Na cava e vakatavulica vei au na ivakaraitaki nei Josefa Simici me baleta na vulici ni kosipeli?

A vakasaqara na kila-ka vakayalo o Josefa Simici ni veiqaravi tiko vakadaunicakacaka ni Turaga ena kena vakalesuimai na kosipeli. A vakasamataka vagumatua o koya na ivolanikalou, vakataroga eso na taro veivakauqeti, ka cakacakataka na ka a vulica. Ni da muria na ivakaraitaki ni Parofita, sa na rawa ni da ciqoma na isau ni noda vakatataro kei na veivakauqeti me dusimaka na noda bula.

Mo vakarautaki iko vakayalo

Vakasamataka na veika o sa sotava oti ena nomu vulica voli na kosipeli. E vakauqeti iko vakacava na ivakaraitaki i Josefa Simici ni ko sa dua ka dau vulica na kosipeli?

Era sa kakavaki tiko vakacava na itabagone ni nomu kalasi ki na vuli oqo? E rawa vakacava ki na ivakaraitaki nei Josefa Simici me vakabulabulataka na nodra vulica na kosipeli?

Vulica na bula nei Josefa Simici. Na cava e vakavulica vei iko na nona ivakaraitaki me baleta na vulici ni kosipeli? Na cava o rawa ni wasea vei ira na itabagone?

V&V 76:15–21 (A vakasamataka vagumatua o Josefa Simici na ivolanikalou)

Josefa Simici—Ai Tukutuku (A vakatauvatana o Josefa Simici na ivolanikalou ki vei koya, taroga na taro veivakauqeti, ka cakacakataka na ka a vulica)

Jairo Mazzagardi, “Na Vanua Tabu ni Veivakalesui Mai,” Ensign se Liaona, Me 2016, 56–58

Craig C. Christensen, “Au sa Kila na Ka Oqo Vakai Au,” Ensign se Liaona, Nove. 2014, 50-52

“Rawata na Kila-ka ni Dina Tawamudu,” Nodra iVakavuvuli Na Peresitedi Ni Lotu: Josefa Simici (2007), 299–310

“Matai Ni Masu Nei Josefa Simici,” Sere ni Lotu, naba 14

Vidio: “Origin”, “Face to Face with President Eyring and Elder Holland: What do we learn about the nature of God from the First Vision?”

Veivakavulici ena ivakarau ni iVakabula

A vakarautaki koya na iVakabula me veivakavulici ena nona dau tiko duadua voli ena masumasu kei na lolo. A vakasaqara na veituberi ni Tamana Vakalomalagi. Na cava o rawa ni cakava mo muria kina na ivakaraitaki ni  Vakabula?

Vidio: “Teaching The Gospel In The Saviors Way”

Sarava eso tale

Semata vata

Raica eso tale na vakasama ni vuli kei na veivakavulici.

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na yaga ni kosipeli ena nodra bula ni veisiga? Na veivakasama ka koto oqo e ra ena rawa ni veivuke:

• Sureta na itabagone mera taroga eso na taro e tiko vei ira me baleta e dua na ivunau era sa vulica tiko.

• Sureti ira yadua na itabagone mera droinitaka e dua na iyaloyalo rawarawa ena vava ni volavola ka matataka e dua na ka era sa kila me baleta na bula nei Josefa Simici (se vakaraitaka ka veivosakitaka na iyaloyalo ena veika a yaco ena nona bula; raica na Gospel Art Book, 89–97). Vola ena vava ni volavola, “Na cava e vakatavulica vei au na ivakaraitaki nei Josefa Simici me baleta na vulici ni kosipeli?” Sureta na itabagone mera vakatura eso na isaunitaro ka tomana na nodra vakasamataka tiko na taro oqo ena gauna taucoko ni lesoni.

Vulica vata

Raica eso tale na vakasama ni vuli kei na veivakavulici.

Na itaviqaravi yadua e ra ena vukei ira na itabagone mera vulica na ivakaraitaki i Josefa Simici ni ra vulica tiko na kosipeli. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

• Sureti ira yadua na itabagone me ra vola e dua na taro baleta na ciqomi ni ivakatakila ki na tamata yadua. Kerei ira na itabagone ke ra gadreva me ra wilika na nodra taro ka qai vakabira na taro ena vava ni volavola. Me ra taleva, vaka-kalasi na Josefa Simici—Ai Tukutuku 1:5–17 ka raica ke na veika a sotava o Josefa Simici sa saumi kina na taro eso e tiko ena papa ni volavola. Sa rawa me ra raica talega na itabagone na isau ni taro ena vidio “Face to Face with President Eyring and Elder Holland: What can we learn about personal revelation from the First Vision?”

• Ena loma ni macawa, sureta e dua na itabagone ena nomu kalasi me railesuva na Josefa Simici—Ai Tukutuku 1:5–17 ka vakarau mai me wasea na veika a cakava o Josefa Simici me kunea na isau ni nona taro. Ni railesuva vakalasi na vosa nei Elder Jairo Mazzagardi “Na Vanua Tabu ni Veivakalesui Mai,” ka vaqara na ivakarau e vaqara voli kina o Elder Mazzagardi na isau ni nona taro. E tautauvata vakacava kei Josefa Simici na veika e sotava o Elder Mazzagardi?  Na taro cava soti me baleta na kosipeli e tu vei ira na itabagone? Me ra na ciqoma vakacava na bolebole nei Elder Mazzagardi me ra “muria na nona ivakaraitaki na Parofita ko Josefa Simici” ni basika na lomatarotaro?

• Sureta na lewe ni kalasi me ra wilika na iwasewase “Me Kerea Vua na Kalou” ena vosa nei Elder Craig C. Christensen “Au Kila Vakataki Au na Veika Oqo.” Sureti ira me ra vola ena papa ni volavola na isau ni taro dodonu ki na taro nei Elder Christensen “O sa raica beka ena veika a sotava o Josefa e dua na ivakarau mo rawa ni vakayagataka mo kunea ka vaqaqacotaka kina na nomu ivakadinadina?” Vakayaloqaqataki ira me ra vakasaqara ena Josefa Simici-Ai Tukutuku 1:5-17 na isau ni taro oqo.

• Vukei ira na itabagone me ra vola na ivakavuvuli kei na ivakarau ni bula ena vukei keda meda vulica na kosipeli (me vakataka na yalomalumalumu, vakasama vakatitobu, vakataka na ivolanikalou, ka taroga na veika veivakauqeti). Lesia ki na cauravou yadua e dua vei ira na malanivosa yadua oqo mai na Josefa Simici-Ai Tukutuku: tikina e 10-20, 21-26, 28-33, 34-37, 48-54, 68-75. Kerei ira na itabagone me ra vakasaqara na veitikina oqo me ikuri ni ivakavuvuli me vulici kei na ivakaraitaki nei Josefa Simici ni vakayagataka voli na ivakavuvuli oqo. Me ra na vakayagataka vakacava na itabagone na ivakavuvuli oqo ena nodra sasaga  me ra vulica kina na kosipeli?

• Wilika vata na qaqa ni sere ni “iMatai ni Masu nei Josefa Simici” (Serenilotu, naba 26), ka raica na vosa e vakamacalataka na ivakarau ni vakasama nei Josefa Simici ni vakasaqara na dina. Vukei ira na itabagone me ra vakamatatataka eso na vosa tawamacala. E rawa vakacava vei ira na itabagone me ra muria na ivakaraitaki nei Josefa Simici ena nodra vakasaqara na dina? Me tiki ni itaviqaravi oqo, vakasamataka mo vakaraitaka na vidio “Origin.”

• Wasea vakailawalawa na kalasi, ka solia ki na ilawalawa yadua e dua na iwasewase mai na wase “Rawata na Kila Ka ni Dina Tawamudu” mai na Nodra iVakavuvuli na Peresitedi ni Lotu: Josefa Simici. Sureta na itabagone mera droinitaka e dua na ka e tukuna tiko na ivakavuvuli nei Josefa Simici me vakatorocaketaka na nodra vulica na kosipeli.

Kerei ira na itabagone mera wasea na veika era sa vulica nikua. Era sa kila deivaki tiko beka na veika a sotava o Josefa Simici me baleta na vulici ni kosipeli? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ulutaga oqo?

Maqosa eso ni vuli ena kosipeli

Vakasaqarai ni ivakavuvuli. Na ivakavuvuli sa dua na dina e tubera na noda ivalavala. Ena so na gauna e dau tukuni vakamatata sara na ivakavuvuli ena ivolanikalou se ena nodra vosa na parofita, ena so tale na gauna era dau vakaibalebaletaki ena italanoa. Ena imatai ni itaviqaravi ena iwase oqo, era sa kerei na itabagone mera lisitaka na veivakavuvuli me vulici. Ni ra vakasaqara na ivolanikalou eso, ena rairai veivuke na veitaro oqo: Na ivakavuvuli cava soti au na vulica mai na itukutuku oqo? Era sa duidui beka mai na veika au a nanuma ka vulica e liu? Era na vakauqeti au beka meu veisautaka e dua na ka ena noqu bula?” Vakayaloqaqataki ira mera raica na ivakavuvuli ena nodra vulica vakataki ira se vakamatavuvale na kosipeli.

Veisureti me caka

Raica eso tale na vakasama ni vuli kei na veivakavulici.

Sureta yadua na itabagone mera vola e dua na ka era na cakava mera daunivuli ni kosipeli vinaka cake kina ni semati ki na ivakaraitaki nei Josefa Simici. Sureti ira na itabagone mera veiwaseitaka vakaiira na veika era sa vola.