Meu vulica vakacava meu dau raica na ligana na Tamada Vakalomalagi ena veika kecega?

E vakavuvulitaka na parofita o Alama, “A ka kecega oqo sa vakadinadinataka ni sa bula tiko na Kalou” (Alama 30:44). E lomani keda na Tamada Vakalomalagi ka dau vakalougatataki keda e veisiga yadua. Kevaka eda dau vakadikeva, eda na rawa ni raica na ivakadinadina ni Nona kaukauwa kei na nona veivakauqeti ki na noda bula kei na vuravura vakavolivoliti keda. E dina ni da sega beka ni rawa ni raici Koya vakatamata, noda dau raica na Ligana ena veika kecega e rawa ni vaqaqacotaka na noda ivakadinadina ni bula tiko o Koya.

Mo vakarautaki iko vakayalo

Na gauna cava o sa bau raica kina na veivakayarayarataki ni Tamada Vakalomalagi ena nomu bula? Na cava o cakava mo kila kina na Nona yalo loloma?

Na sala cava o sa raica kina na ligana na Tamada Vakalomalagi ena nodra bula na itabagone? Na cava e rawa ni vakalati ira na itabagone mai na nodra raica na veivakauqeti ni Tamada Vakalomalagi ena nodra bula? Na sala cava ena vakalougatataki ira kina ena gauna oqo kei na veigauna mai muri na nodra vulica me ra kila na Nona veivakayarayarataki?

Wilika ena yalomasumasu na veivolanikalou kei na ivurevure oqo. Na cava ena vukei ira na itabagone me ra kila na liga ni Kalou ena nodra bula?

Na Same 145:9; 1 Nifai 1:20 (Na yalo loloma ni Turaga e robota na Nona cakacaka kecega)

Alama 30:44; Mosese 6:63 (Sa vakadinadinataka na ka kecega ni tiko e dua na Kalou)

V&V 59:21 (Ena cudru na Kalou ni da sega ni raica na Ligana ena veika kecega)

M. Joseph Brough, “Na Ligana Veidusimaki e Veisiga,”Ensign se Liaona, Me 2017, 23–26

Dieter F. Uchtdorf, “A Ka Levu Vakaidina na Nona iNaki na Noda Kalou!” Ensign se Liaona, Nove. 2016, 19–22

Kim B. Clark, “Mata me Raica kei na Daliga me Rogoca,” Ensign se Liaona, Nove. 2015, 124–26

Vidio: “God Is Our Father,” “We Lived with God,” “The Will of God” “The Tender Mercies of the Lord,” “O Remember, Remember”

3:5

4:0

3:2

3:49

1:28

“Noqu Kalou, Au Kurabui ka Galu,” Sere ni Lotu, naba 44

Veivakavulici ena ivakarau ni iVakabula

E dau wasea na iVakabula na italanoa rawarawa kei na ivakaraitaki dina ni bula. E vukei ira na dau muri Koya me ra raica ka kila na lesoni eso ni kosipeli ena nodra bula e veisiga ena vuravura vakavolivoliti ira. E tu beka ena nomu bula eso na ivakaraitaki se so na ka sa sotavi e rawa ni vukei ira na itabagone me ra raica na sala e vakadinadinataki kina ena veika kecega ni tiko e dua na Kalou? E tu beka vei ira na itabagone eso na ka era sa sotava e rawa ni ra veiwaseitaka?

Semata vata

Ena imatai ni vica na miniti ni kalasi yadua, vukei ira na itabagone me ra semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Kerei ira na itabagone me ra wasea na veika eso era sotava ena macawa sa oti oqo ka vaqaqacotaka na nodra ivakadinadina ni kosipeli.
Wasea e dua na ka o sotava o raica kina na ivakadinadina ni tubera tiko na nomu bula na Kalou, taqomaki iko, se vakalougatataki iko. Wasea na nomu ivakadinadina me baleta na Tamada Vakalomalagi.

Vulica vata

Na veitaviqaravi e ra ena vukei ira na itabagone me ra kila na ivakarau me ra vakadinadinataka kina na liga ni Kalou ena nodra bula. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Vakasinaita e dua na“kato ni veiqaravi” ena iyaya me matataka na veivakalougatataki sa solia tu vei keda na Tamada Vakalomalagi, me vaka e vakaraitaka o Brother M. Joseph Brough ena nona vosa na“Na Ligana Veidusimaki e Veisiga.” Wasea na iyaya oqori vei ira na itabagone, ka sureti ira me ra railesuva na vosa nei Brother Brough ka wasea na veika e vakavulica baleta na tiki ni kato ni qaravi ni Tamada Vakalomalagi. Me vukei ira na itabagone me ra vakila kina na loloma nei Tamada Vakalomalagi kivei ira ka lomani ira, sureti ira me ra vola ka wasea ki na kalasi e dua na veivakalougatataki era sa ciqoma mai vua na Tamada Vakalomalagi.
Vakasamataka mada e dua na iyaya ni veisiga era dau taura tu vakamama na itabagone ena nomu kalasi, me vaka na ivava. Sureti ira me ra veivosakitaka se na duatani vakacava na bula ke sega na iyaya oqori. Ni vakayagataki na vosa nei Peresitedi Dieter F. Uchtdorf “A Ka Levu Vakaidina na Nona iNaki na Noda Kalou!” sureti ira na itabagone me ra vola e dua na lisi ena vava ni volavola na veika eda sa ciqoma mai vua na Kalou na lewe ni Lotu ka da dau vakamamadataka tu beka. Vakasamataka mo sureta e dua se qai saumaki vou mai me vakamacalataka na veika a vakila ena nona vulica tiko na dina ni kosipeli ena imatai ni gauna kei na sala e veisautaka kina na nona bula na dina eso oqori. Na cava e rawa ni da cakava me da vakadinadinataka vakavinaka cake kina na liga ni Kalou ena noda bula ka vakavinavinakataka?
Me vukei ira na itabagone me ra raica na liga ni Turaga ena nodra bula, sureti ira me ra wilika na vosa nei Elder Kim B. Clark “Mata me Raica kei na Daliga me Rogoca.” Na cava era sa vulica mai na vosa oqo me baleta na ivakarau me ra raica kina na ligana na Tamada Vakalomalagi ka vakarogoca na Domona? Me tiki ni nomuni veivosaki, e rawa ni o ni veivosakitaka na kena vinaka na noda rawa ni rai ka rogo vakayago vakakina na dredre ni da sega ni rawa ni rai se rogo. E rawa vakacava ni o vakaraitaka na bibi ni rai kei na rogo vakayalo? Na ivakaraitaki cava e rawa ni o ni wasea vata kei ira na itabagone me baleta na rogo kei na rai vakayalo?
Vakaraitaka e dua na vidio e vakaturi ena ituvatuva oqo. Kerei ira na itabagone me ra vakarogoca na vuna era vakabauta kina na Kalou na tamata ena vidio. Na cava na ivakadinadina ni Ligana era raica na tamata oqo ena vuravura wavoliti ira? Na cava eso tale na ikuri ni ivakadinadina era raica na itabagone? Sureti ira na itabagone me ra wasea na nodra ivakadinadina me baleta na nona veivakayarayarataki na Tamada Vakalomalagi ena nodra bula.
Sureti ira na itabagone me ra lagata, vakarogoca, se wilika na sere ni lotu “Noqu Kalou.” Kerei ira me ra cakava e dua na ituvatuva se droinitaka e dua na iyaloyalo ena papa me baleta na veika ena sere ni lotu ka vakaraitaka na cecere ni Kalou (e rawa talega ni ra wilika na ivolanikalou e cavuti toka ena mua ni sere ni lotu). Na cava tale eso na ka e rawa ni ra vakuria kina na itabagone na ituvatuva oqo ka vakadinadinataka vei ira na kaukauwa kei na loloma ni Kalou? Sureti ira na itabagone me ra vakasamataka eso na sala ni bulika e rawa ni ra vakamacalataka kina na nodra ivakadinadina kei Tamada Vakalomalagi. Me vaka beka oqo, e rawa ni ra vakayagataka na nodra ituvatuva me ra vola kina e dua na nodra sere ni lotu lekaleka, se e rawa ni ra veitaba ka vakarautaka e dua na iyaloyalo sega ni yavala. Vakayaloqaqataki ira me ra wasea na veika era sa bulia ena dua na kalasi mai muri.
Vola na veiyatuvosa cavuka oqo ena papa: “Au na vakamacalataka na loloma uasivi me _______. E dua na ivakaraitaki ni loloma uasivi na ________. Au na sega ni rawa ni raica e dua na loloma uasivi kevaka _______.” Sureti ira na itabagone me ra vakasamataka na ivakarau me ra vakacavara kina na veiyatuvosa oqo ni ra wilika na iwasewase ka kena ulutaga na “Na Cava na Yalo Loloma ni Turaga?” ena vosa nei Elder David A. Bednar “Na Yalo Loloma ni Turaga” (se ena nodra sarava na vidio ka tautauvata na yacana). Sureti ira me ra wasea na nodra vakanananu. Na cava eso na ivakaraitaki ni yalo loloma era sa raica na itabagone ena nodra dui bula? Na sala cava sa vaqaqacotaka kina na nodra ivakadinadina kei Tamada Vakalomalagi na veika eso oqo? Sureti ira me ra vakasamataka e dua e rawa ni ra wasea kina na veika era sa sotava me vukea na kena vaqaqacotaki na nona vakabauta.

Kerei ira na itabagone me ra wasea na veika era sa vulica nikua. Na cava era sa bau vakila se vakanananu kina? Era sa kila beka na sala me ra raica kina na ligana na Tamada Vakalomalagi ena nodra bula? E tiko tale beka eso na nodra vakatataro? Ena yaga dina beka me tauri vakalevu na gauna ena iulutaga oqo?

Me Veivuke ena Veivakavulici

“Ni wiliwili tiko e cake e dua, e dodonu mo vakayaloqaqataki ira na kena vo me ra vakamuria toka ena nodra ivolanikalou. Sureti ira me ra vakarorogo ka vakaraica toka na veivakavuvuli bibi eso se vakasama. Solia na gauna vei ira me ra cega kina na ivolanikalou eso ni se bera ni wiliki” (Na Veituberi, Me iLutua ni Noda Bula [1999], 64).

Veisureti me caka

Vakauqeti ira na itabagone me ra tovolea me ra vakadinadinataka na liga ni Kalou ena nodra bula ena loma ni macawa ka lako mai. Ena itekivu ni lesoni ni macawa mai oqo, sureti ira me ra wasea na veika era sotava.