Ena vagumatuataki vakacava na noqu vulica na kosipeli mai na noqu maroroya na ivakaro?

Ena gadrevi na veivakauqeti ni Yalo Tabu ni da vulica na kosipeli. Sa rawa ki na Yalo Tabu me veivakararamataki meda kila vakavinaka ka vakadinadinataka na dina ni kosipeli. Ni gadrevi meda kililiki kaya na Nona veivakauqeti, sa dodonu meda talairawarawa ki na ivakaro. Me vaka ni da sa talairawarawa ki na ivakavuvuli eda vulica, eda sa vakarautaki keda meda ciqoma na ikuri ni dina mai vua na Turaga.

Mo vakarautaki iko vakayalo

Sa vukei iko vakacava na nomu maroroya tiko na ivakaro ni ko gonevuli tiko ni kosipeli? Na veika cava o sa sotava ni ko talairawarawa o via wasea vei ira na itabagone ena nomu kalasi?

O na vukei ira vakacava na itabagone mera raica na isema ni talairawarawa kei na veivakauqeti ni Yalotabu?

Vulica ena masumasu na ivolanikalou kei na ivurevure eso oqo. Na cava era na vukei kina na itabagone mera kila vakavinaka ni maroroi na ivakaro ena vakayaco-ka ki na nodra gumatuataka na vulica na kosipeli?

Taniela 1(E ratou a vakalougatataki o Taniela kei iratou na nona itokani ena vuku kei na kila-ka ni ratou a talairawarawa); raica talega na vidio “God Gave Them Knowledge”

Joni 7:17 (Kevaka eda na cakava na loma ni Kalou, eda na kila na ivunau)

2 Nifai 28:30; V&V 42:61; 50:24 (Kevaka eda na vakarorogo vua na Turaga, eda na vakararamataki ka kila-ka vakalevu sara)

V&V 76:5–10 (Na Turaga ena vakalagilagi ira sa dau qaravi Koya)

Thomas S. Monson, “Na Vakavakarau ena Kauta Mai na Veivakalougatataki,” Ensign se Liaona, Me 2013

Henry B. Eyring, “ E Dua na iVakadinadina Bula,” Ensign se Liaona Me 2011, 125–28

Richard G. Scott, “ Na Sala Mo Taura Kina na iVakatakila kei na Veivakauqeti ni Nomu Bula,”Ensign se Liaona, Me 2012, 45–47

Veivakavulici ena iVakarau ni iVakabula

E wasea na iVakabula vei ira na Nona tisaipeli na italanoa rawarawa, vosa vakatautauvata, kei na ivakaraitaki ni veika e sotavi dina ka vakaibalebale vei iratou. Na italanoa cava mai na ivolanikalou, mai na itukutuku makawa ni Lotu, se mai na nomu bula o na rawa ni wasea vei ira na itabagone me vakaraitaka ni sa rawa ni vukei ira na talairawarawa ki na ivakaro me vakalevutaki kina na nodra kila vakavinaka na kosipeli?

Semata vata

Raica eso tale na vakasama ni vuli kei na veivakavulici.

Ena imatai ni vica na miniti ni kalasi yadua, vukei ira na itabagone mera semasemata vata na veika era sa vulica tiko ena veikalasi (me vaka na vuli yadudua, semineri, so tale na kalasi ni Lotu se na ka era sotava kei ira na nodra itokani). Ena rawa vakacava mo vukei ira mera raica na kena yaga na kosipeli ena nodra bula e veisiga? Na vakasama eso ka koto oqo e ra ena rawa ni veivuke:

• Tarogi ira na itabagone ke tiko e dua na nodra taro se vakamacala baleta na veika era sa vulica tiko ena nodra kalasi. Sureti ira mera wasea na veika era sa dui sotava se vakasama era sa ciqoma mai na veika era sa vulica.

• Vola ena vava, “Ena vagumatuataki vakacava na noqu vulica na kosipeli mai na noqu talairawarawa?” Solia e dua na gauna vei ira na itabagone mera vakasamataka vakatitobu na taro oqo, ka qai kerei ira mera wasea na nodra nanuma. Vakayaloqaqataki ira mera vakasamataka tikoga na taro oqo ena gauna taucoko ni lesoni.

Vulica vata

Raica eso tale na vakasama ni vuli kei na veivakavulici.

Na itaviqaravi yadua e ra ena vukei ira na itabagone mera kila vakavinaka ni nodra talairawarawa ki na ivakaro ena vakayaco-ka ki na nodra gugumatua ni vulica na kosipeli. Mai na veivakauqeti ni Yalotabu, digitaka e dua se sivia ka na ganita vinaka na nomu kalasi:

• Solia vei ira na lewe ni kalasi na ilavelave ni imatai ni 11 na parakaravu ena vosa nei Peresitedi Thomas S. Monson “Obedience Brings Blessings,” ka sureti ira me ra vola e vica na iyatuvosa me umani kece kina na uto ni itukutuku nei Peresitedi Monson. Ni ra wasea na lewe ni kalasi na nodra iyatuvosa, vakayaloqaqataki ira me ra wasea na vuna era nanuma kina ni sa ka bibi sara vei ira na itabagone nikua na itukutuku oqo.

• Me wilika na kalasi, na Taniela 1 se sarava na vidio “God Gave Them Knowledge.” E ratou a vakaraitaka vakacava na nodratou talairawarawa o Taniela kei iratou na nona itokani? E ratou a vakalougatataki vakacava? Na veika cava era a sotava na itabagone e via tautauvata kei na kena a yaco vei Taniela? Sureti ira yadua na itabagone mera wilika e dua na tamata ena ivolanikalou ni a vakalougatataki ena vuku kei na kila-ka ena vuku ni nona talairawarawa (me vakataki Nifai ena 1 Nifai 4 se o Josefa Simici ena Josefa Simici—Ai Tukutuku 1:11–17). Kerei ira mera vola vakalekaleka na veika era sa wilika ka vakavulica ki na vo ni kalasi me baleta na tamata era sa digitaka sa vakalougatataki ena kila-ka ena vuku ga ni talairawarawa.

• Sureti ira yadua na itabagone mera digitaka e dua vei ira na tikini ivolanikalou oqo: Joni 7:17; 2 Nifai 28:30; V&V 50:24. Kerei ira na itabagone mera wilika na itukutuku ka vakasamataka vakatitobu na veika era sa vakavulici kina baleta na talairawarawa kei na vulici ni kosipeli. Ka sureti ira mera raica e dua ena loma ni kalasi e digitaka e dua tani tale na iyaloyalo ka wasea vakaiira na veika era sa vulica.

• Solia vei ira na itabagone e dua na cina livaliva ca, ka sureti ira mera vakadikeva me laurai na vuna e sega tiko kina ni waqa. Wasea na itukutuku oqo mai na vosa nei Elder Richard G. Scott “ How to Obtain Revelation and Inspiration for Your Personal Life”: “Sa gadrevi sara vua e dua me savasava na nona vakasama kei na yagona ka rarama na nona nanuma me rawa ni vakauqeti koya na Turaga. Vua e dua e talairawarawa ki na Nona ivakaro sa nuitaki koya tiko na Turaga. Sa na yaco vua na tamata oqo na Nona veivakauqeti me kila na ka me cakava, ni gadrevi vakakina, kei na kaukauwa vakalou me na cakava sara kina. … Na noda talairawarawa ena vakadeitaki kina ni sa gadrevi, eda na rawata na kaukauwa vakalou meda vakayacora rawa e dua na inaki vakauqeti vakayalo” (draunipepa 47). E vakatakarakarataka vakacava na cina livaliva o ya na ivakavuvuli e vakavulica o Elder Scott ena itukutuku oqo? Sureti ira na itabagone mera vakasamataka vakatitobu na veika mera cakava mera “nuitaki kina mai vua na Turaga” ka ciqoma na ivakatakila mai Vua. Kerea e vica vei ira me ra wasea na nodra nanuma.

• Sureti ira na itabagone me ra wilika vakatikina na vosa nei Peresitedi Henry B. Eyring “ A Living Testimony,” mai na parakaravu e tekivu tiko ena “Ia sa mai bucini e dua na sorenikau ni vakabauta…” ki na parakaravu e tekivu tiko ena “Sa qai yaco mai meu vakila na nodra reki….” Ena sala cava a vaqaqacotaki kina na ivakadinadina nei Peresitedi Eyring mai na nona talairawarawa? Na veika cava sara era rawa ni cakava na itabagone me ra muria kina na ivakaraitaki nei Peresitedi Eyring?

Kerei ira na itabagone mera wasea na veika era sa vulica nikua. Era sa kila vakavinaka tiko beka ni nodra maroroya na ivakaro ena vakayaco-ka me gumatua kina na nodra vulica na kosipeli? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu cake na gauna ena ulutaga oqo?

Maqosa eso ni vuli ena kosipeli

Vakamacalataki Vakalekaleka. Ena imatai ni itaviqaravi ena iwasewase oqo, era sa sureti kina na itabagone mera vola vakalekaleka na italanoa mai na ivolanikalou era sa wilika. Vakayaloqaqataki ira na itabagone mera cakava talega oqo ena nodra dui vulica na ivolanikalou. Sa rawa me ra vola na veika era sa vakasamataka, na vunau e vakavulici kina, na veika a yaco, o ira era a vakaitavi kina, kei na so tale. Sa rawa mera tarogi ira vakaiira, “Na cava e gadreva tiko na Turaga me vakamatatataka kei na vuna? E tiko beka ena veitikina oqo e dua na ka sa baleti au sara tikoga?”

Vidio: “Using Visual Aids”

Sarava eso tale

Veisureti me caka

Raica eso tale na vakasama ni vuli kei na veivakavulici.

Kerea e vica na itabagone mera vakamacalataka vakalekaleka na veika era sa vulica nikua baleta na semati ni maroroi ni ivakaro kei na vulici ni kosipeli. Sureti ira mera raica na veika era rawa ni cakava se kakua ni cakava ka na rawa ni vukei ira mera vakalevutaka na nodra gumatua me ra vakavulici mai vua na Yalo Tabu. Vakayaloqaqataki ira mera vola na nodra nanuma ena nodra ivolaniveisiga.