Au na rawa ni vukei ira vakacava tale eso mera kila deivaki na ivunau i Karisito?

Na “ivunau i Karisito” sa ikoya mera vakabauti Jisu Karisito na tamata ena veivanua kecega, mera veivutuni, ka papitaiso, ciqoma na isolisoli ni Yalo Tabu, ka vosota me yacova na ivakataotioti. Na ivunau i Karisito sa ikoya walega ena veivakabulai ki na matanitu ni Kalou. Sa ikoya na yavu ni Lotu ka ilutua ni nodra itukutuku na kena daukaulotu.

Mo vakarautaki iko vakayalo

Ena nomu vulica na ivunau i Karisito ena 2 Nifai 31 vakakina ena so tale na vanua ena ivolanikalou, na vakasama cava se vakanananu vakacava e dau basika mai vei iko? Sa tuberi iko ka vakalougatataka vakacava na nomu bula na Nona ivunau?

Na cava na vuna e gadrevi kina mera vulica na itabagone na ivunau i Karisito? Ena vukei ira vakacava na nodra kila deivaki na ivunau oqo mera wasea na uto ni itukutuku ni Veivakalesuimai vei ira na tani?

Ni ko vakavakarau tiko, vulica ena yalomasumasu na ivolanikalou kei na ivurevure oqo. Na cava beka o vakauqeti mo wasea vei ira na itabagone?

2 Nifai 25:26 (Eda vunautaki Karisito)

2 Nifai 31 (Vakamacalataka o Nifai na ivunau i Karisito)

3 Nifai 11:32–41; 27:13–21 (Tukuna o Karisito na nona ivunau)

Yavu ni Vakabauta 1:4 (Na imatai ni ivakavuvuli kei na cakacaka vakalotu ni kosipeli)

“Na Kosipeli i Jisu Karisito,” Vunautaka na Noqu Kosipeli (2004), 66–73

Brian K. Ashton, “Na iVunau kei Karisito,” Ensign se Liaona, Nove. 2016, 106–9

D. Todd Christofferson, “Na Vunau i Karisito,” Ensign se Liaona,” Me 2012, 86–89

Veivakavulici ena ivakarau ni iVakabula

A vakayagataka na iVakabula na ivolanikalou me veivakavulici ka vakadinadinataka na Nona ilesilesi. A vakavulici ira na tamata mera vakanananutaka vakataki ira na ivolanikalou ka mera vakayagataka mera kunea kina na isau ni nodra vakatataro. Ko na vakayagataka vakacava na ivolanikalou mo vukei ira kina na itabagone mera kila deivaki na ivunau i Karisito?

Semata vata

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava vata kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama e koto e ra ena rawa ni vukei iko:

Sureti ira na itabagone mera wasea e dua na ka era se qai sotava oti ga a vakavotuya vei ira e dua na ka era sa vulica tiko ena nodra kalasi ni Lotu.
Vola ena vava ni volavola, “Na cava na ivunau i Karisito?” Solia yadua vei ira na lewe ni kalasi e dua na ilavelave ni parakaravu ena itekivu ni lesoni ka kerei ira mera wilika, ka vakaraica na isau ni taro sa volai tu ena vava ni volavola. Sureti ira mera wasea ena kalasi na nodra nanuma. Sureta na veimama ni kalasi mera wilika na 3 Nifai 11:39–41, ka sureta na ikarua ni veimama mera wilika na “Nomu iNaki” ena tabana e 1 ni Vunautaka na Noqu Kosipeli. Mai na ivurevure oqo, na cava e bibi kina mera kila deivaki na itabagone na ivunau i Karisito?

Vulica vata

Na itaviqaravi yadua ka koto oqo e ra ena vukei ira na itabagone mera vulica na ivunau i Karisito mera na vakavakarau cake kina vakavinaka mera na laki wasea vei ira na tani. Mai na veivakauqeti ni Yalotabu, digitaka e dua se sivia ka na ganita vinaka na nomu kalasi:

Ni railesuva vakalasi se cava na ivunau kei Karisito, me vaka e vakavuvulitaki ena vosa nei Baraca Brian K. Ashton “Na iVunau kei Karisito.” Wasea vakalalai na kalasi, ka sureta na iwasewase yadua me ra cakava e dua na iyaloyalo se droini ka vakaraitaka na ivakarau eratou cakacaka vata kina na vakabauta, veivutuni, papitaiso kei na sakaramede, na isolisoli ni Yalo Tabu, kei na vosota ki na ivakataotioti me vukea noda rawata me vinaka sara. Na cava e vakatura o Baraca Ashton me baleta na ivakarau e rawa ”ni da vakayagataka vakavinaka cake kina na ivunau kei Karisito ena noda bula”? Na vakasama cava tale e rawa ni ra vakatura na itabagone?
Sureti ira na lewe ni kalasi me ra cakacaka veisasa, ka lesia vei ira na isa yadua e dua se sivia na tiki ni ivunau kei Karisito: vakabauta, veivutuni, papitaiso, na isolisoli ni Yalo Tabu, kei na vosota ki na ivakataotioti. Sureta na isa yadua me ra wilika 2 Nifai 31 ka raica na tikina eso e rawa ni ra vakayagataka me ra vakavulica kina na veitikina a lesi vei ira. Na ivolanikalou cava tale e rawa ni ra vakayagataka? Kerea na isa yadua me ra vakavulica na vo ni kalasi, ka vakayagataka na veika era kunea ena ivolanikalou.
Lesi ira yadua na lewe ni kalasi mera wilika e dua na tiki ni wase 3 ni Vunautaka na Noqu Kosipeli: “Vakabauti Jisu Karisito,” “Veivutuni,” “Papitaiso, na iMatai ni noda Veiyalayalati,” “Na iSolisoli ni Yalo Tabu,” kei na “Vosota ki na iVakataotioti.” Kerei ira mera vakavulica na vo ni lewe ni kalasi na veika era vulica, ni vakayagataki e dua na tiki ni ivolanikalou kei na dua na ivakaraitaki se na ka era sa sotava oti.
Kerei ira na lewe ni kalasi mera wilika na 2 Nifai 31 ka vakaraica na ka e vakavulica o Nifai baleta na ivunau i Karisito (vakabauta, veivutuni, papitaiso, ciqomi ni Yalo Tabu ka vosota me yacova na ivakataotioti). Wasea na kalasi kina “veilawalawa” ya rua se tolu, ka solia vei ira e dua na gauna mera navuca na icakacaka ni kena vakavulici na ivunau i Karisito vua e dua ka se bera vakadua ni se bau rogoca. Sureta na ilawalawa yadua mera vakatovotovotaka ka vakavulica e dua tale na ilawalawa.

Kerei ira na itabagone mera wasea na veika era sa vulica nikua. Era sa kila li na ka mera cakava ni vukei ira kina na tani mera kila deivaki na kosipeli i Karisito? Na cava era sa vakila se vakasamataka baleta na itavi ni kena wasei na ivunau oqo vei ira na tani? E tiko beka eso tale na nodra vakatataro?

Me Veivuke ena Veivakavulici

“Sa dodonu vei qasenivuli me kila na duidui e tiko ena nodra rawaka na gonevuli ka qai saga me wasei ira na gonevuli ena nodra totolo” (Asahel D. Woodruff, ena Veituberi, Me iLutua ni Noda Bula [1999], 34).

Veisureti me caka

Tarogi ira na itabagone, se cava era sa vakauqeti kina me ra cakava baleta na veika era sa vulica nikua. Vakauqeti ira mera cakava na ka era sa vakila. Vakasamataka na sala e rawa mo vakamuria.