Na cava au rawa ni vulica me baleta na vulici ni kosipeli mai na ivakaraitaki ni iVakabula?

Ena vulici ni kosipeli, me vaka ena ka kecega, sa noda ivakaraitaki uasivi o Jisu Karisito. Baleta ni a talairawarawa vakaoti ka lomasoli vei Tamana, o Koya a “tubu cake ena vuku kei na yagona talega, a sa vinakati koya vakalevu cake tikoga na Kalou kei ira talega na tamata” (Luke 2:52). Me vaka ni a rawata na iVakabula na “loloma e vakaikuritaki” (V&V 93:12), sa dodonu meda vakasaqara vakamalua na rarama kei na kila-ka mai vua na Kalou ena noda sasaga ni vulica na kosipeli.

Mo vakarautaki iko vakayalo

Na ivakarau va-Karisito cava soti o nanuma e bibi ki na vulici ni kosipeli? E sa vukei iko vakacava na taraicake ni ivakarau oqo ena nomu sasaga ni vulica ka vakatavulica na kosipeli?

Na cava e rawa ni ra kila deivaki na itabagone me baleta na iVakabula ka na vukei ira mera yaco ni gonevuli vinaka cake ni kosipeli?

Vulica ena masumasu na ivolanikalou kei na ivurevure oqo. Na cava ena vakauqeti ira na itabagone mera veivakavulici?

Luke 2:40–52 (A tubu cake vakagonetagane o Jisu Karisito ena yalomatua kei na vuku)

Joni 5:30 (O Jisu Karisito e dau muria ga na lomai Tamana)

1 Koronica 2:14 (Na tamata vakayago sa sega ni kila na veika ni Yalo ni Kalou)

V&V 1:26–28; 112:10 (Na Turaga ena vakatavulici keda kevaka eda sa yalorawarawa ka yalomalumalumu)

V&V 93:11–20 (Sa rawa ni da vakasinaiti ena loloma kei na dina me vaka na iVakabula)

V&V 130:18–19 (Eda rawata na kilaka kei na yalomatua mai na gugumatua kei na talairawarawa)

Richard G. Scott, “Acquiring Spiritual Knowledge,” Ensign, Nove. 1993, 86–88

Robert R. Steuer, “Being Teachable,” Ensign se Liahona, Me 2002, 31–32

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Sureta na itabagone mera wasea e dua na ka era sa vulica tiko me baleta na iVakabula ena nodra vuli vakaiira. Na cava era sa cakava tiko ni tovolea mera vakataki Koya vakalevu cake?
Kerea na itabagone mera cakava e dua na lisi ena papa ni ivakarau i Jisu Karisito (me baleta eso na vakasama, raica na Vunautaka na Noqu Kosipeli,tabana 141). Na ivakarau cava vei ira oqo era nanuma na itabagone ena vukei keda ni yaco meda daunivuli kosipeli vinaka cake? Kerei ira mera vakamacalataka na nodra isau ni taro ka solia na ivakaraitaki eso ni sala a vakaraitaka kina na iVakabula na ivakarau oqo.

Vulica vata

Na itaviqaravi yadua oqo ena vukei ira na itabagone mera kila deivaki na iwalewale e rawa ni vukei ira kina na ivakarau va-Karisito mera yaco ni daunivuli kosipeli vinaka cake. Ena kena vakamuri na veivakauqeti ni Yalotabu, digitaka e dua se sivia ka na mana vinaka ki na nomu kalasi:

Wilika vakalasi e dua se sivia na ivolanikalou oqo: Luke 2:40–52; Joni 5:30; Vunau kei na Veiyalayalati 93:11–20. Sureta na itabagone mera raica na ivakatakilakila ni dauvuli vinaka ena veiwase oqo ka vakaraitaka na iVakabula. Kerei ira mera wasea na ka era kunea, oka kina na ivakatakilakila eso ni dauvuli vinaka ka ra na vinakata mera taracake ena nodra bula.
Vola na veitiki ni ivolanikalou oqo ena papa: Joni 5:30; V&V 1:26–28; 112:10; 130:18–19. Kerea na itabagone yadua me digitaka e dua na tikina, wilika, ka vakaraica ena ivolanikalou e dua na ivakarau ni dauvuli vinaka. Cava na vuna era bibi kina na ivakarau oqo ena vulici ni kosipeli? Sureta na itabagone mera tuva eso na sala era rawa ni vakayacora kina na ivakarau oqo ena nodra vulica na kosipeli.
Sureta yadua na lewe ni kalasi me wilika e dua vei ira na va na ivakavuvuli me rawati kina na kilaka vakayalo ena vosa nei Elder Richard G. Scott “Acquiring Spiritual Knowledge.” Kerea na itabagone mera wasea na ka era sa vulica me baleta na vulici ni itukutuku mai vei Elder Scott. Na sala cava soti e a ivakaraitaki kina ni veivakavuvuli oqo na iVakabula? Sureti ira mera wasea na sala eso e rawa ni ra vakayacora kina na veivakavuvuli oqo ena nodra vulica na kosipeli.
Sureta na itabagone mera wilika na vosa nei Elder Richard R. Steuer “Being Teachable.” Kerei ira mera digitaka e dua na ivakaraitaki ni ivolanikalou era maleleta ka dau vakayagataka o Elder Steuer. Sureti ira mera vakaraica na italanoa ena ivolanikalou (ena vakayagataki ni veitikina mai na vosa), wilika vakalevu cake, ka wasea vata kei na vo ni kalasi na ka era wilika. Na cava era vulica me baleta na rawati ni vakatavulici mai na veiitalanoa oqo? Na ivakaraitaki vakatautauvata cava e rawa ni ra wasea mai na nodra bula? Ena rawa vakacava ni ra muria na vakaraitaki oqo ena nodra vulica vakaiira na kosipeli?

Kerei ira na itabagone me ra wasea na veika era sa vulica nikua. Era sa kila deivaki li na iwalewale ni nodra rawa ni vukei mera daunivuli kosipeli vinaka cake ni ra yaco mera va-Karisito vakalevu cake tiko? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Maqosa eso ena vulici ni kosipeli

Vakaraici ni ivakarau i Jisu Karisito. Ena imatai ni itaviqaravi ena iwasewase oqo, era sa sureti na itabagone mera vakaraica na ivakarau eso i Karisito ena ivolanikalou. Vakayaloqaqataki ira na itabagone mera cakava oqo ena gauna cava ga era wilika kina na ivolanikalou. Sa rawa ni ra vakatarogi ira ena veitaro vaka “Na cava au vulica me baleti Jisu Karisito? Na cava sa dodonu me’u veisautaka ena noqu bula me yaco me’u vakataki Koya cake?”

Veisureti me caka

Tarogi ira na itabagone, se cava era sa vakauqeti kina me ra cakava baleta na veika era sa vulica nikua. Vakauqeti ira mera cakava na ka era sa vakila. Vakasamataka na sala e rawa mo vakamuria.