Ena rawa niu vakatauvatana vakacava na ka a yaco ena Vukitani kei na Veivakalesuimai ki na noqu bula?

Sa dodonu meda “vakamacalataka na ivakavuvuli ni vola tabu me keimami kila ka taurivaka ena neimami bula” (1 Nifai 19:23). Na vakamacalataki ni ivakavuvuli ni vola tabu sa kena ibalebale na kena raici se a tautauvata vakacava na veika a yaco vakaivolanikalou kei na kena ituvaki ki na veika a yaco kei na ituvaki ena noda bula. E dina ga ni a yaco ena gauna makawa sara na Vukitani kei na Veivakalesuimai, sa rawa meda raica na veisala meda vuli mai kina ena veika a yaco oqo ka vakatauvatani ira kivei keda edaidai.

Mo vakarautaki iko vakayalo

O sa vakalougatataki vakacava ena nomu vakatauvatana na ivolanikalou ki na nomu bula? Na ituvatuva matau cava esa vukei iko ena vakatauvatani ni ivolanikalou ki na nomu bula? Na cava soti a yaco mai na Vukitani kei na Veivakalesuimai e vakasakita na nomu bula?

Ena rawa ni vakalougatataka vakacava na itabagone na vulici ni vakatauvatani ni ivolanikalou? Na isema cava e rawa ni o raica maliwana nodra bula kei na veika era sa vulica tiko me baleta na Vukitani kei na Veivakalesuimai?

Wilika ena yalomasumasu na veiivolanikalou kei na ivurevure oqo. Na cava ena vukei ira na itabagone mera vakatauvatana kina na veika a yaco ena Vukitani kei na Veivakalesuimai ki na nodra bula?

1 Nifai 19:23–24 (Sa dodonu meda vakatauvatana na ivolanikalou ki vei keda)

V&V 61:36 (Na ka e tukuna na Turaga vua e dua, sa tukuna o Koya vei keda kece)

Josefa Simici—Ai Tukutuku 1:5–20 (E vakatauvatana o Josefa Simici na Jemesa 1:5 kivei koya)

“Vukitani,” Tudei ena Vakabauta (2004), 199–20

M. Russell Ballard, “Vulici ni Lesoni ni Gauna sa Oti,” Ensign se Liaona, Me 2009, 31–34

Vidio: What the Restoration Means for Me

Veivakavulici ena ivakarau ni Turaga

A vakatavulici ira na tamata na iVakabula mera vakanananutaka vakataki ira na ivolanikalou ka vakayagataka mera kunea kina na isau ni nodra vakatataro. E rawa vakacava ni o vukei ira na itabagone mera kila deivaki na iwalewale e rawa ni ra vakayacora kina na ka era sa wilika ena ivolanikalou ki na nodra bolebole?

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na yaga ni kosipeli ena nodra bula ni veisiga? Na veivakasama ka koto oqo e ra ena rawa ni veivuke:

Sureti ira na goneyalewa mera wasea vata kei ira na cauravou e dua na ka era se qai vulica walega me baleta na Vukitani kei na Veivakalesuimai ena nodra kalasi ni Goneyalewa. Sureti ira na cauravou mera na qai wasea e dua na ka vata kei ira na goneyalewa ka ra sa vulica me baleta na Vukitani kei na Veivakalesuimai ena nodra kuoramu ni Matabete i Eroni.
Sureti ira na itabagone mera wilika na 1 Nifai 19:23 ka veivosakitaka na cava a vakaibalebaletaka o Nifai ni “vakamacalataka na ivakavuvuli ni vola tabu me keimami kila” (ke gadrevi, wasea vata kei ira na itabagone na parakaravu ena itekivu ni dusidusi oqo). Vakaraitaka na vidio “What the Restoration Means for Me,” ka sureti ira na lewenikalasi mera raica na veisala era wasea kina na itabagone ena vidio na veika a yaco ena Veivakalesuimai ki na nodra bula.

Vulica vata

Na veiitaviqaravi yadua e ra ena rawa ni vukei ira na itabagone mera kila deivaki na iwalewale e rawa ni ra vakatauvatana kina ki na nodra bula na veika a yaco ena Vukitani kei na Veivakalesuimai. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureti ira na itabagone mera wilika na Josefa Simici—Ai Tukutuku 1:5–10 mera vulica na cava a yaco tiko ena bula nei Josefa Simici ni a yabaki 14 voli. Qai sureti ira mera wilika na tikina e 11 ki na 20 ka vakatakila na cava a cakava o Josefa Simici me vakatauvatana kina na ivolanikalou a wilika ki na veika a sotava. Ena rawa ni vukei ira vakacava na itabagone na ivakaraitaki nei Josefa Simici mera vakavinakataka kina na nodra vulica na ivolanikalou? Solia vei ira na gauna mera vola na ka e rawa ni ra vakatauvatana ena veika a sotava o Josefa Simici ki na nodra bula. Sureta na itabagone mera wasea vata kei na dua tale na lewe ni kalasi na ka era a vola.
Vola na ulutaga ena vava ni volavola, “Vukitani Levu” kei na “Vukitani Vakatamata.” Tukuna vei ira na itabagone mera wilika na “Vukitani” ena Tudei ena Vakabauta ka tuva ena vava na veika a qai yacova yani se revurevu ni Vukitani Levu. Vukei ira mera vakatauvatana na Vukitani Levu ki vei ira ena nodra veivosakitaka se na rawa ni muataki vakacava ki na vukitani vakatamata na veika era sa tuva tu. Me vakataka, na tamata ka ra vakamatei ira na iapositolo ni oti na mate i Karisito, na tamata nikua ka vakanadakuya se vosavakacacataka na iapositolo bula e sa tiko ena ivakatagedegede rerevaki ni vukitani vakatamata. Na cava e rawa ni ra cakava na itabagone mera taqomaki kina mai na vukitani vakatamata?
Tarogi ira na itabagone e ra na sauma vakacava ke a tukuna e dua na nodra itokani, “Au sega ni taleitaka na wili ivolanikalou; era talanoataka na veika a yaco ena gauna makawa sara. Na cava me ra na cakava ki na noqu bula ena gauna oqo?” Wasea na vosa nei Elder M. Russell Ballard “Vulici ni Lesoni ni Gauna sa Oti,” vei ira na itabagone, ka sureti ira mera wilika na nodra tikina ka raica na veisala mera na sauma lesu kina na nodra itokani.

Kerei ira na itabagone mera wasea na veika era sa vulica nikua. Era sa kila deivaki li na sala mera vakatauvatana kina vei ira na veika a yaco ena Vukitani kei na Veivakalesuimai? Na cava era sa bau vakila se vakanananu kina? E tiko tale beka eso na nodra vakatataro? Ena yaga li me na tauri vakalevu cake na gauna ena iulutaga oqo?

Me Veivuke ena Veivakavulici

“Ena sega so ni bibi na levu ni lesoni se iyaragi ni veivakavulici o vakayagataka tiko mai na veivakauqeti ni lesoni o vakavulica tiko ena nodra bula yadua na lewe ni nomu kalasi. Baleta ni levu na vunau ena dua vata ga na gauna ena vakasesei se vakaocai ira na lewenikalasi, e dau gadrevi ga me da dau vakabibitaka ga e dua se rua na ivakavuvuli taumada” (Veituberi, Me iLutua Ni Noda Bula [1999], 121).

Veisureti me caka

Tarogi ira na itabagone, se cava era sa vakauqeti mera cakava, me baleta na ka era sa vulica nikua, Vakayaloqaqataki ira mera cakava na ka era sa vakila. Vakananuma na veisala o rawa ni taleva cake.