Au rawa ni vulica beka vakacava me mana cake na noqu veiqaravi ena Lotu?

Ni kacivi keda na Turaga me da veiqaravi, sa vakadonui keda o Koya me da veiqaravi ena yalodina. Ni da vulica na noda itavi ka da qai gumatua me qaravi vakavinaka, ena vakalevulevuya na Turaga na noda sasaga. Eda na vakalougatataki talega ena noda veikacivi ni da muria na nodra ivakasala na noda iliuliu ena Lotu. Ena sala oqo eda na vakaitavi kina vata kei Koya me tarai cake na Nona matanitu ka qaravi ira na Luvena.

Mo vakarautaki iko vakayalo

E vukei iko vakacava na Turaga ena nomu segata mo qarava vakavinaka na nomu veikacivi? Na cava soti o sa sotava e rawa mo wasea vei ira na itabagone?

O ira na itabagone o dau vakavulica, era sa veiqaravi tiko ena so na veikacivi? Na cava sa rui bibi kina vei ira me ra vulica ena gauna oqo na ivakarau me mana kina na nodra veiqaravi ena Lotu?

Ni ko vakavakarau tiko, vulica ena yalomasumasu na ivolanikalou kei na ivurevure oqo. Na cava beka o vakauqeti kina mo wasea vei ira na itabagone?

Jeremaia 1:5–9; Mosaia 2:11; Mosese 6:31–34 (O ira na parofita era rawata na igu mai vua na Turaga me ra qarava kina vakavinaka na nodra veikacivi)

Joni 15:16; Yavu ni Vakabauta 1:5 (E kacivi keda na Kalou mai na ivakatakila me da veiqaravi)

Jekope 1:17–19; V&V 4; 107:99; 121:34–36 (Sa dodonu me da cakacaka vagumatua ena kena qaravi na noda veikacivi)

V&V 25 (A ciqoma o Emma Smith na ivakasala me baleta na kena qaravi vakavinaka na nona itavi)

Dieter F. Uchtdorf, “O Koya Sa Turaga vei Kemudou Ensign kei na Liaona, Me 2017, 107–10

Dieter F. Uchtdorf, “Vuli mai vei Alama kei Amuleki,” Ensign se Liaona, Nove. 2016, 71–74

Carl B. Cook, “Veiqaravi,” Ensign se Liaona, Nove. 2016, 110–12

Semata vata

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na veivakasama ka koto oqo e ra ena rawa ni veivuke:

Tukuna vei ira na itabagone mera wasea na ka era a sotakaya wale tikoga oqo ena vakatavulici ni kosipeli. Na cava era nanuma ni a lako vinaka? Na cava era vinakata mera vakavinakataka?
Kerei ira na itabagone me ra veivosakitaka e dua ga na ilesilesi era sa taura oti ena Lotu. Na cava na nodra itavi? Na cava era raica ni dredre se veibolei me baleta na ilesilesi? A vukei ira vakacava na Turaga? Wasea e dua na ka o sa sotava, ka tukuna na nomu ivakadinadina.

Vulica vata

Na itaviqaravi kece e ra ena vukei ira na itabagone ena nodra vulica na ivakarau me mana kina na nodra veiqaravi ena Lotu. Ni vakamuri na veivakauqeti ni Yalo Tabu, digitaka ga na kena o kila ni na ganita na nomu kalasi:

Tauyavutaka e dua na ituvatuva ni taro era rawa ni vakasaqara na itabagone me ra vakasaqara na kena isau ena vosa nei Peresitedi Dieter F. Uchtdorf “O Koya Sa Turaga vei Kemudou,” me vaka “Na cava na veikacivi bibi duadua ena Lotu?” Taroga yadudua na vosa vei ira na itabagone, qai raica ocei vei ira ena imatai me kunea na isaunitaro ena vosa oqo. Tarogi ira na itabagone me ra vaqara na isaunitaro, ka taura na gauna me veivosakitaki na cava e vakavulica vei keda me baleta na veiqaravi ena Lotu.
Cakava e rua na iyatu ena dua na ivolakabi ka vola “Alama” kei “Amuleki” ena vava ni volavola (E rawa talega ni o marautaka mo droinitaki Alama kei Amuleki ena droini lalai rawarawa.) Sureti ira na lewe ni kalasi me ra vaqaqara ena vosa nei Peresitedi Dieter F. Uchtdorf’ “Vuli mai vei Alama kei Amuleki,” ka vaqara na sala eso erau veiqaravi kina vakataki rau o Alama kei Amuleki. Ni kunea e dua na lewe ni kalasi e dua na ka, sureti koya me vola ena ivolakabi. Ena rawa vakacava vei ira na itabagone me ra muria nodrau ivakaraitaki o Alama kei Amuleki? Veivosakitaka vakalasi na isaunitaro.
Kerei ira na itabagone me ra wasea na italanoa mai na ivolanikalou ka soli kina vua e dua, na ilesilesi dredre qai ciqoma na veivuke ni Turaga (me baleta eso na vakasama, raica na ivolanikalou e vakaturi tu ena ituvatuva oqo). Kevaka e rawa, vukei ira me ra vakaraica na iyaloyalo ni italanoa eso oqo mai iVola ni iYaloyalo Vakosipeli. Na cava e vakauqeti ira me baleta na italanoa oqo? Na cava era vulica mai na italanoa oqo me baleta na kena qaravi vakavinaka na ilesilesi?
Sureti ira na itabagone me ra wilika na vosa nei Elder Carl B. Cook “Veiqaravi,” ka vakaraica eso na vosacavuti era rawa ni wasea me baleta na veiqaravi ena yalodina ena veikacivi ena Lotu. Kerei ira na lewe ni kalasi me ra wasea na vosa era sa cavuta mai, kei na vuna era raica ni vakaibalebale kina na ivakasala oqo. Na sala cava era na vakayagataka kina na veika era sa vulica ena nodra ilesilesi ena gauna oqo kei na veisiga ni mataka?
Vola ena vava ni volavola na ulutaga e rua iVakasala kei na Yalayala. Sureti ira na itabagone me ra vakasaqaqara ena Vunau kei na Veiyalayalati 25 ka raica na ivakasala kei na yalayala a solia na Turaga vei Emma Smith me salavata kei na nona ilesilesi. Kerei ira mera vola ena vava ni volavola na veika era sa raica rawa. Ena yaga beka vakacava na ivakasala kei na veiyalayala oqo ki na ilesilesi e dau soli vei ira na itabagone? Kerei ira na itabagone era sa ciqoma oti e dua na ilesilesi me ra wasea na veika era nanuma me baleta na ivakasala kei na yalayala a soli vei ira ena gauna era vakatikori kina. E rawa talega ni o wasea na veika o nanuma rawa. Sa vakayacori beka vakacava na veiparofisai oqori?
Wilika vakalasi na Vunau kei na Veiyalayalati 107:99. Sureti ira na itabagone me ra vakatayaloyalotaka ni soli vei ira e dua na ilesilesi bibi ena tabanalevu se iteki, ka kerei ira me ra wasea se ilesilesi cava era vakasamataka tiko (raica na “iVolakabi ni Veikacivi” ena tabana 159–64 ena iVoladusidusi 2: Veiliutaki ena Lotu). Na cava era na cakava me ra kila kina na cava na nodra itavi ena nodra ilesilesi? (Me kena ivakaraitaki, e rawa ni vaqaqara ena ivolanikalou, iVoladusidusi 2, na Leadership Training Library ena LDS.org, se dua e veiqaravi tiko ena gauna qo ena ilesilesi vata oya). Kerei ira na itabagone me ra taura eso na gauna ena kalasi se ena loma ni macawa lako mai mera vulica me baleta na ilesilesi ka qai wasea na veika era sa vulica ena kalasi ni macawa mai qo.

Kerei ira na itabagone me ra wasea na veika era sa vulica nikua. Na cava era sa bau vakila se vakanananu kina? Era sa kila beka na sala me mana kina na nodra veiqaravi ena Lotu? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Maqosa eso ni vuli ena kosipeli

Kunea na ivakavuvuli. Na imatai ni itaviqaravi ena iwasewase oqo era sureti kina na itabagone me ra vakasaqaqara ena ivolanikalou, ka vakasaqara na ivakavuvuli (se na dina tawamudu) me baleta na veiqaravi ena matanitu ni Kalou. Vakayaloqaqataki ira e ra tarogi ira ena taro eso vakaoqo “Na ivakavuvuli cava a vulica mai na itukutuku oqo? Era duidui beka mai na veika au a nanuma ka vulica e liu? Era vakauqeti au beka meu veisautaka e dua na ka ena noqu bula?” Vakayaloqaqataki ira na itabagone me ra vakayagataka na mataqali taro vata oqo ena nodra vuli ivolanikalou yadua.

Veisureti me caka

Tarogi ira na itabagone, se cava era sa vakauqeti kina me ra cakava baleta na veika era sa vulica nikua. Vakayaloqaqataki ira mera cakava na ka era sa vakila. Vakasaqara na Yalotabu ena nomu vakasamataka ena masumasu na veika e rawa mo na cakava.