre ni vakarautaki, ia e cecere cake na kedra bibi tawamudu. Me vaka beka oqo, e vakacava beka na levu ni noda vakabauta? Eda sa veivutuni tiko beka? E vakaevei beka na kedra ibalebale na cakacaka vakalotu ki na noda bula? E vakaevei beka na noda vakanamata tiko ki na noda veiyalayalati?

Au na kaya tale: eda gadreva na kosipeli kei na Lotu. Io, na inaki dina ni Lotu me vukei keda meda bulataka na kosipeli. Eda dau taroga wasoma: E rawa vakacava ni dua me bulabula sara tu ga ena Lotu ena gauna ni itabagone ka qai sega ni sa qase cake? E rawa vakacava ni dua na uabula dau tiko e veigauna ka veiqaravi me mudu nona lako mai? E rawa vakacava ni dua na tamata ena nona cudruva e dua na iliuliu se dua tale na lewenilotu me vakatara na ka oqori me oti kina na nona vakaitavi ena Lotu? E rairai na vuna beka baleta ni a sega ni saumaki vakavinaka sara ki na kosipeli—ki na veika ni tawamudu.

Au vakatura e tolu na sala bibi me noda yavu kina na kosipeli:

Vakatitobutaka na noda kila na Kalou. Na tokoni ni kila kei na noda lomani iratou na Lewe Tolu Vakalou sa yaga sara vakalevu. Masuta ena vakanuinui na Tamada, ena yaca ni Luvena, ka vakasaqara na veidusimaki ni Yalo Tabu. Me isa ni vuli e veigauna kei na vakanananu vakatitobu ena yalomalumalumu, tara cake tikoga na vakabauta e sega ni yavalati rawa me baleti Jisu Karisito. “Ena kila vakaevei na tamata na nona turaga … ka sega ni kilai koya se nanumi koya se lomana?” (Mosaia 5:13).
Vakanamata ki na cakacaka vakalotu kei na veiyalayalati. Kevaka e se tu eso na cakacaka vakalotu e ganita ka se bera ni caka ena nomu bula, vakarau sara mo ciqomi ira yadua. Oti eda na gadreva meda tauyavutaka na itovo ni bula meda bulataka ena yalodina na noda veiyalayalati, ka vakayagataka vakavinaka na isolisoli vakamacawa ni sakaramede. E vuqa vei keda eda sega ni dau veisau tiko e veigauna ena kena kaukauwa ni veivakasavasavataki ena vuku ni noda sega ni dau rokova na cakacaka vakalotu savasava oqo.
Vakaduavatataka na kosipeli kei na Lotu. Ena noda vakanamata tiko ki na kosipeli, ena yaco na Lotu me veivakalougatataki vakalevu, sega ni vakalailai, ena noda bula. Ni da lako mai ena vakavakarau ki na veisoqoni yadua ena noda qasenivuli na Yalo Tabu, meda “kila ka, io, ena vuli kei na vakabauta” (V&V 88:118). Kevaka eda lako mai meda vakamarautaki, e vakavuqa ni da na rarawa. A taroga ena dua na gauna o Peresitedi Spencer W. Kimball, “Na cava o na cakava kevaka o tiko ena dua na soqoni ni sakaramede dragali?” Kena isau mai vua: “Au sega ni kila. Au se bera mada ni bau tiko ena dua” (cavuta o Gene R. Cook, ena Gerry Avant, “Learning Gospel Is Lifetime Pursuit,” Church News, 24 ni Maji, 1990, 10).

Ena noda bula e dodonu meda gadreva na veika a yaco ni oti na nona lako mai na Turaga vei ira na tamata ena Vuravura Vou ka tauyavutaka na Nona Lotu. E tukuna vakaoqo na ivolanikalou, “Eratou [o iratou na Nona tisaipeli] sa lako voli ena kedra maliwa na Nifai, ka vunautaka na ivakavuvuli i Karisito ki na veivanua kecega; sa lewe vuqa era sa saumaki mai vua na Turaga ka curu me lewe ni lotu i Karisito, raica era sa kalougata na itabatamata oqo” (3 Nifai 28:23).

E vinakata na Turaga me taucoko sara nodra saumaki ki na Nona kosipeli o ira na lewe ni Nona Lotu. Oqo duadua ga na sala vakadeitaki ki na veitaqomaki vakayalo ena gauna oqo kei na marau me tawamudu. Ena yaca i Jisu Karisito, emeni.